Vega Urriellu (Cabrales) - Picu Urriellu

11 de Xunu de 2011

Track: Vega Urriellu (Cabrales) - Picu Urriellu

Alborecemos con un espléndidu día, como albidraben los servicios meteorolóxicos, y ye que dempués de tener n'ascensión a la Torre Carnizosu un día murniu enforma, necesitábemos esti día soleyeru pa facer quiciás el suañu de cualesquier montañeru: El Picu Urriellu. Pa ello, enantes de nada, tocaba desayunar nel refuxu de Vega Urriellu, al que llégase de la siguiente manera: Vega Urriellu

Con estes vistes alborecemos

Paez qu'hai más nervios de lo normal nel refuxu o esa sensación ye la que pue amosáse nel desayunu, con xente falando ensín parar y munchu baruyu de mochiles, fierros y cuerdes nos preparativos posteriores, ya que van ser 3 los grupos que van facer el Picu pola vía Sur Directa, abierta polos Martínez cuantayá.

Los primeros en salir del refuxu preparaos, foron los dos clientes que tenía'l guía Erik Pérez, al cual teníemos intención de siguir, col envís d'echar un vistazu a esi primer llargu de IV+ o V- según les guíes que t'echases al güeyu. Detrás nuesa, saldríen con muncha tranquilidá, un grupu d'espeleolocos burgaleses, colos que convivimos tol finde nel refuxu.

Preparaos, llistos,.... YA!! a pol Picu

Son les 8 la mañana, cuando tamos saliendo del refuxu,... paez mentira que llevantándonos a les 7, ya tuvieramos desayunaos y con tolos trastos (cuerdes, friends, empotradores,...) repartíos, pa empobinanos a la canal de la Celada. Será que tábemos ansiosos por ver ceo la cara Sur d'esti monumentu a la caliza.

Caleyando a pola Celada una vegada más

Despedímonos de la Vega Urriellu, y de dalguno de sus "habitantes", como'l Neverón d'Urriellu, y baxamos hacia l'entamu de la canal de la Celada, la cual díbemos facer por segundu día consecutivu, por mor d'averanos al H.ou Treselpicu una vegada más.

La Celada cola Torre Carnizosu al fondu

La verdá ye que nestos momentos, nun se sabe mui bien que pensar. Tamos yendo al picu más naguao d'Asturies, y anque vayamos a xubilo por su cara más sele como mínimu un intensu nerviosismu ye más que xustificable.

Tito na Celada y el Picu dende cerca'l colláu de la Celada

De la que vamos xubiendo la Celada, separtámonos en grupos, German, Iván y yo, damos-y un pocu más de zapatu, demientres falamos de l'ascensión que ficimos el día anterior a la Torre Carnizosu y de lo meritoriu d'ésta nun día nel que la borrina y la humedá, fizo que nun fueren les meyores condiciones nin de roca nin d'orientación pal ascensu.

Fernan, que xunto a German, son los únicos que ya xubieren al Urriellu, va per detrás con Tito, faciendo mil y una semeyes, ya que'l día ta pa ello, y quiciás albidren qu'una vegada que temos na paré, nun vamos poder sacar toles semeyes que quisiéramos.

Col Picu detrás

Vamos bordiando'l Picu, descubriendo cada nueva forma que nos amuesa y tamién vamos pescanciando les dixebraes víes de la cara este que lu xuben, hasta qu'aportamos a les cercaníes del colláu de la Celada, onde averarémonos hacia la paré Sur, que ya entamamos a agüeyar casi en tola so estensión.

Los tres reis del H.ou Treselpicu: Carnizosu, Osu y Morra

De xemes en cuando, desviámos la vista hacia les otres besties del h.ou Treselpicu, pero son les menos, ya que tenemos la vista puesta na base del Picu, y casi xubimos corriendo les últimes llambries hacia l'entamu de la nuesa vía, ya que la cordada anterior taba nos primeros pasos del primer llargu y queríemos velo.

Somos 5 y ya práuticamente tenemos decidío, como vamos a dir. Germán, el que más esperiencia tien, va xubir a Tito y a Fernan, y la segunda cordada la fadremos Iván y yo, que dempués de da-y munches vueltes, decidimos que xubirá de primeru Iván, ya que tien más conocimientos téunicos de cara al montaxe de reuniones, seguros,... y eso pesa más que mi mayor grau de deportiva.

Esperando na base demientres vemos el primer largu

Y ye que l'alpina, ye dafechu diferente. Nun esisten eses chapes que tanto nos prestan a los escaladores y los friends y empotradores, nun dan esa seguridá tan naguada. Poro, el escalador ta faciendo un trabayu doble, tien qu'escalar pero tamién tien que tar sollerte, d'asegurase ante una posible caída, y una norma na escalada alpina, ta penriba de toes les demás,... meyor nun cayése.

Cuando nos queda'l primer llargu llibre, German, pónese a ello, con unos primeros pasos con ciertu nerviosismu, ya qu'esta vía nun lo conoz y a pesar de ser más fácil qu'otres que fizo, como dixe enantes, meyor nun cayese n'alpina.

Fernan nel primer llargu y na reunión con Tito

Sin problemes, fai los pasos más difíciles y aporta a la reunión, onde asegura primeru a Tito y llueu a Fernan, que tamién superen ensín problemes el llargu. A too esto, Fernan, xubió les nueses cuerdes, y vamos facer un ascensu tanto Iván como yo, de segundos. Esto facilita les coses, ya que nun tenemos qu'asegurar el llargu, y en menos de dos minutos xúbolu ya Iván algámalo tamién, ensin nenguna dificultá.

Equí, nel ñeru de la primer reunión, vamos quedános Iván y yo solos, y entamen los problemes. D'aniciu, ya tenemos nidiu, qu'aseguranos con dos cuerdes de 10,2 mm y un reversu, yera una xera abegosa enforma por mor del rozamientu tan grande nel asegurador y pa siguir, la salida del segundu llargu yera pelín h.odía y nun les tenemos toes con nós.

Menos mal, que nesto aporta tamién a la reunión, Jorge, un de los "espeleos" burgaleses y el que más esperiencia tenía n'escalar. Gracies a él, Iván saca la salida del segundu llargu y desapaez de la mio vista paré arriba, sacando un llargu de primeru que camiento-y resultó un antes y un dempués na so vida como escalador.

Iván aportando y finando'l segundu y tercer largu

Si señor, güevazos que-y echó, y amás usando ellementos qu'enantes utilizara como friends, dalgún puente roca,... Yo ensín más, quedéme asegurándolo dende la reunión, demientres entreteníame con Jorge quitando tensión y entrugando-y a Iván que tal diba de xemes en cuando.

A tou esto, ya decidiera col collaciu burgalés, que díbemos desfacenos d'una de les cuerdes ya qu'asegurar a dos cuerdes col reversu yera un peñazu. Asína pues, tiramos una cuerda pa la base'l picu, y escucho que ya toi aseguráu y que ya puedo entamar a xubir, colo que tiro p'arriba y plántome na segunda reunión, onde-y doi la norabona a Iván por sacar el llargu.

German asegurando'l tercer llargu y abriendo'l cuartu

Penriba, tou se supón correutu, ya que nun vemos a naide, y namái oyemos que ya podemos xubir o que non, pente los glayíos de la cordada que nos sigue, los cuales son abondo más ruidosos que nós, lo cuál amuesa una despreocupación y tranquilidá a la cual envidiamos fonderamente.

Tenemos la señal, ya Iván, métese con muncha más confianza nun tercer llargu qu'a la fín, diba ser el más fácil y "deportivu" de toos, con munchos agarres y un diedru que protexe tola escalada, hasta aportar los dos a la reunión ensín nengún problema y muncho más tranquilos.

D'esta reunión, vamos entamar el cuartu llargu, del cual comuníquenmos d'esferes más altes, ye dicir, de la primer cordada nuesa, que nos dexen los seguros puestos, colo qu'una cosina menos de qu'esmolecese.

Iván ya saliendo del marronete del cuartu largu y yo acabándolo a lo lloñe

Esti cuartu llargu, ta cotáu como IV+, y ye un llargu perllargu, jeje y tien el toque "especial", de facése al traviés de los pernomaos tubos d'órganu. Nun ye que seya mui difícil, pero ye tendíu, pelín vertical y necesita muncha confianza y decisión pa llevalu alantre, ya que nun ye cenciellu d'asegurar.

Cola primer reunión, foi na que más tiempu tuve colgáu como un chorizu de la paré, ya qu'Iván metióse nun marrón, al siguir hasta'l final del diedru, quedando-y dempués una travesía d'esquierdes espuesta hasta la reunión.

Equí tuviemos unos bonos momentos de tensión, ya que tuvo que ser rescatáu tirándo-y una cuerda Tito, pa que pudiera dar fin al llargu ensín peligru. Por mi parte, tuve tol tiempu asegurando a Iván, demientres falaba con Jorge, que como siempre llegaba per detrás, como primeru de cordada y dábame conversación pa lliberar tensión.

Xubiendo'l quintu llargu a lo sherpa, bufff...

Ensín más, tocóme'l turnu, y tiré p'arriba de frente, primeru pegáu al diedru y llueu a lo xole, per un tubu d'órganu, el cual dióme un puntu de diversión nesta escalada d'adherencia. Otra vegada, que nun sufrí nin un instante, y ye que dir cola cuerda penriba ye lo que tien, date una tranquilidá que nun lleves si vas camentando que debería meter equí dalgo p'asegurame o que si me caigo vaya hostia, etc...

Llegué a la cuarta reunión, y alcontreme, con que Fernan, Tito ya Iván, ya xubieran el quintu llargu ensín asegurar, y que diba tocáme facer lo mesmu, pero cargáu con una mochila, tol material que fuera recoyendo enantes pola vía y de regalu una cuerda de 70 ms nel cuellu.

Descansando y dexando les mochiles pa les trepaes finales

El descansu nel ñeru del final del quintu llargu foi xustificáu, ya que'l pesu que llevaba enriba y la puta cuerda que nun me dexaba ver onde ponía los pies, fizo algamar una tensión grande qu'aumentaba más inda si mirábes per debaxu del sobacu pa la caída hacia l'abismu que teníemos baxo los pies.

Finalmente, acabóse la parte d'escalada del Urriellu per esta cara Sur, y darréu, tres poner les botes de montaña, tocábanos garrar una canalina de trepada hasta l'arista cimera del Picu. Esta parte, dempués de dexar les mochiles nel anfiteatru al final del quintu llargu, ye una pasada y más sabiendo que tas a puntu de ganar l'arista que dará pasu al cumal del Picu Urriellu.

Xubiendo pol canalizu hacia l'arista cimera

Impresión ye la pallabra más afayaiza, pal instante nel que pones los pies n'arista, ya que ves unos metros más alantre desapaecer el suelu, no que sabes a les clares que ye una caída de más de 500 ms hasta la Vega Urriellu. Acoyonar, acoyona...

Asína, qu'avanzamos intentando nun facer nenguna babayada y aportamos a los 2514 ms del cumal cimeru del Picu Urriellu a les 2 menos cuartu de la tarde, práuticamente 3 hores dempués de qu'esguilásemos l'entamu de la paré sur del Picu.

Delles semeyes n'arista cimera

3 hores d'actividá na paré, a les que teníemos que sumar otra hora esperando na base hasta que nos tocáse da-y y otra horina más d'accesu dende'l refuxu a la paré, facíen sumar casi 6 hores en total pa da-y preste al Picu.

Poro, camientu que nun yera cansanciu la verdá, pero si que la tensión facíase notar, y paez que'l cuerpu reláxase más de lo debíu, y entren a xugar un pocu los nervios, ya que tas enriba l'Urriellu y nun ye'l momentu de facer el fatu, jeje.

Na cume del Picu Urriellu (2514 ms)

Sensaciones.... pues nun se. Camiento qu'habrá xente que-y parecerá'l mayor llogru montañeru de la so vida, pero.... yo taba ellí arriba defraudáu quiciás. Nun se por qué, pero nun me paeció que l'ascensión fuera mía... ya que dientru de mi, sabía que l'ascensión del Urriellu, tenía que merecémela y que nun foi asína.

Simplemente xubí.... detrás, ensín esfuerzu, ensín peligru, ensín esposición, ... en definitiva ensín entender nada. Y eso foi lo que más me h.odió, la poca preparación cola que fui al Urriellu, el que te faigan tol trabayu otres persones y t'aproveches d'ello pa facer una cume.

Unos segundos dende'l cumal del Urriellu

Sensaciones agridulces... la verdá. Per un lláu ta l'Urriellu algamáu y con collacios. Un placer compartir cordada con Iván, que tien tol méritu d'esta ascensión, al igual que German, que fízonos de guía y tamién gracies al bon facer de Tito y Fernan.

Toi arguyosu de xubir al picu con Fernan, que quiciás, si nun fuera porque yo quería xubilu, nun tendría mayores ganes de tornar a él, casi 30 años dempués. Ellos si que tienen méritu, y ye que'l méritu d'una ascensión ta en saber que ye lo que se fai y lo qu'hai que facer en cada pasu, en cada reunión, en cada seguru,...

Vistes de los demás cumales de los Urrieles

Lo prestosu de la escalada alpina, nun ye'l grau de les víes, nun ye la dificultá de los pasos, nun ye la esposición pol altor,... lo prestosu de l'alpina a la escontra de mi añorada escalada deportiva, ta nel conocimientu.

El conocimientu de les mil y una téuniques de facer ñudos, d'asegurar a un compañeru, de montar una reunión con seguridá, de meter seguros, etc... son munches les coses qu'hai que saber y facer y munchos tamién los ellementos qu'entren en xuegu y de los cuales hai que tener un conocimientu previu y una esperiencia d'usu que carecía dafechu.

Asína que sí, ya tengo l'Urriellu en mi sacu, pero yo nun lo xubí, a mi xubiéronme y eso nun me val. Tornaré pa que seya míu de verdá.

Baxando de nuevu al ñeru onde dexames les mochiles

Estos camientos rondáronme pola tiesta tol ratín que tuve nel cumal, pero tamién pude esfrutar con mis collacios de tan nomada cume, cellebrando con rises y bon rollu un ésitu que nun sería talo, hasta que tuviéramos de nuevu colos pies na roca caliza de la base del Picu.

Magar, del esfrute de la cima, na que xintamos un pocu de quesu gamonéu, dellos frutos secos y chocolate, decidímonos a baxar ya, dempués d'acolumbrar toles cimes de los Urrieles habíes y por haber.

Hai que dicir que'l Picu a pesar de nun ser el más altu, si que ye céntricu a más non poder, y tiénse una visión de 360 grados, como nun la hai en tolos picos d'Europa, colo que ya solo por esto y por su miticismu, una vegada na vida, paga la pena tar enriba de semeyante totem.

Rapelando y añeraos na reunión

Con esto ya, dicimos alón al cumal del Picu, y garramos l'arista cimera hasta'l canalizu qu'en destrepes entreteníos, dexarános na quinta reunión onde dexáramos les mochiles. Equí será onde preparamos el primer rapel, que nos dexará na cuarta reunión, nun rapel perfácil como quien diz de calentamientu.

Dempués, tocará pasar un ratu mui llargu papando dalgo de fríu, ya qu'en tol día nun se quitó un vientín molestu que nel mio casu, fízome pasar fríu en dellos momentos d'espera na paré, primeru asegurando na escalada y llueu acurrucáu hasta que me tocáse'l turnu de baxar rapelando.

Últimu rapel y Fernan en plenu rapel hasta'l suelu

La verdá ye que 5 persones rapelando a turnos, ye pelín coñazu, y les ganes d'aportar al suelu fueron aumentando colos minutos de tar colgáu como un chorizu en delles reuniones. La nota graciósa túvose na segunda reunión dempués de rapelar de la cuarta reunión a ésta, onde axuntámonos los 5 na mesma reunión, casi ensín tener sitiu p'afayanos, jeje.

Xintando'l bocata al fin, col mar de ñubes que yera Asturies

A la fín, tocábemos suelu, y casi daben ganes de besalu, dempués de tantes hores nos altores del Urriellu, pero les ganes de xintar el bocata yeren más fuertes, asína que recoyimos tol material y baxamos hasta'l colláu de la Celada, onde pegaos a una roca pergrande, sentámonos col envís d'esfrutar del mar de ñubes que yera Asturies, y nel mio casu d'un bocata de salchichón de casa Ezequiel (Vil.lamanín), que quitaba'l xacíu.

Una cervecina pa cellebrar l'ésitu de l'ascensión

Magar d'esti pequeñu descansu, tocaba baxar pola Celada hasta'l refuxu, onde garramos unes cerveces pa brindar l'ascensu y l'algame del Picu Urriellu. Equí ye onde entames a da-y esa importancia debía al ascensu, anque como ya dixe enantes, el sentimientu agridulce de l'actividá nun me dexó esfrutala dafechu.

Pero, como nun hai mal que por bien nun venga, la siguiente idega que metióseme na tiesta foi solventar esos problemes de conocimientu, con unos cursinos d'escalada alpina pa tolos interesaos del GM Xuan de la Borrina, asína qu'espero deprender tolo posible pa siguir avanzando nesta estaya de la escalada tan prestosa, col envís de facer nel futuru nueves actividaes que vaya empobinaes al ésitu dende la seguridá y el conocimientu.

Cara Sur del Picu Urriellu y Jorge qu'echónos un bon gabitu
Info téunica so l'ascensión (Grupu de Montaña El Maquis): Picu Urriellu

Más nada,... el Picu algamáu dempués de 9 hores y 45 minutos d'actividá nos que camínense tan solo unos 5 kms, y supérense trepando y esguilando 612 ms de desnivel direutu, de los que 160 ms son d'escalada dafechu.

Camudando'l Camín dende'l Picu Urriellu

Nesta ascensión ficimos el míticu Picu Urriellu de 2514 ms que ye: dos mil de Cabrales y pertenez al Club 111 de Picos d'Europa.

Ver progresos en: Retos montañeros