viernes, 9 de noviembre de 2018

Poncebos (Cabrales) - Sollambriu - Estremeru - Peña'l H.ultayu - Vega d'Ariu (Onís)

3 de Setiembre de 2018

Track: Poncebos (Cabrales) - Sollambriu - Estremeru - Peña'l H.ultayu - Vega d'Ariu (Onís)


Madrugamos n'Uviéu, anque tampoco como pa morrer y cola calma conduciremos tola autovía'l Cantábricu hasta Posada, onde saldremos pel camín davezu hacia Arenas pasando per H.ortigueru, Canales, Carreña y Pó.

N'Arenas, pararemos a almorzar otra vegada y de secute, siguimos camín hasta Poncebos, onde si tou va bien, entamaremos y finaremos la nuesa circular de seyes díes pela redolada del Cares, faciendo camín pente los macizos del Cornión y los Urrieles.

Per delantre tenemos 6 díes de monte, de monte duro, ya que los planes nun son de pasiar, anque cola meteo un pelín revuelta vamos tener que llevar dellos planes B y C. Aparte, hai varios interrogantes aparte de la meteo, el mió xemelu cola recién rotura y si seremos a aguantanos durante 6 díes, Anina y yo, jeje.

Entamábemos en Poncebos (221 m)

El primer día, planiamos dalgo que nun mos mermara pal restu los díes y a la mesma vegada motiváranos pa siguir con más fuercia si cabe. Pa ello, albidré pente les canales qu'ascienden al Cornión, cual podría faltar per conocer y alcordéme d'un reportaxe de Monchu na qu'ascendíen la de Sollambriu.

Asina que tamos en Poncebos (221 m) y son casi les diez y media la mañana, pero viéndonos cola mochilona penriba'l llombu, ta claro que priesa nun llevamos o al menos eso paecen pensar los pasiantes del Cares que nos miren casi como bichos raros.

Caleyaremos la sienda'l Cares, que tanto Ana como yo, tamos fartos de facer, casi siempre p'aportar a llugares más interesantes que la propia sienda y aparte de charrar d'una mil coses, vamos nomando canal a canal, les que ya tenemos nel bolsiellu tanto a un llau como al otru.

Facemos tol camín del Cares hasta atopar la entrada a la canal de Sollambriu



Nun podemos facer otra cosa qu'echar un vistazu a la canal de Sabugu, que tantos disgustos tráxome na Travesera de fai dos años, pero quedámonos más bien con Estorez qu'entá dengún de los dos fuimos a conocer, asína que vamos apuntando na llibretina de pendientes.

Ensin danos cuenta (2 horines de ritmu pausáu), aportamos a la entrada de la riega Las Párvulas o lo que ye lo mesmu al entamu de la canal de Sollambriu, ye dicir, embaxo la Llambria, nesti casu unos mil metrinos penriba de la nuesa posición.

Metémonos nun espaciu xabaz... pocu transitáu ya increyible

Baxo la mirada pocu avezada de los caminantes del Cares, apartámonos de la multitú y garramos un senderu pocu marcáu qu'arranca pela mandrecha de la riega Las Párvulas. Con más esfuerzu del camentáu ya intentando dir pelo meyor que vamos alcontrando, ascendemos desnivel hasta dexar bien abaxo la sienda y adientranos nun mundiu empozáu pente parés y vexetación.

Sacante la parte d'aniciu de la canal, que faise duru pela piedra suelto, una vegada que metémonos na propia canal o más bien, na propia riega, vamos dir esfrutando a tope. Nun hai que dicir, que negociar per onde meyor vamos dir superando resalte tres resalte, ye dafechu divertíu y eso amuésase nes nueses cares en forma de sorrisa permanente.

Les trepaes son contines y les vistes hacia'l central van abriéndose

Nun soi a diciros de dificultaes, simplemente vamos superando trepe tres trepe, otra cosa ye garrar esta riega moyada, pero nel intre, taba seco y díbemos casi superando los pasos per onde nos petaba y más nos facía esfrutar.

Ca pocu, parábemos pa sacar semeyes pal central ya que les canales de Piedra Bellida, Ría y Agua, llamaben a fotografiar y de pasu picábamonos pa sacar dalguna semeya sonriendo ya que la seriedá va impresa nes nueses cares, jaja.

Pali, pali, vamos finando lo más empozáu de la canal y saldremos a la parte más amplia onde la vexetación, ganará tarrén a les llambries nidies de la riega y podremos alcontrar dalgo de solombra pa picar dalgo y descansar un puquiñín.

Empobinámonos hacia'l valle Estremeru col envís d'averanos hacia Les Cruces

A dicir verdá, ta faciéndose hasta curtia la canal, pero bono, ye'l primer día, fai calor y llevamos un mochilón más grande que nós, poro siguiremos cola calma, intentando siguir nesta parte dalgún qu'otru h.itu pa evitar les partes más abegoses de calizu y ablanos.

Al altor más menos de los 1300 m, tendremos que decidir si queremos garrar una salida de la canal u otra. La más direuta hacia'l nuesu destín que ye la Vega d'Ariu, tendría de dir averada a los parés que caen dende les cabeces de la Llambria, La Verde y el Covu, cerquina de la cueva Corrobre y la segunda llevaríanos a conocer el valle Estremeru.

Nesti casu, viendo que yeren entá les 3 y media la tarde, decidímonos por conocer el Valle Estremeru que tendría de danos continuidá hacia'l colláu les Cruces, míticu por ser entrada a la canal de Trea y pasu pente la llocura caliar d'Aliseda y la entrada a la Vega d'Ariu.

Dende les Cruces averámonos hacia la Peña'l H.ultayu


Una vegada que nos metemos nesti valle, nun tendremos mayores problemes que siguir el sen del propiu valle hasta atopar el camín que vien de Trea y ascender a los 1551 m del colláu Les Cruces, onde reposamos un ratín de les 4 hores y 1100 m direutos de desnivel hasta esti increyible mirador del macizu central.

Diez minutinos de reposu, una miradina al reló, otra miradina a la compañera y... pocu más que dicir, ye demasiáu ceo pa metese nel refuxu, vamos hasta la Peña'l H.ultayu que paez qu'entá tenemos fuercies pa siguir alantre. 

Facemos cume na Peña'l H.ultayu (1932 m)

Venticinco minutinos más y casi 400 metrinos de desnivel pa la patuca y tábemos nos 1932 m de la Peña'l H.ultayu, que ya ta ganando enteros na carrera por más ascensiones na mió llibreta, siendo la tercera nesti casu y de xuru que nun hai cuarta mala.

Siempre acaba siendo un placer tar un ratín nesti cumal, tan agradecíu y con tan bones vistes, pal Central y sobretou pa les nueses amaes canales del central, peles que tantes ganes tenía de volver a sentir baxo les miós botes.

Descendemos cola calma hacia la Vega d'Ariu

Unes semeyines de cume, munchos comentarios montañeros frikis, de si yo fice esto y yo lo otro, de si conoces esto o aquello y otra miradina pa les ñubes prietes que veníen per tras de la Bermeya y decidimos que va siendo hora de tirar pal refuxu que taba poniendose fresquín y díbemos mui gallos o trail correnderos en pantalón curtiu.

Pa cuando aportamos al refuxu, magar de 16,5 km y 8 hores y 20 minutos de patear, llegábemos al refuxu con tantes ganes d'echar una cervecina, que sentámonos cola calma baxo un finu orbayu a descansar, baxo los últimos rayinos de sol y con unos 1950 metros positivos de desnivel nes patuques más otros 450 negativos.

Les cares sólo yeren de... esfrutar del momentu, de la cena (menudes lenteyes riques) y al dia siguiente... más y meyor... siempre meyor.

Camudando'l Camín dende'l Cornión

No hay comentarios:

Publicar un comentario