13 de Xunetu de 2026
Track: Brez (Llébana) - Lechugales - Montestigu - Mermeja - Prau Contés - Cámara - Somajía
Siguimos de Travesera Picos 2025-2026 pela Llébana, llueu d'un día percalurosu onde ficiéramos la Peña Ventosa y pasáremos la tarde entre piscina y picoteos de pipes, mierdes varies y birres hasta dir pa la cama a descansar, pasando ya una nueche reguleres na furgo pol calor, que nun me dexó durmir tolo necesario.
Llevantéme con revoltura estomacal y almorcé lo que'l cuerpu fue a soportar yendo delles vegaes al bañu, pintando la cosa regular pa lo que teníemos per delantre y ye que tocaba una ruta propuesta por mí pal calendariu y nun yera otra que conocer esti "Terrenu Pucavi" nes canales menos conocíes del macizu Oriental.
La ruta a la Morra Lechugales peles canales de Lechugales y Arredondas, ficiera estragos nos pies de dellos compañeros, quedándonos ensin la compaña de Carlos y Mario, que prefirieron regulase pa continuar los siguientes dos díes de Travesera, asina que quedamos namás que Rubén, Montse y lo que queda de mi cuerpu p'atacar la ruta más potente, aventurera y espuesta d'estos díes per Picos.
Gracies a una xarazada descomunal del día anterior, la previsión yera d'un día muncho más fresquín, asina que nun madrugamos tanto y a les 8 tábemos preparaos pa entamar a caleyar, teniendo que facer el mesmu camín hasta la canal de Lechugales del sábadu, asina que pocu tenemos más que cuntar del nuesu pasu per Rojes y Sandoblo, teniendo nesti día, la total visión de tol macizu, poro diremos intentando aldovinar per onde van llevanos los nuesos pasos pente'l murallón calizu.
Dos díes dempués, tábemos de nuevu dando los primeros pasos pela canal de Lechugales, cola alcordanza del bon día que tuviéramos, entamando los primeros pasos pela riega Piedras Negras pa siguir canal alantre, empobinándonos hacia La Campa, onde metémonos na segunda parte de la riega Piedras Negras, que d'accesu a la canal de Montestigu, teniendo que poner les manes nun par de resaltes de la riega.
Saliendo d'esti canalizu, tengo que facer la primer parada a boxes del día, debilitándome un pelín más, continuando namás que con Aquarius y con munches ganes. Continuaremos saliéndonos pela manzorga la llerona que baxa dende la entrada a la canal Mermeja, per onde ñaz la riega de Piedras Negras, siempre echando una güeyada hacia las traviesas de Somajía, ya que vemos a la borrina xugando penriba nuesa y nun ye un tarrén p'andar ensin visibilidá.
Nós siguiremos llibrando la llerona per tramos de prau y piedra, siempre empobinándonos hacia un desconcháu na paré que sírvenos de referencia d'entrada a la fastera de llambries nidies de Montestigu, les que van tenenos entreteníos durante un bon ratu, escoyendo les meyores opciones qu'alcontramos, con pasinos d'adherencia y esfrutando munchu de tolos trepes.
Dicir que tiramos pelo más tieso casi siempre, tirando d'adherencia, nunes llambries ensin la típica roca abrasiva de Picos, sinon que ta nidia por mor del xelu, la ñeve y l'agua, asina qu'hai que dir con confianza o dir buscando la parte esquierda de la canal, con más repises y tierra pela que poder progresar ya que camiento, que pudieran llibrase munchos de los pasos más de confianza na suela los playeros.
Nun pueu dar datos de dificultá, simplemente hai que tar de movese per esti tarrén y al ser unes llambries amplies, pues caún va restolando los pasos que meyor-y vengan, pero supongo qu'en varios trepes, tendremos un segundu grau na so amplitú, anque dalguna llambria ponse pindia y siempre la sensación de nun tener fallos ye la meyor aida posible pa la tiesta.
Salimos a la muria que corta la progresión per Montestigu, alcontrándonos na so base un caballu, lo que diznos que pegaos a les muries de la esquierda la canal, progrésase tamién quiciás con mayor facilidá que poles llambries, lo que danos tranquilidá pa la baxada ya que tamos metíos pente la borrina. Equí, decidimos continuar pela pindia vallina herbosa que tien de llevanos a la h.orcaína Montestigu, onde vamos aldericar si ye sensatu siguir o non, pente la borrina.
Xubimos tola vallina herbosa, dándo-y vueltes a la tiesta, pola falta de fuercies que llevo y por pensar en destrepar toles llambries que xubimos si la borrina continúa, hasta qu'aportamos a h.orcaína, onde acolumbramos a la baxada a la Canal Mermeja, mirando pal cielu con menos ñubes baxes, polo que decidimos continuar, descendiendo con curiáu pela pindia canalina.
Una vegada qu'aportamos a la baxera la canalina, entraremos na Canal Mermeja y como-yos dixe a los collacios, tábemos nel puntu de non retornu, agora ya, si que si, yera más intelixente salir por arriba, metiérase la borrina o non, que dar la vuelta. Por suerte, el día paez que va acompañar y ascendemos per onde meyor vamos viendo pela canal Mermeja, siempre cola vista puesta nun blocón, que llibraremos nel nuesu casu pela manzorga.
Equí tendremos el pasín más espuestu, pero ensin peligru y ye que travesar un derrabáu de piedra fina, paecía que díba facenos marchar canal abaxo con tola piedrina, pero fuimos a pasar bien y ya trepamos per un terracéu hasta la vira d'entrada hacia'l Senderu'l Gatu y los Cantones, que tan bien tienmos desplicáu Victor na so entrada: Canal de Montestigu, Mermeja, Cantones, Senderu'l Gatu.
Entraremos pues na llarga travesía dende la Canal Mermeja hasta'l Prau Contés, siempre pembaxo de les enormes muries del Jisu o Peña Contés y fadrémoslu per una evidente viru, con un pasín espuestu d'entrada marcada con dellos h.itos. Superamos el pasu pente rises y entramos nun mundiu, más guapu si cabe que tolo anterior que llevamos percorríu, siguiendo la traza de h.itos y marques de senderu de colláu en colláu, empobinándonos a la fastera de los Cantones, delles aguyes evidentes baxo'l Jisu (Contés).
Nun se mui bien por qué, pero diónos pereza entrar pente les aguyes per una pedrerona y salimos pel colláu de la esquierda, entrando de nuevu a los Cantones pente dellos blocones ensin denguna dificultá, entrando xusto dempués nel Senderu'l Gatu, evidente y claru pasu de robezos, que va agasayanos con dellos pasinos colgaos preciosos con dalgo d'ambiente aéreu, pero increyíblemente bonitos.
L'actividá ye increyible y vamos encantaos, anque personalmente, va terminándoseme la pila por nun poder comer res, asina que faigo mis últimos esfuerzos guiando y sacando semeyes a los collacios nel senderu'l Gatu y voi cola vista puesta na salida hacia'l Prau Contés, que tengo lleío que nun hai salida direuta, anque rápidamente vemos el pasu pela mandrecha d'unes aguyes, con una trepadina preciosa hasta la collada de la canal de las Grah.as.
Tanto ye de prestosa la canalina de salida, que na collada veo continuidá y ensin querer acabo xubiendo al Picu La Canal de las Grah.as (2267 m) pero nun veo baxada posible hacia'l Prau Contés y me toca destrepar y baxar hacia la canal de las Grah.as pa bordiar esti piquín, alcordándome d'esti pasu cuando ficiera la Peña Contés (Jisu) y el picu'l Prau Contés.
Aportaremos al Prau Contés y descansaremos unos 15 minutos, ya que llevábemos 6 hores y media a fueu, ensin parar de trepar, patiar, restolar pasos y tomar decisiones. Intento xintar mediu sandwich y a los 5 minutos toi otra vegada en boxes, asina que ya desisto y sigo col Aquarius como forma de supervivencia, poniéndonos en marcha bordiando'l picu'l Prau Contés, ya que teníemos na tiesta atacar los picos de Cámara.
Aportamos con un destrepín al colláu sur del Prau Contés, col Morrascu la Tabla enfrente nuesu y entramos nel caóticu descensu pente canales lleroses pa bordiar los cumales del Pozán, que ya ficiera va años, faciéndosenos llargu y penosu siguir el descensu hasta los Picos de Cámara, ya que la solana taba pegando fuerte y les fuercies entamaben a non acompañar.
Parámonos embaxo los Picos de Cámara y personalmente se me fai un mundiu, solo de camentar que tengo que volver a xubir y restolar la trepada del picu más altu, que paez ser que tenía un pasu de II+. Falámoslo un ratín y namás que facemos media intención de xubir una pedrera p'atacar al primeru, vemos que nun tamos pa munches hosties y tovía quédanos una llarga baxada.
Coles coses clares, siguimos camín hacia'l colláu de Cámara al qu'arribamos cansaos y decidimos parar un pocu a la solombra ya intentar picar dalgo de nuevo. Media barrina soi a meter y empobinámonos pelas Traviesas de Somajía, de les cuales nun tengo nin mediu recuerdu al faceles en mediu la borrina. Esta vegada sí que las pueu esfrutar y pueu dicir que'l senderu ye preciosu ufreciéndonos una guapa baxada, pero la solana castíganos dafechu y sólo pensamos n'entrar a la Campa Lechugales, onde vemos que tenemos solombra.
Ellí, descansaremos unos minutinos, echaremos un tragu y continuamos cola baxada, esta vegada tomando la sienda superior ensin destrepar la riega de Piedras Negras, evitándonos esi destrepe pela riego o bordiar más hacia y ya continuaremos hacia Sandoblo pa garrar la pista hacia los ivernales de Rojes, onde ya los nuesos cuerpos diben más por inercia que por ganes de caleyar.
Arribamos a Brez, onde les ganes de sentase, pegar una duchina ya intentar meter dalgo nel cuerpu pa ganar fuercies yera lo que necesitaba pa recuperar de los 17 km de percorríu, con un desnivel acumuláu de +/- 1550 m nun total de 11 hores y media de navegar, trepar y descubrir pasos maraviyosos.
No hay comentarios:
Publicar un comentario