viernes, 8 de julio de 2011

Poncebos (Cabrales) - Trabe Norte - H.ou de los Cabrones (Cabrales)

18 de Xunu de 2011

Track: Poncebos (Cabrales) - Trabe Norte - H.ou de los Cabrones



Collacies, collacios... con toos vosotros,... l'últimu retu del añu montañeru del GM Xuan de la Borrina... Torrecerréu. Y siendo Torrecerréu, bien se merecía facer una ascensión curiosa y ensín priesa, poro escoyimos facela bien dende baxo y en un par de díes, nos qu'esfrutar del macizu Los Urrieles como correspuende.

Asína que, tocónos madrugar un puquiñín a Carlos, Canta, Pangua, César y a mi, col envís d'alcontranos con Fernan, Bittor ya Iker en Arenas pa desayunar como bien se merez. La ruta en coche foi la davezu, Xixón-Posada pola autovía del Cantábricu, pa garrar direición l'Altu Ortigueru y d'ehí ya en Cabrales, pasar polos pueblos de Canales, Carreña, Poo y Arenas al fin.


Salimos de Poncebos (213 ms)

Magar del desayunu, tiramos en direición Sotres, pero esta vegada quedámonos ya nel parking de Poncebos, onde preparamos mochiles pa dos díes de vida na montaña, ya qu'esta nueche vamos durmir nel refuxu del H.ou de los Cabrones, el cual ta encaxonáu, nun de los llugares más guapos y xabaces d'Asturies.

Pamidega, que tamos pelín nerviosos y too. Tenemos por delantre, dalgo más de 2000 ms de desnivel a superar, asína que más nos val dir poquín a pocu nel día de güei. Salimos a la fín, sobre les 9 menos cuartu la mañana, y empobinarémonos hacia'l Puente la H.aya, onde tendremos que garrar la canal del Texu hasta'l pueblu cabraliegu de Bulnes.


Vamos averándonos al puente la H.aya

Vamos sele nel caleyar, ya qu'hai xente que nun tuvo muncho nestos llares, y sacar semeyes a dolor, ye un de los mayores pasatiempos qu'hai nesta vida, anque camiento qu'estes coses siempre pasen al entamu hasta que'l cansanciu pasa factura y sacar la cámara ye un gastu innecesariu de fuercies.


Entamamos la canal del Texu

A lo que díbemos, salimos de Poncebos, y avanzamos pola carretera que va hacia la Sienda del Cares, hasta que topámonos col Puente la H.aya, onde baxamos casi hasta'l ríu Cares, pa namái pasalu penriba, entamar esta preciosa canal. De primeres, diremos pel llau drechu'l ríu Texu hasta'l puente'l Zardu, onde ya garraremos la manzorga'l riu y nun l'abandonaremos en nengún momentu hasta aportar a Bulnes.


Caleyando pola canal hacia Bulnes

Nun se si será pola hora, anque tampoco ye mui ceo, pero casi nun alcontramos a naide en tola canal, y eso que ye ún de les más guapes, accesibles y fáciles que fice. Van encaxonada ente la Peña Maín y el Murallón d'Amuesa, faciendo a tramos delles envueltes píndies y n'otros llargos tramos rectos pocu tendíos, faciéndose hasta relaxante'l caminar hasta Bulnes.


Desvíu hacia la canal d'Amuesa cola peña'l Tornu enriba

En pocu más d'una hora, aportamos al puente Colines, onde podríamos xubir a la parte alta de Bulnes, y salir ya a la que sería la segunda canal del día y la que nos fadrá sufrir de verdá, la canal d'Amuesa.

Pero, como la nuesa primer intención yera desayunar en Bulnes, y por culpa mía, too sea dicho, que nun me sonó l'alarma'l móvil, tuviemos que facelu n'Arenas, pa que nun esperasen muncho los collacios vascos, decidimos tomar al menos una cervecina en dalgún chigre del pueblu.


Tomando una cervecina en Bulnes (639 ms)

Aportamos a Bulnes, y paramos nun chigrín que ya güel a fabada al llau del ríu Texu. Tien coyones pero casi dános fame y too, jeje. Escaecémos esto, y tomámonos una cañina cáun, que sinceramente sábenos a gloria, anque nun paramos más, que sinon sentámonos na terraza y nun salimos d'ellí, jeje.


Salimos del barriu altu de Bulnes hacia la canal d'Amuesa

Magar del toque alcohólicu, una cerveza a les 10 de la mañana nun ye mui normal, vamos xubir hacia'l barriu cimeru de Bulnes, y n'él ye onde tomaremos la canal que nos fadrá ganar casi tol altor a superar del día,.... así a lo xabaz.


Primeros pasos pola canal hacia la fuente'l Tornu

La primeros metros de xubida son per verdes vegues hasta qu'aportamos a la fuente'l Tornu, onde recoyemos augua pa la dura ascensión que tenemos enriba, y la cual pocu más alantre ya vemos a les clares.


Aportando hacia'l cuellu de botella de la canal

Pasín ente pasu, vamos dir alcontrándonos con que les amplies vegues onde pastiaben vaques y xatos, desapaecen de la nuesa vista y la canal estréchase faciéndonos dar envueltes al traviés d'un amiestu de pedreru y yerba.


Metíos no más pindiu de la canal

Nun hai secretos pa esto, más que paciencia y ritmu (caún el suyu) demientres fales de mil temes, si ties aliendu pa ello o distráeste col paisaxe, ya que'l día taba impresionante anque de xemes en cuando tiraba un airín dalgo friucu.


Tola canal con Pandébano a lo lloñe y la mah.ada d'Amuesa

Finalmente, dempués de dos dures hores de canal, aportamos al colláu cima, onde tenemos unes vistes ablucantes de tola canal que sofrimos, con Pandébano al fondu, Peña Maín, y sobretoo de la guapa y conservada Mah.ada d'Amuesa.


Esperando nel colláu a Carlos y Canta que veníen pelín más atrás

Equí taremos un ratín descansando hasta que nos xuntamos toos, porque como ya dixe, lo meyor nestos casos ye llevar un ritmu propiu y continuu, así que llegamos un pocu desperdigaos. Nun fai falta dicir, que dalgunos de nós, más que mirar p'abaxo ya andávemos acolumbrando'l cumal del Cuetu del Trabe norte, el cual diba ser un prósimu oxetivu, anque secundariu, ya que lo importante dafechu, yera llegar al H.ou de los Cabrones enteru.


El Cuetu del Trabe norte ta xixilando enriba nuesa

Tamos a 1414 ms d'altor, colo que nesti puntu superamos dende Bulnes casi 800 ms de desnivel, quedándonos inda otros tantos por facer. Poro, siguimos alantre pel senderu qu'empobínase pela cuesta del Trabe, y que como diz so nome, costar cuesta, la mui... perra.


Dexamos les mochiles nel crucie hacia'l H.ou de los Cabrones y a pol Trabe Norte

Casi otra hora y más de 400 ms de desnivel vamos a superar nun tramu, nel que'l sol va escondese, y va dexar pasu a una ñebla baxa que trai muncha humedá y esi vientu fríu, que déxate destempláu del too.

El fin d'esti tramu como non podía ser, ye'l crucie que nos va llevar hacia'l H.ou de los Cabrones, pero inda nun ye'l momento. Nel intre, vamos dexar les mochiles nunes piedres, y vamos quitános pesu, pa entamar l'ascensu al Cuetu del Trabe norte.


Xubimos per fáciles llambries siguiendo dellos h.itos

Preparámonos, y salimos p'arriba, siguiendo dellos h.itos, qu'indícanos el camín a seguir. Esti camín paecía cortu, pero'l cuetu en cuestión tien una señora pala que faerános tener que superar casi otros 400 ms de desnivel, pente llambries, balcones y canalizos, qu'albidren un final que nunca paez llegar.

Y ye que son 50 minutos los que necesitamos pa encumar esti norteñu cumal de 2231 ms del cresteríu del Trabe. Cresteríu, que ta cortáu precisamente pola aérea H.orcada del Trabe dende esti cumal al restu d'ellos que lleguen hasta la collada L'Augua, mui cerquina del refuxu de Cabrones.


Ablucante cumal del Cuetu del Trabe Norte (2231 ms)

Enriba, tenemos ñubes y claros, que nun mos dexen acolumbrar como tan bien se merecía, tola grandeza de Picos, pero aún así, somos a dixebrar delles canales que xurden dende'l Cares hacia'l Cornión, alla a lo baxo, o dalgunes grandes cumales de los Urrieles que ñacen tamién dende'l faldón del Cares p'arriba.

Como nota toponímica, vamos decir que tou esti conxuntu de cumales del Trabe, con B, toma nome de la pallabra asturiana Trabe, que significa: llugar onde ye fácil los argayos de ñeve. Nun se m'ocurre un llugar meyor pa ellos, coles dos grandes caídes hacia'l Cares o hacia'l H.ou Lluengu.


Carlos fizo delles semeyes demientres esperaben: Albos, H.orcada del Trabe y Peña Maín

Ensín, más baxamos lo más aína posible, ya que sabemos que los "Carlos", lleven tiempu esperándonos pa xintar, ya que nun se vieron con fuercies de facer esti cuetu, pero aún así, pasaron fríu abondo na espera, hasta qu'aportamos al puntu d'alcuentru, onde xintamos el bocata nun tris que yera bien tarde (les 3 de la tarde), y había fame a esgaya.


Xintando toos xuntos colos Albos como protagonistes

El paisaxe d'esti macizu nun pue ser más ablucante... como amuesen les semeyes que ficieron durante la espera. Nun sabes mui bien si tas de verdá nesti mundiu, ya que nun esperes alcontrar estes mezcles de verdes de les vegues col cielu azul y blancu de les ñubes, y pel mediu tola tonalidá de grises calizos imaxinables. Picos me tien namoráu.


Averándonos a les parés del Trabe

Magar de la xinta y el descansu, siguimos alantre, esta vegada ya hacia'l destín final: H.ou de los Cabrones. Cuando damos los primeros pasos, llevábemos casi 7 hores de ruta, y les pates gláyenmos que nun ta la cosa pa munches folixes.

Con esti mal arrancar, vamos garrar senderu, pente dalguna veguca escondía ente roques calices inmenses, y vamos averános hacia la paré del Trabe, sin mayores dificultaes que dalgun destrepe de llambria y el cansanciu que llevamos enriba.


Dalgún pasu de llambria y cuevona na paré del Trabe

El avance per esti infiernu de pequeños h.oos, faíse pelín abegosu. Poquín a pocu, vamos dir separtándonos en grupos, y yo quédome colos Carlos, ya qu'ellos sentó-yos pior inda'l parón ya que perdieron una hora esperándonos.


Siguimos avanzando baxo la paré de los Cuetos del Trabe

Sacante d'echar un güeyu a los naguaos Albos, nun habrá muncho que ver hasta que cruciamos un ñeveru allongáu, y xubiremos hacia un hombru, nel qu'hai unes cuerdes fijes, supongo que pal iviernu, porque en branu nun son mui necesaries.


Otru pasín aseguráu y Cabrones al fondu asoma

Esti ye un puntu máxicu, ya que ye la primer vegada, que vemos el Picu Cabrones apaecer ante nós, y nun pue ser más prestosu. Paez el picu perfectu, cola so forma triangular y amás bien acompangáu d'un garrapiellu d'aguh.es que faénlo más inaccesible y agreste.


Los Albos y Areneras y Cabrones y Dobresengos (un mundu de caliza)

D'equí n'adelantre, el caleyar será más fácil, ya que tamién apaecerán los picos de Dobresengos, onde xusto embaxo tendremos el refuxu, dándonos ánimu, y distrayéndonos nel camín hasta'l puntu d'escaecer casi la frayadura que llevamos enriba.


Dalgún pasín aseguráu y los Dobresengos enriba

Un pasín más, aseguráu de cuerda, será la última dificultá, y ya veremos el h.ou de los Cabrones onde asítiase'l refuxu que nos dará cobixu, y lo que más nos importa, una cerveza como mínimu y un asientu pa dexar de caminar al menos pol día de güei.


Al fin tenemos el refuxu a la vista, los "Carlos" se lo curraron

8 hores y 10 minutos, va ser el resultáu d'esta ruta, que particularmente me prestó munchísimu. Son llugares que nun conocía del macizu de los Urrieles, y anque l'accesu hasta equí ye una bona soba, paga la pena ver picos como Dobresengos o Cabrones, a pesar de tol desnivel acumuláu qu'hai que llibrar (2480 ms) y de la distancia percorría (13.8 kms).


Nel Refuxu del H.ou de los Cabrones descansando (2033 ms)

De les 5 de la tarde que llegamos al refuxu, hasta casi les 11 que tiraríamos pal pequeñu bloque de lliteres pa durmir, foron un montón de sensaciones, unes positives: quitar les botes, mudáse de ropa, tomar una cerveza o dos, o tres.... al sol, ponése finu d'espagueti... y otres non tanto: cansanciu, el vientu fríu que nin siquiera nun h.ou dexábanos tranquilu, la incomodidá d'un refuxu tan pequeñu y estráu de xente....


Aguh.as y Picu Cabrones (paez que m'atraen enforma eh??)

Pero que queréis que vos diga, nesti llugar perdíu en mediu de picos d'Europa, pues ver el meyor atapacer que tuve la ocasión d'esfrutar na mio vida. Dende acolumbrar al Picu Cabrones y a les sos collacies picudes camudar de collor durante un par d'hores, a xubir al puntu más increyible quiciás de tou Picos: La Collada l'Augua.


Ensín pallabres col atapecer de la collada l'Augua

Y ye que xubir corriendo en chancles pa ver l'atapecer nesti puntu, nun tien comparanza nin preciu posible, pa lo demás ya sabéis tiráis de tarxeta, jeje. A pesar de la rasca que tiraba, nun podíes más que sentate, y quedáte embobáu mirando como les ñubes baxeres, tápaben tol Cornión y toa Asturies menos los sos cumales cimeros (Peñasanta Castiella, Peñasanta d'Enol, Torcu, Tres Maríes, H.orcada, Enmediu,...).

Y lo más impresionante, yera mirar pal Cares, y ver que dalguna corriente de vientu del desfiladeru, facía baillar a les ñubes, como si fueren les foles de la mar, al aportar a la oriella'l sablón.

Con esto ya, alón, ún tira pal sobre, y ya-y da igual durmir onde seya y como seya.... paz y llibertá ye lo únicu que tien unu na tiesta...

Mañana más...


Camudando'l Camín nel Cuetu'l Trabe Norte y na collada L'Augua

Nesta ruta ficimos un dos mil de Cabrales: Cuetu del Trabe Norte (2231 ms)

Ver progresos en: Retos montañeros

6 comentarios:

  1. Sencillamente impresionante,sois muy buenos campeon.La verdad,os tengo un poco de embidia,de la sana ehh..nosotros la queremos hacer en septiembre o asi,me parece que voy a llevarme esta entrada para intentar que sea mi libro de ruta.Animo y a seguir.

    ResponderEliminar
  2. Hola Berto, una ruta guapa en la que se salva un desnivel importante. Como es normal, las vistas desde la Collada del Agua muy bonitas.
    Ahora a esperar la ascensión del día siguiente, seguro que será otro buen reportaje.
    Un saludo

    ResponderEliminar
  3. Muy bonita la collada del Agua y sus vistas. Ni comparación después de haber hecho la Canal del Agua.Oscar.
    Hay cabrones y Cabrones por todas parte.
    Fernan.

    ResponderEliminar
  4. Gracies Juan y Monchu. La verdá ye que foi un día increyible anque duro

    Fernan, Oscar... vémonos na travesera en 3 díes

    ResponderEliminar
  5. Impresionante Berto, el día al final os dejo disfrutar de la cumbre. Y la puesta de sol desde la collada del Agua indescriptible (que recuerdos.....) Un saludo y genial el reportaje.

    ResponderEliminar
  6. Gracies collaciu

    Pa mi qu'eses vistes quedáronme pa tola vida na tiesta. Ye impresionante la collada l'Augua.

    Un abrazu

    ResponderEliminar