Dempués d'unos díes per Llión trepando y conociendo les escueles de Aleje y Alejico, fice un prestosu viaxe hasta Potes per San Glorio, aportando al pueblu, xusto enantes de qu'entrase un frente, que dexó lluvies ensin xacíu durante esa nueche.
Nun sabes mui bien, lo que suena la chapa de metal de tu furgo, hasta que pases una nueche de xarazaes continues. Menos mal que Kíla y yo, tenemos pocu problema pa durmir y descansar, descansamos enforma.
Abellugaos del agua na Cueva'l Ribero onde siempre se puede trepar
Al día siguiente, tocaba baxar a almorzar cola calma hasta La Hermida, onde tuve trabayando un pelín col portátil a la espera de qu'aportasen dellos collacios d'Asturies pa trepar unos díes más pel desfiladeru anque viendo como chorreaben tolos parés, díbemos tenelo complicáu de xuru.
Esa mesma tarde, nun teníemos otra que dir hasta Cueva'l Ribero, onde como siempre podíase esguilar en casi toes les víes. Personalmente, esi día, prestóme muncho facer un 6b perguapu (Madre que de tierra) pa calecer y llueu tocó metese a probar serio Rebelión en la Granja, un 7a perclásicu d'esti seutor.
Lluchando nun 6c+ super físicu y mui cabrón
Esi día nun mos lo llevamos, pero al día siguiente al primer pegue ya cayó, asína que siguimos probando dalgún qu'otru 7a quiciás 7a+ como ye Daniela. Nun fuimos a sacala, pero guapa yera enforma, asína que quedamos tan tranquilos col día d'escalada.
Mientres tanto, Orlando se llevaba Daniela, al empar que tamién la probaba yo, Álvaro que taba de cordada conmigo, tamién encadenaba Rebelión y Fon, se llevaba ya nun día bien guapu de solo como les semeyes amuesen, un 7b qu'intentaré probar na siguiente visita, ya que tenía una pinta brutal.
Fon fusilando Cucho's Wall un 7b preciosu
Polo demás, el tercer día, fuimos dar un patéu hasta Cicera pa ver que se podría facer. Personalmente nun lo conocía y ya caleyar al llau del rigu de camín al seutor ya paga la pena, sobretou polo guapu y acoyonante del paré de Cicera así como de les vistes hacia la cueva de Carcalosa.
Nun sólo visitamos Cicera, tamién dimos pateos pa ver l'estáu de Rumenes, Estragüeña.... varios seutores del desfiladeru la Hermida y la constante yera clara... taba tou pingando. Asina que nel últimu día de trepar en Cantabria, aprovechando qu'averóse Suco tamién, fuí con él hasta cueva'l Ribero p'asegurar que trepase dalgo, demientres el restu'l grupu quedaba en Cicera intentado facer dalgo.
Paseín hasta Cicera con guapes vistes de la cueva de Calcalosa
Esi tercer día, demientres Suco conocía Rebelión en la Granja, dándo-y tres peguinos curiosos, yo metíme nun 6c+ supercabrón que ya probara en Xunetu y que ta resistiéndose y ye que pa ser 6c+ ye una vía dura y de resistencia corta esplosiva a esgalla.
Con pocu más y col sol secando los parés, faciéndose ya protagonista, terminábemos el trabayu na Hermida, non sin antes dir a durmir a Potes, ya que'l pueblu de la Hermida ye de lo más atristayáu que conozo... piesllando tolos chigres a les 10 de la nueche casi.
La Hermida
Croquis modificaos por mi de la escuela d'escalada de La Hermida, por mor del guía de monte: Fernando Zamora. Gracies y col so permisu.
------------------------------------------------------------------------------------
5, 6 de Mayu, 9, 10 y 16 de Xunu
Fartos, pero mui fartos del mal tiempu per Asturies, más d'un día colamos pa la vecina Cantabria, anque vien averáu a Asturies como ye'l beyu de la Hermida. Esti desfiladeru ye una auténtica ayalga pa la escalada deportiva, teniendo munchos seutores pa convencer a casi toos los públicos.
De camín a la Placa Mora
Esa típica fras de "Oye, que llibra pa la Hermida" y a tomar pol culo, tol mundu p'allá, normalmente aprovechando tamién pa dir patear o simplente salir de comedia per Potes, que nun tou va ser la dura vida del alpinista.
Fina, fina la escalada de plaquina y alloñes p'aburrir
Ún de los findes, averámonos con intención de plaquear a primeros de Mayu y diónos por conocer la Placa La Mora, que viendo los croquis paecía tener un puntín curiosu y graos cenciellos. Na, más lloñe de la realidá, si pensáis que vais sobraos en sextos baxos podéis cagar trito en quintos colos alloñes que caracterizan esti seutor... por dalgo lu llamen "la placa del miedo".
Perguapes vistes dende'l seutor
El sitiu ye guapu enforma, poles vistes, anque'l pie de vía nun ye mui allá y ye soleyeru a fartar, poro a mediudía nun había quien parara ya, pero intentaré tener otra visita al menos, para terminar de facer toles víes del seutor.
Al mes siguiente tocaba dir a apretar con otru grupu de collacios escaladores, falando del mes de Xunu, averándonos a la Cueva del Ribero, tamién nomáu como'l Gallineru onde l'abundante desplome fai que puedas trepar casi en cualesquier condición.
Pie de vía de la Cueva del Ribero
Ellí tuvimos intentando trepar con dalgo de motivación, pero ya venía yo con una especie de cansanciu xeneral y namás probar dalguna vía nel pañu de roca de la manzorga, pringando un 6b+ a vista, ya ví que nun tábemos pa grandes hestories.
Guapu 6b nel que taba trabayando Vane
Al ver que nun andaba mui fino, ficiera esi día un V+ y un 6a, perretes ambos, pa ver si garraba puxu, calentando un pocu más pa encadenar el 6b+ y llueu metíme a probar un 6b con un pasu de placa inicial que díxome que nun yera'l día y que meyor parábemos a descansar.
Seutor de camín a Bejes... nun llugar perguapu
Al día siguiente, dempués de mirar la meteo con calma, decidimos probar suerte intentando conocer un sectorín de camín al pueblu de Bejes. Nesta fastera de la carretera tenemos un seutor enfrente del otru, el más sele, dábenos pa trepar bien y pa intentar facer unos metrinos, pero namás que díonos tiempu a calecer deos con dos 6as y al momentu entamó a esbastiar, baxando pingando hasta la furgo.
Perguapu accesu hasta'l seutor Clónico
Una selmana dempués a mediaos de Xunu, teníemos ruta col GM Xuan de la Borrina y como non, vinimos el día d'antes a trepar. Col grupu Los Veroños, siempre andamos a la gueta de seutores onde podamos esfrutar toos del día d'escalada, asína que viendo más menos los graos, decidimos averanos hasta'l seutor Clónico, xustu enriba del pueblu de la Hermida.
Pasando la mañana al solete nel Clónico
Hai que dicir, que'l sitiu ye guapu, el pie de vía cómodu y hasta l'accesu dende la furgo ye un patéu preciosu pente una viesca. Eso sí, nun vos fiéis col grau, porque apreta de coyones y ya nos sestos baxos ties que dir cola cabecina nel sitiu por mor del alloñe pente chapes... eso sí... les víes son una preciosidá y la caliza escelente.
Vistes bien guapes de la Hermida
------------------------------------------------------
Branu 2017
Paez mentira, que cola cantidá de roca qu'hai nel Desfiladeru de la Hermida, tan sólo pudiera dir per ellí un par de vegaes. Pero siendo claros, ta más lloñe de lo que paez y sobretou la vuelta faise pesadísima cuando ya vienes cansáu d'un llargu día.
Armes de destrucción plaquera
Aún así, dir pa pasar un finde o más díes, sí que paga la pena enforma. Nos dos díes, fue un amiestu de visites cabraliegues y cántabres con un día en cada sitiu más menos. La primer vegada que trepamos na Hermida, fuimos como non, hasta les plaques d'Esquilléu, onde dempués de cruciar el míticu puente tibetanu pudimos esfrutar de la calidá de les plaques.
Plaquenado nel Esquilléu tol mundiu... mui disfrutones les víes
D'aquella, a primeros del branu, xuntáramonos un montón de collacios, pudiendo echar unes rises y apretar un puquiñín o un montón, dependiendo del grau que gastemos. Pela mió parte, fice más menos, la metá de la escuela, así qu'habrá que tornar per ellí a finalizar el trabayu.
Perbona xornada d'escalada nun ambiente xenial
A destacar el primer día d'escalada en roca de Jenny, qu'a lo postreru, convirtióse n'aquel finde nuna más del grupu d'escalada, de Xuan de la Borrina y de los mios collacios en xeneral. Increyible, les ganes que-y echó y el puxu con qu'apretaba de primera nes víes más cencielles de la placa.
Atentos los aseguradores... como tien de ser
La segunda visita a la Hermida fué va pocu y tiramos Vane y yo al que dicen, el seutor más feu de tola Hermida, jaja. Vaya puntería. Aún así, pudimos apretar nos dos 6bs baxos, que salieron a vista, anque son durinos, hai que decilu.
Conociendo'l Salmón en plenu desfiladeru de la Hermida
Llueu tuviemos matándonos con un 6c+ de diedru, perrísimu, que tenía una salida infernal a una placa, mui, mui psicolóxica. Nun cayó a la fín, pero los pegues fueron mui prestosos, con un vuelín llargu na salida a reunión.
Kíla y Lolo... dos clásicos nos pies de vía
Vacíu d'entrenar y de los pegues, pocu más qu'encadenar a vista un 6b raru de coyones, pente una chorrera y una placa finísima y probar un 6b+ de la parte alta del seutor, con un pasu pa echáse a llorar, que tuvimos que dexar pa una meyor ocasión.
La próxima... más y meyor...
-------------------------------------------------------------------------
No hay comentarios:
Publicar un comentario