La Polavieya (Ayer) - L.larín - Cualnegro - Freneo - La Furacá - La Mornera - Col.lá Cebarón - Felechosa

5 d'Ochobre de 2025

Track: La Polavieya (Ayer) - L.larín - Cualnegro - Freneo - La Furacá - Escuciarréu - Altu Vallina - Felechosa

Continuamos la temporada 2025-2026 un pocu perezosos en cuanto a participación, pero siempre qu'haya dalguien motiváu salimos, poro, xuntámonos en Mieres p'almorzar y siguimos hacia'l valle d'Ayer col envís d'entamar la ruta nel pueblu de la Pola Vieya, pel que tábemos fartos de pasar, pero qu'enxamás tuviéremos de puntu de partida nestos años.

La idega yera conocer dellos pinganones na fastera oriental del valle, ascender al picu Cualnegro y continuar hacia la llende pente Ayer y Sobrescobiu ensin un oxetivu claro. Preparámonos nos coches y pelín enantes de les diez de la mañana, tamos echando una güeyada el cartelu informativu de la circular al picu Cualnegro.

Partimos de la Pola Vieya (600 m)

Siguimos peles cais de la Pola Vieya, viendo como pali pali, van recuperándose les cases del pueblu, atopando a la salida dellos cartelos de maera, dando indicativu de les distintes rutes, lo que sorpréndenos enforma, anque a dicir verdá, nos últimos años, vemos como'l conceyu d'Ayer ta enfotándose en facer valir toles posibilidaes senderistes y montañeres de tan guapu conceyu.

Saldremos pela plaza Corro, charrando con un paisanu comentándo-y lo guapu que tienen el pueblu y diznos que llevamos per delantre a grupos numberosos de montañeros. Tiramos camín alantre, pasando al llau dela mina la Naval y siguimos direición al crestón calizu de Castro, al que vamos desvianos pa conocer el guapu pinganón de Castro, bien marcáu con cartelos de peligru en casu de riada. 

Xubimos pelos praos y cabañes de Misiegos hacia'l guapu pinganón de Castru

Nós, nun tenemos tanta suerte y atopamos les poces y el pinganón pelín escosu, pero paeznos un llugar tan guapu que quedamos con ganes de volver. Tornamos al camín y salimos peles cabañes de Misiego penriba la sierra Castro hasta aportar al Pinganón de L.larín, al qu'atopamos con menos caudal que'l de Castro, lo que diznos a les clares que tendremos que revisitar esta ruta.

Continuamos camín hacia'l de L.larín qu'atopámoslu pelín probe de caudal

Cruciaremos una ponte de maera y siguimos siguiendo los cartelos, que llévenmos a la Col.lá L.linares (pal que fizo los cartelos la che vaqueira nun se grafía con tx que nun tamos n'Euskal Herria, sicasí ts pudiera tar meyor en caso de non querer usar la ll sopuntiada). Sacante d'esto, pasaremos peles cabañes de los Palombos onde adelantamos al grupu Vetusta y los sos milenta montañeros y entraremos na parte más guapa la ruta, na viesca de Cualnegro.

Continuamos pelos Palombos hacia l'ablucante viesca de Cualnegro

Nun hai munches pallabres pa describir esti llugar, simplemente camínase y esfrútase de cada pasu penriba la fueya cayío, ensin parar de mirar les enormes fayes que nos acompañen pel camín, atopando dalguna cabaña enmediu de la espesura d'ensuañu, hasta que salimos hacia les cabañes de las Tablizas, pasu previu hacia la col.lá L.linares, puntu onde entamará l'ascensión al picu Cualnegro.

 

Esfrutamos de cada pasu pel fayéu descubriendo cabañes increyibles

Dende L.linares, perpasaremos pela mandrecha un prau llendáu y siguiremos los fitos y traces de senderu que van dir llevándonos per tarrén pindiu pero guapísimu, como non, pente un fayéu preciosu, hasta la collada noroeste del Cualnegro, onde entamaremos l'ascensu final, primeru per prau pa salir a la parte alta pente la peña calizo y les fayes, que llevaránmos hasta los 1123 m d'esti guapu cumal.

Entamamos ascensu pel monte Cualnegro hacia'l so cumal

Nun soi yo de cumales onde la vexetación aporta hasta lo cimero, pero tengo que dicir qu'esti monte sorprendióme pol allugamientu, con tola faldera tapizada de fayes y el claro xustu nel cumal, pa tener delles vistes del conceyu d'Ayer, destacando como non, la Pena Reonda y les foces del Pino, xusto enfrente nueso.

Facemos cumal nel Cualnegro (1123 m)

Pararemos un ratín a picar dalgo, porque la verdá ye que vamos a fueu dende que salimos y ye que tamos nun puntu dulce nel grupu con unos ritmos potentes y perbona forma de los compañeros. Magar del picotéu, descendemos del Cualnegro, cruciándonos nel colláu con tola paisanada del Vetusta hasta aportar a L.linares, onde vamos tomar camín pela L.lamera, pa siguir con un pelín de descensu hacia'l Enu Mayor, llugar onde meterémonos nel valle de Freneo.

Baxamos de Cualnegro hacia la col.lá L.linares pa siguir hacia Freneo 

Nel Enu Mayor, toparemos dalgo tomaos los pasos pente les finques, pero salimos sin mayor problema dando vista a la foz de cuarcita de las Navariegas, a la qu'aportamos al traviés de les cabañes de Gamonal, pa entrar ya nel antiguu camín empedráu que va dir sacándonos hacia'l Mayaín, dando vistes a la mole del Retriñón al fondu, pel que xubiéramos per esti mesmu camín, viniendo de Felechosa.

Entramos na parte alta del valle Freneo col clásicu camín empedráu xubiendo hacia la Valencia

Nós aportaremos, al Mayaín y aprovechando'l reciente desbrozu, decidimos ascender hacia la peña La Furacá, saliendo pela manzorga del Casarón pa garrar la guapa vallina de la Forá, siempre dexando tol crestón calizu del Portillo a la nuesa mandrecha, aportarndo al colláu la Forá, onde sacamos les semeyes de rigor con tan guapa ventanona de la Peña La Furacá.

Xubimos pela vallina la Vegona hasta la Furacá

Llevamos unes 4 hores de patéu y ya va entrando ganes de parar un pelín a xintar, asina qu'apuramos pa xubir al Penón de la Carba (1485 m), guapu mirador hacia tol valle del Alba en Sobrescobiu, que tantos recuerdos traeme de la ruta peles Aberrugues y descendemos de nuevu hacia la Vegona, onde ya paramos un bon ratín a descansar, contándo-yos l'aventura de baxada pela vallina'l ríu Cabritu, na que quedamos a otru tabayón de quedanos a dormir nel monte jeje.

 

Aportamos al Penón de la Carba (1485 m) con vistes hacia'l parque de Redes

Magar del descansu, descenderemos hacia la vega La Felguera pa continuar pela pista que tan ampliando a la vega La Valencia, continuando hasta L'Otero que bien conocemos de l'ascensión al Retriñón, onde xintáremos a la baxada y vamos descender hacia les cabañes de la Mornera, pa garrar el camín empedráu per L'Escú Zarréu, que dempués de virar a la mandrecha, darános vista al pinganón de la Mornera, secu dafechu nesta dómina l'añu.

Pasamos pela Felguera, La Valencia y  L'Otero descendiendo a la Mornera pa continar per L'Escú Zarréu

Perpasaremos esti guapu camín, cola pena de nun tener La Mornera con más agua y continuamos camín hacia'l col.láu la Palanca devolando ya hacia'l monte Cebarón, siguiendo camín hasta la guapa col.lá Cebarón onde garramos descensu hacia Freneo, pelos caminos clásicos del percorríu de les brañes ayeranes, que tienen d'empobinanos hacia Felechosa.

Dexamos atrás el Pinganón de Mornera (secu) pa continuar al col.láu Cebarón y baxar a Freneo Baxo

Dende Cebarón, descenderemos esfrutrando de les cuidaes cabañes y de les vistes hacia'l valle Freneo hasta aportar a lo fonderu del valle, onde tamién acolumbramos enriba nuesa la faza norte del picu Cualnegro, que visitamos unes hores enantes y con esa visión, garramos puxu baxando hacia Felechosa, onde decidimos parar a echar una cervecina nuna terraza.

Descendemos a Felechosa pa continuar pelos caleyos hasta la Pola Vieya

Llueu del refrixeriu, continuamos peles cais de Felechosa hacia'l rigu Braña, aprovechando la caleya hasta'l Pino pa evitar la carretera, teniendo dempués dellos cientos de metros hasta la entrada de la Pola Vieya, onde teníemos aparcáu los coches. Dicir, que diónos la sensación que la casa conceyu ayerana, tien previsto facer una senda pegada al rigu Braña dende Felechosa a la Pola Vieya, lo que paezme una idega bien guapa pa los senderistes y turistes d'esti conceyu que paez apostar per un turismu sostenible de monte.

Dellos metros enantes de la Pola Vieya, alcontrámonos cola mítica Pena Reonda de la canción y con esti últimu detalle, terminamos esta perguapa ruta de 20 km, con un desnivel acumuláu de +/-1185 m, que pudimos llevar a bien, nun total de 8 hores y 5 minutinos de patéu ayerán.

Camudando'l Camín pente la Pola y el Pino