22 de Febreru de 2026
Tornamos a Sobrescobiu y más en concretu a Soto, porque quería enseñar a los collacios del GM Xuan de la Borrina les mines de Pandanes o Llaímu , enantes de que les acondicionaren pa crear un "percorríu senderista". El mayor de mis mieos, yera que-y quitasen esi toque tan especial y xabaz col que les conocimos, poro pesie a facer esta mesma temporada un rutón al Cuetu Cuchu, nun duldamos en tornar a esti conceyín tan montañeru.
Como siempre quedamos p'almorzar nel Balcón de Redes en Rusecu y continuamos hasta Soto, onde cambiámonos y preparámonos a caleyar so les 10 de la mañana, nun parando namás que pa tomar aliendu y quitar dalguna capa de ropa per tol camín d'Agüeria, adelantando a munchos senderistes, hasta arribar a la Vega, onde entamaría la nuesa ruta en realidá.
Nun tenemos munchu que contar, ya que si na ruta al Retriñón per Pandanes, prestarános pola vida, pesie a lo xabaz del senderu, esta vegada, alcontramos el senderu recién desbrozáu, lo que permite esfrutar del caleyar penriba l'escobiu l'Alba, con tola tranquilidá mirando onde pisamos, descubriendo eses armadures increyibles y en resume, un trabayu perfeutu de desbroce ensín asegurar nin retocar l'antiguu camín.
Asina pues, continuamos camín, viendo dende bien abaxo la Casa Los Obreros a lo lloñe, cosa que nun veíemos n'anterior visita, aportando a ella, pudiendo echar un vistazu nel interior, agüeyando lo pequeño del abellugu onde dormíen los trabayaores y camentando la dureza del trabayu pa sacar el fierru d'esta fastera xabaz del monte Llaímu.
Los collacios van pasándolo en grande, tanto los que lo conocíemos, Carlos y yo, polo guapo que lo dexaron pa caleyar, como'l resto que va alloriando col ablucante camín, sobretou cuando salimos hacia la cabaña del Vixilante y los cargaderos de material hacia'l tabayón de la Riega La Escombrera, onde pasamos pelos pasos más "espuestos" sobre armadures mineres.
Diremos atopando tramu a tramu, delles bocamines, sobretou la que saca l'agua a la Escombrera, pero tamién les antigües na parte alta, onde color del fierru domina los parés, el suelu y hasta los regatos que baxen hacia la riega cimera, continuando la nuesa ascensión pel tramu d'armadures n'envueltes que van sacanos pela viesca hacia la Casa La Mina, na que llevamos otra prestosa sorpresa.
Vemos como la Casa La Mina, fue esbarrumbada en parte, dexando les muries principales, retirando tol material peligrosu, dexando un espaciu, qu'espero valga de descansu pa los montañeros y visitantes, llueu del ascensu de 600 m de desnivel qu'algamamos facer en 2 hores y cuartu. La verdá ye que nun xubimos hasta'l mayáu de Pandanes, pero lo que vimos en cuanto al trabayu d'acondicionamientu del senderu, paeciónos una maraviya y pa cualesquier "montañeru capacitáu", ye una ayalga industrial, ñatural y deportiva a esfrutar.
Con un gran tastu pol llabor fechu, a la escontra que na ruta al Retriñón na que pasamos per Pandanes, esta vegada vamos descender hacia'l valle d'Agues, pela pista minera, col primer tramu con guapes vistes na parte alta, hacia tola xerra'l Crespón y el valle del Alba, pa siguir pel tramu inferior nel descensu, travesando una guapa viesca a la vera la riega Los Negros, que baxa pel monte Llaímu y del picu Moroma.
Llueu de cruciar l'amestaura les riegues de los Negros y Agues, xubiremos per una vallina pindia, col envís de nun retrodecer pel camín, hasta entrar pembaxo a los mayaos d'Argamosielles, onde ya garraremos bon camín, pel que diremos ganando altor selemente pel valle d'Agues, hasta'l ñacimientu de la riega, onde abandonaremos la fondigonada del valle, pa salir pela faldera hacia un senderu superior que vien dende La Bauga hasta'l colláu Pandefresnu.
Nesti tramu perderemos un pocu el senderu más claru y travesaremos monte baxo, hasta garrar esti senderu bien claru que vien de la Bauga, que llevarános cómodamente hasta Pandefresnu, onde ya entraremos na faldera del picu La Frayá, que nun dexará garrar aliendu, xubiendo per una pindia vallina, onde diremos ganando les vistes hacia la Cabeza L'Arcu y la cuerda del Retriñón, que vien dende los Arrúos.
Arribamos a la parte alta xusto al altor de la mui antigua mayada la Frayá, onde malpenes atopamos los restos de dos cabañes y tocará ñavegar nun tarrén calizu de fayes, peña y fueya percaóticu, teniendo casi qu'aldovinar cual morrillu ye'l puntu más altu d'esti picu al que-y nome le vien al guante, porque ye un caos de frayaures, h.oos, crestones calizos... una llocura de monte de 1393 m.
Comentar que pa facer 200 m de desnivel tardamos 40 minutos, nun ye lo más normal, pa dar xacíu a lo abegosa de la parte final d'esti monte, anque toca dicir que ye'l primer día del añu de calor y sofrímoslu un pelín. Sicasí, con tol grupu percontentu pola ascensión, toca xintar cola calma y dir camentando cuales sedrán los siguientes pasos a tomar, ya qu'anque la primer parte de la ruta ficiéramosla aína, l'ascensión a la Frayá, llevónos más tiempu del planiáu, siendo ya les 3 de la tarde d'un domingu.
La mió idega yera crestiar hasta la Peña Riegos pa descender pegaos a la Peña Argayos pel guapa vallina Les Endroses, pero namái que punxímonos a descender garramos la vallina equivocada de la Frayá, que nun fizo otra cosa que sacanos perbaxos pel Pandu Troncos y la idega de tener que recuperar desnivel, mató mentalmente a munchos onde ya taben muertos físicamente otros, asina que decidimos descender per un guapu senderu encaxonáu hacia la Bauga, onde garramos pista cómoda, que ya conociéramos del descensu del Retriñón dende Pandefresnu.
Esfrutaremos ya con calma de la pista, pasando peles cabañes de la Bauga, per guapes, asina como de Praullongu, dando preste a kilómetros pocu recomendaos pa les nueses plantes de los pies tocaes polos calcetos ivernales, teniendo claro ya, que toca pasar al mou primaveral na ropa de monte. Ensin más, aportamos a la puente Retorturiu onde empatamos col camín d'Agüeria (senda L'Alba) que percorremos a bon ritmu, hasta la puente la Precia.
Ellí decidimos tornar hasta Soto, pel camín de la Precia que nun conocía y anque tien un pocu más d'ascensu paecióme guapu pa escapar de la parte final formigonada hasta Soto. La verdá ye que llevámonos comiendo la senda L'Alba nos últimos tiempos y tamos un pocu fartucos, poro camiento que tardaremos en tornar lo menos hasta la temporada que vien, pa conocer quiciás la vallina Les Endroses y ascender a la peña Riegos, quedando una ruta perguapa a mi entender.
Ensin más, con 7 hores 45 minutos de ruta, aportábemos a Soto, contentos pol día guapu de monte y pola ruta de 21,5 km superando un desnivel acumuláu de +/- 1210 m, pero sobretou por esfrutar de les mines de Pandanes o Llaímu, recién desbrozaes qu'espero tengan ésitu montañeru pa caltener tola infrastructura minera llimpia pa los montañeros.
No hay comentarios:
Publicar un comentario