13 d'Avientu de 2025
Track: Soto (Sobrescobiu) - L'Alba - Valle Penocha - Cuchu - Forcá - Valle Texera
Continuamos temporada ivernal col GM Xuan de la Borrina, averándonos esta vegada al conceyu de Sobrescobiu, na contorna del Parque de Redes, onde tantísimes rutes ficimos y carrreres pel monte tamién y ye qu'antaño yera una de les nueses fasteres preferíes, poro colos años, fuimos conociendo munchos de los montes y llugares más nomaos, pero siempre somos a restolar dalgo que conocer, asina que tábemos de vuelta.
Nesti casu, al igual que na última visita, na qu'ascendiéremos al Retriñón peles mines de Pandanes, quedamos nel pueblu coyanu de Soto, onde nel so afayaizu aparcaderu coincidimos con munchos montañeros y corredores, preparando caún los sos preseos, nun día bien frescu, nel que teníemos ganes de caleyar pa entrar en calor.
Dellos minutos enantes de les 9 y media, somos a entamar a patiar y al igual que n'aquella ocasión, tenemos que xintar con patatines tol camín d'Agueria, primer parte de la sienda l'Alba hasta la Vega, pero hai que dicir que'l desxelu y les lluvies, faen que seya una maraviya caminar al llau del rigu l'Alba o Llaímu, ya que los tabayones son un continuu cola compaña del verdor del mugor nes peñes, faciendo tol cuadru d'humedá iverniega.
Aportaremos a la Vega onde entraremos na segunda parte de la sienda L'Alba o camín de Llaímu, onde l'agua desplómase per tolos llaos y continuamos ensin quitar nin media capa de ropa, hacia la Cruz de los Ríos onde vemos como sol alluma les cumales de la xerra La Magrera, destacando'l Cuetu Santibanes o Cuchu, que nun ye otru que'l nuesu oxetivu d'esta ruta.
Dicir que los ritmos hasta la Cruz de los Ríos fueron de llocura, camentando lo tarde que salimos, ficimos los 7,5 km en menos d'hora y media, parando a echar un tragu d'agua xelada y de secute tábemos ya intentando travesar la riega Penoba, alcontrando un pasín pente les peñes xugándonos una moyadura, hasta salir hacia los Pandos de Penoba, travesando una pedrera hacia'l NO hasta dar con rastru de senderu y colos primeros rayinos de sol del día.
Travesaremos tolos Pandos, cola suerte de pasar pisando tolos felechos amagostaos, ya que nun me quiero imaxinar que taba esto a finales del branu y seronda y pali, pali, ganaremos altor, hasta atopar los restos de la mayada Cueto, puntu nel que paramos a quitar dalgo de ropa, enantes de facer una pequeña baxadina hacia la riega Penoba, cursu d'agua que va sirvinos d'orientación ya que vamos siguila valle alantre, hacia la cume del Cuchu.
Baxaremos entós hacia la riega, atopando a cachinos tramos de sienda pisada, cruciando, según veíemos meyor el tarrén, los distintos regatos que percorren el valle Penoba, unes vegaes a la manzorga y otres a la mandrecha, pero siempre esfrutando d'un fayéu máxicu colos collores del tardíu, el verdor del mugor y tol agua de los regueros, sintiéndonos pelín afortunaos de patiar llugares perpocu transitaos nestos tiempos.
Tirando d'orientación ya que nun teníemos track dengún, continuamos ascendiendo, dexando nun puntu, ya pa siempres, la riega cimera del Penoba a la nuesa mandrecha, ya que vemos como'l tarrén va poníendose más pindio y por tanto la riega entama a embarrancar y pa ello, garramos de referencia un xerru calizu, El Mosquil, que perpasaremos pela manzorga, pa coronalu al traviés d'un canalizu pindiu, onde alcontramos restos de muria humana.
Aparte de los restos, tamién atopamos un senderu hacia'l centru de les foces de Llaímu, pero como nun ye la nuesa direición, nós siguimos el cursu del valle Penoba, pero siempre pela faza esquierda, que va dir llevándonos primeru pente'l fayéu y más tarde per monte baxo, nuna de les ascensiones más llargas y dures que recuerdo, siempre a la gueta de tramos de senderín y zones llimpies p'avanzar, pero siempre tamién, con un desnivel bastante fuerte que nos fué mermando paso a paso.
Nos últimos tiempos, tan sólo na ruta a la Tesa pel monte Tixirúa viera llegar al grupu tan cansáu, al cumal, pero ye que la hora y media de bregada continua, col caberu tramu lluchando cola urcia baxa y hasta teniendo qu'abrir buelga per planches de ñeve, fízose llarguísimu y los 1646 m del Cuetu Cuchu paez que nun llegaben enxamás.
Sicasí, los altos ritmos iniciales tamién nos fueron comiendo les fuercies, les 4 hores y 45 minutos y los 1200 m de desnivel direutu, pa encumar esti Cuetu dicen a les clares de lo que tamos falando. Nin que dicir queda, que tamos nos díes más curtios del añu, asina que vamos descansar 5 minutos pa xintar el bocadillu y picar frutos secos, esfrutar de les increyibles vistes a tolos montes ayeranos y del parque y nun mos queda otra que continuar patiando pela xerra Magrera.
Baxaremos pues, pela arista Oeste hacia'l colláu Bermeyu, pero onde ascendiera dende Yanos al Cuchu va dellos años, siguiendo al picu homónimu de 1544 m pa continuar al colláu Les Abudules, teniendo que navegar un pocu p'ascender al siguiente cumal (1535) y ya descender tamién bregando pente les urcies, a la colladiella La Forcá, onde tenemos un breve alderique, de si xubir al picu La Forcá o rodealu pela faldera drecha.
Nesti casu, como cuesta casi lo mesmu, al final ascendemos toos a la Forcá (1556 m) perguapu picu que ya conocía d'otra circular increyible dende Llaviana (Raigusu - Forcá - Peña Mea) y nun podemos más que parar unos segundos a mirar toles vistes y tamién pa l'ascensión que ficiéramos al Cuchu y ye que vemos el Xerru Mosquil no baxo'l valle y alloriamos colo llargo de la xubida hasta'l Cuchu, normal que temos cansaos.
Pero como siempre, esti grupu tira p'alantre y ye que nos últimos años tamos garrando un nivel guapo y podemos siguir dando zapatu con xeitu, asina que baxamos de la Forcá y continuamos hacia la Colladina, pasando antes pela guapa y antigua braña de Casares, coles sos costrucciones de llábanes calices, pa continuar hasta la Llomba, caberu cumal de la xerra, que marcará'l final de les ascensiones y dende la qu'entamaremos al fin la naguada baxada hacia la senda L'Alba.
Pa ellos, escoyí un valle que nun conociera como ye'l de Texera, baxando cenciello dende la Llomba (1459 m) hacia'l colláu Rosellón, siempre col desafiante Corbellusu presente y tola xerra'l Crespón col Cogullu y Guanalón garrando a la fin, una seliquina y guapa pista, que va dir llevándonos al traviés de praos y cabañes como los de Texera na parte alta y Valdecéu no baxo'l valle.
Son pasaes les 5 la tarde, asina que vamos cola cuenta atrás, teniendo dos opciones en Valdecéu, pudiendo siguir la pista rodada hasta La Vega, a la entrada la foz del Alba o garrando un camín armáu que diba sacanos más alantre escoyendo esta opción al ser más afayaiza. Asina lo ficimos, aportando a la Peña'l Gatu, onde atopamos un megacierre que travesamos como podemos y atopamos el por qué del cierre, col camín armáu esbarrumbáu.
Les opciones sedríen dar vuelta atrás hasta Valdecéu y baxar a la Vega o buscar opciones, ya que vemos un canalizu yerbosu al otru llau del corte con posible baxada, asina que damos vuelta y vemos rastros de pisáu pel crestón calizu, asina que tiro p'arriba pela Peña'l Gatu y efectivamente, salimos en travesía alta a la pindia vallina, pela que baxamos con cuidáu al tar moyada, dando al guapu camín armáu de nuevu.
Ya de vuelta nel camín y relaxaos por nun tener que dar tanta vueltona cola nueche enriba, continuamos el guapu camín en sele baxada y aportamos al camín d'Aguería (senda L'Alba) al altor del Retorturiu, quitándonos bastante metros de pista pa los nuesos cansaos pies, lo que nun quita que nesi puntu quedaren tovía dalgo más de 3 kilómetros y mediu hasta l'aparcaderu de Soto.
Sicasí, dábanos igual, ya que la ruta taba completada y pesie al cansanciu que llevábemos volvimos a garrar ritmu ensin xacíu, arribando al aparcaderu en 9 hores clavaes de ruta, llueu de percorrer 25 km y superar un desnivel acumuláu de +/- 1450 m y sin tener que poner el frontal de milagru. El tardéu per Soto y la siguiente cena per Rusecu taba más que xostificada.
La prósima más...y difícilmente meyor
No hay comentarios:
Publicar un comentario