Los Tornos (Llaviana) - La Forcá - Peña Mea

5 de Xineru de 2013

Track: Los Tornos (Llaviana) - La Forcá - Peña Mea

Casi taben finando los díes de navidaes y nun tuviera inda la oportunidá de meteme una xatada, nesos díes sueltos de vacas que quedaben por esfrutar. A la fín, el día anterior a los reis, pusímonos a ello y nesta ocasión los nuesos pasos diben llevanos a conocer, les 4 cotes más altes del guapu conceyu de Llaviana.

Los implicaos na ruta? Pues como siempre Pangua y yo, pero esta vegada contamos col enfotu d'un llavianés, César y col tiu de Pangua, Miguel, que va acampañanos tolo que pueda, ya que tien que llevar a les fíes a la cabalgata pela tarde.

Salimos de Xixón pela minera, pa garrar como siempre'l corredor del Nalón, hasta La Pola Llaviana, onde xuntámonos toos, alcontrando de milagru una cafetería abierta onde poder almorzar daqué y tomar un cafetín que nos faiga espertar.

Ablucante alborecer dende la Pumará

Nuna nueche zarrada inda, vamos salir de Llaviana por L'Otero, travesando llueu la puente la Chalana, garrando la As-252, pasando por Entrialgo, La Correoria y en Villoria, salímonos pela LV-7 que tien de llevanos d'envuelta n'envuelta, hasta un de les meyores alborecíes que nunca viera, na collá pente los pueblos de Campumayáu y la Pumará.

Nun pude facer otra cosa, que baxame del coche y sacar una semeya al prietu relieve de la xerra'l Crespón, col Guanalón, Cogullu y Corbellosu. Magar d'ella, baxaremos col coche hasta'l guapín pueblu de Los Tornos, onde atoparemos un bon aparcaderu, con vistes al nuesu destín, les Foces del Raigusu.

Semeya de grupu nos Tornos (635 ms)

Son les 9 la mañana, cuando tamos preparaos pa salir a caleyar, ya ye de día y pel momentu abrigámonos un pelín, ya que tócanos baxar desnivel hacia les foces del Raigusu. Anque realmente, d'esti conxuntu de foces formaes pel ríu Raigusu y los sos afluentes, namái que vamos percorrer la de Cobellayu y Cebellales.

Dexando'l pueblu de los Tornos atrás mientres baxamos a les foces del Raigusu

Pa conoceles, baxamos per pista, poles cabañes de Montardo, hasta los 521 ms, puntu más baxo de la ruta, en plena foz de Cobellayu, formada peles parés de la Peña'l Fanu a la manzorga el picu Les Aguiles a la mandrecha.

Siguimos empozaos nes Foces del Raigusu alantre demientres el sol calez los cumales

El camín ye ampliu y bien guapu de caleyar ya inclusu facer en bicicleta, poro, garraremos un ritmu altu, adelantando pocu enantes de les cases d'Ejesa a miembros de la Fempa, pa pocu dempués alcontranos un bon garrapiellu de mastines de toles edaes, que faen el so trabayu a base de lladríos.

Facemos el tramu más pindiu de pista hacia les cabañes del Raigusu onde ábrense les vistes

Siguimos alantre, ascendiendo poquín a pocu desnivel, hasta que'l ríu Raigusu paez desapaecer en varies riegues que baxen dende les falderes del Picu La Forcá. Ehi, entamará una pindia ascensión hacia les cases del Raigusu primeru y dempués al picu Corgallones, qu'amuésanos una increyible vista del Picu Corbellosu.

Ascendemos pelos Collaos cola ablucante visión del Corbellosu

Nesti puntu, casi nun soi a creeme como ficimos aquella ascensión, viendo lo vertical d'esti cumal y con tantísima ñeve. En fin, como tamos a otra cosa, siguimos camín hacia Los Collaos (1140 ms), onde vamos abandonar la cómoda pista, que llevamos dende los Tornos, y siguiremos una sienda que faldiará el Picu La Forcá hacia l'oriente.

Faldiamos pembaxo de la Forcá hacia la Colladina

Hai qu'andar con güeyu, porque esisten dos siendes paraleles y defechu, nós tendremos que garrar la que va penriba. La mio rodiella ,sufrió les consecuencies de garrar la d'abaxo, y queriendo tornar al bon camín, resbarié y desfícela escontra una peña.

El dolor durante'l restu de la ruta, diba tar aseguráu y nun tenía mui claro siquiera si nun tendría que retirame. Aún así, continuamos el faldéu de la Forcá, pasando penriba les riegues de Sogrande y Cañaínes, les cuales xúntense n'ablucante foz de Focilleru, formada pel Corbellosu y el picu Lacafresna y aportaremos al nuesu primer destín: La colladina.

Perguapu cumal la Colladina (1476 ms) con unes vistes de lo meyor

La colladina de 1462 ms, ye un increyible mirador de los cumales casinos y ponguetos, así como de los propios Picos más al fondu. Esti pequeñu colláu ta pente'l picu Lagobeta y el picu La Colladina, al cual ascenderemos en menos de dos minutinos dende'l propiu colláu y ye un llugar perguapu pa un posible vivac inclusu, col monte Llaímu xusto embaxo.

Crestiamos hacia'l picu La Forcá pasando pela braña Los Casares

Dexamos los 1476 ms de la Colladina, pa empobinanos per un crestéu ampliu y perguapu hacia la Forcá, destacando muncho'l nuesu pasu pela vieya braña de Casares, con corros formaos per llábanes enormes. Nun quédase atrás, de guapo, l'echar un vistazu al Picu Retriñón, col monte Llaímu na parte baxa, demientres averámonos aína al cumal calizu de la Forcá.

Personalmente, nesti tramu, nun voi nada cómodu y tengo hasta un fonderu esmolecimientu pela rodiella, decidiendo xubir a la Forcá y baxar pa descansar un ratín ya intentar curame lo meyor posible la fería y protexela.

Ascendemos col Monte Llaímu a la nuesos pies a la Forcá

L'ascensión a la Forcá, pue facese de dos formes, dende la propia forcá, trepando un pelín hasta'l cumal pela pequeña arista, con un pocu de patiu pa los dos llaos o dándo-y la vuelta pol sur, que xubiríase andando dafechu.

Cumal de la Forcá (1549 ms)

Nós, ficimos la trepada pa xubir hasta los 1549 ms del picu, faciendo unes guapes semeyes pal macizu d'Ubina y decidimos baxar pela ruta fácil, bordiando la cumera'l picu, hasta la forcá de nuevu, onde asomámonos hacia los collaos, pa empobinar a Miguel, lo meyor posible hacia la pista naguando qu'aportase a tiempu a los reises.

Darréu, tocaba curiar la fostia que tenía la rodiella y menos mal, qu'entre los tres collacios, pude iguar un pelín l'asuntu, ya que dexéme'l botiquín del GM Xuan de la Borrina, na otra mochila. Gracies a César qu'apurrióme agua oxixenao, gases y esparadrapu; Miguel una rodillera y Pangua una pirula d'ibuprofenu, que pude siguir, ya que na semeya paez menos, pero'l furacu yera grande y el dolor internu pior.

Un descansín y siguimos l'averamientu hacia les Peñes Negres

Despedímonos de Miguel, pa siguir agora nel enllaz más llargu entre cota y cota de Llaviana que tenemos, ya que serán per delantre más de 3 kms hasta les Peñes Negres, penriba de tol crestéu y llevamos casi dalgo más de 3 hores y media y 10 kms de percorríu.

Ponémonos a ello, baxando de la forcá, per un tarrén de piedra suelto, y en pocu tiempu tamos nel Altu la  Pandiel.la, onde agradecemos el pisar yerba, que faínos avanzar rápidu, penriba la col.la Fierros y bordiando pela manzorga'l cumal d'El Picu, siempre baxo l'atenta mirada d'una utre y de los altos picos del conceyu d'Ayer.

Llarguisimu tramu pente la Forcá y les Peñes Negres

Casi una hora tardaremos n'arribar a les Peñes Negres, onde tendremos que decidir per onde será meyor xubiles, anque paez claro, que bordiar el primer espolón pela manzorga y garrar una canal de piedra paez lo más cenciellu.

Aún así, paez qu'agüeyamos otra opción ensín baxar desnivel y ye pasar una muria ñatural de peña, nun pasín dalgo n'adherencia y llueu metése nun tarrén amestáu de peña y monte baxo, que tien de llevanos al final de la canal que viéramos a lo lloñe, pa llueu quedanos "tan solo", la parte cimera de les Peñes Negres.

Enguedeyada ascensión a les Peñes Negres

Digo tan solo, porque costónos un pelín alcontrar, el pasu bono, pa xubir a la parte más alta d'estes Peñes Negres, que tan guapes vistes, diéronmos de valles ayeranos, de la escuela d'escalada de Pel.luno o del nuesu particular restaurante, la Peña Mea.

Y ye que mirando dende la Colladina a les Peñes Negres, paecíen llonxanes, llonxanes y la Peña Mea ainda más. Agora, tamos un pelín más cerca, de poder descansar, xintar y ver más cercanu'l final de la nuesa ruta llavianesa.

Cumal de les Peñes Negres (1529 ms)

Hai que dicir, que si la xubida a les Peñes Negres (1529 ms) nun foi fecha al debalu, la baxada tamién fízonos triar delles posibilidaes, pasando en más d'una ocasión d'una fastera la cresta a la otra y pisando una especie de turbera prieta y pelín asquerosa, hasta qu'al fin pudimos tar nuna bona sienda hacia la Campa Mea.

A la fín, un últimu tramín hasta la cota más alta de Llaviana: Peña Mea

Dende equí, ya con cierta relaxación, dedicámonos a esfrutar de la cabera ascensión del día a Peña Mea, metiéndonos pelín enantes de lo normal hacia'l cumal na fastera oriental y trepando ensín necesidá, sobretou pa la rodiella, hasta la cota más alta de Llaviana, Peña Mea con 1556 ms.

Oxetivu final: Peña Mea (1556 ms)

Agora sí, tomamos un merecíu descansu nesta perguapa peña, que vese dende milenta llugares d'Asturies, y que xúbase per onde se xuba, tien unes ascensiones bien prestoses. Tanto, como la media horia qu'echamos descansando y viendo como'l propiu sol, decíanos que muncho más nun podíemos tar aselando.

Pa onde vamos y d'onde venimos... soba fina

Asína que, vamos entamar la mítica baxada a Doñango, de la cual tenía clara alcordanza de mi otra visita a Peña Mea, va ya unos añinos. Poro, garramos ritmu, y baxamos a fueu hacia la collada Los Palomos, bordiando primeru'l picu La Bollica pela mandrecha.

Baxada mítica hacia la collada Doñango y campes de Tolivia

Y de ehí, baxada perpegaos al paré de nuesa mandrecha hasta garrar les envueltes de la Canga'l Mayaón, con guapes vistes de les Campes de Tolivia, la collada Doñango y enriba suya'l Picu Prau Bra, el cual tendremos que dexar a la nuesa esquierda, pa baxar hacia'l valle los Tornos, na nuesa vuelta hacia'l coche.

Baxada hacia los valles de los Tornos col Prau Bra a la manzorga

Como siempre, nestes baxaes hacia valles cercanos a pueblos, unos caminos tan meyores qu'otros y non toos, van dexanos onde queremos, asína que sollertes con seguir demasiáu'l camín marcáu como GR. Ya que, podéis acabar na Campa Felguera y facer munchos metros de más, que dempués d'una ruta así, sería dalgo pelín penosu.

Asína que, cuando esti camín amuésenos una xubida pegándose a les parés del Picu Prau Bra, val más facer una envuelta y tomar una sienda que primeru, llevarános pegaos a una sebe y llueu al traviés d'una viesca, dexarános na pista que pasará penriba la riega Los Tornos y llueu magar d'un ratín, nel pueblu del mesmu nome, finalizando una gran ruta circular.

Aporando de nuevu al pueblu de los Tornos cola Peña Mea al fondu

En resume, ruta que faínos percorrer nos sos 20,2 kms y 8 hores de percorríu, les cuatru cotes más altes de Llaviana, faciéndonos conocer parte de les guapes foces del Raigusu, pero obligándonos a superar un desnivel acumuláu d'unos 1650 ms.

Camudando'l Camín col Ciares na Peña Mea

Rutaca navidiega faciendo les 4 cotes de Llaviana: Picu La Colladina (1476 ms) cuarta, Peñes Negres (1529 ms) tercera, Picu La Forcá (1549 ms) segunda y Peña (1556 ms) primer cota y vértice xeodésicu de Llaviana

Ver progresos en: Retos montañeros