martes, 31 de enero de 2017

Felechosa (Ayer) - Picu Retriñón

20 de Payares de 2016

Track: Felechosa (Ayer) - Picu Retriñón


Ya llovió dende que nel 2010 ficiera l'ascensión al Retriñón dende Caliao, en compaña de Simón y César. Daquella ficiéramos tres picos más enantes del "monte que tañe" pero esta vegada, con un día pelín murnio, lo qu'interesaba yera conocer la fastera ayerana p'ascendelu.

Asína que plantámonos los collacios del GM Xuan de la Borrina en Felechosa, ensin matanos a madrugar y almorzamos tranquilamente, camentando les posibilidaes. Enantes, quedaba tol viaxe dende Xixón garrando la autovía minera hasta Mieres del Camín onde garramos la autovía A66 saliéndonos na salida de Morea, pa percorrer la As 112, pasando polos siguientes pueblos: Morea, L'Escuyu, Los Estrul.lones y Cabanaquinta onde garraremos la AS-253 pasando per L.levinco, Entepenes, Col.lanzo, Yanos, La Pola Vieya, el Pino y a la fín Felechosa.

Partimos dende lo alto Felechosa ( m)

Preparámonos pal fríu y la lluvia y salimos caleyando dende la ermita, polo que nómase como la ruta de las brañas ayeranas (PR AS-30). Esti camín, tien de llevanos pel valle Fresneo alantre y xubirá con tranquilidá pente viesca autótono y pasando d'un llau al otru de la riega, lo que faise perentreteníu y mui guapu.

El día nun ta pa munches hestories, asina qu'apretamos el pasu ya que tenemos na tiesta que la lluvia va llegar tarde o temprano, poro cuanto menos nos moyemos meyor. Aún así, nun soi a otra cosa que dir mirando pa la toponimia d'esta fastera, con nomes como la peña Los Furacones (claro ta) y otros como la Vallina Escosa o la Suerte Mala, lo paez dicir que si yes dueñu d'estes tierres nun tuviesti muncha suerte.

Xubimos per una preciosa pista pel valle Fresneo

El camín ye guapu enforma y a los diversos crucies de vera en vera del ríu, amestámos-y dalgun saltín d'agua prestosu, enantes d'abandonar el cursu'l ríu p'ascender desnivel fuerte hacia'l Valle Freneo, el cual cruciaremos pa siguir pembaxo la Casa'l Quentu.


L'agua, los collores tardíos y guapes caseríes entretiénen nel nuesu caleyar hacia la Foz

Pocu más alantre, tornaremos al llau del ríu Fresneo pa crucialo pel Vau y entraremos nun tarrén de monte baxo de felechu y cotoya, saliéndonos de la viesca y empobinándonos pel Gamonal hacia la Foz de Fresneo, guapu pasu armáu, pente les falderes de los picos la Forá y Llacíu.

Averámonos hacia la Foz un guapu pasu armáu pente les peñes pa salir hacia Valencia

Trespasaremos la Foz y salimos per tarrén embarráu, con orbayu gafu en dellos momentos, hacia la Vega Valencia. Esti enorme mayáu, tien d'accesu una auténtica autopista, la cual evitamos totalmente, pero nun podemos facer otra cosa qu'alloriar con tan xabaz construcción.

Caleyamos pela vega Valencia con vista hacia la Furacá

Perpasamos Valencia pasando per grupos de cabañes como'l Mayaín o la Felguera, siempre col güeyu puestu nos parés de la Peña La Furacá y como nel so arcón. Dende La Felguera, fadremos una envuelta a la mandrecha pa siguir un senderín pente carrascos que tien de dexanos nel colláu Valencia (1300 m)

Ascendemos a la collá Valencia y dende ehí entamamos un fríu y duru ascensu al Retriñón

Hasta equi, llevamos pocu más de 2 hores de camín y a pesar de la lluvia, hai que dicir que mui guapu, pero'l día lloñe nin siquiera de danos un respiru, ponse más gafu, el vientu tira con fuercia y la lluvia clávase na cara como cristales.

Dedicimos siguir alantre cola ascensión al Retriñón

Aún así, queremos probar suerte, tenemos el Retriñón ehí, abrigámonos con tolo que tenemos y entamamos a xubir pela enorme panda suroeste, la cual va marcada con dalgunos fitos que faen el camín más o menos ensin perda.

Caún al so ritmu diremos ganando metrín a metru, hasta topar un camín más marcáu que va llevanos a l'arista sur del Retriñón, la cual ganamos pa degolar a la fastera este, onde tamos a la mercé del vientu y d'una lluvia qu'aumenten enforma, faciéndonos pasar muncho frío.

Pasamos a la otra fastera onde'l vientu faise casi inaguantable


Dende que saliéramos del colláu Valencia, tardamos una barbaridá n'ascender al picu y eso condergónos a pasalo pelín mal, sobretou esperando a xuntanos toos nel cumal de 1857 m que más que retrañir esta vegada fizo que tiritásemos de fríu... hasta Kíla, metíase pente les pates pa intentar amatagar el vientu xeláu que nos azotaba.

Ensin batería na cámara, con dalgún móvil y con guantes y casi sin sentir les manes, paezme que la semeya de grupu nun salió y la única ye de Benjamín y míu, fadiaos de fríu al llau del vértice. Cuando aportaron Ana y Zori al cumal, dímonos ánimos y decidimos colar d'ellí a ver si baxando yeremos a calecer un pocu'l cuerpu.

Nin semeya de grupu pudimos facer nel cumal del Picu Retriñón

Descendimos pel mesmu camín, hasta más menos, onde camudamos de fastera y siguimos baxando pel Chirrial (faza sureste) hacia'l mayéu L'Oteru. Por suerte, según descendiemos y protexíos pela vallina que fae'l Retriñón col picu La Muezca fuimos ganando ánimos y decidimos conocer la Cueva L'Oteru.

Con un guelpe de suerte al fín, paró de llover nel tramu final y cuando entramos na cueva, notamos una temperatura agradable, que sirviónos, pa camudar la ropa pingando que llevábemos polo que tuviéramos seco y tuviemos un bon ratu esplorando pela cueva y escaeciendo lo mal que lo pasamos nel cumal del Retriñón.

Cueva L'Oteru y Mayéu L'Oteru

Con otru ánimu, siguimos descendiendo hacia'l Mayéu L'Oteru onde metímonos nel portal d'una cabañina y xintamos el bocadillu, hasta con unos mínimos rayinos de sol. Casi media horina de relax y siguimos caleyar dende L'Oteru, baxando dellos praos hacia les cabañes de la Mornera, onde tomamos otru camín de los d'alcordanza.

De la Mornera facemos un prestosu camín con guapes armadures de vuelta hacia Felechosa

Nun lo esperábemos, pero'l nuesu caminar va llevanos a conocer un camín colgáu de la fastera este del picu Llacíu, el cual va danos increyibles vistes del valle del Ríu Braña, con collores nos árboles mui serondiegos, con dalgún pasín armáu y hasta con un hermosu tabayón.


Llueu, namás quedábanos siguir camín más ampliu pasando pela colláu Cebarón, l'Altu la Vallina y descender hacia la ruta de las Brañas Ayeranas onde entroncamos col camín col que varies hores enantes dábemos entamu a la ruta de güei.



De siendes colgaes y prestosas, a pista amplia y agradable hacia Felechosa


En resume, ruta encomendable totalmente, con meyor tiempu a poder ser, ya que tanto'l camín d'ascensu como'l de descensu va facenos conocer guapos llugares. En total, saliónos una ruta de 17,6 km, nun total de 7 hores y 40 min, superando unos 1350 m.

La próxima más y meyor ya que pa tener dies bonos hai que tener dalgunu malu tamién...

lunes, 23 de enero de 2017

Caldueñu (Llanes)

2 d'Ochobre y 19 de Payares de 2016

Apurando les últimes opciones d'una veronda o veroño interminable entá tuviéramos d'acampada a primeros d'ochobre en Benia d'Onís. Llueu de la parrillada na nueche, d'aguantar a dos holandoses castrones y de llevantanos al día siguiente, tocaba dir a trepar un puquiñín.

Esi primer día, decidimos dir hasta'l Valle de Caldueñu nel qu'a lo llargu de tola so estensión, alcuéntrense munchos parés que forma una escuela de recién creación. Esta vegada xubimos a la Cabeza Blanca nel Mazucu onde, aparte d'un pindiu averamientu, tendremos unes víes d'enorme calidá.


Trepando nel Mazucu intentando conocer les víes poquín a pocu


Nesti casu, daquella siguía cola travesía nel desiertu y el pié casi nun me dexaba esguilar, asína que fice dalgún quintín con dolores nel pié y pegámonos con Agente Espesante, un 6a, perro enforma y mui suciu, con grandes posibilidaes de salir volando como ta mandáu.

La siguiente visita a esti guapu valle, diba ser un mesín más tarde, pero vamos camudar de zona y tiraremos penriba del pueblu de Villa al alcuentru de la placa Aviaos, que yo tovía nun conocía pero Jose y Pepa ya tuvieran probando.

Placa de Avios nel valle Caldueñu

Namás llegar, Richar y yo, metémonos a la primer vía de 6a de dos llargos, metiendome d'un tirón tola vía de 50 m hasta la segunda reunión, paeciéndome una preciosidá per un diedro-fisura brutal, siendo'l grau bastante continuu durante tola vía.

Llueu d'aportar Richar hasta la segunda reunión de segundu, vamos prauticar un puquiñín los rápeles y tiramos p'abaxo a facer ya víes d'un llargu. Tiramos de manzorga a mandrecha, sacando a vista Sensación de romper y Metralla, 6b y 6b+ mui del estilu de la primer vía tamién, con fisures y pasos de babaresa.

Faciendo un par de llarguinos de 6a

Nun madrugáremos muncho que se diga esti día y col pasu del día, punxérase fríu de coyones, decidiendo nun matanos muncho más y decidimos dir recoyendo, dexando una bona xera pa otres visites.

 Caldueñu (Seutores visitaos)

Croquis modificaos por mi de la escuela d'escalada de Caldueñu, por mor del blogue Escalada en Llanes y Entretenimiento Vertical. Gracies y col so permisu.


----------------------------------------------------------------------------

jueves, 19 de enero de 2017

Puirtu Braña (Ayer) - Picu Valmartín

13 de Payares de 2016

Track: Puirtu Braña (Ayer) - Picu Valmartín



Día de monte col GM Xuan de la Borrina dempués de la primer ñevada de la temporada y ye qu'anque retrasóse un pelín... siempre dicen que pa Tolos Santos, Ñeve nos Altos y cumplir, cúmplese, anque llueu se tiro tol mes d'Avientu ensin cayer gota y con un tiempu casi primaveral.

Pero nesi sen, nun fue'l nuesu día, ya dempués de la ñevada tocó una selmanina perbona de bon tiempu que la xente que por selmana pudo aprovecha hasta-y dió pa facer corredores cenciellos, pero a nós, como siempre, tocónos dir de finde y con un día perruno al máximu.

Salimos pelín más baxo del Puirtu Braña (1488 m)

martes, 17 de enero de 2017

Caldas (L.luna) - Foz del Pincuejo - Cirbanal

2 de Payares de 2016

Track: Caldas (L.luna) - Foz del Pincuejo - Cirbanal


Nueva ruta del GM Xuan de la Borrina, na que díbemos axuntanos al Baskonia Mendia Taldea, que ya llevaba dellos díes faciendo monte per Asturies. Na so última ruta, fuimos cola intención al menos de saludanos al entamu y final de la ruta, ya que llevábemos diferentes percorríos.

Quedamos nel pueblu de Caldas en L.luna, conocíu, aparte de por tener un balneariu y un área de serviciu del Güerna cara enforma, por alcontrase na so parte final del pueblu con una guapa Foz, la del Pincuejo, onde los escaladores puen facer metros en delles víes de calter alpín.

Grupín de paisanos a les afueres de Caldas (1141 m)

lunes, 9 de enero de 2017

Vegarredonda (Cangues d'Onís) - Torcu - Les Tres Maríes

29 d'Ochobre de 2016

Track: Vegarredonda (Cangues d'Onís) - Torcu - Les Tres Maríes


Madrugada brutal y vuelta al Cornión, esta vegada, en compaña de Pepa y Jose col envís de facer una actividá qu'al igual que l'anterior al Porru Bolu y Llagu, ye un amiestu pente'l montañismu y l'alpinismu.

¿Como dixebrar delles actividaes tan lligaes? Pues pa min, nun hai manera, así qu'apaecerá n'ambos apartaos, porque bien lu merez y porque al menos l'ascensión a la Torre'l Torcu nun requeriría obligatoriamente de cuerda, anque por seguridá que nun quede.

Caleyamos col alborecer hacia'l Cornión

miércoles, 4 de enero de 2017

Vegarredonda (Cangues d'Onís) - Porru Bolu - Porru Llagu

11 d'Ochobre de 2016

Track: Vegarredonda (Cangues d'Onís) - Porru Bolu - Porru Llagu


Dempués del precalentamientu na Aguya Madalena, tocaba pasar a la acción de verdá y nun par de díes de vacas d'esos que suelo facer, tiro un martes con Dani hasta'l Cornión, lo cual entama a ser un vezu nos últimos tiempos.

Cómo aportar al macizu de Picos del Cornión? Pues tais fartucos de velo, asína que les señes pa conocer Vegarredonda tenéisles equí. Nós, entamamos l'aventura dende'l refuxu y el paséu dende Pandecarme ye pa entrar en calor y bona falta facía ya que'l día taba fresquín.

El Porru Bolu esperándonos impaciente

martes, 3 de enero de 2017

Bejes (Cillórigu de Llébana) - Picu Samelar

9 d'Ochobre de 2016

Track: Bejes/Beyes (Cillórigu de Llébana) - Picu Samelar


Dempués d'un día trepando per Cuevas y durmir de camping en Llanes, llevantámonos prontín pa dir hasta Unquera onde xuntámonos tol GM Xuan de la Borrina col envís de facer monte. Como ye vezu, garraríemos l'autovía'l Cantábricu dende Xixón, pa dempués d'almorzar siguir pela N-621 en direición al desfiladeru de la Hermida, pa nel pueblu de la Hermida desvianos hacia'l pueblu de Bejes.

L'accesu a esti pueblín, nun pue ser más espeutacular y conduzco ensin poder parar de mirar pal valle del ríu Corvera, a través del cual avanza la carretera unes vegaes a un llau del ríu y otres al otru, hasta aportar a Bejes/Beyes, nomáu pueblu por facese'l quesu Picón.

Partimos del pueblu de Bejes (582 m) na Llébana

domingo, 1 de enero de 2017

Sotres (Cabrales) - Peñe Castil - Tortorios - Moñas

13 de Xunu de 2010 y 22 d'Ochobre de 2016

Track: Sotres (Cabrales) - Peñe Castil - Tortorios - Moñas



Esta ruta yera, quiciás, la de mayor dificultá de les que propusimos esti añu pal grupu. La pena fué que nun mos xuntaramos namái que tres persones, más los nuesos collacios vascos. Yera una prueba de la ganancia de nivel, durante too un añu ensín parar de dir de monte.

Aparte de caleyar cada día más y tar más en forma, tamién esti añu deprendimos (dalgunos al menos) a salir siempre, ya qu'arriba nun se pue aldovinar a les clares, que tiempu vamos alcontrar. Asína, qu'apesar del mal tiempu reinante, dirixímonos Simón y yo, al alcuentro n'Arenas d'un desayunu y de Fernan, Juanan y Pangua.

La ruta en coche ye la davezu, Xixón-Posada pola autovía del Cantábricu, pa garrar direición l'Altu H.ortigueru y d'ehí ya en Cabrales, pasar pelos pueblos de Canales, Carreña, Po y Arenas, pa dempués del desayunu de turnu, meternos nosotros y tolos trastos a la furgo de Fernan, y pa Sotres.


Na Curvona en Sotres, entamu de la ruta en 2010 y 2016

Enantes de llegar al pueblu, como pa tantes otres rutes, aparcamos na curvona d'esquierdes y dempués de preparanos pal orbayu, entamamos a caleyar hacia los Ivernales del Texu pa esta vegada, empobinános hacia Las Vegas de Sotres, que práuticamente nun soportaben más augua, ya que'l riu Duh.e diba hasta enriba, faciendo más verdes y más guapes estes vegues inda.

Hasta equí la ruta ye práuticamente llana, poro pa calecer pates vien perbien, ya qu'a partir de Las Vegas, garraremos la canal de la riega Cambureru la cual va ponenos les pulsaciones a bon ritmu. Enantes de las Vegas, son destacables les parés de Fresnidiellu a la nuesa mandrecha, onde hai delles víes d'escalada mui importantes n'Asturies, anque pocu pudimos ver d'elles, nesta primer visita a Castil.


Hacia las Vegas de Sotres pasando per Fresnidiellu (semeya de 2016)

Con un sentir estrañu, ya que dibemos dándonos cuenta que'l tiempu nun mos diba dar tregua, vamos xubiendo poquín a pocu pola canal de Cambureru, dexando a la nuesa manzorga la mayada'l Fresnedal. De xemes en cuando, acolumbrábemos les parés de los Cuetos de Castil, y con ello dábemonos cuenta de que ganábemos altor rápidamente.


Tomando un respiru pingando en 2010 y con meyores vistes nel 2016


Con tan solu un par de paráes pa picar dalgo y tomar bébora, pa nun deshidratar, ya qu'anque nun pegaba Llorenzu la humedá yera pergrande, fuimos averándonos al final de la canal, ganando-y tarrén, pegaos al paré'l Carbonal, al neveru Cambureru.

Mil metros de desnivel quedaben atrás dende Las Vegas hasta'l tan añoráu colláu Cambureru. Toa una canal de la Riega Cambureru, perllarga, qu'empobinábamos na canal del Fresnedal, que pegaba coles parés de Carbonal y a la fin dexábamos nel colláu de Cambureru debaxu mesmu del Cabezu Los Tortorios.


Cabezu Los Tortorios y Cabeza Las Moñas nel colláu Cambureru

Ya tábemos a unos 2056 ms d'altor y por delantre tocaba garrar puxu pa l'ascensión al oxetivu de güei: La Peñe Castil de 2447 ms. Poro, yeren menos de 400 ms los que mos faltaben por xubir, y quicías foi l'únicu momentu'l día nel que yeremos positivos sobre la posibilidá d'agüeyar un mínimu de paisaxe que diese xacíu a tanto desgaste físicu.


Demientres la xubida a Castil, l'altor diba abriendo la borrina

Metrín a metru, y pasu a pasu'l rellume del sol, facía quitar capes de ropa, y espoxigar l'ánimu a la mesma vegada que dexábanos ver la preciosa cume de Castil. Tou ello, fízonos ganar ésta, práuticamente esnalando y ensín alendar.


En Peñe Castil a 2447 ms con Picu y sin Picu


Peñe Castil, el meyor mirador del Picu, ya yera nuesu, pero nun diba danos el tiempu nengún requexu valoratible qu'amosara tolo que nos arrodiaba. Dalgún ventanu pasaba como una filera de diapositives, dándonos semeya del grupu d'Albos-Areneras, Neverón d'Urriellu, y la tiesta del Picu Urriellu, hasta que.... zarráronse les ñubes de nuevu, y ya nun hubo más pase de modelos.

Asína quedámonos, como'l que ta nun striptease, y anque digas "quítatelo too", nun te faen casu y acábase, o pior inda, como cuando tas trabayando hores con dalguna moza, nuna nueche de folixa y dempués de picar más que na mina, marches pa casa caliente como un fornu, jajaja. En fin, paez ser que na montaña tamién te dexen a medies, jeje.


Acolumbrando ensín ver lo que nel 2016 si tuviemos la suerte de ver


Escaecíu esto, yeren 4 hores d'ascensión, tocaba xintar dalgo que mos ficiese recuperar fuercies, ya que teníemos dalgún retu aún más por facer. Ensín demasiada fame, más que de chocolate y dalguna barrina, dexamos el bocata pa más tarde y baxamos al colláu Cambureru p'alcontranos cola borrina, collacia de viaxe nel día de güei.

Camentamos les posibilidaes pa da-y preste al siguiente h.itu del camín, y dempués d'arrodiar un pelín tiramos de frente hasta ganar los 2149 ms del Cabezu Los Tortorios, otru monte, otru borrón a los 2000's de Cabrales.


Nel cumal del Cabezu Los Tortorios (2149 ms)

Sinceramente, los tracks esistentes, nun s'aventuraben perende y fuimos viendo'l percal sigún dibemos avanzando, y anque'l tarrén nun tenía dificultá, si que yera abondo quebrapates y ya veníemos dalgo maduros.


Simón que nun taba pasando'l meyor de sos díes montañeros

Los Tortorios fueron dando pasu, a bien de cimes, como'l Coteron de 1983 ms, y tamién d'antecimes como les 3 que tuvimos que sofrir hasta dar cola que queríemos facer, La Cabeza Las Moñas de 2076 ms.


Na Cabeza Las Moñas (2076 ms)

Nesti cumal, ya sí que rendímonos a la fame. 6 hores y media de ruta y les 15:30 d'hora, yeren superiores al fríu, mal tiempu, moyadura,... ya inda quedaba tola baxada. Había que parar a xintar, sí o sí.

D'equí, ya teníemos per delantre, un descensu llargu enforma, que nos facía pasar pela Vega Las Moñas, como descansu y garrar la parte inicial de la Canal de la Becerrera, pa siguir baxando altor polos Conchinos de Marracéu hacía la Llomba'l Marracéu.


Baxando a la Vega las Moñas


Al fin, vemos nesta llomba parte'l fin del descensu. A tiru piedra teníemos La Terenosa y magar d'ella'l Colláu de Pandebano. Equí podemos al fin, caleyar con pasu grande y cansáu, pola pista, ya fecha tantes vegaes, pa xubir a la Vega Urriellu o xubir a Peña Maín, ... Yera ya tou conocíu, y les pisaes fuerónnos dexando dempués de pasar pola Robre, y el colláu Cuaceya, enriba de los Ivernales del Texu. Que ganes de velos teníemos!!!, yeren significáu d'una xera bien fecha, a pesar de les poques ayalgues que nos ufreció nel so cumplimientu.


Pandébano y los Ivernales del Texu de vuelta


Finábemos una ruta de 9 hores y cuartu y 18 kms nel que lo más importante foron los 1940 ms de desnivel acumuláu que teníemos nes pates. Tou ello, ensín vistes, ensín paisaxes, y aún así camiento que toos y caún, tomámonos la clara de refrescu en Arenas, contentos de la ruta esfrutada y brindando por munches más que de xuru caerán.


Fernan y el picu dende Castil (añu 1996), tenía que ponela, jaja
Beti aurrera


Nesta ruta ficimos 3 dosmiles de Cabrales y ún de los picos del club 111 de Picos: Peñe Castil (2447 ms) y los dos miles: Cabezu Los Tortorios (2149 ms) y Cabeza Las Moñas (2056 ms).Ver progresos en: Retos montañeros