Travesera 2025 - 2026

Del 10 al 15 de Xunetu de 2026

Como tolos años la Travesera del GM Xuan de la Borrina, ye puntu referente del añu y esta temporada veníemos bien bregaos de tol añu, nel que volvimos incluso, a facer dalgo d'ivernal, sicasí, camiento que va ser l'asignatura pendiente pa la temporada que'entra, ya que nun sólo tenemos que progresar na temporada estival pa evolucionar, sino que lo poco que podamos facer con ñeve, deberíemos aprovechalo.

Pegando un vistazu per onde díbemos movenos

De toes formes, l'avance del nivel del grupu ye evidente, teniendo unos ritmos altísimos a metá de temporada con rutes bien potentes tanto en kilómetros como en desnivel y téunicamente, tamién fuimos faciendo cresteríes desconocíes pal grupu, que sirvieron d'entrenu pa que la xente fuera con bastante facilidá y con más confianza pel tarrén calizu.

 

Preciosa actividá pel Macizu Oriental y apartamentos de Brez onde tuvimos bien cómodos

Esti añu la escoyeta pa la Travesera, yera'l Macizu Oriental y más en concretu, la so faza oriental, onde teníemos preparaes delles rutes de calendariu que nos diben sirvir pa completar con dalgunos montes pendientes dende va años. Los díes más potentes diben ser auténtiques prebes del nuesu nivel d'estáu físicu y téunicu, conociendo llugares onde la navegación y orientación diba ser tan importante como la potencia de les pates.

 

Entemecemos rutes potentes con más cómodes

Per primer añu, decidimos garrar campu base nun pueblu pa pasar varios díes y tener onde duchanos y descansar aparte de les furgos. Nesti casu, escoyimos Brez y los sos alloxamientos rurarales de las Rocas de Brez, pudiendo partir nun par de rutes dende la propia casa, onde tamién, ficimos almuerzos a hores intempestives, meriendes dempués de rutes y delles cenes que sirviónos p'aforrar tamién d'alcontrar dalgo pa cenar.

 

Menos mal que teniemos la casa de Brez pa relaxanos dempués de grandes palices

El primer día, como solemos facer siempre, escoyimos una ruta seliquina, onde pudimos acolumbrar munchos de los oxetivos que teníemos pal restu de díes, yendo dempués hasta Brez pa organizar les habitaciones, cenar y preparar el madrugón del segundu día, que diba llevanos a una llarga xornada de monte, con munchu desnivel y un oxetivu claru, facer la cota más alta del macizu d'Andra, pa dempués cenar n'Espinama tol grupu.

 

Travesía dende H.uentedé hasta H.ermosu pel centru del macizu Los Urrieles

El domingu, preparamos una rutina más curtia, pero con un ciertu toque picante col envís de tar a mediudía embaxo y que la xente que trabayaba al día siguiente, pudiera facer la vuelta a casa con tranquilidá. Nesti tercer día, perdíemos a Pepa per una cayida baxando la canal del sábadu con una mancaura na muñeca, que nun la diba dexar facer les trepaes de la ruta propuesta.

 

Xornada de monte dende H.ermosu y xinta per Camaleño

Les baxes diben dir sucediéndose y tanto Mario como Carlos, nun se veíen físicamente y mentalmente, pa facer la ruta del llunes, quedándonos namás que Montse, Rubén y yo, que tuve problemes gastrointestinales y tuve que comerme la ruta más dura de la Travesera con líquidos namás, ya que lo que comía lo echaba. Ese día llegué como una pantasma a Brez de vuelta y pensé que tendría qu'abandonar los dos díes siguiente na fastera de H.uentedé. 

Atapeceres clásicos de H.ermosu

Por suerte, pudimos completar los dos díes siguientes, ameyorando mui pocu a pocu, anque los problemes físicos en dellos casos y la mala comunicación n'otros, ficiera que terminasemos dixebraos los grupos tanto pa la ida al colláu H.ermosu como pa la vuelta del caberu día. Sicasí, les rutes completáronse y caún coles sos alternatives esfrutó de los díes pel monte.

Mil gracies a los participantes d'esti añu: Carlos, Rubén, Mario, Montse, Pepa, Marcos y Jose que pasó per ellí a visitanos y Sara y Vane, que finalmente nun pudieron sumase a la Travesera.

Como siempre, vamos dexar unos datos a mou resumen y les correspondientes entraes del blog:

Primer Estaya: 

Dobarganes (Llébana) - Picu Jano

Duración: 2 h y 35 min   
Llonxitú: 9 kms
Ascensu: 590 ms
Descensu: 590 ms


Segunda Estaya:

Brez (Llébana) - Canal de Lechuglales - Morra - Silla Caballu - Canal d'Arredondas

Duración: 10 h y 40 min
Llonxitú: 17,15 kms 
Ascensu: 1730 ms
Descensu: 1730 ms

Tercer Estaya:

San Pedro (Llébana) - Toja - Taruey - Peña Ventosa - Salarzón

Duración: 5 h y 10 min
Llonxitú: 13,85 kms
Ascensu: 950 ms
Descensu: 950 ms

Cuarta Estaya:

Brez (Llébana) - Lechugales - Montestigu - Mermeja - Prau Contés - Cámara - Somajía

Duración: 11 h y 30 min
Llonxitú: 17.1 kms
Ascensu: 1550 ms
Descensu: 1550 ms

Quinta Estaya:

H.uentedé (Llébana) - Hacheru - Las Garamas - Collada Blanca - Picón - La Palanca - H.ermosu (Valdión)

Duración: 10 h y 10 min
Llonxitú: 17.4 kms
Ascensu: 1895 ms
Descensu: 915 ms

Sesta Estaya:

H.ermosu (Valdión) - Hoyu Oscuru - San Luis - Cueturredondu - Igüedri - H.uentedé (Llébana)

Duración: 6 h
Llonxitú: 17.25 kms
Ascensu: 580 ms
Descensu: 1570 ms

Totales:

Duración: 46 h y 5 min
Llonxitú: 91.75 kms
Ascensu: 7295 ms
Descensu: 7295 ms
 

Pal prósimu añu intentaremos facer más cosines y descubrir más llugares y canales