jueves, 28 de febrero de 2019

Cordiñanes (Valdión) - Tres La Envernosa - Torres Arestas - Pambuches

13 Ochobre de 2018 
 
Track: Cordiñanes (Valdión) - Tres La Envernosa - Torres Arestas - Pambuches



Cuartu día faciendo xataes per Picos, llevándose dafechu'l premiu, el día anterior, cola ascensión per Arzón y Dobresengros a la Torre la Celada y baxada posterior per Mueñu. D'esti xeitu, saber como va comportase'l cuerpu esta mañana, ye toa una incógnita, anque tenemos claro que viendo la meteo pal día siguiente, vamos terminar les actividaes güei y vamos facelo dándolo too defechu.

Magar d'una ruta na que sí sabíemos y teníemos referencies clares del esfuerzu que diba llevanos facer tol percorríu, pa esta ruta, vamos perseguir una d'eses canales mui pocu andaes y casi desconocíes, como ya ficiéramos cola de Sollambriu en Setiembre.

Nos díes d'antes, tuvi faciendo trabayu d'investigación y como non, toca escaecer posibles tracks peles redes, llevando nel GPS la ruta fecha a man col envís de tener un mínimu de referencia y delles semeyes de dalgún reportaxe perdíu nel tiempu na rede.

Salimos dende'l Mirador del Tombu en Cordiñanes (840 m)

Queremos conocer la canal de Tres La Envernosa, una d'eses canales qu'ascienden al pelín escaecíu seutor de la Bermeya nel Cornión. La canal, empobínase a la fastera central d'esti seutor, entrándo-y al macizu p'enmediu d'un marabayu de cumales de dos mil metros que tan a la solombra de la Bermeya.

Pa ello, averámonos a Cordiñanes na furgo, aparcando nel pueblu y caleyando hacia'l mirador del Tombu, onde saldrá'l camín que tien de llevanos hacia'l preciosu monte La Corona. Como siempre, ye obligatoriu parase a sacar semeyes na viesca, sobretou nel requexu de la Farfada, quiciás un de los llugares que más me presten en Picos, perconocíu de les vegaes que pasé pela canal de Capozu.

Al pocu de cruciar la riega la Farfada, dexaremos la sienda qu'avérase a los seos de los Cabidos que dan entrada a la canal de Capozu y vemos echar la vista nuna canalina qu'asciende a una viesquina penriba la Cueva Lluques.

Facemos tol camín hacia'l Monte La Corona saliéndonos hacia Tres La Envernosa

Meterémonos nella con decisión, pudiendo alcontrar restos de senderu, anque avanzamos per onde meyor podemos, poniendo a preba los músculos cansaos de la xornada anterior. Ensín mayores problemes, accedemos a la viesquina y travesarémosla con tendencia a la manzorga, teniendo al salir, la vista d'una sucesión de terraces cortaes per tarrén herbosu y llambria sucia y húmeda.

Tamos nun puntu perimportante de la ruta, ya que teníemos estudiáu un par d'entraes: La primera averándonos a la mandrecha a los parés y xubiendo per tarrén herbosu o trepando una llambria per un canalizu central, ambas saliendo a la manzorga en travesía per una terraza.

Sabiendo lo que nos presta trepar, escoyimos el canalizu central, qu'al final nin lo tocamos, ya que trepamos per un espolón a la so mandrecha, al que-y vimos bonos agarres. Munchu güeyu, ya que lo vertical del tarrén nun da llugar al fallu... ya que probáblemente a los 10 metros de cayía del espolón, tendríemos de sumar salir rebotando per un prau hasta un cortáu del que ya nun hai res que facer, aparando más menos na riega la Farfada.

Negociamos tol sedu Tres La Envernosa p'acceder a la canal

Magar del trepe espuestu, tocará facer una travesía penriba de tramos de yerba, llambries prietes y cruciar una pequeña riega. Ye un tramu nel que debemos tar sollerte ya qu'alcuentrase dalgún h.itu y dexamos puestu unu bastante importante, enriba d'una llambria que marca la bona direición a siguir.

Pasada esta travesía, tamos en dimposición de dir al alcuentru del seu Tres La Envernosa, que ye ensín dubia, el puntu nel que más menos sabes que l'aventura va en bon camín. Esti seu, siempre en travesía a la manzorga, ta pocu marcáu, pero entá somos a distinguilu, siendo'l primer pasu penriba d'un pequeñu matu.

Pali, pali, diremos alcontrándolu más pisáu ya incluso con dalgo d'armadura en forma de peñes a mou d'escalera, hasta salir a un par de llambries, que treparemos per onde más mancháu vemos de pasar los robezos y a la fín... taremos a la entrada de la canal Tres La Envernosa.

Toca navegar pa superar milenta resaltes siempre con pasinos cenciellos

Ye una canal estraña cuanto menos, ya qu'enfrente nueso tenemos cientos de metros de llambries mugoroses, perllavaes pel agua, poro'l nome de la canal ye más que descriptivu. Equí casi nun pega'l sol en tol añu y tien pinta de correr l'agua peruquiera, faciendo si cabe más complexa l'ascensión en munches dómines del añu.

Por suerte, alcontrámonos a mediaos d'Ochobre y tenemos les llambries sequines, la yerba seco tamién y lo únicu que nos fai sofrir ye la humedá que fai sudar ensin xacíu. Per delantre, un mundiu de resaltes, toos más cenciellos que'l seu anterior, pero que tenemos que dir navegando, restolando p'alcontrar los pasos menos espuestos.

Dicir que de primeres, vamos dir pegaos al cursu d'una riega a la manzorga de la canal, hasta tener que trepar pel canalizu onde caería un pequeñu tabayón, pa salir a la terraza superior, onde ya entraremos nuna fastera más herbosa que con tendencia a la mandrecha siguirá'l camín más evidente de terraza en terraza, superando con pequeños trepes los pasos que vamos alcontrando.

Pali pali salimos de la Envernosa pa poder asoleyar y quitar esi sudu y humedá brutales

Pasín a pasu, vamos ganando altor pela canal y vemos más cerquino salir de la solombra eterna de la Envernosa, col envís garrar el solín pa descansar una migayina. A estos altores tanto Ana como yo, vamos en mou totalmente de disfrute ya que perpasamos los momentos más complexos d'alcontrar la entrada a la canal y agora tirar de reductora ye dalgo que nun mos cuesta y más col rodaxe que traemos de los díes anteriores.

Paez mentira que vayamos totalmente relaxaos y que nun notemos dengún problema muscular, sicasí, decidimos facer una paradina pa tomar el sol, que seque la camiseta y picar dalgo de chocolate. Atrás dexamos, esi tarrén tipu morrena, con terraces, llambries y resaltes y entramos nun tramu de canal más típicu d'amiestu de pedreru y yerba.

Nel intre, vamos facer el caberu tramu de la canal, pa tener un par d'opciones de salida de Tres La Envernosa: una d'elles, que llevábemos a mou de plan B si díbemos mui cansaos, sedría siguir la canal de frente hacia la Cuesta'l Caballu dándonos un enllaz estupendu hacia la canal de Capozu faciendo una circular perguapa, ya que personalmente la canal de Capozu ye de les miós preferíes.

Salimos de Tres La Envernosa pa empobinanos pel H.ou Tres L'Ah.orcáu

La otra opción, sedría siguir la evidente canal que sal hacia'l Sur, empobinándose hacia'l H.ou Tres L'Ah.orcáu, siempre tomando de referencia l'aguya del Peñón. Nós, viéndonos fuertes y con ganes de finar los díes de monte con un tastu inmeyorable, decidimos siguir esti percorríu, con ganes de conocer un pocu más d'esti seutor de la Bermeya y salir pela h.orcada Pambuches.

Poro, siguiremos camín como dixe, dexando a la nuesa mandrecha'l Peñón y meterémonos nel h.ou col envís d'echar una güeyada a los cumales que lu arrodien, teniendo como cotes más representatives les torres Parda, Ita y Ciega, a la mandrecha de Pambuches y les torres d'Arestas a la so manzorga.

Atacamos la primer torre de las Arestas con unos trepes cenciellos

Viendo que los cumales de la torre Parda queden lloñe y que los d'Ita y la torre Ciega suponen l'usu de material, vamos decidinos por conocer las Arestas, pa les que traveseramos tol h.ou Tres L'Ah.orcáu y casi al altor de la h.orcada Pambuches tendremos de desvianos a la manzorga per tarrén amestáu de yerba y peña pequeño.

Ensín mayores dificultaes, averámonos hacia'l colláu pente les cotes de la primer y segunda torre d'Arestas, siempre con un par de visiones que nos dan ciertu picor de camiseta. Una ye la Torre Ciega, de la que tanto Ana como yo, tenemos lleíes varies rutes d'ascensión y que de xuru fadremos xuntos y otra ye a lo lloñe la cara sur de la Torresanta, que ya me va dando ganes de repetir, pero non pola normal.

Facemos cume na primer torre Arestas (2122 m)

Nestos camientos andamos, cuando entramos na parte cimera de la primer torre d'Arestas, la cual tien un pequeñu toque alpín, con un crestéu de tarrén descompuestu de grandes bloques, que más val dir sortiando y tocando lo menos posible hasta encumar los sos 2122 m d'altor.

Les vistes como siempre ablucantes, entamando por tol valle de Valdión, les Peñes Cih.uentes con tol seutor del Frieru, Hoyu Lliordes, Torre Salinas y más atrás les más recientes dendel Tiru Pedabeh.u a Peña Remoña y dende ehí esi mundiu de roca erma que ye los Urrieles colos seutores del Llambrión y la Torre Cerredu.

Vistes hacia tola redolada de Picos... increyible

Hacia'l Cornión, una estensa fastera parda llévanos per tol seutor de la Bermeya, faciendo maquinar al maxín como poder xuntar nuna ruta varios d'esos cumales. Nestes coses ando, cuando Ana intenta ufreceme dalgo de xintar, como siempre intentando cuidame, decidiendo meyor siguir a la torre Central ya parar un cachín cola calma.

Desfacemos el camín pela arista, non sin echá-y una güeyada a l'afilada arista NE de la segunda Aresta, diciéndome Ana que nin de coña se me pase pela cabeza. Agacho les oreyes y vamos a da-y la vuelta pa entrar pel llugar correutu como ye l'arista Oeste, non sin antes acolumbrar el nomáu pasu de travesía p'ascender a la torre Sur d'Arestas, el cual paeznos una auténtica escombrera y peligrosu enforma

Facemos la segunda de las Arestas nun tarrén bien divertíu de trepar

Entrarémos-y a la torre central, con un trepe per una llambria pela fastera norte, pa pasar dempués a la sur, onde tendremos de trepar fino y ganar una cresta de caliza perfeuta, con ambiente, pero con perbona adherencia, hasta salir a una amplia pedrera que fai de cumal nos 2128m.

Magar de dellos instantes nos que tiraba un airín fríu premonitoriu del cambeu de meteo pa mañana, el sol súmase a la folixa, dándonos unos minutos de relaxación, nos qu'esfrutamos de picar dalgo y charrar de próximes rutes a completar.

Cume na segunda Aresta (2128 m) cola presencia brutal de la Torresanta

Nun será por planes y ye que si pueu tar arguyosu de dalgo, cuntando cola compañía d'Ana que tien un bagaxe pel monte d'ablucar, ye de ser capaz de trazar rutes pa enseñá-y dalgo nuevo y ye que con una compañera tan motivada y aficionada al monte, da igual repetir canales, cumales o descubrir llugares nuevos... disfrútase dafechu.

Llevamos más de 6 hores de ruta y va siendo hora de pensar en baxar, ya que tenemos de guinda final, conocer los dos la h.orcada y canal de Pambuches, de la que tantes vegaes oyimos falar, pol so estáu escarnáu y rotu que fai, qu'ascendela seya un penar continuu.

Toca descender hacia la h.orcada de Pambuches

Poro, destrepamos la crestina, demientres la tercer torre d'Arestas déxanos claro lo pocu apetecible que ye, viendo una auténtica escombrera de cumal y con pocu más, alcontrámonos baxando lo más pegaos que podemos hacia la h.orcada Pambuches, pa nun tener que tornar a xubir dengún metru.

Aportaremos a la h.orcada y vemos unos primeros metros verticales enforma, teniendo que destrepar con curiáu, pasándonos a un llau y al otro del final de la canal, pa garrar les meyores repises nes qu'alcontrar los pasos más cenciellos.

Faciendo esta primer parte pela mandrecha la canal, llueu pasaremos a la fastera central, onde entamamos a ver que la fama ye cierta y que nun hai una peña que nun se mueva al tocala y ye que lo solombriega d'esta canal debe facer que les temperatures frañen la roca iviernu tres iviernu.

Canal perdelicada tanto pa xubir como pa baxar... munchu güeyu

Con varios trepes d'andar sollerte vamos descendiendo hacia les inmenses lleres que cayen dende la parte alta, onde camuda dafechu'l xeitu de baxar, tirándonos llera tres llera, siempre controlando una repisa onde poder parar ya que lu pindiu del tarrén fae que movamos auténtiques montoneres de piedres que garren velocidá de forma peligrosa.

Pali pali, vamos saliendo de la verticalidá y les lleres caltiénense más estables desendolcando un descensu más sele y depositándonos con rapidez a la mandrecha del argayu central, entrando ya nos praos que baxen dende'l colláu Pambuches.

Abandonamos Pambuches pelas traviesas del Hurden hacia la Vega Arestas

Equí pararemos otru pelín a echar un tragu d'agua y picar dalgo más, ya que paeciónos más seria y delicada de lo qu'albidrábemos nun entamu esta canal, que siendo sinceros ye tan mala pa xubila como pa baxala, así que munchu güeyu, porque más que mancase ún mesmu, ye más fácil mancar a un compañeru que vaya per delantre baxando o per detrás si vamos xubiendo.

Con tol pescáu vendíu, con una tarde preciosa y soleyera, tan sólo quédanos descubrir si podemos descender direutamente hacia Cordiñanes ensín tener que pasar per Posada Valdión. Pa ello, siguiremos descendiendo y envede siguir per Pantivalles, salimos a la manzorga a la búsqueda d'un senderín que nos lleve pelas Traviesas del Hurden y baxo l'argayu d'Arestas deposítenos na Vega d'Arestas onde alcontramos una bona fonte en caso de que tuviéramos que garrar agua.

Averámonos al puntu final de la ruta en Cordiñanes

Dende equí, continuaremos praos alantre hasta alcontrar un bon senderu que baxa per un pindiu terraplén hasta dar vista a unos praos con muria, nomaos como l'hoyu de Prienda, onde podremos garrar pista, que bordiando más de lo que nos prestaría déxanos al altor del mirador del Tombu, tan sólo a unos minutos de Cordiñanes.

Con casi 9 hores de ruta al llombu, 14,5 km de percorríu y 1640 m desnivel positivu, completábemos un total de 4 díes de xabazada montuna na redolada d'un pueblín, Caín, que camiento va ser un pocu, el nuesu campu base particular p'actividaes montunes y nuevos descubrimientos como esta canal de Tres La Envernosa que tanto nos prestó conocer, navegar ya investigar pa poder percorrela.

Camudando'l Camín siempre mirando próximos retos

No hay comentarios:

Publicar un comentario