viernes, 28 de diciembre de 2018

Pandecarme (Cangues d'Onís) - Cabra Blanca - Estribos - Forcadona

29 de Setiembre de 2018

Track: Pandecarme (Cangues d'Onís) - Cabra Blanca - Estribos - Forcadona



Dempués del entamu alpín de la primer ruta de temporada al Portil.lín Cimeru, quedamos con ganes de más actividaes picantones, pero esta vegada de día completu, asína que mirando'l calendariu del grupu, decidimos tirar al Cornión a la gueta d'aventura y una ascensión esixente.

A estes altures, col grupu montaña camín de los diez años d'esistencia, vamos conociéndonos toos y más menos sabemos hasta onde pue llegar cada miembru, tanto físicamente, como técnicamente, como lo más importante... mentalmente.

Somos un grupín bayurosu, anque los activos seyan la metá a lo sumo, que na diversidá tien el so puntín positivu, con xente que-y presta más el tarrén alpín, otros les viesques y la seronda, unos pateos más llargos, otros curtios y picantes... y a mí tócame amoldame a lo que me vaya cayendo.

El GM Xuan de la Borrina nel aparcaderu de Pandecarme (1048 m)

miércoles, 26 de diciembre de 2018

Tuíza Riba (L.lena) - Portil.lín Cimeru

16 de Setiembre de 2018

Track: Tuíza Riba (L.lena) - Portil.lín Cimeru



Un añu más, entamamos temporada nel GM Xuan de la Borrina y anque yo vengo totalmente en forma, dempués de pasar 6 díes patiando per Picos quise poner una ruta que tuviera un pocu de picante alpino pero que físicamente nun fuera esixente.

Asina qu'una vegada más, decidimos conocer un cumal nuevu del macizu de Penubina y nesti casu l'escoyíu sedría'l Portil.lín Cimeru o Portil.lín Oriental. Los Portil.linos son una serie d'escarnaos cumales que van dende la forqueta'l Portil.lín hasta'l picu'l Siete.

Salimos del pueblu montañeru de Tuíza Riba (1140 m)

viernes, 14 de diciembre de 2018

Picos d'Europa 2017 - 2018

Del 3 de Setiembre al 8 de Setiembre de 2018

Track: Picos d'Europa 2017 - 2018


Nun soi a alcordame cuando, Ana y yo, planiamos tirar pa Picos una selmana a facer actividá, pero de xuru que la primer vegada que salimos al monte xuntos, na ivernada na Carba Valsecu, ya golíemos que díbemos del mesmu palu cañeru nel monte.

Alcuérdome bien un día, que quedamos pa trepar y preparar col mapa una posible circular, pero como siempre, demientres un cafetín, pasamos olímpicamente de trepar y centrámonos en dibuxar col maxín, cuales pudieren ser les diferentes estayes de la circular.

Entamábemos en Poncebos la tremenda circular

miércoles, 12 de diciembre de 2018

Terenosa (Cabrales) - Peñe Maín - Cuetu Bierru - Tielvi - Poncebos (Cabrales)

8 de Setiembre de 2018

Track: Terenosa (Cabrales) - Peñe Maín - Cuetu Vierru - Tielvi - Poncebos (Cabrales)



Magar d'un día increyible de monte travesando los Urrieles y de durmir como hasta casi la hora que nos petó, decidimos llevantanos cola calma, p'acometer la cabera estaya de la nuesa circular per Picos que como non tendría de dexanos 6 díes dempués nel aparcaderu de Poncebos.

Nesti puntu del nuesu andar per Picos, llevamos más de 43 hores d'actividá, na que les nueses pates y cuerpos fueron a superar los 6200 m de desnivel ascendíos y unos 75 km percorríos, poro díbemos ya pensando que pa ser la primer vegada que nos xuntábemos a facer monte, Ana y yo, ya diba tando bien.

Salimos de la Terenosa (1275 m) nel últimu día

miércoles, 28 de noviembre de 2018

Áliva (Llébana) - Paredón d'Albu - Moñetas - Peñe Castil - Terenosa (Cabrales)

7 de Setiembre de 2018

Track: Áliva (Llébana) - Paredón d'Albu - Moñetas - Peñe Castil - Terenosa (Cabrales)



Magar de dos díes cola meteo repunante enforma, alborecemos nel hotel-refuxu d'Áliva con un día espléndidu nel que'l sol rellumaba nun cielu azul, que como non, aumenta les ganes de facer otra xornada de monte de restallu.

Necesitábemos calecer pa siguir alantre cola circular, ya qu'ayeri llegábemos pingando, siendo ya cuatru les estayes de patéu per Picos y la musculatura sufre más con condiciones más gafes. Poro, esti sol, esti calorín mañaneru y ponese a almorzar como xabalís mirando pal calizu cada vegada más seco, ye una auténtica inyección de fuercia y motivación pa lo que teníemos per delantre.

Quiciábes, ye la estaya más dura, penriba'l mapa, xunto cola que teníemos planiada p'ascender a colláu H.ermosu, asína qu'entamamos con un caleyar sele, col envís de calecer patuques baxando pela Llomba'l Toru hacia'l meyor puntu pa cruciar el ríu Duh.e.

A la fin salimos con un día soleyeru d'Áliva (1668 m)

lunes, 26 de noviembre de 2018

Colláu H.ermosu (Valdión) - Casares - Torreblanca - Cabaña Verónica - Áliva (Llébana)

6 de Setiembre de 2018

Track: Colláu H.ermosu (Valdión) - Casares - Torreblanca - Cabaña Verónica - Áliva (Llébana)


Tamos na cuarta estaya dientro de la nuesa particular pateada per Picos. Si na estaya anterior, na qu'ascendimos al colláu H.ermosu llibrando'l día como meyor pudimos, arribamos al refuxu envueltos nun borrín fondu, esta mañana llevantámonos del mesmu xeitu.

Ayeri, falábemos con bien de dellos montañeros, qu'esperaben pacientes a facer actividá al día siguiente y munchos d'ellos col envís d'ascender al Llambrión, inclusu con guía, pero les sos cares yeren más bien de poca esperanza pa cola meteo.

Salimos pente'l borrín en H.ermosu (2056 m)

viernes, 16 de noviembre de 2018

Caín (Valdión) - Cordiñanes - Asotín - Argayu Congostu - Colláu H.ermosu (Valdión)

5 de Setiembre de 2018

Track: Caín (Valdión) - Cordiñanes - Asotín - Argayu Congostu - Colláu H.ermosu (Valdión)


Esto del monte ye así, al mal tiempu bona cara. Teníemos planes A, B y C pal tercer día y paezme que tuvimos que facer hasta'l D, porque de xuru, nun tenía comtempláu ascender a H.ermosu pela normal o al menos, pela más transitada nos últimos tiempos.

Yera la tercer estaya d'esta aventura per Picos, quiciás la más ambiciosa y dura nos planes iniciales, pero toca amoldase a les situaciones y pa eso nun tenemos precio. Magar de tola nueche oyendo llover, ventiar y tronar, a l'alborecer fue más xabaz entá y dende'l nuesu abellugu, nel albergue de Caín, veíemos na ventana'l techu, como rellumaben los relámpagos penriba de los Urrieles.

Saliendo de Caín (475 m) con un día permalo

martes, 13 de noviembre de 2018

Vega d'Ariu (Onís) - Oliseda - Tiru La Llera - Mesones - Caín (Valdión)

4 de Setiembre de 2018

Track: Vega d'Ariu (Onís) - Oliseda - Tiru La Llera - Mesones - Caín (Valdión)


Alborecemos na Vega d'Ariu, a la qu'accedimos pela pocu transitada canal de Sollambriu y magar d'una nueche aguantando a Ana dando vueltes ensin xacíu dientro'l sacu, paez que garro'l suañu cuando'l día quier esperezase ya, lo que suel dame una rabia tremenda.

Tamos na segunda estaya d'esti viaxe montuno per Picos y descansar ye necesariu, tema complexu col revolvín al llau, jeje. Menos mal que tuvimos un bon almuerzu, más bien de restallu, con café asgaya pa despertar. Mil gracies a los collacios del refuxu de Vega d'Ariu, porque de verdá que la cena fue una pasada y l'almuerzu con esi pan y esa miel casero ye como pa nun salir al monte con ganes.

Con ganes salimos del refuxu y con ganes punxímonos el plumes, porque vaya rasca que facía. Ya nel día anterior, viéramos como amurniaba, pocu a pocu, un día de calorín prestosu y esta mañana tenémosla fresca, anque camentamos que la meteo tien de dir meyorando col pasu de les hores.

Salimos de la Vega d'Ariu (1636 m)

viernes, 9 de noviembre de 2018

Poncebos (Cabrales) - Sollambriu - Estremeru - Peña'l H.ultayu - Vega d'Ariu (Onís)

3 de Setiembre de 2018

Track: Poncebos (Cabrales) - Sollambriu - Estremeru - Peña'l H.ultayu - Vega d'Ariu (Onís)


Madrugamos n'Uviéu, anque tampoco como pa morrer y cola calma conduciremos tola autovía'l Cantábricu hasta Posada, onde saldremos pel camín davezu hacia Arenas pasando per H.ortigueru, Canales, Carreña y Pó.

N'Arenas, pararemos a almorzar otra vegada y de secute, siguimos camín hasta Poncebos, onde si tou va bien, entamaremos y finaremos la nuesa circular de seyes díes pela redolada del Cares, faciendo camín pente los macizos del Cornión y los Urrieles.

Per delantre tenemos 6 díes de monte, de monte duro, ya que los planes nun son de pasiar, anque cola meteo un pelín revuelta vamos tener que llevar dellos planes B y C. Aparte, hai varios interrogantes aparte de la meteo, el mió xemelu cola recién rotura y si seremos a aguantanos durante 6 díes, Anina y yo, jeje.

Entamábemos en Poncebos (221 m)

martes, 6 de noviembre de 2018

Vega Urriellu (Cabrales) - La Torre Cerredu

26 d'Agostu de 2018

Track: Vega Urriellu (Cabrales) - La Torre Cerredu


La vida, munches vegaes, llévanos a situaciones mui estrañes, teniendo cumes y h.oos de motivación pa depende qu'actividá montañera. Por suerte, como muévome siempre nestos deportes de monte, cuando nun toi motiváu cola escalada deportiva, toi col montañismu o l'alpinismu ya inclusu coles carreres pel monte.

Siempre hai un vínculu común a toes elles y normalmente ye Asturies y los sos montes, parés, valles, foces... tar na natura llámame enforma y ye lo que caltién esi espíritu de conocer más y más requexos, otra cosa ye qu'a cada momentu faígalo sele yendo a pies de vía o dedique'l mió tiempu a patiar o corretiar pel monte a lo xabaz.

Siguiendo con estos dixebraos momentos de motivación o desmotivación, dexara por unes selmanes la deportiva pa entrenar pel pueblu pa una carrera de monte. Los entrenos fueran bien, con cuatru salides llarguines, anque notara una carga fuera de lo normal nos xemelos, teniendo que parar los últimos díes pa recuperar. 

Preparamos el vivac baxo la borrina abellugándonos del orpín

La sorpresa fue cuando de la manera más tonta, rompí fibres nel xemelu baxando de la furgoneta al cargar los trastos pa colar de nuevu pa Xixón. A partir d'equí, escaecer la carrera, parte al seguru, mélicos incompetentes, reposu forciáu durante selmana y media y posible pérdida d'actividaes planiaes que tenía pa finales d'Agostu y primeros de Setiembre.

Con una mala hostia terrible, consigo que me faigan una eco, pa dicime que tenía rotura nel xemelu cola inserción del tendón d'aquiles, dándome de solución... el reposu. Nin sesiones de fisio nin hosties y eso díztelo un mélicu que nin te tocó durante los tres díes que tuve qu'averame hasta la clínica.

Nun se pue ser probe, sinon tires de fisio de confianza y que-y den pol culu al seguru. Si a perder el tiempu col seguru y nun poder correr la carrera, sumámos-y qu'a la selmana y media tenía plan p'ascender a la Torre Cerredu col grupu... taba que me xubía pelos parés.

Espertamos con un día ablucante dafechu... les vistes son brutales

martes, 30 de octubre de 2018

Directa Yerai (L.luna)

31 de Xunetu de 2018

Un branu pocu efectivu y desmotivante pa la escalada deportiva, fae que decida parar de trepar por un tiempu, siendo la idega colar pal pueblu y nun llevar res que tenga que ver cola escalada, poro sólo ropa pa correr pel monte y fuera.

Aun así, Dani ye a picame, enantes de colar, pa facer dalgo d'alpina y nun refugo'l convite, porque na realidá apetezme facer dalgo d'esguilada que tenga más que ver col monte y menos con intentar apretar a muerte nes escueles de deportiva.

Averamientu y entamu del primer llargu

Desempolvamos los trastos y a les 3 tamos tomando un café nel Alambique en Xixón y a les 5 tamos arrancando hacia'l pie de la vía en Rabanal de L.luna. El día, pues como siempre inmeyorable, de solana, pero a les hores qu'entamamos la vía como que nun mos esmolez precísamente.

Llevábemos un branu gafu cola meteo per Asturies y un escesu de sol casi hasta qu'apetez y como los graos de la Directa Yerai son agradables, pues nun díbemos tener dengún problema. La vía en cuestión, fué abierta per Ramón Canales a l'alcordanza del fíu d'otru gran montañeru como yera J. Blas, poro una vía con munchu sentir.

Pasándolo podre nuna reunión vexetariana

Como siempre, tenéis el croquis y una reseña detallada na páxina web del Maquis, poro nun me voi estender en graos, sinon en sensaciones como siempre. Nesto de l'alpina lo que más cuesta ye poner la tiesta nel sitiu y el primer llargu quiciás nun ye'l más afayaizu pa ello, ya que tenemos les mayores dificultaes concentraes nestos primeros 45 m.

Personalmente, costóme muncho entrar en xuegu, siendo una primer parte mui cenciella onde déxase protexer pa dempués tener los pasos duros de placa protexios per parabolts, pero bastante duretes con dalgún bloqueu fuerte pa salir a bon cantu.

Esfrutando a tope con llargos bien guapos

Namás salir de la placa entraremos na parte alta del "Sarcófago" onde la cosa se pon seria, al tar rota la roca y nun poder meter trastos p'asegurar. La verdá ye que voi solucionando'l percal como puedo y aporto a la reunión con muncha tensión y sin protexer tolo que diba prestame.

Na primer reunión, tocó baxar les pulsaciones, montar la reunión con calma y asegurar a Dani, que cuando llega dizme que paez que sufrí un pocu y que paez que vamos dir pillaos de tiempu. Por suerte, nel segundu llargu reláxome, la roca tórnase mui buena y déxase protexer, esfrutando esti llargazu munchísimu.

Dani colos sos retratos al vacíu

La verdá ye que ya pongo la directa y dempués del esfrute del segundu llargu, guapísimu d'escalar, zampo'l terceru con una tirada llarguísima (55 m) costándome alcontrar la reunión y métome nel cuartu qu'empobínase a un techín con una pinta preciosa de superar.

Enantes del techín, tenemos una placa fina mui disfrutona y la verdá ye que'l techu nun tien denguna dificultá y protéxese enforma, poro siguimos volando hacia l'últimu llargu de la vía, que ye un pilar IV grau, onde hai que dir negociando la roca más segura, por mor de dalgunos bloques sueltos.

Relaxación na última reunión de la vía

Ensin mayores problemes aporto al cumal de la Peña Rabanal, onde aseguro a Dani y queriendo dirse la lluz del día, facemos les semeyes de rigor y esfrutamos de la tranquilidá del atapecer, demientres recoyemos tol material.

Como tiros garramos la canal de descensu hacia la ermita de Pruneda, teniendo qu'andar sollerte pa nun enmarronanos per destrepaes innecesaries, tomando la canal siempre pela mandrecha y saliendo hacia unos praos enantes de tornar hacia la manzorga hasta la propia ermita.

Cellebrándolos y p'abaxo que se fai de nueche

Finalmente, un aciertu total averase hasta Rabanal a facer esta vía, quedándome con un perbon tastu nos 240 m de percorríu de la vía qu'anque de primeres fízome trabayar y sudar, dempués ya dexóse trabayar ensin dengún problema.

Tornaremos per Llión a por más... eso de xuru... la cordada con Dani Asturwaterman tien futuru jeje 

lunes, 29 de octubre de 2018

Llombera (Gordón)

29 de Xunetu de 2018

Finalizamos el finde d'escalada llionesa, tornando a una escuela que fai dos años, prestáranos enforma. Nun sabía de l'apertura d'otros dos seutores que dan vuelta a la peña, pudiendo tener varies orientaciones pa esfrutar d'una escalada a la solombra nos meses de branu.

Ensin madrugar demasiáu, más bien na, meyor dicho. Desperezámonos en Geras y magar del almuerzu, siguimos viaxe hacia la Pola Gordón, lléndonos hasta Llombera, onde aparcaremos y garraremos agua pa xubir hasta'l paré cimeru. 

Ana probando un sestu mui guapín

Tuviemos la suerte d'alcontranos con xente conocedor de la escuela y pudieron pasame una reseña de les nueves víes abiertes nos seutores a la solombra. Hasta ellí nos fuimos, intentando aprovechar lo máximu posible enantes de qu'entrase'l sol a facer protagonismu.


Un par de sextinos llargucos ye pa lo que nos dió tiempu, comprobando como les víes son buenes, pero la roca ye dalgo feble y queda muncho por sanear y romper. Si a esto sumamos, un cartelu de prohibición por añeramientu que nun diz de cuando a cuando ye la prohibición, pues acoyonamos un pelín y decidimos colar.

Tastiando la roca d'esti nuevu seutor

Pa cuando pasamos de nuevu pel seutor cimeru, decidimos baxar hasta'l pueblu de Llombera a tomar el vermú porque nun se paraba de calor. Nun digo na, de cómo entraben les clares al solete y de la xinta que nos metimos a la solombra de los portones de la furgo.

Hasta una señora siesta, tuvimos tiempu d'echar, ya que yera imposible dafechu, xubir a trepar de nuevu col calor que facía. A última hora de la tarde, cuando baxó'l calor, diónos por xubir un ratín hasta'l seutor pa facer unes cuantes víes.


Pie de vía cómodu pa esguilar cola calma


La verdá ye que dió pa muncho, anque fuesen namás que dos hores escases, ficimos unes 6 o 7 víes de plaquina cenciella. Lo máximu que treparíemos sedría un 6a probáblemente, pero prestó pola vida y quitamos un pelín esi picor, ya que la mañana quedara pelín curtia.


Jose fue más allá aún y se ventiló toles plaquines del seutor, ya que Pepa taba zángana y nun-y apetecía trepar. La verdá ye qu'esta escuelina ye bien guapa y camiento que paga la pena facer más visites y ponese en serio a trepar gradinos más duros.



Momentu siesteru con Kíla


Croquis modificaos de Llombera por mor de Infoescalada. Gracies y col so permisu.

---------------------------------------------------------

sábado, 27 de octubre de 2018

Beberino (Gordón)

28 de Xunetu de 2018

Cuando coláramos pol colar en Geras, tuviéramos cola mayor de les calmes tomando'l vermú, nun de los chigres del pueblu, apalancaos na terraza'l chigre como si nun hubiera mañana, siendo ún d'esos momentos en que tas tan a gustu que nun quies que pase'l tiempu.

Aún así, decidimos meneanos hasta otra escuela, contando con buscar dalgo onde la solombra nos dexara intentar esguilar dalgo más. Nun teníemos mui claru, si Beberino sedría un opción bona pero al menos, conoceríemos otra escuela d'escalada más.



Merendando a la espera de que baxase'l sol

D'esta miente, salimos de Geras en direición la Pola Gordón, parando dellos kilómetros enantes nel crucie pal pueblu de Beberino. Dende ellí, pudimos ver la pirámide que ye la escuela d'escalada y pudimos comprobar como'l solo pegaba con fuercia tovía.

Coles mesmes y aprovechando que teníemos qu'esperar por Ana que diba xunise al grupu pal finde, buscando dalgo de sombra, sacamos les meses y merendamos cola calma demientres tomábemos una birra a la espera de poder trepar.

Ablucante paré'l de Beberino

Cuando sentimos que'l calor diba baxando, garramos los trastos y empobinámonos canal arriba hacia'l pie de vía de la muria de Beberino. Namái aportar al paré, daste cuenta que pel momentu, nun ta la muria tolo aprovechada que pudiera y que la roca supera en calidá a la de Geras con muncho.

Por mor, de lo tarde qu'entra la solombra nel paré, nun mos dió muncho tiempo a trepar, pero al menos probamos un par de viuques cencielles a la manzorga del diedru que separa'l paré en dos seutorinos.

Noah atenta a la xugada nel pie de vía

Paezme que yeren un cuartu y un quintu pa calecer yemes y dempués metíme nun 6b llargu preciosu, un pelín suciu, pero con gran calidá na roca. Una pena, que nun pudiésemos tar más tiempu esguilando, porque viendo los croquis y les plaques, esta escuela si paga la pena otra visitina, asína que tornaremos de xuru.

Beberino (Gordón)

Croquis modificaos por mi de la escuela de Geras, por mor de Los Cuatro Valles. Gracies y col so permisu.