Entepenes (Ayer) - San Xulián - Cueva L'Ablanu - Peña Solengues - Valdeveneru

25 d'Ochobre de 2025

Track: Entepenes (Ayer) - San Xulián - Cueva L'Ablanu - Peña Solengues - Valdeveneru

Dempués de la ruta dende la Polavieya al Cualnegro, apeteciónos tornar pel conceyu d'Ayer una vegada más, yéndonos nesti día hasta Entepenes, onde tantes vegaes viéremos la foz d'entrada al valle de San Xulián y como nun lo conocíemos, preparamos una rutina pa sacar alantre nun día bastante murniu y con toques amenazantes a lluvia.

Partimos del pueblu d'Entepenes (505 m)

Asina que magar del almuerzu en Mieres, tiramos hasta'l valle d'Ayer y pelín dempués de les 10 de la mañana, tábemos preparaos, pa entamar a caleyar a la entrada de la foz de San Xulián. Sacamos semeya al llau del rigu y entamamos a caleyar cómodamente pente guapos paredones valle alantre, hasta dir algamando vistes a les Peñes Negres, previu a la nomada Penamea.   

La Polavieya (Ayer) - L.larín - Cualnegro - Freneo - La Furacá - La Mornera - Col.lá Cebarón - Felechosa

5 d'Ochobre de 2025

Track: La Polavieya (Ayer) - L.larín - Cualnegro - Freneo - La Furacá - Escuciarréu - Altu Vallina - Felechosa

Continuamos la temporada 2025-2026 un pocu perezosos en cuanto a participación, pero siempre qu'haya dalguien motiváu salimos, poro, xuntámonos en Mieres p'almorzar y siguimos hacia'l valle d'Ayer col envís d'entamar la ruta nel pueblu de la Pola Vieya, pel que tábemos fartos de pasar, pero qu'enxamás tuviéremos de puntu de partida nestos años.

La idega yera conocer dellos pinganones na fastera oriental del valle, ascender al picu Cualnegro y continuar hacia la llende pente Ayer y Sobrescobiu ensin un oxetivu claro. Preparámonos nos coches y pelín enantes de les diez de la mañana, tamos echando una güeyada el cartelu informativu de la circular al picu Cualnegro.

Partimos de la Pola Vieya (600 m)

Siguimos peles cais de la Pola Vieya, viendo como pali pali, van recuperándose les cases del pueblu, atopando a la salida dellos cartelos de maera, dando indicativu de les distintes rutes, lo que sorpréndenos enforma, anque a dicir verdá, nos últimos años, vemos como'l conceyu d'Ayer ta enfotándose en facer valir toles posibilidaes senderistes y montañeres de tan guapu conceyu.

Saldremos pela plaza Corro, charrando con un paisanu comentándo-y lo guapu que tienen el pueblu y diznos que llevamos per delantre a grupos numberosos de montañeros. Tiramos camín alantre, pasando al llau dela mina la Naval y siguimos direición al crestón calizu de Castro, al que vamos desvianos pa conocer el guapu pinganón de Castro, bien marcáu con cartelos de peligru en casu de riada. 

Puirtu Braña (Ayer) - Tonéu - Aguyas - Cuerna - Sentiles - Requexines - Ausente

27 de Xunetu de 2025

Track: H.ou Los Cabrones (Cabrales) - Amuesa - Piedrabellida - Cares - Caín (Valdión)

Dempués de la Travesera Picos 2024 - 2025 nun saliéramos entá de monte y llueu de munchos díes d'esguilada per Asturies, pente selmana y de finde, ya tocaba salir a patiar un pocu y esparcer pel monte lloñe de pensar en víes, graos, equipar y apretar más o menos, depende del día.

Sicasí, teníemos poques ganes de pensar en llocures per Picos y más bien teníemos ganes d'un patéu rápidu, a mou entrenamientu que nun lo tuviéremos perlloñe de casa, asina que tiramos hasta'l Puirtu Braña y más en concretu, al aparcaderu de la estación ivernal de San Isidro na comarca del Porma.

Partimos del desoláu aparcaderu de San Isidro (1645 m)

Como yera d'esperar, aportamos al enorme aparcaderu ensin gota de vida nesta dómina de l'añu, amosando a les clares lo erróneu d'estes xeres deportives tan estacionales, qu'estrocen sobre manera tol espaciu ñatural pa cada vegada menos díes d'actividá al añu, ensin meteme ya nel ambiente pocu favoratible pa col mediu ambiente, qu'avérase a esti tipu d'instalaciones deportives. 

Ensín más, preparámonos y salimos del aparcaderu en direición a los edificios y bien ceo, garramos de referencia la riega Cebolléu, o más bien barrancu, ya que tien un nivel d'argayu increyible, faciéndolo pela so mandrecha, ya que l'argayu na parte superior ye enorme y allóñanos del nuesu primer oxetivu: el picu Tonéu.

L.levinco (Ayer) - Xerra de Pel.luno

28 de Xineru de 2024

Track: L.levinco (Ayer) - Xerra de Pel.luno

Otru día d'esti iviernu atípicu ensin ñeve, anque albidro que va ser la tónica nos años que queden per delantre. Asina que decidimos dir a cotes baxes, porque pa pisar la tristura nos altos, preferimos tocar caliza y trepar un pocu, asina que viniéronseme a la tiesta, esos guapos cumales penriba de la escuela d'escalada de Pel.luno.

Vamos xuntanos un bon garrapiellu xente, con primer ruta col grupu de Carlos, que vien col so perrín Nico y tamién de Maite, qu'acompaña a Carla, que facía munchu tiempu que nun venía col grupu. D'esti xeitu, vamos facer la decena de persones col restu xente más avezada a venir con nós de monte.

Partimos dende'l pueblu de L.levinco (450 m)

Quedaremos toos nel pueblu ayerán de L.levinco, onde almorzaremos nel chigre y dexaremos los coches, pa preparanos y entamar a caleyar peles cais del pueblín hacia la parte alta, pudiendo travesar peles cais o xubir un pelín pela carretera en direición a la cantera y ya garrar una pista a la manzorga que déxenos nos praos de la Pandiel.la.

Pel.luno (Ayer)

13 de Xineru de 2024

Dempués de la visita a Oceano sin Límite nel primer día del 2024, dimos una vuelta de tuerca y decidimos conocer dalguno de los seutores nuevos qu'apaecen na guía de Roca Verde, viendo'l seutor de L'Ercu la Vieya, con una imaxen positiva, por mor de la variedá de graos, pa un día na que la meteo diba tar un pelín repunante, así que rodar diba veninos bien a tol grupu.

 

Camín guapu y tranquilu hacia L'Ercu la Vieya

P'allá que nos fuimos entós, aparcando esta vegada nel Barrio Cima de Pel.luno, baxo les indicaciones d'un amable vecín que cuéntanos delles hestories, sola nueva masificación montañera que sufren y al pocu de caleyar con tolos trastos ya vamos equivacaos y otra vecina entrúganos pa onde vamos y empobinanos correutamente con una amabilidá, que sorpréndenos, namorándonos esti pueblu y la so xente.

 

Revisamos vía a vía tol pié de vía de L'Ercu la Vieya

Esfrutaremos del patéu hacia L'Ercu La Vieya con una parte final preciosa de camín empedráu que saldría hacia la Peña'l Castro. Nós, xustu enantes de les últimes envueltes salímonos a la mandrecha, viendo los primeros bordillos equipaos, quedando un pelín ablucaos, pol seutor qu'escoyimos pa pasar el día, nun teniendo claro si gastariemos chapes dengún de nosotros nesos bordillos.

 

Damos unos peguinos pente ñube y ñube cayendo cuatru gotes

Daremos un vistazu a tol seutor, yendo hasta L'Ercu, interesándonos poles víes más llargues, nun teniendo mala pinta dos 6bs llargos dalgo apartaos, echando una güeyada a un 7a a la mandrecha llarguísimu, que direutamente desesperanzónos pa col seutor en xeneral, pola mala pinta de la roca, asina que volvimos a les víes centrales, onde más cómodu yera'l pie de vía y decidimos dar unos peguinos por pasar el día, pero desencantaos pa col seutor.

 

Les vistes dende'l seutor lo meyor ensin dubia

Al final ficimos unes tres víes, pente ñube y ñube que tiraba dalgu d'orbayu, faciendo un 6a+ (Calcetu Solís) bastante feete y con dalgún pire innecesariu y llueu ameyoraron les de la manzorga, con meyor roca, paecíendonos 6b (Calcetu de Yamba (6c nos croquis)), más guapa saliéndose hacia Lluna d'Ochobre, pa nun facer un pasu ranciu del 6a+ y pa terminar Lluna d'Ochobre, que si pudiera rondar el 6b+ pero bastante suave, eso sí mui guapa.

En resume, seutor bastante malo, con poca continuidá de roca, bordillos y en xeneral un pañu non mui afayaizu, que nun pasaba na si quedaba ensin equipar, viendo los murazos qu'hai más altos a la mandrecha, nes muries que cierren los praos de Pel.luno en direición a la collada.

-----------------------------------------------------------------------------------------------------------------

Morea (Ayer) - Cuitu Moros

2 d'Avientu de 2023

Track: Morea (Ayer) - Cuitu Moros

Finde raruno no meteorolóxicu, con muncha inestabilidá, poro buscamos rutes curties en ventanes de tiempu y siguir "tachando" vértices xeodésicos de conceyos asturianos. Nesti casu, tenía pendiente conocer el Cuitu Moros, como últimu vértice que quedábame del conceyu d'Ayer, un conceyu nel que tantes bones rutes tenemos feches.

Sicasí, lo averao al pueblu mineru de Morea, quiciabes nunca fizo mui atrautiva esta cume, asina que fue quedando nel tinteru hasta güei. Animosos como siempre, Benjamín y Carlos serán los collacios del grupu qu'apuntáronse al pateú, llueu del almuerzu de rigor en Morea.

 

Partimos d'un aparcaderu na Conforcá en Morea (300 m)

Averámonos en coche hasta un aparcaderu nel barriu de la Conforcá, preparamos les mochiles, intentando calmar los nervios de Kíla y Ares y salimos caleyando teniendo que travesar un segundín la carretera que va pa Nembra y aína garraremos el camín del percorríu Les Fuentes, bien marcáu al entamu la pista, xunto a les cases de Vidayos.

Resistencia Reino Astur Nembra (Ayer)

2 d'Abril de 2023

Track: Resistencia Reino Astur Curtiu (Ayer)

Web del Trail: Resistencia Nembra   

Clasificaciones: Clasificaciones 2023

Continuamos con esta temporada tan correndera, na que tornamos a sentinos bien y anque dexáremos d'entrenar pela semana, con tan sólo andar pel monte pa dir a esguilar y correr cada quince díes, siguimos ganando estáu de forma y vamos completando carreres tan positives como la pasada en Nava, nel primer Trail Villa de la Sidra.

Semeya perguapa per tramos de correr a fueu

Esta vegada díbemos pa Nembra, con menos kilómetros qu'en Nava, pero más desnivel y una carrera más típicamente asturiana, ye dicir, a pinchu p'arriba y a fueu p'abaxo, ensin medies tintes. Ya la corriera va cinco años, cuando facíase en Xunetu y gustárame muncho, teniendo la idega de facer la meyor carrera posible.

Primera parte de la carrera a pinchu hacia'l picu la L.lomba

D'esti xeitu, salimos bastante alantre, viendo como'l nivel diba ser peralto, saliendo como tiros tolos participantes, hasta topanos con un tapón, al cruciar los primeros regatos. Llueu, fuese estirando pali pali la carrera, hasta aportar a la gran xubida hasta'l picu la L.lomba, un entepechu brutal que tuve que tragar con un personaxe llevando musiquina discotequera, hasta qu'a la fín pude adelantalo.

 

Tramu correnderu nel crestéu hacia'l picu Pedru García

Son cosines que me fadien munchísimu y los organizadores deberíen tomar cartes nel asuntu, nin auriculares nin música qu'ofenda al restu participantes. Si corres pel monte, deberíes ser capaz d'esfrutar del monte, de los soníos, del alendar de los compañeros que corren al to llau, de la charra en comuna y del bon ambiente de les carreres, sinon, vete a dar vueltes a un parque con tu musiquina y dexar vivir el monte al restu los participantes.

 

Increyible lo dura y correndera que ye la Resistencia Nembra

Sacante d'esta falta d'empatía, llueu de la L.lomba, pude esfrutar de correr y aldericar con varios deportistes demientres avanzábemos hacia'l picu Pedru García, onde nos tocó ver l'horror de los incendios d'esta selmana, corriendo per tierra quemada, casi caliente y tragando un pelín de fumu, qu'entá salía d'esta tierra astur, que dalgunos empéñense n'estrozala.

 

Tramu final de carrera hacia la meta

Como siempre dempués d'encumar el puntu más alto, toca una llarguísima baxada, con tramos téunicos al entamu, otros más correnderos na parte media pa tornar a baxar per trialeres bien guapes, hasta'l ríu Negru, onde ya tendremos un llanéu hasta arribar a la meta en Nembra, onde Rubén, el nuesu animador preferíu y paisanu de Nembra, tenía a bien saludar participante, tres participante, nesta folixa del trail.

Aportamos a meta dempués d'una carrera bien lluchada

El nivel ye tal, que dempués de facer una bona carrera, aportamos a meta el 121 de 313 participantes y el 38 de la mió categoría de 105, siempre rondando tar nel primer terciu de los compañeros, pero como digo, ye una pasada ver el nivel notándose que los corredores entrenen y muncho... poro, los montañeros agora, quedamos cola sensación de facer lo que podemos ya intentar esfrutar d'esti deporte como un complementu estupendo al restu de les nueses actividaes.

 

En cuanto, a la organización del pueblu de Nembra, namái que dar les gracies pol ambiente, pola carrera, pol avituallamientu final, con pasta recién cocío, empanaes, cerveza gratis, mercáu astur y tol pueblu volcáu con esta folixa del trail, a la qu'espero volver mientres tenga fuercies y ganes d'intentar competir dientro del nivel al que pueu y pienso dar.

La Felguerosa (Ayer) - Picu Cutrifera - Monte Bustiello

19 de Payares de 2022

Track: La Felguerosa (Ayer) - Picu Cutrifera - Monte Bustiello

Primer selmana d'iviernu, con ñevaes nes cotes altes, lo que llevó a buscar un requexín, una pequeña ventanina, pa poder salir al monte. Esta vegada, la xente nun fui mui positiva y tan sólo aventurámonos Charly y yo, tornando una vegada más, hasta'l cordal de L.longalendo, onde entá faltábenmos un tramu per conocer, xustu enriba de Morea, nel conceyu d'Ayer.

Les otres incursiones en L.longalendo, fueran más al oriente, entamando pelos picos Culladiella y Grandes, pa finalizar el cordal pela Burra Blanca y Cuetu Ventosu que ficímoslo nun va tantos años, siendo una costante nesti cordal, el caltenimiento de los mayaos ganaderos y calteniéndose en bon estáu una llínea de senderos pela propia cumera o falderes altes de L.longalendo.

Partimos de la Felguerosa (494 m) penriba de Morea d'Ayer

D'esti xeitu, llueu del clásicu almuerzu en Mieres, onde compartimos coche, continuamos hasta'l valle del rigu Ayer, pa salir en Morea y facer un par de kilómetros hasta'l pueblín de la Felguerosa. Nun voi descubrir yo la fealdá que supuso la enorme industralización de les cuenques mineres, con crecimientos ensin xacíu de los grandes pueblos, pero sí que quiero destacar que namái que salímonos a les falderes de los cordales, alcontrámonos con pueblinos bien calteníos, onde por suerte, recuperánronse bona parte de les cases, a mou de segunda vivienda supongo, la mayoría d'elles.

Cuevas (Ayer)

2 d'Ochobre de 2022

Dempués de la ruta pela redolada de Cuevas del día anterior, ascendiendo al Picón de las Rubias, al día siguiente averámonos enantes de que'l sol pegase fuerte, hasta'l seutor de la Fuente, onde ya esguiláramos va dellos añinos, faciendo un par de 6b/+ durinos pero mui guapos.

Nathalia apretando duro nes víes de la Fuente

 

Tamién, daquella probáramos Merci Cata, vía que según onde mirásemos salía de 6c o 6c+. Esta vegada, sufríeramos la so dureza Suco y yo, alloriando un pocu, de nuevu, con que la vía fuese sólo 6c/+, nun sacándola nin de broma al primer pegue nengún de los dos.

 

Perguapu llugar la escuela ayerana de Cuevas

 

Magar de parar un ratín a xintar cuando más pegaba la solana, tornamos a últimes hores de la tarde, ya a la solombra y con meyor tactu, pa dar otru pegue al corte totalmente pa encadenala, quedándome claro, como vien na última guía de Escalada en la Cordillera, que más bien ye 7a esta vía.

Cuevas
 
Croquis modificaos por mi de la escuela d'escalada de Cuevas. Gracies y col so permisu. 

-----------------------------------------------------------------------------------------------

Cuevas (Ayer) - Riopinos - Picón de las Rubias - El Gumial

1 d'Ochobre de 2022

Track: Cuevas (Ayer) - Riopinos - Picón de las Rubias - El Gumial

Entamábemos temporada montañera, tardía llueu de que nun saliese alantre la xuntanza n'Euzkadi, averándonos hasta Cuevas n'Ayer, onde nun va munchu tiempu pasáremos dellos díes esguilando y mui rellacionáu nos últimos tiempos col monte astur, gracies a les campañes publicitarias d'Agua de Cuevas.

El tema yera, que tábemos con ganes de tornar de monte per esta fastera, ya que personalmente tenía un par de valles por conocer y la última vegada que tuviéramos, ficiéramos un bon día de monte ascendiendo tol val.le Melera, hasta la Peña Pandos o Peña Melera.

Partimos de Cuevas (772 m) nel conceyu ayerán

Encomiéndovos a dexar el coche nel aparcaderu del llau del merenderu de Cuevas (onde entama la ruta hacia'l Gumial) y non como nós, onde l'area recreativa, ya que caleyamos per carretera de más. Aún así, dicir que de nueche tuviemos cenando perbien nel merenderu, asina que tomar dalgo al terminar nesti restaurante ya ye un motivu más pa esta ruta.

Casomera (Ayer) - El Cuitu - Picu L.lamas - Urmial

6 de Febreru de 2022

Track: Casomera (Ayer) - El Picu Cuitu - L.lamas - Urmial

Camudamos un pocu les rutes ivernales del GM Xuan de la Borrina, por restolar dalgo afayaizu ensin ñeve y dempués de tantos años de patéu per Asturies, siempre ando a la gueta de llugares desconocíos, col envís de tachar montes pelos qu'entá nun puse los miós pies enriba.

Nesta xera andamos, poro les rutes dirán convirtiéndose nuna aventura tres d'otra, yéndonos nesti casu hasta'l conceyu d'Ayer, que tan bones rutes lleva dándonos nestos años. La idega yera conocer la parte baxa de la xerra de Fuentes d'Inviernu, averándonos hasta'l guapu pueblu de Casomera nel valle del rigu Ayer.

Partimos de Casomera (625 m) nel valle del rigu Ayer

 

Aparcaremos al llau de la ilesia, al empar que dellos montañeros más y pondrémonos a caleyar pela carretera con una xelada perfuerte, intentando calecer músculos lo antes posible. Magar d'un kilómetru de camín, al altor de la riega Castañera, saldremos per un senderu que dirá faciéndonos xubir a la manzorga'l cauce hasta crucialo en Polumal, pa continuar hacia los praos de Cul.lacón.

Puirtu Braña (Ayer) - Peña'l Vientu

19 d'Avientu de 2021

Track: Puirtu Braña (Ayer) - Peña'l Vientu

Continuamos col entamu de temporada ivernal, averándonos hasta'l Puirtu Braña nel conceyu d'Ayer, onde dende cuantayá teníemos pendiente facer ascensión a la Peña'l Vientu, monte que ya ficiéramos va munchos años, amestándo-y la Peña Los Fornos y el picu Cascayón.

Esta vegada, dibemos dixebraos en dos grupinos, los montañeros equipaos con crampones, marañones, piolé y demás y los esquiadores, que diben averase hasta'l colláu L'Acebal y restolar  cuales yeren les meyores opciones pa pegar una bona baxada.

Partimos pelín abaxo del Puirtu Braña al entamu de la pista Wamba

Aportamos al Puirtu Braña y como ye vezu, baxaremos en coche hasta l'entamu de la pista Wamba, onde una retafila coches y furgonetes tan aparcaes a la vera la carretera. Nós, asitiámonos como podemos y entamen los preparativos garrando los preseos necesarios pa la ruta.

Col.lanzo (Ayer) - Pinganón del Caideru

16 de Mayu de 2021

Track: Col.lanzo (Ayer) - Pinganón del Caideru

Finde gafu no meteorolóxicu, pero teníemos ruta programada y yera la vuelta de Benjamín, tras el parón pandémicu, asina qu'una vegada que taba vacunáu, había que salir a dar un pateín y conocer dalguna cosina nueva.

Nesi sen, dióme por dir a conocer el Pinganón del Caideru, poro preparamos varies opciones y plantámonos el domingu a les 9 la mañana en Col.lanzo, nel conceyu d'Ayer. Anímense Montse y Jorge, aportando al grupu yo les dos perrones: Kíla y Xena y la mió cansada presencia.

Semeyina nel Texu de Santibanes

El día ta murniu, pero paez que va aguantar, asina que salimos tranquilamente de Col.lanzo caleyando pela carretera primeru hacia Santiabanes de la Fuente, onde facemos semeya de rigor col texu y siguimos carretera hasta'l pueblín de la Fuente, con pocu espaciu d'apartaderu polo que dexar los coches en Col.lanzo ye la meyor opción.

Uriés (Ayer) - Burrablanca - Cuetu Ventosu

 31 de Xineru de 2021

Track: Uriés (Ayer) - Burrablanca - Cuetu Ventosu

Primer día del añu 2021, nel qu'animámonos xente del grupu a salir a dar un pateín. Enantes anduviera en solitariu faciendo una prestosa ivernal al Picu Torre en Piloña, pero nesti finde, al menos Carlos y Carla tamién tenían ganes de salir a estirar les pates.

Nos últimos tiempos sigo faciendo "trabayu de campu" y tuviera repasando los Techos d'Asturies mirando dellos mapes. Nesi sen, siempre acabamos garrando idegues pa salides pel monte, gracies a esti trabayu y nel intre, ví que faltábame'l techu del conceyu de Mieres por ascender, asina que tiramos hasta'l pueblu d'Uriés n'Ayer, puntu de partida de la nuesa ruta.

Salimos del pueblu ayerán d'Uriés (612 m)