H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

15 de Xunetu de 2026 

Track: H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

Últimu día de la Travesera 2025 - 2026, alboreciendo nel colláu H.ermosu al que llegáramos faciendo una travesía increyible pela Collada Blanca y la Torre La Palanca, volviendo a tener dellos problemes estomacales por mor de la superespeciada cena, pero a cambiu, tuviéramos a gustu viendo una proyeición del leopardu de les ñeves, abrigadinos nel esterior.

Preparámonos con calma, revisando un pocu tol refuxu, porque'l día anterior dalgún espabiláu, robóme los bastones y asina tamos, cola mochila puesta y ensin bastones pa facer casi'l mayor descensu de tola Travesera, teniéndonos que devolve a H.uentedé onde tenemos los coches.

Partimos de los 2065 m del Colláu H.ermosu

Salimos los supervivientes d'esti añu cola vista puesta nas Colladinas, clásica salida de H.ermosu, anque tol tiempu los güeyos se nos van al guapu más de ñubes que tenemos nel valle de Valdión, destacando como non, el macizu del Cornión cola so másima espresión la Torresanta llionesa y la Torre'l Frieru enfrente nueso, que tamién pide protagonismu.

H.uentedé (Llébana) - Hacheru - Las Garamas - Collada Blanca - Picón - La Palanca - H.ermosu (Valdión)

14 de Xunetu de 2026 

Track: H.uentedé (Llébana) - Hacheru - Las Garamas - Collada Blanca - Picón - La Palanca - H.ermosu (Valdión)

Continuamos per Picos, completando la Travesera Picos 2025-2026, dalgo recuperaos del día anterior pela increyible canal de Montestigu y el Senderu'l Gatu, pudiendo na mañana almorzar más curioso, que na cena, que tampoco pude meter munchu pal cuerpu ya que nun me sentaba del tou bien. 

Nesti día, entamamos una travesía de dos díes con final nel colláu H.ermosu y con salida en H.uentedé, asina que tocaba abandonar l'apartamentu de Brez, llueu del almuerzu y recoyer la casina, pa facer per carretera'l tramu hasta l'aparcaderu de H.uentedé, onde terminamos de rematar los preparativos pa entamar la ruta.

Partimos tol equipu de H.uentedé (1080 m)

El menú de primeru ye facer la senda L'Hacheru que conozco de varies ocasiones, anque la primer vegada ficiérala nun intentu fallíu a los Picos de Santana n'ivernal, quedándonos por mor de la ventisca na Torre las Coteras Roxas, pudiendo esfrutalalu munchísimu tamién, n'ascensión correndera con Kíla a la Peña Vieya. 

Esta vegada nun vamos nin corriendo, nin n'ivernal, pero llevamos trisca nes pates de tolos díes anteriores, asina que salimos del aparcaderu pali pali, sobretou col envís d'esfrutala ya intentar poner les pates de nuevu a tonu, dempués del mal día que pasé na ruta anterior, sintiéndome tovía mui cansáu y con floxera nos primeros metros d'ascensu.

H.ou Los Cabrones (Cabrales) - Amuesa - Piedrabellida - Cares - Caín (Valdión)

14 de Xunetu de 2025

Track: H.ou Los Cabrones (Cabrales) - Amuesa - Piedrabellida - Cares - Caín (Valdión)

Finábemos la Travesera Picos 2024 - 2025 alboreciendo nes tiendes de campaña del refuxu del H.ou Los Cabrones, llevantándose los cuerpos de sentires bien dixebraos, descansando dalgunos como neños y otros pasando una nueche de perros, con humedá y hasta frío, por mor de nun planificar bien el saco o ensin más acostase pelín pegañosu del día anterior.

Pero ye que'l borrín que tapecía tol H.ou Los Cabrones, nun mos permitió nin siquiera llavanos un pocu na fonte, mudándonos de ropa malpenes y guardando les mochiles, playeros y demás na tienda que nun se moyara col orpín continuu, que nun paró hasta bien entrada la nueche.

Partimos del H.ou Los Cabrones (2042 m)

Poro, col cuerpu pelín desfechu de la nueche, vamos a almorzar al refuxu, tomando dellos cafés con tostes, col envís d'intentar espabilar una migayina al menos. A dosmil metros d'altor tenemos un día perguapo, col cielu azul y dalguna ñube estratificao, lo que nun quita que los ánimos y les fuercies nel grupu nun tean pa munches hestories.

D'esti xeitu, casi ensin pensalo tengo claro, que con descender per Piedrabellida y facer el Cares vamos tener abondo, pa terminar con 4 díes siguíos de monte, de gran valir montañeru, pa muncha xente, pero yo quédome pelín atristayáu, por nun plantegar dalguna actividá qu'aportáseme'l conocimientu de dalgo nuevo, sacante de la ruta a la Peña Vallines del primer día. 

Caín (Valdión) - Dobresengros - H.orcadas d'Arenizas - H.ou Cerredu - H.ou Los Cabrones (Cabrales)

13 de Xunetu de 2025

Track: Caín (Valdión) - Dobresengros - H.orcadas d'Arenizas - H.ou Cerredu - H.ou Los Cabrones (Cabrales)

Alborecemos nel tercer día de Travesera Picos 2024 - 2025 en Caín y nel día de güei tenemos per delantre l'ascensión de la canal de Dobresengros, quiciábes una de les canales más mítiques y grandes de los Picos d'Europa, que por mi parte, tuve la suerte o la desgracia de percorrer en varies ocasiones.

La primer vegada que conociera esta canal remóntase a quince años atrás nuna travesía pente Caín y el refuxu de la Vega Urriellu, mientres que nel nuesu caso, l'oxetivu de la nuesa travesía ye'l H.ou Los Cabrones, onde asítiase'l refuxu más altu de Picos, rexentáu pelos collacios Jorge y Naiara.

Cares de cansanciu na partida del grupu en Caín (460 m)

Saldremos a les 9 la mañana cola mochila más cargada que nos díes anteriores, ya que vamos vivaquiar nes tiendes de campaña qu'ufrécenmos nel refuxu y los primeros pasos resiéntense de la ruta del día anterior a la Peñeblanca.

Despedímonos de los miembros qu'abandonen l'aventura per Picos, na nueche anterior, menos Pepa que llevántase a desayunar con nós, sacándonos la semeya de partida y los que continuamos avanzaremos hasta la Puente Grande sol Cares, onde podremos empobinanos hacia'l senderu que llévanos al sedu Mabru.

Caín (Valdión) - La H.errera - Oliseda - Peñeblanca - H.ou Miguel - Mesones

12 de Xunetu de 2025

Track: Caín (Valdión) - La H.errera - Oliseda - Peñeblanca - H.ou Miguel - Mesones

Segundu día de Travesera Picos 2024 - 2025 alboreciendo en Caín, llueu de la ruta a la Peña Vallines en Tierra la Reina, asina que coles pates ya calentines del día anterior, tenemos per delantre enfrentanos a un día potente de monte, queriendo ascender pela canal de la H.errera a la Peñeblanca, pa descender dempués pela canal de Mesones, completando unos dosmil metros de desnivel positivu y otros tantos de baxada.

Con esti plan, nun quedaba otra que madrugar asina que pa les 8 la mañana ya tábemos preparaos, cargando agua na fonte del Cainejo y sacando la semeya de rigor cola mesmísima Peñeblanca enriba nuesa, casi dosmil metros na nuesa vertical.

Grupu preparáu pa un día potente de monte en Caín (465 m)

Salimos camín alantre, siempre en continua xubida, aportando a Caín de Riba pela mandrecha, dempués de varies envueltes de camín empedráu y bien ceo ya tendremos la riega la H.errera delantre nuesa, metiéndonos pela so mandrecha, atopando'l senderu pelín tomáu, viendo a posteriori, que ye meyor garrala pela manzorga la riega, cruciándola xusto embaxo'l tabayón míticu d'esta guapa riega.

Tamos cola mosca tres de la oreya, ya qu'a dalgunos compañeros que dormíen nel albergue, nun-yos encomendaron a facela, ya que decíen que taba mui tomada, pero bueno, nun sabe bien la xente, a lo que-yos tengo avezáu pel monte astur, asina que somos testerones y el plan diba siguir alantre si o si. 

Travesera Picos 2024 - 2025

Del 10 al 14 de Xunetu de 2025

Nueva travesera del GM Xuan de la Borrina, que preparamos con mimo durante varios meses, siempre a la espera por mi parte, que'l cadril nuevu, fuese a furrular como debiera pa tantos díes de monte potente. Les últimes rutes, ya me dexaren claro que la cosa diba bien, tanto pel Sil na ruta al Catoute como per Piloña a la Peñe Crespa.

Entamábemos la Travesera al frescu

D'esti xeitu preparamos 5 díes de monte, aportando a Riañu el xueves de tarde, dempués del viaxe de rigor per Tarna y atopamos un día imposible dafechu, ya qu'a les 3 de la tarde teníemos 35 graos a la solombra. Sicasí, fuimos hasta Vegacerneya, onde partía la ruta al Pandián, monte cimeru llionés del Cordal Cantábricu, pero albidramos lo mal que lo díbemos pasar y decidimos dir hasta'l banzáu de Riañu a prauticar el kayak y tar fresquinos hasta'l día siguiente.

Colláu H.ermosu (Valdión) - Torre'l Llambrión - Colladinas - Llagu Baxeru - Asotín - Cordiñanes (Valdión)

14 de Xunetu de 2024

Track: Colláu H.ermosu (Valdión) - Llambrión - Colladinas - Llagu Baxeru - Asotín - Cordiñanes (Valdión)

Tercer día de Travesera Picos, espertando nel colláu H.ermosu, onde teníemos apallabráu almuerzu, asina qu'averámonos al refuxu y llueu de ponenos finos con tolos esistente na mesa, tornaremos al vivac pa recoyer tolos trastos cola calma, poniéndonos en marcha so les 9 y media la mañana, col oxetivu claru: La Torre'l Llambrión.

Tamos nel últimu día del finde, teniendo munchos integrantes del grupu que tienen qu'abandonar pa trabayar al día siguiente, asína que la idega ye xubir y baxar peles "marques marielles", ensin cresteríes, pa que tengan tiempu de sobra a baxar, nun llegar mui tarde a casa y ver la final del mundial de fútbol, ensin atropellos.

Partimos del Colláu H.ermosu (2075 m)

El grandiosu día anterior peles Travieses del Rabicu y Llaz, pasó factura y Vane llevantóse con dolor nel cadril, asina que va quedar nel refuxu a la espera de que baxemos, acompañada por Sara, la so hermana, demientres que los demás, salimos colos mochilones hacia'l H.ou del Llambrión, onde podremos dexales, tres d'una piedra dalgo escondíes, pa facer un ascensu llixeru.

Col día pelín frescu, según vamos xubiendo, alcuérdome de nun llevar dalgo más de ropa, esperando que l'esfuerzu y los trepes vayan caleciendo, asina que tiro a ritmu, probando una vegada mi maltrechu cadril, respondiendo perfeutamente, poniéndonos a la entrada de les "marques marielles" en 50 minutinos dende'l refuxu.

Cordiñanes (Valdión) - Asotín - Solano - Rabicu - Llaz - Colláu H.ermosu (Valdión)

13 de Xunetu de 2024

Track: Cordiñanes (Valdión) - Asotín - Solano - Rabicu - Llaz - Colláu H.ermosu (Valdión)

Dempués de la cena y durmir en Santa Marina en Valdión, tol grupu teníemos que movenos hasta Cordiñanes, pa continuar cola Travesera Picos d'esta temporada y teníemos per delantre, dos díes de monte pela fastera'l colláu H.ermosu, con una primer estaya que diba llevanos a esti guapu llugar, per senderos colgaos non aptos pa xente con vértigu, teniéndome defechu dalgo esmolecíu, ya que yéremos en grupu curiosu pa movenos per estos pericuetos.

Ensin priesa, magar del almuerzu calmáu nes furgonetes, averámonos hasta Cordiñanes, onde preparamos tol material de vivac, embutiéndolo como pudimos na mochila y pocu dempués de les 10 de la mañana, entamábemos a caleyar con un día fresquín pero soleyeru, no que vien a ser una temperatura perfeuta p'andar pelos Picos.

 

Grupu preparáu en Cordiñanes (865 m) p'aventurase per tarrén xabaz

Dempués del día anterior, ensin vistes n'ascensión al Escañu, alborecíemos con borrina baxa, que fuera esnidiando durante la mañana, dándonos vistes al seutor de la Bermeya nel Cornión, nos primeros pasos pela senda la Rienda, lo que prometía que díbemos tener un día bien guapu pa facer monte. 

Munchos de los collacios, nunca xubieran pela Rienda, asina que diben encantaos col senderu colgáu, senderu que la primer vegada que percorriera, nun tenía dengún seguru, nin cuerdes, nin cadenes, asina que mientres comentábemos estes hestories, calecíemos músculos y díbemos acolumbrando tola redolada de picos, canales y pasos que teníemos enfrente.

Travesera Picos 2023 - 2024

 Del 12 al 17 de Xunetu de 2024

Tornamos a les Traveseres de Picos, dempués de la mió lesión de cadera, que dexóme facer bien pocu l'añu pasáu, asina qu'esti añu cola decisión ya tomada d'operame, tiré p'alantre y volví a preparar dellos díes per Picos y dir viendo como diba respondiendo la cadera y si tenía que reventar pues que reventase pel monte.

Tornamos a Valdión con tola gana del mundiu

Una vegada más, escapo un pelín de los masificaos Picos d'Europa asturianos (Asturies, Llión, Cantabria) averándonos a la fastera llionesa, onde tenemos un ambiente más relaxáu que la foriatada que ye a trayer Asturies, colos Llagos y el Cares, como fonte de desesperación pa los que siempre movímonos con llibertá y amamos estos montes.

Posada (Valdión) - Chávida - Canal Sur - Frieru - Asotín - Cordiñanes (Valdión) - Bustiu

28 d'Agostu de 2022

Track: Posada (Valdión) - Chávida - Canal Sur - Frieru - Asotín - Cordiñanes (Valdión) - Bustiu

Dempués de la llibrada tormentosa del día anterior, na contorna de la Peña Bermeya, alborecíemos con un día preciosu y una previsión más estable pero tamién más calurosa. Poro, almorzamos na furgo, despidiéndonos d'Ani y Rubén y caleyamos peles cais de Posada de Valdión, garrando bien d'agua, pa salir per un camín na carretera hacia Pandetrave, que nos enllace col Pr-PNPE 15, el cúal tien que dir empobinánonos al nuesu destín, la canal de Chavida y a la posteriori, la Torre'l Frieru.

Partimos de Posada (924 m) con un día bien guapu

Según vamos ascendiendo pel senderu, el calor y la humedá va desprendiéndose del suelu, dándonos una sensación de que nun lo vamos a pasar mui bien. Cuéstanos enforma garrar ritmu y decidimos caltener un pasu continuu anque seliquino, parando namás que pa echar una güeyada a la muria que forma tola redolada de Pambuches.

Posada (Valdión) - Bufón - Peña Bermeya - Torres Pardas - Pambuches

27 d'Agostu de 2022

Track: Posada (Valdión) - Bufón - Peña Bermeya - Torres Pardas - Pambuches

Dempués del entrenu pel Picu Gabanceda, del día anterior, esta vegada ya tocaba ruta con tol equipín al completu, averándose hasta Posada de Valdión, Carla y Mario del GM Xuan de la Borrina y dos collacios, Ani y Ruben, del grupu xente qu'axuntámonos pa esguilar davezu.

Como siempre digo, val más ser pocos y afayaizos que munchos y terminar chifláu, asina que teníemos per delantre dellos díes de monte y furgonetéu con un plan trazáu qu'esperábemos llevar a bon puertu. De primeres decidimos camudar l'orde de les rutes per Valdión, entamando per una ascensión circular a la Peña Bermeya, que ya ficiéramos va munchos años colos collacios del Baskonia.

Semeya de salida, nunca meyor dicho, en Posada (922 m)

Llueu de saludar a munchos conocíos del mundiu de les carreres pel monte, ya que teníemos el pueblu abarrotáu de furgos y corredores, pa la Transvaldeónica, escapamos pali pali, hacia'l seutor de la Bermeya, ascendiendo hacia Pantivalles, con unes ñubes amenaciantes, que bien ceo, amosaron les sos intenciones con unes tronaes perimportantes.

Al altor de la fonte d'Hurdén, nun mos quedó otra qu'abelluganos media horina embaxo'l fayéu, a la espera que pasara la tormenta, enantes de poder continuar camín pela Llera Pambuches hacia la Pandona, demientres echábemos un vistazu a la baxada que nos diba esperar pela canal de Pambuches.

Pandetrave (Valdión) - Picu Gabanceda - Susiella - Altu Vallosero

26 d'Agostu de 2022

Track: Pandetrave (Valdión) - Gabanceda - Susiella - Vallosero

Tornamos a los Picos d'Europa, col envís de continuar la tradición del GM Xuan de la Borrina, en forma d'especial montañera nuna Travesera de Picos pa esta temporada. El casu ye, que l'alcuentru col restu la xente del grupu yera en Posada de Valdión, ya que teníemos la idega de pasar un par de díes per esta comarca y pente salir de trabayar el vienres y aportar al pueblu, dábame pa salir a entrenar un ratín y de pasu tachar un de los Dosmiles Cimeros de Picos. 

Pa ello, pegué en solitariu la xatada conductora, con parada incluyía en Riañu, al pasu de la Vuelta Ciclista, pa siguir per Portilla la Reina, hasta'l Puertu de Pandetrave. La mió idega yera facer una ruta más llarga con ascensión a L'Escañu, l'otru monte de segunda categoría que fáltame nel llistáu de Picos, pero viendo la hora de llegada al puertu, diba ser dafechu imposible, asina que'l Gabanceda diba ser l'oxetivu del día.

Partimos del Puertu Pandetrave (1561 m)

Así qu'a les 5 y media, bien pasaes, salgo corriendo dende Pandetrave, pista arriba, primeru per monte baxo y llueu per un pequeñu fayéu hasta aportar a un colláu con baxada hacia'l valle de la riega Gabanceda. Nel intre, la borrina andaba esnalando pela fastera norte del Gabanceda, dexándome namái qu'acolumbrar les cumeres de los macizos del Cornión y Urrieles.

Llagu La Ercina (Cangues d'Onís) - Verdilluenga - Trea - Caín (Valdión) - Culiembru - Ostón - Vegamaor - Arnaedu- Belbín

21, 22 d'Agostu de 2021

Track: Llagu La Ercina (Cangues d'Onís) - Verdilluenga - Trea - Caín (Valdión) - Culiembru - Vegamaor - Belbín

Findes de bon tiempu n'Agostu, nos que toca aprovechar y tirar pa Picos. Esta vegada, llevaba Carlina, diciendo de preparar un finde y dempués d'aldericar qu'opciones sedríen les meyores, viendo que nun conocía denguna canal de Picos, decidime a repetir dalgunes estayes de Traveseres d'antaño.

Llagu La Ercina (1115 m) sedría'l puntu partida

 

Una de les más guapes estayes pel Cornión, llevónos dende'l Llagu La Ercina hasta Caín, magar de facer tola cumera dende la Verdilluenga hasta la Peña'l H.ultayu, pa baxar per Trea a Caín. Poro, nun hubo muncho más que pensar y más coles ganes que tenía de pasar un finde nel Albergue de Caín, onde ya lloviera de les últimes aventures con Ana.

Sesanes (Valdión) - La García - Senda'l Rabicu - Colláu Solano - Asotín

16 de Xunetu de 2020

Track: Sesanes (Valdión) - La García - Senda'l Rabicu - Colláu Solano - Asotín

 

Magar de dos díes bien prestosos de monte, de primeres pela fastera'l Llambrión tocando tolos sos altos
y el segundu día pel Cornión, conociendo la Torre Los Cabritos, esta vegada nel tercer día, queríemos facer dalgo de tarrén d'aventura, menos andáu... a la fín, salínos de les rutes davezu qu'atopamos en páxines y bloques.

Siempre que colamos Ana y yo, pa Caín, intentamos dixebrar los díes de monte, con actividaes más téuniques como pudieren ser cresteríos y otros pateos más físicos percorriendo grandes desniveles, pero si dalgo nos presta ye conocer llugares y pasos menos andaos, como ya ficiéramos en Tres la Envernosa va pocu tiempu.

Preparámonos pa caleyar en Sesanes (640 m)

Caín (Valdión) - Mesones - Torre Los Cabritos - Puertos de Cuba - Capozu

15 de Xunetu de 2020

Track: Caín (Valdión) - Mesones - Torre Los Cabritos - Puertos de Cuba - Capozu

Alborecemos un día más nel Albergue de Caín, esfrutando cola calma d'un almuerzu recién fecho. Ye lo que tien venir en Xunetu al monte y non n'Ochobre, que tenemos más hores de lluz pa les nueses xabazaes y tamién d'estes pequeñes coses.

Poro, magar de llenar el banduyu, preparámonos y salimos Caín p'arriba, sortiando les obres de renovación del empedráu, colo que los vecinos anden pelín molestos, ya que paez ser que nun tuvieron pandemia pa facer la obra y non en plenu mes de Xunetu, estráu de turistes. Lo de los políticos nun camuda nin nos pueblos, nin nes ciudades, nin nos paises, siempre fadiando al ciudadanu.

Partimos del pueblín de Caín (460 m)

Cordiñanes (Valdión) - Asotín - Colladinas - Cresteríu del Llambrión - Colláu H.ermosu

14 de Xunetu de 2020

Track: Cordiñanes (Valdión) - Asotín - Colladinas - Cresteríu del Llambrión - H.ermosu

Paez mentira, pero ya lloviera dende que nun mos xuntábemos Ana y yo pa da-y duro al monte. De xuru que dende'l crestéu per Peña Manteca, anque tuviéramos planes dempués que tuvieramos que torgar, poro les ganes yeren munches, asina qu'arrancamos como non, pal nuesu campu base en Caín.

Tamos falando de madrugón de los d'alloriar y tiradísima de coche hasta aportar a Cordiñanes, onde preparámonos pa una primer xornada de les que ya tenía ganes col envís de facer tola crestería del Llambrión dende la Torre las Minas del Carbón hasta la Torre del H.ou Grande.

Entama l'aventura en Cordiñanes (865 m)

Caín (Valdión) - Mesones - Piedralluenga - H.orcada Blanca - Aliseda - Ariu (Onís)

14 de Xunetu de 2019

Track: Caín (Valdión) - Mesones - Piedralluenga - H.orcada Blanca - Aliseda - Ariu (Onís)

Magar d'una nueche fina, fina de roncaera per parte de Alberto nel albergue, tocó llevantase pelín cansáu y ye qu'al día anterior, a lu tuntu, ficiera más esfuerzu del que camentaba, canal p'arriba y canal p'abaxo intentando alcontrar pasu hacia Dobresengros y ente eso y nun durmir demasiáu, llevantéme con una necesidá enorme de café pa despabilar.

Asina, qu'almorzaremos nel Albergue de Caín con calma, pero sin pasase, que tenemos per delantre una llarga xornada, que tien de llevanos hasta la Vega d'Ariu. Años atrás, teníemos esta mesma intención pero'l borrín truncónos l'intentu y tuviemos qu'optar per un plan B que nos llevase hasta Vegarredonda.

Partimos del pueblu de Caín (460 m)

Poncebos (Cabrales) - Bulnes - Amuesa - Piedrabellida - Cuesta Duh.a - Tranvia - Caín (Valdión)

13 Xunetu de 2019

Track: Poncebos (Cabrales) - Bulnes - Amuesa - Piedrabellida - Cuesta Duh.a - Tranvia - Caín (Valdión)

Alborezo n'Arenas con un día pa dir de monte estupendo ya que'l día anterior tuviera esguilando de tarde un pocu en Pó y dempués de cenar, fuera pa la cama prontín, nótome descansáu y preparáu pa entamar la mió 9ª Travesera de Picos.

Dalgo qu'entamó como una idega pa conocer un tarrén que nin siquiera atrevíemos a pisar, fue pasando a ser una tradición que facía que tuviese que restolar pente mapes y tracks, pa intentar facer un percorríu novedosu añu tres añu.

Partimos de Poncebos (241 m) con tola ilusión