Vegacerneja (Valdeburón) - Mura - Pandián - Misionello - Orza

11 de Setiembre de 2026 

Track: Vegacerneja (Valdeburón) - Mura - Pandián - Misionello - Orza

Terminamos esta montonera díes per Caín, xubiendo valle alantre hasta la comarca de Valdeburón, onde teníemos pendiente dende unes cuantes visites a Picos, el picu Pandián, na contorna del banzáu de Riañu y Dosmil cimeru del Cordal Cantábricu que por mor de les altes temperatures, nos díes qu'intentamos facelu, tuviéremos qu'abortar l'ascensión ensin dubia.

Partimos de Vegacerneja (1100 m ) en Valdeburón

Pa ello, averámonos hasta'l pueblín de Vegacerneja, onde tenemos un aparcaderu bien afayaizu pa dexar les furgonetes ya incluso pernoctar ensin molestar a naide. Nós, aportaremos de mañana col almuerzu nel banduyu, asina que namái que vamos mudanos de ropa, garrar la mochilina col pinchu y entamamos a caleyar cruciando'l rigu Orza, siguiendo les indicaciones de la ruta al picu Pandián.

Caín (Valdión) - Cares - Puente Vieya - Pandu - Inabio - Raíz - Ría - Cuesta Duja - Tranvia

10 de Setiembre de 2026 

Track: Caín (Valdión) - Cares - Vieya - Quintana - Inabio - Raíz - Ría - Cuesta Duja - Tranvia

Otru día más na contorna de Caín navegando pelos requexos colgaos del Cares y si'l día anterior anduviéremos pela fastera del Cornión, poles canales de la Raya y Culiembru, esta vegada teníemos l'envís de tornar a visitar pasos de los Urrieles, poro nun mos quedaba otra que patear una vegada más la sienda'l Cares, lo que ya entamaba a dar una pereza estrema.

Güei perdíemos a Carlos, que llevantárase malín del estómagu y prefirió quedar por Caín de tranqui, asina que saldremos a patear Sara, Mario y yo, caleyando una vegada más Cares alantre, alcontrándonos un día más, con muncha xente foriata y ye qu'alloriamos cola cantidá de senderistes que fae'l Cares y sobretou d'europeos durante díes pente selmana. 

Salimos de Caín (460 m) otru día más

Nós vamos a lo nueso, cruciándonos colos primeros qu'intenten aportar a Caín, parando dacuando a echar dalguna güeyada a canales que queremos descubrir o antiguos tramos del camín d'antaño del Cares que pasaba pela parte del Cornión, menos conocíu que'l de la fastera los Urrieles, que ficimos completu delles vegaes y que pude enllazar el tramu que me faltaba nos primeros díes per Caín d'esti añu, col pasu a Cámara pel Puntedo dende Casielles.

Caín (Valdión) - Cares - La Raya - Peñón d'Ostón - Culiembru

9 de Setiembre de 2026 

Track: Caín (Valdión) - Cares - La Raya - Peñón d'Ostón - Culiembru

Alborecemos con un día borrinosu, dempués de les tormentes del día anterior, nel que tuviemos qu'acortar la ruta per Yerbas Altas y anque quedáramos bien a gustu col percorríu, güei teníemos ganes de meter más desnivel pal cuerpu, asína qu'una vegada más, teníemos l'envís de percorrer la senda'l Cares p'averanos a otra canal que nun conozco, como ye la de las Avareras.

Quedamos 4 compañeros, llueu de la marcha de Montse nesta mañana, caleyando'l Cares atopándonos con muncha más xente de lo esperáu, pa un miércoles de Setiembre, pero la foriatada nun entiende de folixes y nun paramos de saludar xente, que mui al nuesu pesar, vienen más abrigaos de lo que nos diba prestar. 

Una vegada más puntu de partida en Caín (460 m)

Pasaremos les canales de Culiembru y la Raya ensin moyanos, pero avanzamos unos cientos de metros más y la ñube nortiega astur, ta metida y nos toca, con un orpín finu pero moyaor, asina como con un borrín gafu na canal que queremos conocer.

Abellugámonos un ratín, pa pensar que facer, hasta poniendo enriba la mesa, tornar y salir más al sur hacia'l valle de Valdión a facer algo, pero según tornamos so los nuesos pasos, falamos que nengún, sacante de mí, conoz la canal de la Raya, asina que decido facer la ruta na direición contraria de va unos años que ficiera Culiembru a Ostón y baxar pela Raya.

Caín (Valdión) - Santibaña - Caín de Riba - Yerbas Altas - Bersolina - Trea

8 de Setiembre de 2026 

Track: Caín (Valdión) - Santibaña - Caín de Riba - Yerbas Altas - Bersolina - Trea

Continuamos per Caín dando pateínos y conociendo nuevos llugares, pero tamos siempre cola meteo repunando y faciéndonos tomar decisiones pa cambeu de planes, poro viendo que tenemos tormentes de tarde decidimos salir al plan anicial y dir viendo sobre la marcha hasta onde podríemos llegar, ampliando una posible escapatoria con un paseín hasta la Cueva Santibaña. 

Una vegada más en Caín (460 m) entamamos ruta

D'esti xeitu y con dalgo de borrín, salimos de Caín, faciendo casu a los paisanos del pueblu, pa conocer la cueva del Quesu o de Santibaña, que tanto nos recomendaren estos díes ya que según ellos dexáranla mui guapa, anque a posteriori enterámonos que nun fueren nin vela entá, jaja. El casu ye qu'entamamos a caleyar per Caín atopando perbien marcáu tol percorriu hasta Santibaña y ye que'l parque de Picos ta poniendose les piles, pa marcar dellos percorríos y que nun ande tol mundiu pelos mesmos llugares.

Sesanes (Valdión) - Los H.oyaos - Sedu La Garcia - Senda'l Rabicu - Asotín - Cordiñanes

7 de Setiembre de 2026 

Track: Sesanes (Valdión) - Los Hojaos - Sedu La Garcia - Senda'l Rabicu - Asotín - Cordiñanes

Dempués d'un domingu de llibrar el día, nel que dimos un paséu pela senda'l Cares, conociendo'l camín de la Electra, que tién un pocu l'interés hestóricu y montañéramente d'accesu a delles canales como Saigu o Avareras, tocaba volver a l'actividá más seria, ya que dexónos un pocu a medies, anque nun daba'l día pa más, ya que tuviemos a la vuelta que metenos nos túneles p'abelluganos de los bastiazos que cayeren de torbón.

Magar de pasar el domingu tarde de descansu, ficimos un pocu cambiu de cromos, colando Marcos que tenía que volver al trabayu y xuniéndose al grupu, Mario y Sara con enerxíes renovaes. Pa contentá-yos, díbemos repetir pela mió parte la ruta al Sedu la Garcia, que ya ficiera va dellos años, pero que camentaba diba paecié-yos increyible y mui divertía. 

Partimos del aparcaderu de Sesanes (850 m)

Alborez col día pelín borrinosu, tovía colos restos de mal tiempu del día anterior, asina qu'almorzamos con calma y averámonos na furgo hasta Sesanes, ya que tenemos l'envís de facer la circular hasta colláu Solano pela senda'l Rabicu, anque si tuviéremos con munches más ganes, pudiéremos empatar la Garcia col final de la Traviesa'l Llaz y baxar per Mueñu hasta Caín, faciendo'l camín hasta Sesanes pel tramu de senda'l Cares que tan arreglando nel intre, pa nun tener que facer tocar asfaltu, lo que va dar muncha vida a los pueblos de Valdión, en cuanto a senderistes.

Caín (Valdión) - Mueñu - Camín de les Oveyes - Torre Pamparrosu - Dobresengos

5 de Setiembre de 2026 

Track: Caín (Valdión) - Mueñu - Camín de les Oveyes - Torre Pamparrosu - Dobresengos

Sábadu a les 6 y media la mañana, suena'l despertador dempués d'una nueche d'aguantar de fondu la musiquina de les fiestes de Caín, asina que llevantámonos dafechu reventaos, facemos una cafetera como podemos y preparamos p'almorzar de nueche zarráu entá. Metemos pal cuerpu lo que podemos, facemos el pinchu pa la ruta y a partir de les 7 entamen a llegar los compañeros que durmieren nel albergue.

Con galbana ponemos les mochiles y les pates entamen a caleyar dormíes hacia la salida de Caín, el día anterior caleciéremos perbien peles siendes antigües del Cares, pero paez que'l cuerpu nun descansó les hores debíes y cuesta arrancar hacia los Praos de Castro, puntu nel que la canal de Mueñu entama y amuésase perllarga delantre de los nuesos güeyos. 

Salida de Caín (460 m) coles primeres lluces

Ye una vieyísima conocida, asina que nun voi detallar muncho la so ascensión, ya que ficiérales va munchos años como enllaz hacia H.ermosu, ascendiendo la Palanca y el Llambrión y tamién la descendiera dempués d'una llocura de ruta hasta la Torre La Celada dempués de xintanos Arzón y parte Dobresengros o baxando dende la parte media al venir dende les Travieses del Llaz cola Torre del Mediu nel menú.

Caín (Valdión) - Cantu Mabro - Casielles - Puntedo - Cámara - Trescámara - La Tránvia - Cares

4 de Setiembre de 2026 

Track: Caín (Valdión) - Cantu Mabro - Casielles - Puntedo -Cámara - Trescámara - La Tránvia - Cares

Tornamos a Picos d'Europa dempués de la Travesera 2025 - 2026 col envís de conocer dalgunos llugares y pasos que me queden na contorna de Caín. Siendo sinceros, cada día cuéstame más alcontrar rutes motivantes y ye que ya son munchos años de pateos y personalmente Picos, ye dalgo que trabayé muncho, coles traveseres y dalgunos díes d'especiales.

Sicasí, dempués de dar munches vueltes y preparar munchos tracks, con milenta posibilidaes, tiramos el vienres a Caín cola idega de tar una selmana patiando, nun día de munchu calor, asina que dexamos pa prau cualesquier monte del cordal y decidimos dar un paséin aéreu pel Cares, pa que los collacios vayan metiéndose en farina.

Partimos dende Caín (460 m)

La idega ye estirar les pates dempués del viaxe y cansar un pocu, ya qu'enriba tenemos les fiestes de Caín y suponemos que la música nun mos va dexar descansar pa la ruta del sábadu, que presentábase potente. Nel intre, preparámonos y salimos caleyando per Caín, pasaes les 4 y media la tarde, pegando entá la solana con fuercia, averándonos hasta la Jarda, onde garraremos el senderu del sedu Mabro.

La calufa ye terrible y sudamos enforma, pero tenemos la esperanza de garrar solombra un pelín más alantre cuando empocemos na garganta, asína que tiramos alantre pel senderu, garrando nos Lleraos el desvíu hacia'l Cantu Mabro, que ya percorriera la primer vegada que conocí Dobresengos nun error que fízonos superar más desnivel del deseyáu, por nun tomar bien el Sedu Mabro. 

Braña la Senra (Tameza) - La Cadavina - Puertu Banduxu - Braña La Cueva - Nial La Utre

23 d'Agostu de 2026 

Track: Braña la Senra (Tameza) - La Cadavina - Puertu Banduxu - Braña La Cueva - Nial del Utre

Una nueva ruta más del GM Xuan de la Borrina, na que personalmente nun tenía munches idegues pa facer dalgo nuevo. Por suerte, Carlos, tamién ye fiel seguidor de dellos blogues de monte y apúntase cosines dacuando, proponiendo facer esta ruta que viera nel blog del collaciu Javi Cienfuegos, nel conceyu de Tameza, onde facía años que nun tornaba de monte.

Partimos dende la braña de Senra en Tameza (910 m)

La mala suerte fue que Carlos al final nun pudo venir y ya nun mos daba tiempu a camudar de ruta, asina que siguimos alantre cola propuesta, el restu del grupu, parando a almorzar en Grau y continuando llargu camín hasta Yernes en Tameza, teniendo que siguir pista alantre la braña La Senra, asfaltada reciéntemente por mor del ciclismu, hasta'l mesmu colláu de Fancuaya, baxo la faldera del míticu monte L'Oral.

Piedrafita (Los Argüeyos) - Cuetu Millaró - Guazones - Campastiñosas - Puertu Piedrafita

 15 d'Agostu de 2026 

Track: Piedrafita (Los Argüeyos) - Cuetu Millaró - Guazones - Campastiñosas - Puertu Piedrafita

Continuamos de monte col grupu n'Agostu, dempués d'unos díes de descansu y muncha bicicleta per Soria, nos que repetimos varies rutes pero sobretoo metimos volumen de kms nes pates, aprovechando pa conocer dalgunes zones del Celtigravel de Soria, tornamos a poner les pates en mou patéu, yéndonos hasta Los Argüeyos en Llión.

Partimos del pueblu de Piedrafita (1302 m)

Tirando un pocu de repertoriu de rutes sueltes que preparo y nun acaben por salir, vamos averános hasta Cármenes, pa conocer un pocu tol valle de Piedrafita y percorrer la xerra de Riañu, a la que pertenez el perconocíu Cuetu Millaró, que ya ficiéramos tanto en branu como n'ivernal, nun d'esos intentos que ficiera por deprender l'esquí de travesía.

La Vid (Gordón) - Bregón - San Roque - Cuetu San Mateo - Fayabaxo - Santa Lucia - Ciñera

 26 de Xunetu de 2026 

Track: La Vid (Gordón) - Bregón - San Roque - Rasón - Cuetu San Mateo - Fayabaxo - Santa Lucia - Ciñera

Dempués de la Travesera Picos 2025 - 2026 tornábemos a facer dalgo d'actividá, pa caltener la bona forma algamada y viendo que teníemos la meteo pelín repunante p'Asturies, averámonos hasta Llión col envís de conocer otru d'esos Montes Cimeros del Cordal Cantábricu de menos de 2000 metros, como ye'l Cuetu San Mateo.

Partimos de La Vid (1065 m) na comarca de Gordón

Pa ello, nun tuvimos muncho que viaxar, averándonos a la comarca de Gordón, bien afayaiza dende'l Puertu Payares y llueu del almuerzu clásicu n'Ezequiel, continuamos hasta'l pueblu de la Vid, onde teníemos el nuesu puntu de partida, llueu de crear un percorríu xuniendo dalgún tramu d'un trail y una clásica ascensión al Cuetu San Mateo.