lunes, 26 de noviembre de 2018

Colláu H.ermosu (Valdión) - Casares - Torreblanca - Cabaña Verónica - Áliva (Llébana)

6 de Setiembre de 2018

Track: Colláu H.ermosu (Valdión) - Casares - Torreblanca - Cabaña Verónica - Áliva (Llébana)


Tamos na cuarta estaya dientro de la nuesa particular pateada per Picos. Si na estaya anterior, na qu'ascendimos al colláu H.ermosu llibrando'l día como meyor pudimos, arribamos al refuxu envueltos nun borrín fondu, esta mañana llevantámonos del mesmu xeitu.

Ayeri, falábemos con bien de dellos montañeros, qu'esperaben pacientes a facer actividá al día siguiente y munchos d'ellos col envís d'ascender al Llambrión, inclusu con guía, pero les sos cares yeren más bien de poca esperanza pa cola meteo.

Salimos pente'l borrín en H.ermosu (2056 m)

El nivel de motivación montañero d'Ana y mía, ye siempre perpositivo, asína que preparamos tol material pa moyanos un día más. Despedímonos de los refuxeros y magar de buscar cobertura pa mirar la meteo y sacar a unos estranxeros d'enmarronase, entamamos a caleyar arropaos per un borrín y orpín que va calando poquín a pocu.

Como casi tolos díes, el nuesu plan A de travesar per Tiru Calleh.u hacia'l h.ou Tres Llambrión nun va poder ser, poro decidimos siguir polas Colladinas a la espera de que la meteo estabilícese o non. El casu ye que vamos calaos, al menos yo, mi gore ya dixo hasta equí y con un cutu tremendu vamos navegando pel H.ou de los Llagos, empobinándonos hacia la collada Ancha (2288 m) como meyor vamos viendo.

Toca navegar pente los collaos y los h.oos hasta'l Tiru Casares (2352 m)

Picos ye así, ya pues tener pelaú'l culu d'andar per esti tarrén, que despísteste una migaya y nun sabes onde andes. Tiramos d'esperiencia y gps y averámonos a los parés del cresteríu Madeh.unu-Torreblanca, penriba'l llagu Cimeru, siguiendo ya camín con menos problemes hacia'l Tiru Casares (2352 m).

La nuesa apuesta de dar un paséu al menos hasta cabaña Verónica y non tirar pela canal de San Luis, da unos mínimos frutos y en Casares, les ñubes llevántense y danos aliendu pa mudar la ropa y calecer con unos rayinos de sol.

Entamamos un faldéu calizu tremendu baxo'l Madeh.unu

Charramos un ratín y vemos que posibilidaes tenemos, viendo qu'al menos ún de los cumales que teníemos en mente pa güei, podríemos facelu, poro trazamos nel maxín el nuesu percorríu que tendrá de llevanos faldiando y llambriando baxo tolos parés del cresteríu Madeh.unu-Tiru Llagu hasta la Torreblanca.

Los rayinos del sol tornen a esapaecer, pero'l borrín caltiénse pelín más altu y vemos los suficiente pa navegar pente la caliza, esfrutando de trepar y destrepar per llambries, buscando pasos pente terraces con cayíes perimportantes, dacuando, so los h.oos Sengros.

Tamos falando d'un tarrén peligrosu, nel que saber movese y orientase ye perimportante. Nós, vamos encantaos, al menos tamos faciendo actividá y la mochilona paez pesar ca vegada menos, nos distintos movimientos que trazamos nesti llaberintu calizu.

Siguiremos baxo'l Tiru Llagu colos h.oos Sengros a lo fonderu

Quiciás, los tramos más abegosos, alcuéntrense nel enllaz baxo'l Madeh.unu y el Tiru Llagu, onde llevamos una mala esperiencia, alcontrando sangre na roca y material abandonáu y destrozáu pente les cuchielles caliares.

Desdexamos los malos camientos y fadremos un trepe considerable, pa superar la terraza que sácanos del Tiru Llagu hacia la Torreblanca, aselando'l tarrén y el borrín, que nos dexará tamién, orientanos pa garrar el cresteríu final hacia'l nuesu oxetivu.

Llambriamos hacia'l nuesu oxetivu del día... nun gafu día

Cola tranquilidá y seguridá, de que vamos facer cume na Torreblanca, decidimos divertinos llambrieando na cresta final, probando que l'adherencia na caliza de Picos ye ablucante, hasta cuando nun paró d'orbayar en tola mañana y la mayoría los tramos tan moyaos enforma.

Con casi 5 hores d'actividá en condiciones mui desfavorables, algamamos los 2609 m de la Torreblanca con un resol, que fai que tar sentaos nel puntu más altu de Cantabria, seya un placer pa tolos sentíos, anque nun seyamos a ver res en denguna direición.

Cumeee na Torreblanca (2609 m)

Personalmente toi feliz, facía tiempu que nun alcontraba con quien facer estes xabazaes, qu'anque siempre con seguridá, hai que decidise a tirar, a mirar y albidrar que trepada nun mos va dexar nun puntu de retornu complexu o cual ye la vira adecuada pa perpasar a la terraza correuta pa siguir camín.

Col trabayu fechu, sentámonos a picar dalgo, demientres les ñubes llevántense un pocu pa ver tola estensión del ermu tarrén de los h.oos Sengros, asina como amuésanos, que naide más anduvo per estos altores en tol día, ya que nun vemos nin oyemos xente nel cumal del Llambrión, oxetivu del 90% de los montañeros del refuxu.

Descendemos hacia la collada Blanca pel espolón noreste

Paez que'l día torna a emborrinase y decidimos descender pela normal, garrando tol espolón noreste per onde meyor va dexando facer pasu tres pasu. Alcontrando la roca pelín más descompuesta que na nuesa ascensión, vamos dando vista a la collada Blanca, pasu pente'l Picu Tesoreru y la Torreblanca que cuantayá, naguaba per conocer.

Nun tuve'l meyor día pa ello, pero prestóme ver l'accesu dende'l H.ou Grande qu'imaxinaba quiciás pa dalguna travesera futurible. Nun taba pa parar muncho y arrancamos darréu hacia Cabaña Verónica, siguiendo los milenta h.itos que traten de guiyar a los montañeros per tarrén tan complexu.

Col día gafu enforma, abellugámonos un ratín en Cabaña Verónica, xusto'l tiempu pa echar un café y una cervecina, dexar dalgo de perres al refuxeru y arrancar baxo un orpín continuu, pela Vueltona hacia la h.orcadina Covarrobres.

Empobinámonos hacia Verónica y dende ellí hacia'l nuesu destín n'Áliva


Ellí, siguimos pela pista p'abaxo, col envís de garrar el senderín que parte averáu a los Cuetos de Juan Toribio, empobinándose muncho más direutu que la propia pista, hacia'l hotel-refuxu d'Áliva, onde una vegada más, la cena dexara muncho que deseyar y la temperatura interna, fizo que tuviéramos col plumes en casi tou momentu, poro nun val lo que págase nin de broma.

En resume, una xornada más, llibramos el día de forma perpositiva, pero a bas d'echa-y tolanos al asuntu, d'arriesgase y confiar na nuesa esperiencia en monte, penriba de la previsión de la meteo y del estáu del tiempu nel intre... ya que nun yera mui recomendable andar nestes condiciones per un tarrén tan xabaz y complexo d'orientase.

Los 14,3 km, los 1060 m d'ascensión, los 1445 m de descensu y les 8 hores y media d'actividá nun son namái que datos oxetivos que nun reflexen el fríu, la moyadura, les males condiciones y la toma de decisiones continua, a cada tramu de ruta que díbemos llevar alantre, eso sí, siempre de rises y esfrutando de tar onde queremos... nel monte.

Camudando'l Camín xugando'l col borrín y la caliza

No hay comentarios:

Publicar un comentario