martes, 6 de noviembre de 2018

Vega Urriellu (Cabrales) - La Torre Cerredu

26 d'Agostu de 2018

Track: Vega Urriellu (Cabrales) - La Torre Cerredu


La vida, munches vegaes, llévanos a situaciones mui estrañes, teniendo cumes y h.oos de motivación pa depende qu'actividá montañera. Por suerte, como muévome siempre nestos deportes de monte, cuando nun toi motiváu cola escalada deportiva, toi col montañismu o l'alpinismu ya inclusu coles carreres pel monte.

Siempre hai un vínculu común a toes elles y normalmente ye Asturies y los sos montes, parés, valles, foces... tar na natura llámame enforma y ye lo que caltién esi espíritu de conocer más y más requexos, otra cosa ye qu'a cada momentu faígalo sele yendo a pies de vía o dedique'l mió tiempu a patiar o corretiar pel monte a lo xabaz.

Siguiendo con estos dixebraos momentos de motivación o desmotivación, dexara por unes selmanes la deportiva pa entrenar pel pueblu pa una carrera de monte. Los entrenos fueran bien, con cuatru salides llarguines, anque notara una carga fuera de lo normal nos xemelos, teniendo que parar los últimos díes pa recuperar. 

Preparamos el vivac baxo la borrina abellugándonos del orpín

La sorpresa fue cuando de la manera más tonta, rompí fibres nel xemelu baxando de la furgoneta al cargar los trastos pa colar de nuevu pa Xixón. A partir d'equí, escaecer la carrera, parte al seguru, mélicos incompetentes, reposu forciáu durante selmana y media y posible pérdida d'actividaes planiaes que tenía pa finales d'Agostu y primeros de Setiembre.

Con una mala hostia terrible, consigo que me faigan una eco, pa dicime que tenía rotura nel xemelu cola inserción del tendón d'aquiles, dándome de solución... el reposu. Nin sesiones de fisio nin hosties y eso díztelo un mélicu que nin te tocó durante los tres díes que tuve qu'averame hasta la clínica.

Nun se pue ser probe, sinon tires de fisio de confianza y que-y den pol culu al seguru. Si a perder el tiempu col seguru y nun poder correr la carrera, sumámos-y qu'a la selmana y media tenía plan p'ascender a la Torre Cerredu col grupu... taba que me xubía pelos parés.

Espertamos con un día ablucante dafechu... les vistes son brutales

El día d'antes de colar pa Picos, tuve la ecografía que confirmóme la rotura, poro decido esi vienres que nun voi dir hasta La Vega Urriellu al día siguiente. Otra cosa ye que llevantéme'l sábadu con un día ablucante y nun tenía planes prestosos pa facer, poro'l picor por tornar al monte yera demasiáu p'aguantame'l finde en casa.

Manda güevos que la temporada de monte, nun fuera nin muncho menos de les meyores y andaba con poca motivación, pero apetecióme tirar a Picos enforma y dempués de charrar colos interesaos y mercar cuatru coses pa vivaquear, decidí tirar pa Cabrales ensin dubialo.

Fernan, Benjamín, Txema y Eutikio adelantaríense cola calma xubiendo de tarde hasta La Vega Urriellu, onde teníen intención de durmir nel refuxu. Yo más pilláu de tiempu y perres, decidí vivaquear con Pepa y Jose, que xubien tamién a facer dalgo actividá pelos Urrieles.

Los titanes a los qu'acompaño baxo'l gran totem astur

Quedada n'Arenas, una birrina y cargamos trastos nuna furgo, ya que camentamos que Pandébano va tar a reventar como p'aparcar. Aportamos a Pandébano y al final nun ye pa tanto, anque xente si qu'había y conocida, como un grupu de collacios del rocódromu onde entreno que diben pal Picu pal día siguiente.

Colos dos palos, munchu mieu y un ritmín tranquilu voi xubiendo hacia la Vega Urriellu, llevándome una grata sorpresa al ver como'l xemelu va calenciendo pali pali, soi a aguantar los ritmos de la xente y cuando quiero dame cuenta voi tirando del grupu d'escaladores (Javi, Angel y Javi Escalada) tomándoselo con más calma Pepa y Jose.

En menos de dos hores, aportamos a la Vega Urriellu ensin mayores molesties qu'una carga normal nel xemelu. Tan contento, múdome de ropa de la sudada y busco a los collacios, que tan a bon recaudo tomando unes cerveces nel refuxu y aunque ya sabíen que xubía, la cara de sorpresa y allegría, prestóme enforma.

Míticu camín pela Corona'l Rasu hacia la h.orcada Arenera

Abrazos y una charra animosa, dió pasu a tomar unes cerveces con unos y otros, cenar fuera, saludar a muncha xente conocío... taba claro que la decisión de xubir hasta la Vega Urriellu fuera un aciertu. Sólo quedaba preparar el vivac con Pepa y Jose, lo cual fue un pelín complicáu y esfrutar d'una nueche pasada per orpín y borrina nel entamu, pa finalizar siendo una nueche espeyada con una lluna tan potente que paez que teníemos un farol enriba'l vivac.

Nun ye que se duerma muncho nos vivacs, pero tar descansando baxo l'atenta mirada del Picu Urriellu paga la pena, sobretou si podemos acolumbrar la so silueta cola lluz de la lluna o escucar como una cordada avanza pela Murciana, a les 5 la mañana col envís de facer les 4 cares nel día: Victor Sanchez.

Nós nun teníemos tanto que madrugar pa dir a la Torre Cerredu, pero Fernan, fízome llevantame a les 7 la mañana, cuando más a gustu taba dientro'l sacu. Ye más, acercóse per ellí, pa decatase de que taba esperezando al menos jaja.

Averámonos a la base de la Torre Cerredu

Un cafetacu nel refuxu y a recoyer un puquiñín les coses con Pepa y Jose, que teníen pensáu dir pa las Areneras poro teníen menos priesa. Los miós compañeros taben ansiosos y decidieron arrancar hacia la Corona'l Rasu ensin mí.

Nun m'importó, ya que tovía quedábame por preparar la mochila, poneme de curtiu y charrar un ratín colos collacios escaladores que diben pa la Sur deseyándo-yos suerte a los Javis y a Ángel na so primer andadura pel Picu.

Cola calma, arranqué siempre pensando en nun forzar de más la patuca, diciéndome que ya los pillaría, pero pa mi sorpresa xusto enantes d'ascender a la Corona'l Rasu ya tábemos tol grupu, axuntándome a Fernan, Benjamín, Eutikio y Txema.

Entamamos la primer parte del terracéu

Aporto a ellos y van encantaos, d'alderique, esfrutando d'un día preciosu en Picos. Yo venía un pocu más reflesivu, coles mies hestories internes, alcordándome de la primer vegada que trepé pela canalina que xube a la Corona'l Rasu, n'aquella ascensión al Neverón d'Urriellu.

Llevo una temporadina apartáu del monte, faciendo namás que les rutes del grupu y non saliendo a forzar la máquina, tanto física como mentalmente. Ensin facer ascensiones más potentes, picantes o espuestes dende va tiempu, pierdes un pocu esi instintu y saber movese nel monte, que va pillándose nel día a día, en cada trepada, en cada presa qu'escueyes o nel sofitu perfeutu pal pie que va facete nun resbariar.

Poro, voi en silenciu, ya intento empapame d'esa ilusión que lleven los collacios a los qu'acompaño feliz, ya que tamos nun d'esos díes nos que nun se pue facer otra cosa qu'esfrutar y ser feliz. Los collacios, que ronden la xubilación, lleven bien d'años nesto d'andar pel monte y nun se-yos ve con una plizca menos d'ilusión que llevaría un neñu... ye una pasada tornar a Picos con un grupu d'esti xeitu.

Facemos la vira a la mandrecha col trepe pel canalizu

Aportaremos a la h.orcada Arenera y daremos vista al nuesu oxetivu, La Torre Cerredu, que ya xubiéramos xuntos Fernan y yo, col GM Xuan de la Borrina va unos añinos atrás. Nel intre, adelantaremos a un grupu que nos precedía y siguiremos camín llambrieando peles falderes del Neverón d'Urriellu primeru y más tarde del Cuetu La Párdida.

A mui bon ritmu, siguiremos faciendo camín y plantámonos nel colláu d'entrada al H.ou Cerredu, onde ficiéramos una bona actividá Fernan y yo, ascendiendo la Torre Coello, el Tiru L'Osu y el picu Boada.

Darréu, entamaremos l'averamientu a la Torre Cerredu, perpasando'l pequeñu neveru d'entrada al canalizu que tien de depositanos na terraza intermedia magar d'un pequeñu trepe. Ellí, aconseyo a los compañeros que dexen les mochiles pa dir más llixeros y siguimos colos bastones pel senderu qu'en varies envueltes tien d'empobinanos nel trepe que da pasu a la terraza superior.

Siguimos cola llarga vira a la manzorga trepando con curiáu

Nesti pasu equivócome un pelín y meto una trepada desplomada innecesaria totalmente, jeje. Dende riba, veo los h.itos y ya faigo retroceder al grupu pa xubir pela normal, teniendo malpenes qu'afitar les manes nun par de pasos.

Dende riba'l canalizu, ya entamaremos tola vira hacia la manzorga, que caltien los pasos más espuestos y les trepaes más continues. Como siempre, voi atento a la evolución de la xente, pero veolos centraos y nun pierden un pasu nin una presa que voi garrando.

Asina que cuando queremos danos cuenta, tamos xustu nel final de la vira, parándonos nun abellugu pa dexar pasar a otros montañeros que baxan. Namái quédanos xubir a la h.orcadina final y una envuelta en trepada hacia l'arista, pa percorrela sele, esfrutando de cada pasu hasta'l puntu más altu d'esti país de montes: Asturies.

Cumaaal na Torre Cerredu (2649 m)

El día ye increyible, perclaru, tira una brisina fresca, pero con abrigase un pelín, tar nel cumal de la Torre Cerredu ye casi máxicu. Les vistes pa tola redolada, los collacios esfrutando de l'ascensión, les cares de satisfacción y felicidá por cumplir casi pequeñu suañu pa dalgunos.

Personalmente, nun pueu tar más satisfechu, los compañeros lo pasaron en grande, esfrutando de cada momentu y el xemelu, si nel día anterior xubiendo a la Vega Urriellu, fuera un pocu más molestu, en tol averamientu y trepaes p'ascender a esti torruxón de 2649 m nun me diera dengún problema.

Asina, que cola calma, entamamos el descensu tol grupu, siempre col másimu respetu y sin perder la tensión necesaria pa nun tener sustos. Fadremos tol destrepe ensin problemes y tornaremos a les mochiles pa sentanos a xintar y tomar el sol con un merecíu descansu.

Ablucantes vistes dende l'altor máximu de los Picos

Col llabor fecho, tan sólo tendremos que desfacer el camín de nuevu hacia la Vega Urriellu, col envís de sacar semeyes y volver a acolumbrar tantos cumales que tráenmos bones alcordances o quiciás tamién, posibles futuribles al nun teneles nel bolsiellu entá.

Eutikio va comentándo-y a Benjamín que-y falta por facer namás que la Torre Santa, pa completar la triloxía de cumales más altos de cada macizu de Picos. Ya me voi viendo'l percal y d'equí nun añu, ver veremos, dígo-yos,... la Canal Estrecha quiciás son pallabres mayores, asína que ye un tema a masticar cola calma.

Ensin más, diremos faciendo les paraes adecuaes na h.orcada Arenera, pa ver si vemos a Pepa y Jose, más tarde na Corona'l Rasu y como non, la cervecina tanto na Vega Urriellu como na Terenosa más tarde, serán totalmente obligaes.

Tornamos so los nuesos pasos col llabor bien fecho

En resume, una nueva visitina a la nuesa Torre Cerredu que nos llevó un total de 10 hores y 15 min, con delles paraes tranquilines, a les que podríemos amestá-y otres dos hores dende Pandébano a Vega Urriellu del día anterior pa facer unes 12 hores de caminar montuno normal.

En kilómetros falaríemos de 16 km + 6 dende Pandébano y en desnivel unos 1760 m tanto pa xubir como pa baxar, poro tanto pa mi patina como pa los compañeros nel día de güei, facelo en dos xornaes fue un aciertu total.

Lloñe de tiempos, kilómetros y metros de desnivel... les sensaciones de tornar a Picos, de tastiar el calizu una vegada más, reconcilióme col monte y dióme esperances pa poder afrontar un plan que tenía pa una selmana en Picos... que próximamente espero contavos.

Camudando'l Camín tornando al llar... el monte

No hay comentarios:

Publicar un comentario