viernes, 17 de enero de 2020

La Hermida (Saja - Nansa)

10 al 13 de Setiembre de 2019

Dempués d'unos díes per Llión trepando y conociendo les escueles de Aleje y Alejico, fice un prestosu viaxe hasta Potes per San Glorio, aportando al pueblu, xusto enantes de qu'entrase un frente, que dexó lluvies ensin xacíu durante esa nueche.

Nun sabes mui bien, lo que suena la chapa de metal de tu furgo, hasta que pases una nueche de xarazaes continues. Menos mal que Kíla y yo, tenemos pocu problema pa durmir y descansar, descansamos enforma.

Abellugaos del agua na Cueva'l Ribero onde siempre se puede trepar

Al día siguiente, tocaba baxar a almorzar cola calma hasta La Hermida, onde tuve trabayando un pelín col portátil a la espera de qu'aportasen dellos collacios d'Asturies pa trepar unos díes más pel desfiladeru anque viendo como chorreaben tolos parés, díbemos tenelo complicáu de xuru.

Esa mesma tarde, nun teníemos otra que dir hasta Cueva'l Ribero, onde como siempre podíase esguilar en casi toes les víes. Personalmente, esi día, prestóme muncho facer un 6b perguapu (Madre que de tierra) pa calecer y llueu tocó metese a probar serio Rebelión en la Granja, un 7a perclásicu d'esti seutor.

Lluchando nun 6c+ super físicu y mui cabrón

Esi día nun mos lo llevamos, pero al día siguiente al primer pegue ya cayó, asína que siguimos probando dalgún qu'otru 7a quiciás 7a+ como ye Daniela. Nun fuimos a sacala, pero guapa yera enforma, asína que quedamos tan tranquilos col día d'escalada.

Mientres tanto, Orlando se llevaba Daniela, al empar que tamién la probaba yo, Álvaro que taba de cordada conmigo, tamién encadenaba Rebelión y Fon, se llevaba ya nun día bien guapu de solo como les semeyes amuesen, un 7b qu'intentaré probar na siguiente visita, ya que tenía una pinta brutal.

Fon fusilando Cucho's Wall un 7b preciosu

Polo demás, el tercer día, fuimos dar un patéu hasta Cicera pa ver que se podría facer. Personalmente nun lo conocía y ya caleyar al llau del rigu de camín al seutor ya paga la pena, sobretou polo guapu y acoyonante del paré de Cicera así como de les vistes hacia la cueva de Carcalosa.

Nun sólo visitamos Cicera, tamién dimos pateos pa ver l'estáu de Rumenes, Estragüeña.... varios seutores del desfiladeru la Hermida y la constante yera clara... taba tou pingando. Asina que nel últimu día de trepar en Cantabria, aprovechando qu'averóse Suco tamién, fuí con él hasta cueva'l Ribero p'asegurar que trepase dalgo, demientres el restu'l grupu quedaba en Cicera intentado facer dalgo.

Paseín hasta Cicera con guapes vistes de la cueva de Calcalosa

Esi tercer día, demientres Suco conocía Rebelión en la Granja, dándo-y tres peguinos curiosos, yo metíme nun 6c+ supercabrón que ya probara en Xunetu y que ta resistiéndose y ye que pa ser 6c+ ye una vía dura y de resistencia corta esplosiva a esgalla.

Con pocu más y col sol secando los parés, faciéndose ya protagonista, terminábemos el trabayu na Hermida, non sin antes dir a durmir a Potes, ya que'l pueblu de la Hermida ye de lo más atristayáu que conozo... piesllando tolos chigres a les 10 de la nueche casi.

La Hermida
 
Croquis modificaos por mi de la escuela d'escalada de La Hermida, por mor del guía de monte: Fernando Zamora. Gracies y col so permisu.

   
                            ------------------------------------------------------------------------------------

jueves, 16 de enero de 2020

Bejes (Llébana)

26, 28 de Xunetu de 2019

Munches vegaes anduve pel pueblín de Bejes, pero nunca parara a trepar finalmente. Alcuérdome que va dellos años, tuviéramos echando una güeyada a les víes que casi taben recién equipaes nos parés a la mandrecha'l pueblu. Daquella, col día mediu gafu, pente que dedicimos sacar trastos o non, entamó a orbayar y quitáronsemos les ganes dafechu, jeje.

Pueblu de Bejes dende'l paré

Otra vegada qu'anduve per ellí, ficiéramos un rutón circular bien guapu ascendiendo al Picu Samelar pela canal de San Carlos y daquella, tamién quedáramos echando un vistazu a los parés ensin llegar a tastialos. Así qu'esti branu, con un tiempu de perros per Asturies tiramos hacia la Hermida, lloviendo como si acabárase'l mundiu hasta Unquera, pa dir metiéndonos pali pali nel desfiladeru y ver como diba llibrando'l día.

Haritz preparáu pa metese a trepar

Esa mesma tarde Haritz y yo fuéramos a esguilar enteru un mini seutorin de V's dientro de les plaques y fináramos con una 6a+ más llargucu bien guapu. Al día siguiente la lluvia nun mos dexara facer na, sacante d'unos pegues na cueva'l Ribero por mi parte colos ánimos y delles semeyes de los collacios.

Precioses vistes dende les plaques de Bejes

El domingu a la solana, Haritz, Pepa y yo, volvimos a la carga ventilando casi tol restu del seutor, con otru 6a+ interesante y montón de quintos dexando unu que tenía una pinta un pocu rota a la mandrecha del tou y un par de víes de 6b llargues que supongo que daré-yos preste pa la próxima visitina a Bejes.


Bejes (Seutores visitaos)
 
Croquis modificaos por mi de la escuela d'escalada d'Alejico, por mor del InfoEscalada. Gracies y col so permisu.


----------------------------------------------------------------------------------------------------------------------

N'otra vista fae un añu, nun día de calor perfuerte nel que caíen los páxaros, tiramos hasta Bejes, pero tan sólo pudimos trepar a la solombra nes plaques del Sorval. La verdá ye que valen pa eso, pa pasar un ratín, ya que nun pasen de V y tan dalgo goches, pero con tal de facer dalgo metímonos a elles y echamos unes rises.
   
Na placa del Sorval onde pegaba la solombra

Magar de les distintes trepaes hasta facer el seutor, colamos al apartaderu d'al llau cola calma a xintar, mientres veíemos pasar xente saliendo de la ferrata del pueblu de la Hermida. A falta de bones víes, al menos poder fartar a gustu jeje.

Hora de la xinta

miércoles, 15 de enero de 2020

Aleje (Cistierna)

9 de Setiembre de 2019

En plenu puente, siguíamos trepando per Llión y dempués de tomanos con muncha calma l'almuerzu y d'un negativu intentu de conocer otra escuela de la zona, acabamos yendo a trepar a la escuela d'Aleje, poro pasamos d'Alejico a Aleje... lo cual nin da pa chiste, porque la escuelina ta bastante bien equipada jeje.

Anna trabayando perfeutamente una vía que rondará'l 6a+

Nun día desapacible enforma, tan sólo Anna y yo del grupu, teníemos ganes de trepar dempués d'un accesu al pié de vía agradable enforma. La verdá ye que tenemos en frente una muria bien guapa con víes na so mayor parte de placa d'adherencia pero viéndose muncha variedá na escalada, con diedros, plaques, techinos...

Intentando esfrutar d'un increyible diedru

Pente pitos y flautes, al final, namái que ficimos un par de víes, nel centru la muria, la primera nun venía nos croquis, pero apretaba en dellos pasos y pudiera rondar el 6a+ o 6b y la segunda ya más clásica col diedru Yordas que ye 6a de primer llargu... mui guapu, anque me cueste moveme nestes esguilaes.

Habrá que tornar... porque sí que-y ví más interés que n'Alejico,  ya que'l vientín fríu qu'aldovinaba un camudu nel tiempu, terminó por echanos pa casa que'l restu'l grupu tenía que volver pa Xixón, pal día siguiente trabayar... yo siguía de vacaciones hasta'l finde siguiente.

Aleje (Seutores visitaos)
 
Croquis modificaos por mi de la escuela d'escalada d'Alejico, por mor del InfoEscalada. Gracies y col so permisu.

lunes, 13 de enero de 2020

Alejico (Cistierna)

8 de Setiembre de 2019

Siguimos de puente tranquilamente per tierres llioneses y dempués de colar na nueche anterior dende Cistierna a Boñar, col envís de durmir relaxádamente lloñe del ruíu de les fiestes y sobretou de la terrible orquesta qu'amenizaba la verbena, alboreceremos cola calma y un sele almuerzo.

Vista del seutor de plaques de Alejico

Dempués de munches deliberaciones, saldremos de Boñar previu pasu pel super pa mercar mil histories y viendo que Jose sólo puede esguilar en placa onde nun tire muncho del brazu y hombru, decidímonos a conocer la escuelina d'Alejico.

Haritz y Jose plaqueando con tranquilidá

La verdá ye que nun llevo grandes pretensiones d'apretar duro, así que munches vegaes con pasar el puente de bon rollu, al solete y colos collacios, nun tengo denguna necesidá d'andar metiéndome en víes más dures, así que si toca plaquear n'adherencia llionesa pues se plaquea.

El pié de vía cómodu anque buscando la solombra a poder ser

La escuela tien un par de seutores namás, quedándonos tol tiempu nes plaques más averaes al aparcaderu. Dicir que'l sitiu ye bien guapo, col ríu al llau, que caltien la única instalación d'agues xabaces que viera na mió vida pa los kayaks.

Anna plaqueando fino

La escalada en xeneral, pues mui cenciella, con dalguna entradina picantona, pa pasar a la típica placa llionesa onde como siempre toca camudar el xeitu esguilador y fiase de los pies, pa finar encadenando les víes casi corriendo.

Día pertranquilu en Alejico

Como ya dixe, hai díes y findes pa too, nuna mañanina ficiéramos toles víes Anna y yo y anque xubiéramos a ver si pagaba la pena dir un ratín hasta l'otru seutor, llevábemos un bon ratu a la solana y lo que más apetecía yera tomar una cerve a la solombra al llau del rigu.

Pepa y Jose na mesma vía

El restu del grupu escalador fueron turnándose a facer les víes siendo Haritz el más motiváu, faciendo toes elles tamién, turnándose Pepa y Jose pa facer dalgunes ya qu'ellos ya tuvieron otra vegada nesta escuela y ya les teníen ventilaes tamién... y Kíla como siempre esfrutando de la llibertá perruna.

Camudando'l Camín per Llión

Alejico (Seutores visitaos)
 
Croquis modificaos por mi de la escuela d'escalada d'Alejico, por mor del InfoEscalada. Gracies y col so permisu.

viernes, 10 de enero de 2020

Fuentes de Peñacorada (Cistierna)

7 de Setiembre de 2019

Como ya comenté na entrada de la visitina a la escuela de Cuevas, otru añu más pal día d'Asturies, desplazábemosnos hasta Llión col envís d'esguilar al solete y asegurar el bon tiempu. Pero una cosa ye trepar al sol y otra pasase tres pueblos, asína que nuestru primer día al sol en Fuentes de Peñacorada, fue un pocu escesivu en cuanto a solana.

La solana casi acaba col grupu... anque dalgunos teníen ayuda

Andábemos col equipín pelín tocáu, con Jose d'un hombru y Jenny del tobiellu, poro namái qu'anduvímos esguilando Anna y yo, per un llau y per otru Haritz y Pepa, con dalguna escalada de Jose pa probar l'hombru, sobretou en placa d'adherencia onde nun tuviese qu'apalancar del brazu.

L'atapecer dexaba semeyes guapes

La idega yera clara, llimpiar el seutor de les Plaques, que ya-y metira un bon repasu fai un par d'años, pero entramos a 4 víes nueves a la mandrecha del tou que nun sabíemos nin el grau y lleváronmos un pelín más de lo camentáu y cola tosta del sol, decidimos camudar de seutor namás que finamos esi mini seutorín colgáu so la carretera.

Finábemos el día per Cistierna... tomando dalgo

De tarde con dalgo más de solombra, metímonos nun seutor penriba de Conjunción de Venus, con unes 7 víes que fuimos a fulminar, ensín que pasasen del 6a aprox, siendo la meyor d'elles dos víes más llargues a la manzorga'l seutor.


Col día fechu, tocaba tirar a Cistierna, que yeren les fiestes, pero quedámonos coles pizzes d'un chigre pelín estrañu, porque lo que yera la orquesta fue tan infumable que decidimos colar de vuelta pa Boñar pa durmir tranquilinos jeje.



Fuentes de Peñacorada (Seutores visitaos)
 
Croquis modificaos por mi de la escuela d'escalada de Fuentes de Peñacorada, por mor del InfoEscalada. Gracies y col so permisu.


-----------------------------------------------------------------------

miércoles, 8 de enero de 2020

La Puente (Morcín) - Peña Manteca

2 de Setiembre 2019

Track: La Puente (Morcín) - Peña Manteca


Llevábemos munchos meses ensin xuntanos pa facer monte cola compañerina montuna, Ana. Cuantayá, quedara la meyor actividá ivernal que ficiera enxamás, cola canal de Ría y pente pitos y flautes, nun xurdieren planes en tola primavera nin en branu, poro aportó casi la seronda y enantes de finar l'horariu de branu, tuviemos la oportunidá de conocer el cresteríu de Peña Manteca.

Yera dalgo que rondábenos la tiesta dende va tiempu y díbemos dexándolo pali pali pa prau, anque ye ciertu, que namái qu'eches el güeyu dende una escalada n'Otura nun pues escaecer esi picor de percorrer esa crestería tan atrautiva.

Partimos de la Puente (239 m) hacia Peña Manteca