Caín (Valdión) - Santibaña - Caín de Riba - Yerbas Altas - Bersolina - Trea

8 de Setiembre de 2026 

Track: Caín (Valdión) - Santibaña - Caín de Riba - Yerbas Altas - Bersolina - Trea

Continuamos per Caín dando pateínos y conociendo nuevos llugares, pero tamos siempre cola meteo repunando y faciéndonos tomar decisiones pa cambeu de planes, poro viendo que tenemos tormentes de tarde decidimos salir al plan anicial y dir viendo sobre la marcha hasta onde podríemos llegar, ampliando una posible escapatoria con un paseín hasta la Cueva Santibaña. 

Una vegada más en Caín (460 m) entamamos ruta

D'esti xeitu y con dalgo de borrín, salimos de Caín, faciendo casu a los paisanos del pueblu, pa conocer la cueva del Quesu o de Santibaña, que tanto nos recomendaren estos díes ya que según ellos dexáranla mui guapa, anque a posteriori enterámonos que nun fueren nin vela entá, jaja. El casu ye qu'entamamos a caleyar per Caín atopando perbien marcáu tol percorriu hasta Santibaña y ye que'l parque de Picos ta poniendose les piles, pa marcar dellos percorríos y que nun ande tol mundiu pelos mesmos llugares.

Sesanes (Valdión) - Los H.oyaos - Sedu La Garcia - Senda'l Rabicu - Asotín - Cordiñanes

7 de Setiembre de 2026 

Track: Sesanes (Valdión) - Los Hojaos - Sedu La Garcia - Senda'l Rabicu - Asotín - Cordiñanes

Dempués d'un domingu de llibrar el día, nel que dimos un paséu pela senda'l Cares, conociendo'l camín de la Electra, que tién un pocu l'interés hestóricu y montañéramente d'accesu a delles canales como Saigu o Avareras, tocaba volver a l'actividá más seria, ya que dexónos un pocu a medies, anque nun daba'l día pa más, ya que tuviemos a la vuelta que metenos nos túneles p'abelluganos de los bastiazos que cayeren de torbón.

Magar de pasar el domingu tarde de descansu, ficimos un pocu cambiu de cromos, colando Marcos que tenía que volver al trabayu y xuniéndose al grupu, Mario y Sara con enerxíes renovaes. Pa contentá-yos, díbemos repetir pela mió parte la ruta al Sedu la Garcia, que ya ficiera va dellos años, pero que camentaba diba paecié-yos increyible y mui divertía. 

Partimos del aparcaderu de Sesanes (850 m)

Alborez col día pelín borrinosu, tovía colos restos de mal tiempu del día anterior, asina qu'almorzamos con calma y averámonos na furgo hasta Sesanes, ya que tenemos l'envís de facer la circular hasta colláu Solano pela senda'l Rabicu, anque si tuviéremos con munches más ganes, pudiéremos empatar la Garcia col final de la Traviesa'l Llaz y baxar per Mueñu hasta Caín, faciendo'l camín hasta Sesanes pel tramu de senda'l Cares que tan arreglando nel intre, pa nun tener que facer tocar asfaltu, lo que va dar muncha vida a los pueblos de Valdión, en cuanto a senderistes.

Caín (Valdión) - Mueñu - Camín de les Oveyes - Torre Pamparrosu - Dobresengos

5 de Setiembre de 2026 

Track: Caín (Valdión) - Mueñu - Camín de les Oveyes - Torre Pamparrosu - Dobresengos

Sábadu a les 6 y media la mañana, suena'l despertador dempués d'una nueche d'aguantar de fondu la musiquina de les fiestes de Caín, asina que llevantámonos dafechu reventaos, facemos una cafetera como podemos y preparamos p'almorzar de nueche zarráu entá. Metemos pal cuerpu lo que podemos, facemos el pinchu pa la ruta y a partir de les 7 entamen a llegar los compañeros que durmieren nel albergue.

Con galbana ponemos les mochiles y les pates entamen a caleyar dormíes hacia la salida de Caín, el día anterior caleciéremos perbien peles siendes antigües del Cares, pero paez que'l cuerpu nun descansó les hores debíes y cuesta arrancar hacia los Praos de Castro, puntu nel que la canal de Mueñu entama y amuésase perllarga delantre de los nuesos güeyos. 

Salida de Caín (460 m) coles primeres lluces

Ye una vieyísima conocida, asina que nun voi detallar muncho la so ascensión, ya que ficiérales va munchos años como enllaz hacia H.ermosu, ascendiendo la Palanca y el Llambrión y tamién la descendiera dempués d'una llocura de ruta hasta la Torre La Celada dempués de xintanos Arzón y parte Dobresengros o baxando dende la parte media al venir dende les Travieses del Llaz cola Torre del Mediu nel menú.

Caín (Valdión) - Cantu Mabro - Casielles - Puntedo - Cámara - Trescámara - La Tránvia - Cares

4 de Setiembre de 2026 

Track: Caín (Valdión) - Cantu Mabro - Casielles - Puntedo -Cámara - Trescámara - La Tránvia - Cares

Tornamos a Picos d'Europa dempués de la Travesera 2025 - 2026 col envís de conocer dalgunos llugares y pasos que me queden na contorna de Caín. Siendo sinceros, cada día cuéstame más alcontrar rutes motivantes y ye que ya son munchos años de pateos y personalmente Picos, ye dalgo que trabayé muncho, coles traveseres y dalgunos díes d'especiales.

Sicasí, dempués de dar munches vueltes y preparar munchos tracks, con milenta posibilidaes, tiramos el vienres a Caín cola idega de tar una selmana patiando, nun día de munchu calor, asina que dexamos pa prau cualesquier monte del cordal y decidimos dar un paséin aéreu pel Cares, pa que los collacios vayan metiéndose en farina.

Partimos dende Caín (460 m)

La idega ye estirar les pates dempués del viaxe y cansar un pocu, ya qu'enriba tenemos les fiestes de Caín y suponemos que la música nun mos va dexar descansar pa la ruta del sábadu, que presentábase potente. Nel intre, preparámonos y salimos caleyando per Caín, pasaes les 4 y media la tarde, pegando entá la solana con fuercia, averándonos hasta la Jarda, onde garraremos el senderu del sedu Mabro.

La calufa ye terrible y sudamos enforma, pero tenemos la esperanza de garrar solombra un pelín más alantre cuando empocemos na garganta, asína que tiramos alantre pel senderu, garrando nos Lleraos el desvíu hacia'l Cantu Mabro, que ya percorriera la primer vegada que conocí Dobresengos nun error que fízonos superar más desnivel del deseyáu, por nun tomar bien el Sedu Mabro. 

Braña la Senra (Tameza) - La Cadavina - Puertu Banduxu - Braña La Cueva - Nial La Utre

23 d'Agostu de 2026 

Track: Braña la Senra (Tameza) - La Cadavina - Puertu Banduxu - Braña La Cueva - Nial del Utre

Una nueva ruta más del GM Xuan de la Borrina, na que personalmente nun tenía munches idegues pa facer dalgo nuevo. Por suerte, Carlos, tamién ye fiel seguidor de dellos blogues de monte y apúntase cosines dacuando, proponiendo facer esta ruta que viera nel blog del collaciu Javi Cienfuegos, nel conceyu de Tameza, onde facía años que nun tornaba de monte.

Partimos dende la braña de Senra en Tameza (910 m)

La mala suerte fue que Carlos al final nun pudo venir y ya nun mos daba tiempu a camudar de ruta, asina que siguimos alantre cola propuesta, el restu del grupu, parando a almorzar en Grau y continuando llargu camín hasta Yernes en Tameza, teniendo que siguir pista alantre la braña La Senra, asfaltada reciéntemente por mor del ciclismu, hasta'l mesmu colláu de Fancuaya, baxo la faldera del míticu monte L'Oral.

Piedrafita (Los Argüeyos) - Cuetu Millaró - Guazones - Campastiñosas - Puertu Piedrafita

 15 d'Agostu de 2026 

Track: Piedrafita (Los Argüeyos) - Cuetu Millaró - Guazones - Campastiñosas - Puertu Piedrafita

Continuamos de monte col grupu n'Agostu, dempués d'unos díes de descansu y muncha bicicleta per Soria, nos que repetimos varies rutes pero sobretoo metimos volumen de kms nes pates, aprovechando pa conocer dalgunes zones del Celtigravel de Soria, tornamos a poner les pates en mou patéu, yéndonos hasta Los Argüeyos en Llión.

Partimos del pueblu de Piedrafita (1302 m)

Tirando un pocu de repertoriu de rutes sueltes que preparo y nun acaben por salir, vamos averános hasta Cármenes, pa conocer un pocu tol valle de Piedrafita y percorrer la xerra de Riañu, a la que pertenez el perconocíu Cuetu Millaró, que ya ficiéramos tanto en branu como n'ivernal, nun d'esos intentos que ficiera por deprender l'esquí de travesía.

La Vid (Gordón) - Bregón - San Roque - Cuetu San Mateo - Fayabaxo - Santa Lucia - Ciñera

 26 de Xunetu de 2026 

Track: La Vid (Gordón) - Bregón - San Roque - Rasón - Cuetu San Mateo - Fayabaxo - Santa Lucia - Ciñera

Dempués de la Travesera Picos 2025 - 2026 tornábemos a facer dalgo d'actividá, pa caltener la bona forma algamada y viendo que teníemos la meteo pelín repunante p'Asturies, averámonos hasta Llión col envís de conocer otru d'esos Montes Cimeros del Cordal Cantábricu de menos de 2000 metros, como ye'l Cuetu San Mateo.

Partimos de La Vid (1065 m) na comarca de Gordón

Pa ello, nun tuvimos muncho que viaxar, averándonos a la comarca de Gordón, bien afayaiza dende'l Puertu Payares y llueu del almuerzu clásicu n'Ezequiel, continuamos hasta'l pueblu de la Vid, onde teníemos el nuesu puntu de partida, llueu de crear un percorríu xuniendo dalgún tramu d'un trail y una clásica ascensión al Cuetu San Mateo.

H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

15 de Xunetu de 2026 

Track: H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

Últimu día de la Travesera 2025 - 2026, alboreciendo nel colláu H.ermosu al que llegáramos faciendo una travesía increyible pela Collada Blanca y la Torre La Palanca, volviendo a tener dellos problemes estomacales por mor de la superespeciada cena, pero a cambiu, tuviéramos a gustu viendo una proyeición del leopardu de les ñeves, abrigadinos nel esterior.

Preparámonos con calma, revisando un pocu tol refuxu, porque'l día anterior dalgún espabiláu, robóme los bastones y asina tamos, cola mochila puesta y ensin bastones pa facer casi'l mayor descensu de tola Travesera, teniéndonos que devolve a H.uentedé onde tenemos los coches.

Partimos de los 2065 m del Colláu H.ermosu

Salimos los supervivientes d'esti añu cola vista puesta nas Colladinas, clásica salida de H.ermosu, anque tol tiempu los güeyos se nos van al guapu más de ñubes que tenemos nel valle de Valdión, destacando como non, el macizu del Cornión cola so másima espresión la Torresanta llionesa y la Torre'l Frieru enfrente nueso, que tamién pide protagonismu.

H.uentedé (Llébana) - Hacheru - Las Garamas - Collada Blanca - Picón - La Palanca - H.ermosu (Valdión)

14 de Xunetu de 2026 

Track: H.uentedé (Llébana) - Hacheru - Las Garamas - Collada Blanca - Picón - La Palanca - H.ermosu (Valdión)

Continuamos per Picos, completando la Travesera Picos 2025-2026, dalgo recuperaos del día anterior pela increyible canal de Montestigu y el Senderu'l Gatu, pudiendo na mañana almorzar más curioso, que na cena, que tampoco pude meter munchu pal cuerpu ya que nun me sentaba del tou bien. 

Nesti día, entamamos una travesía de dos díes con final nel colláu H.ermosu y con salida en H.uentedé, asina que tocaba abandonar l'apartamentu de Brez, llueu del almuerzu y recoyer la casina, pa facer per carretera'l tramu hasta l'aparcaderu de H.uentedé, onde terminamos de rematar los preparativos pa entamar la ruta.

Partimos tol equipu de H.uentedé (1080 m)

El menú de primeru ye facer la senda L'Hacheru que conozco de varies ocasiones, anque la primer vegada ficiérala nun intentu fallíu a los Picos de Santana n'ivernal, quedándonos por mor de la ventisca na Torre las Coteras Roxas, pudiendo esfrutalalu munchísimu tamién, n'ascensión correndera con Kíla a la Peña Vieya. 

Esta vegada nun vamos nin corriendo, nin n'ivernal, pero llevamos trisca nes pates de tolos díes anteriores, asina que salimos del aparcaderu pali pali, sobretou col envís d'esfrutala ya intentar poner les pates de nuevu a tonu, dempués del mal día que pasé na ruta anterior, sintiéndome tovía mui cansáu y con floxera nos primeros metros d'ascensu.

Brez (Llébana) - Lechugales - Montestigu - Mermeja - Prau Contés - Cámara - Somajía

13 de Xunetu de 2026 

Track: Brez (Llébana) - Lechugales - Montestigu - Mermeja - Prau Contés - Cámara - Somajía

Siguimos de Travesera Picos 2025-2026 pela Llébana, llueu d'un día percalurosu onde ficiéramos la Peña Ventosa y pasáremos la tarde entre piscina y picoteos de pipes, mierdes varies y birres hasta dir pa la cama a descansar, pasando ya una nueche reguleres na furgo pol calor, que nun me dexó durmir tolo necesario.

Llevantéme con revoltura estomacal y almorcé lo que'l cuerpu fue a soportar yendo delles vegaes al bañu, pintando la cosa regular pa lo que teníemos per delantre y ye que tocaba una ruta propuesta por mí pal calendariu y nun yera otra que conocer esti "Terrenu Pucavi" nes canales menos conocíes del macizu Oriental.

Partimos de Brez (745 m) con un día maraviyosu

La ruta a la Morra Lechugales peles canales de Lechugales y Arredondas, ficiera estragos nos pies de dellos compañeros, quedándonos ensin la compaña de Carlos y Mario, que prefirieron regulase pa continuar los siguientes dos díes de Travesera, asina que quedamos namás que Rubén, Montse y lo que queda de mi cuerpu p'atacar la ruta más potente, aventurera y espuesta d'estos díes per Picos.

Gracies a una xarazada descomunal del día anterior, la previsión yera d'un día muncho más fresquín, asina que nun madrugamos tanto y a les 8 tábemos preparaos pa entamar a caleyar, teniendo que facer el mesmu camín hasta la canal de Lechugales del sábadu, asina que pocu tenemos más que cuntar del nuesu pasu per Rojes y Sandoblo, teniendo nesti día, la total visión de tol macizu, poro diremos intentando aldovinar per onde van llevanos los nuesos pasos pente'l murallón calizu.

San Pedro (Llébana) - Toja - Taruey - Peña Ventosa - Salarzón

12 de Xunetu de 2026 

Track: San Pedro (Llébana) - Toja - Taruey - Peña Ventosa - Salarzón

Continuamos na Travesera Picos 2025 - 2026 y como ye vezu en toles anteriores, ye día de despedides al finar los díes del finde, teniendo que tornar pa casa dalgunos participantes, qu'al día siguiente ye día de curro. Poro, siempre preparo una escapatoria o una rutina más tranquila pa que tengan un viaxe tranquilu de vuelta al llar.

Esti añu, a les baxes iniciales, sumamos la de Pepa por lesión pero entra n'aición Montse, que va tar presente hasta'l final y Marcos fadrá la ruta pa colar pa casa dempués. La idega, simplemente yera facer un monte potente, pero que nun se nos fuese d'hores la ruta y nun pudimos acertar más d'entamu, ya que tenemos un día percalurosu per delantre.

Partimos de San Pedro (548 m) nel valle de Bedoya

 

Vamos conducir dende Brez desfiladeru abaxo pasando Potes y al pocu vamos desvianos hacia'l valle de Bedoya, onde tendremos el nuesu puntu d'aniciu de rutu, como ye'l pueblu de San Pedro. Aparcaremos a la entrada y preparamos les mochiles con una sensación térmica alta.

Por suerte, la ruta va llevanos pela riega Bedoya alantre, siempre per pista cómoda y baxo la solombra d'una abundante viesca hasta aportar a los Vaos, onde entraremos en tarrén más pindiu, teniendo que facer varies envueltes hasta les cabañes y ermita de Toja, saliendo a la parte más alta de la pista que tien de llevanos baxo'l sol hacia'l colláu Taruey.

Brez (Llébana) - Canal de Lechugales - Morra - Silla Caballu - Canal Las Arredondas

11 de Xunetu de 2026 

Track: Brez (Llébana) - Canal de Lechuglales - Morra - Silla Caballu - Canal d'Arredondas

Dempués del primer día de ruta pela tarde al Picu Jano, venía ún de los platos fuertes d'esta Travesera Picos 2025 - 2026 como yera l'ascensión a la cota más alta del macizu Oriental, pero claro, nel GM Xuan de la Borrina, nun díbemos facelo cenciellu dende'l H.itu d'Escarandi, sinon que queríemos conocer la Canal de Lechugales y baxar pela d'Arrendondas, canal a la que-y tenía munches ganes.

Les previsiones yeren de munchu calor, asina que les alarmes na casa rural y nes furgos, sonó a les 6 de la mañana, ya que teníemos la intención d'entamar a caleyar a les 7. Asina que con un apixote perimportante, vamos preparándonos los almuerzos, la mochila y la xinta, intentando despertar a base de cafés infernales, que yeren de salir corriendo al bañu ún tres d'otru.

Partimos bien ceo del pueblu llebaniegu de Brez (760 m) 

Con too preparáu y una mañana fresquina pel momentu, tamos a les 7 la mañana preparaos pa caleyar y facémoslo saliendo, cola mochila enllena de xinta y agua (unos 4 litros por tiesta), asina que con esi pesu, entamamos a caleyar peles cais de Brez hacia la parte alta del pueblu onde vamos garrar la pista formigonada que llévanos hacia los ivernales de Rojes.

Continuamos pela pista, baxo la borrina mañanera hsta los praos de Sandoblo, onde salímonos de la pista y garramos el senderu baxo la canal del Ranchón, continuando con un cómodu ascensu hacia la entrada de la canal de Lechugales, perdiéndonos el senderu superior pelín tomáu, teniendo qu'aportar a la parte baxa de la riega de Piedras Negras, ya con tola canal enfrente de los nuesos güeyos, llueu d'hora y media dende Brez.

Dobarganes (Llébana) - Picu Jano

10 de Xunetu de 2026 

Track: Dobarganes (Llébana) - Picu Jano

Pues llegó'l momentu de la Travesera Picos 2025 - 2026 y como los últimos años, preparamos una rutina pa la tarde del vienres, como pa poner los músculos a furrular de cara a la paliza de los díes siguientes y como non, si l'añu pasáu tuviemos que cancelar pola calufa infame que teníemos en Riañu, na Llébana andamos más menos asemeyaos, anque viendo que vamos dir munchu tiempu per viesca, decidimos siguir alantre. 

Partimos del pueblín de Dobárganes (960 m)

Siguir alantre, significa aportar a Dobárganes, llueu de parar n'Ojedo a tomar un cafetín y al aparcar nel pueblu y salir a la cai a preparanos, casi morremos del calor. Preparamos mochila con agua y pocu más y al par del cartelu qu'indícanos la ruta, vamos entamar a caleyar, col suelu secu del camín desprendiendo un calor insoportable. 

Travesera 2025 - 2026

Del 10 al 15 de Xunetu de 2026

Como tolos años la Travesera del GM Xuan de la Borrina, ye puntu referente del añu y esta temporada veníemos bien bregaos de tol añu, nel que volvimos incluso, a facer dalgo d'ivernal, sicasí, camiento que va ser l'asignatura pendiente pa la temporada que'entra, ya que nun sólo tenemos que progresar na temporada estival pa evolucionar, sino que lo poco que podamos facer con ñeve, deberíemos aprovechalo.

Pegando un vistazu per onde díbemos movenos

De toes formes, l'avance del nivel del grupu ye evidente, teniendo unos ritmos altísimos a metá de temporada con rutes bien potentes tanto en kilómetros como en desnivel y téunicamente, tamién fuimos faciendo cresteríes desconocíes pal grupu, que sirvieron d'entrenu pa que la xente fuera con bastante facilidá y con más confianza pel tarrén calizu.

El Condao (Llaviana) - La Repunta - El Cotón - Mediodía - La Triguera - Fresnéu - La Robellá - Xerra - Boroñes

27 de Xunu de 2026 

Track: El Condao (Llaviana) - La Repunta - El Cotón - Mediudía - La Triguera - Fresnéu - La Robellá - Xerra - Boroñes

Continuamos un pocu cola preparación pa la Travesera de Picos del GM Xuan de la Borrina, viniéndonos a la tiesta, que tenía pendiente una crestería que bien pudiera valenos, pa superar un desnivel curiosu y sobretou pa movenos per tarrén calizu, asina que decidimos averanos hasta'l Condao en Llaviana, p'acometer la crestería sur del cordal de Peñamayor hasta'l Picu La Triguera. 

Les previsiones son de bastante calor y posibles tormentes de tarde, asina que saltámonos l'almuerzu de turnu y a les 9 la mañana tamos preparaos nel aparcaderu del cementeriu del Condao, pa entamar a caleyar, onde un potrín y la so ma, tienen a bien aparte de saludanos, acompaganos un ratín de pista nos primeros pasos del día. 

Partimos del pueblu d'El Condao (375 m)

La pista pela que salimos ye la que xube hasta'l colláu de Breza, xustu al empar del nuesu oxetivu final como ye'l Picu La Triguera, que tamién ficiéramos va munchos años na otra parte de la crestería de Peñamayor dende Fayacaba naquella ocasión. Esta vegada, saldremos a 375 m d'altor poro tenemos casi mil metros direutos d'ascensión per una crestería que nun pilotamos res, asina que vamos a l'aventura como siempre.

La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

17 de Xunu de 2026 

Track: La Puente (Morcín) - El Rotellón - Figares - La Collá - La Madalena - Cuitu Rumiru - Otura - Llugar de Baxo

Miércoles cualesquiera col horariu de branu y somos a xuntanos, pa entrenar, tres del GM Xuan de la Borrina per Morcín. La idega yera facer la ruta al Picu Figares, que tantes vegaes fice entrenando pa les carreres y si'l tiempu permitíalo, continuar hasta'l Monsacru y facer el percorríu que más nos apeteciese, ya que teníemos avisu tormentes.

Son pocu más de les 4 la tarde, preparámonos y salimos caleyando pela sienda verde pela que discurría la vía'l tren pente'l pozu Monsacru y la Pereda en Mieres. Agora, tendremos un seliquín patéu, que tamién usamos pa dir a esguilar a los seutores de la Peña Garcilleru, teniendo que cruciar un par de túneles illuminaos, hasta'l Caliru'l Rotellón, onde aparte del caliar, tamién había llugar de crucie de trenes. 

Partimos del aparcaderu del cementeriu de La Puente (245 m)

Comentar que ta n'estudiu, recuperar la siguiente parte de la senda verde, al traviés de la cantera de Peñamiel, pa xunise a la esistente de La Pereda a Frechura, pudiendo casi unir Mieres cola Foz de Morcín, lo que daría munches posibilidaes deportives, sobretou ciclistes a estos conceyos mineros. Nós, tamién tenemos perpasáu dalgún túnel más, con "usu ganaderu" p'acceder a la fastera de Cueva Cabrera tamién na escuela de la Peña Garcilleru, pa esguilar pero dexa de ser transitable nel siguiente túnel.

Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

13 de Xunu de 2026 

Track: Bueida (Quirós) - Puertu Güeria - Muezca Cigacha - Ranchón - Socel.lares - Valle La Foiz

Tornamos a les rutes de calendariu del GM Xuan de la Borrina, yéndonos nesti casu hasta'l macizu de Penubina (Les Ubiñes), onde Pepa preparare una ruta p'ascender al picu Ranchón, conociendo'l pasu de monte de la Muezca Cigacha que nun conocía y tamién la baxada pel valle la Foiz, otra pequeña ayalga a descubrir.

El problema que teníemos yera'l calor que daben, teniendo que madrugar enforma y quitando de la ecuación el nuesu clásicu almuerzu de camín. Poro, plantámonos nel aparcaderu de Los Garrafes, pista alantre sol pueblu quirosanu de Bueida, pelín dempués de les 8 la mañana, pa preparanos y salir a les 8 y media en puntu.

Partimos de Los Garrafes (Bueida) (925 m) 

Caleyaremos con calma, siempre pela solombra pa dir entrando muscularmente en calor, personalmente sigue un pelín mosqueáu colos soleos, asina que nun quiero entamar fuerte, asina que voi dexándome dir al ritmu del grupu aportando a la Campa Las Infiestas (1130 m).

Pel camín tuvimos 'un agradable paséu pembaxo'l fayéu y al llau de la riega Buxalbe de la que nun achisbamos nin media d'agua nesta dómina l'añu y ye que tol paraxe de Los Garrafes ye un sumideru qu'apara nun sifón subterráneu, que sólo brota cuando enllénas, lo que tien que ser un espectáculu.