12 de Xunetu de 2026
Track: San Pedro (Llébana) - Toja - Taruey - Peña Ventosa - Salarzón
Continuamos na Travesera Picos 2025 - 2026 y como ye vezu en toles anteriores, ye día de despedides al finar los díes del finde, teniendo que tornar pa casa dalgunos participantes, qu'al día siguiente ye día de curro. Poro, siempre preparo una escapatoria o una rutina más tranquila pa que tengan un viaxe tranquilu de vuelta al llar.
Esti añu, a les baxes iniciales, sumamos la de Pepa por lesión pero entra n'aición Montse, que va tar presente hasta'l final y Marcos fadrá la ruta pa colar pa casa dempués. La idega, simplemente yera facer un monte potente, pero que nun se nos fuese d'hores la ruta y nun pudimos acertar más d'entamu, ya que tenemos un día percalurosu per delantre.
Por suerte, la ruta va llevanos pela riega Bedoya alantre, siempre per pista cómoda y baxo la solombra d'una abundante viesca hasta aportar a los Vaos, onde entraremos en tarrén más pindiu, teniendo que facer varies envueltes hasta les cabañes y ermita de Toja, saliendo a la parte más alta de la pista que tien de llevanos baxo'l sol hacia'l colláu Taruey.
Aportaremos al colláu Taruey, onde asítiense bien de vaques moscando y la sensación de calor esnala, gracies a un vientín nortiegu que va dir acompangándonos durante tol camín de collaín en colláin, hasta'l de la Peña, onde ya baxaremos un pelín hasta garrar una arista bien entretenida, nel que'l vientu soplará a tramos con ganes, faciéndonos duldar si díbemos poder encumar la bien llamada Peña Ventosa.
En dalgún puntu de l'arista sopla tan fuerte que casi nos fae cayer, pero en cuanto metémonos más pela faldera sur, dexamos de sintir esti airón y preparámonos pa l'ascensión final, na que decidimos dexar les mochiles abaxo, ya que sabíemos de varies trepaes y díbemos facelo más cómodamente ensin elles, poro echamos unos tragos d'agua y picamos dalgo, pa continuar la travesía pela baxera sur de la Peña Ventosa.
Los primeros pasos sedrán en travesía per senderu marcáu hasta perpasar una llambrina con pelín d'ambient, continuando per senderu hasta un evidente espolón, que treparemos hasta una h.orcadina pa continuar en travesía hasta'l pasín más clásicu, nel qu'hai que trepar una llambria con bonos agarres en mou carboncillos ferrosos, pa continuar en travesía ascendente ya por tarrén más terrosu.
Continuaremos navegando per senderos poniendo les manes en dalgún puntu y ya alcontrámonos con canalizu final, bastante vertical nel que lo más importante ye pisar con curiáu y nun tirar piedres a los compañeros ya que ta dalgo descompuestu, aportando al cumal de la Peña Ventosa de 1439 m, onde sorprendentemente tampoco tira l'aire que tuviéramos n'aristina d'entamu nel colláu La Peña.
Comentar que l'ascensión a la Peña Ventosa pela normal, ye divertida, siguiéndose perbien tol percorríu, con trepadines cencielles en dalgún puntu, pero con curiáu nun tien mayor problema y la peña ye perguapa con un cumal comodísimu pa echar un bon ratu xintando'l bocata, pero la calufa d'esti día fízonos escapar apriesa.
La baxada fadrémosla pel mesmu llugar desfaciendo tolos pasinos hasta recoyer de nuevu les mochiles y tamién recoyer a Carlos que col vientu, nun le dió muncha confianza los trepes a facer y siguiremos ya tol grupu xuníu, descendiendo pela fastera sur nuna amplia envuelta a dreches pembaxo la Peña Ventosa, hasta una colladina evidente, onde fadremos de nuevu otra envuelta a esquierdes.
Dempués d'esta llarga envuelta, pelín pesada y pelín tomada en dalgunos puntos con cotoyes pinchudes, na colladina metémonos pel monte Bedoya, hacia la parte alta de la riega Salarzón, onde tendremos dellos árboles pa garrar solombra, ya que ta pegando durísimo a estes hores.
Descansaremos unos minutinos y ya vamos topar una pista nos praos que nun perderemos hasta'l pueblu de Salarzón, faciendo más envuelta de la necesaria, pero como nun teníemos prisa y tola llarga pista diba faciendo envuelta baxo los árboles, preferimos nun buscar l'atayu y caleyar un pocu más, siempre a la solombra.
Con una calufa perimportante aportamos a Salarzón, percorriendo les sos cais pa garrar carretera hasta San Pedro, onde poníemos final a esta ruta mañanera, encumando una Peña Ventosa, a la que teníemos bien de ganes dende va munchu tiempu y que nos vino perfeuta como día de transición nesta Travesera.
En resume, ascensión clásica a la Peña Ventosa, con un percorríu de 13,85 km, nel que superamos unos +/- 950 m de desnivel acumuláu, nun total de pocu más de 5 hores, lo xustu pa salir pitando hasta Potes pa peganos un bañu na piscina, ya qu'había en San Pedro 35 graos insufribles.
No hay comentarios:
Publicar un comentario