miércoles, 12 de diciembre de 2018

Terenosa (Cabrales) - Peñe Maín - Cuetu Bierru - Tielvi - Poncebos (Cabrales)

8 de Setiembre de 2018

Track: Terenosa (Cabrales) - Peñe Maín - Cuetu Vierru - Tielvi - Poncebos (Cabrales)



Magar d'un día increyible de monte travesando los Urrieles y de durmir como hasta casi la hora que nos petó, decidimos llevantanos cola calma, p'acometer la cabera estaya de la nuesa circular per Picos que como non tendría de dexanos 6 díes dempués nel aparcaderu de Poncebos.

Nesti puntu del nuesu andar per Picos, llevamos más de 43 hores d'actividá, na que les nueses pates y cuerpos fueron a superar los 6200 m de desnivel ascendíos y unos 75 km percorríos, poro díbemos ya pensando que pa ser la primer vegada que nos xuntábemos a facer monte, Ana y yo, ya diba tando bien.

Salimos de la Terenosa (1275 m) nel últimu día

Con estos antecedentes y un día soleyeru como casi dengún en tolos díes de patéu, entamamos a baxar hacia Pandébano con un pelín de galbana y l'estómagu fartuco del almuerzu. De la que caleyamos sele, vamos echando vistazos atrás a la allumante caliza de los Urrieles, casi dándonos pena acabar esta aventurina na que tan bien lo pasamos.

Na realidá, llevamos una soba de coyones, pero cada día sentíamonos más fuertes, poro si nun fuera porque toca volver a trabayar, seguiríamos felices pateando y ascendiendo cumales, mapa y gps en mano, faciendo percorríos cola mente y siguiendo'l plan, na medida que la meteo nos dexase.

Averámonos a la Peñe Maín coles increyibles vistes al Picu

El nuesu envís ye travesar la Peñe Maín pa baxar a Tielvi a xintar, tornando a Poncebos pel camín antiguu dende Sotres cola mayor de les tranquilidaes. Pero como siempre, vamos facelo a la nuesa manera, así qu'envede dir buscar l'ascensión dende la mayada la Robre, tiramos per un senderu dende Pandébano a la gueta d'alcontrar camín hacia la mayada de Grosea.

Como siempre, el nuesu olfatu montañeru ye finu y magar de perpasar un pindiu tramu penriba de cotoya baxa, garramos un canalizu hacia un colladín con un h.itu onde tenemos entrada a la parte cimera de la Peñe Maín y hacia'l nuesu destín... la mayada de Grosea onde les vistes hacia'l Picu Urriellu y tol macizu central son d'ablucar.

Cumal de la Peñe Maín (1605 m)

Siguiremos dempués de Grosea pel típicu y mui caóticu caliar de la Peñe Maín y bien ceo, acolumbraremos el cumal de la Cabeza la Mesa onde alcuéntrase'l vértice xeodésicu y puntu más altu de Maín.

Ya son munches les vegaes que tuviemos equí enriba y entre que vamos cola calma (dos horines dende Pandébano) y que salimos dalgo tarde, entainamos a colar de la Mesa, ya que queremos baxar a xintar a Tielvi, magar de conocer otru cumal que siempre fue a llamanos l'atención.

Descendemos hacia la mayada de Bierru

Pa ello, descenderemos hacia'l norte, perpasando la cabecina Quemada pela manzorga, empobinándonos los más apriesa posible hacia'l monte l'Arandanera, que recíbenos nel so enguedeyáu camín con un bon barrizal que vamos llibrando como meyor podemos.

Nós, vestíos coles nueses meyores gales braniegues (pantalonín curtiu, playerinos de trail runner y camisetina de color clarín) y alcontrámonos con unes auténtiques llamargues de barru y mierda de vaca pa facer les delicies del respetable, sobretou cuando Ana, casi va de culu nun par d'ocasiones... pocu me reí.

El Cuetu Vierru garra tol protagonismu del día

Ensín más, salimos d'esa trampa y apaecemos na campa de la mayada Bierru, onde podemos dir arrastrando los pies pa llimpiar los playeros lo meyor posible. Enfrente nueso, tenemos l'amenazante silueta del Cuetu Bierru, pel que pasara al llau nuna estaya d'una Travesera na que la xente llegó cansadina, cansadina magar de travesar Portudera y Maín hacia la Terenosa.

Esta vegada sí que tenemos la idega d'ascendelu y pa ello, van acompañanos Pepa y Jose, que vinieron a recibinos a Ana y a mí, dempués d'estos 6 díes tremendos de monte. Los cuatru xuntos, vamos dir ganar la fastera nororiental del cuetu, tratando d'alcontrar la meyor ruta p'ascender a esti cuetón.

Dellos momentos de la enguedeyada ascensión al Cuetu Vierru

Pali, pali diremos ganándo-y altor a esti cuetu, trepando y faciendo vires per un amiestu continuu de yerba llargo y caliza que sorprendéntemente ye perestable. Estable sí, pero aéreu y vertical ye enforma, poro fuimos trepando col mayor de los cuidaos per un llau y cola mayor de les tranquilidaes, al menos Anina y yo, que veníemos en mou zen total.

La tranquilidá acabóse, cuando en mediu d'una trepada Jose va pañar un agarre y al salir a una repisa alcuéntrase de frente con una víbora a la que casi-y echa la man. El berríu oyóse dende les sableres de Llanes hasta los montes de Riaño más menos, jaja... eso sí, ya se nos quitó'l mou sele y fuimos sollertes de per onde díbemos moviéndonos.

Cumeee nel Cuetu Bierru (1211 m)

Con trepaes más o menos airoses aportamos al cumal del cuetu Bierru (1211 m), topándonos con una
mosquitada d'eses que fae que fuxes p'abaxo de nuevu como si nun hubiera mañana. Asína que semeya de turnu y a destrepar, este vegada un pocu más direutos al Este y llueu en travesía diremos baxo'l cresteríu hasta dar de vira en vira al llugar del trepe más vertical y abellugu de la nuesa collacia la víbora.

Esta vegada nun sal al alcuentru y destreparemos hasta la base de cuetu onde llegaben tamién de visita Haritz y Jenny, que perderse nun se perdieron na con esti cumal y ganar diben ganar abondo con una bona fartura en Tielvi.

Tranquilu descensu hacia Tielvi

Llueu d'una prestosa xinta en Tielvi, na que fuimos viendo como les tormentes qu'albidráben los meteorólogos diben ser una realidá, tocó al camín col goretex enfundáu, la mochila col chubasqueru y muncha paciencia y ganes d'acabar lo qu'entamamos.

Ana, Haritz, que quiso acompañanos y yo, completábemos pela canal de la Rumiada hacia Poncebos, la circular qu'entamábemos facía 6 díes, eso sí, pa finar con una moyadura de les de recordar y baxo l'amenaza de les centelles y la truena sol tendíu llétricu, lo que daba mui mal rollu.

Con 9 hores y media d'actividá, anque parte d'ella fuera xintar en Tielvi, acabábase esta circular per Picos, terminando'l día con otros 14,9 km, 715 m d'ascensión acumulada y 1810 m de descensu pa calecer les nueses pates moyaes y cansaes.

Aún así... seguíemos con ganes de más... si pudiésemos por trabayu jeje... la próxima más y meyor

Camudando'l Camín despidiéndose de los Urrieles

2 comentarios:

  1. Nun tuvo mal la travesera d´esti añu. Magar de bonos cumales, pateasteis abondo y nun siempre por llugares habituales. L´ascensu a Castil prestome asgaya y queda ehí, apuntáu pa facelu.
    Norabona a los dos.
    Un abrazu

    ResponderEliminar
    Respuestas
    1. La verdá ye que ficimos lo que pudimos cola meteo que nos tocó y l'ascensión a Castil pela sur ye mui recomendable, vas a disfrutala.

      Del plan A que llevábemos a lo que tuvimos que facer tela... pero resarcímonos un pelín n'Ochobre... a ver si llego pa contalo jaja

      Un abrazu

      Eliminar