Tarna (Casu) - La Bolera - La Salguerosa - Ventaniella (Ponga) - Valle Ambenes - Valloseru - Paréu

27 de Marzu de 2022

Track: Tarna (Casu) - La Bolera - La Salguerosa - Ventaniella - Valle Ambenes - Valloseru - Paréu

Cuando lleves dellos años faciendo monte per Asturies, munchos de los cumales cimeros, sobromanera de fasteres tan guapes y montunes como Casu o Ponga, tiéneslos toos nel llibretu de tachaos, poro prepares rutes cola idega de conocer requexos puntuales.

Na Travesera Casu-Pongueta d'esti últimu añu, Alberto y yo, conociéramos el cordal de Valloseru, descendiendo a la fastera casina, quedándonos con ganes de conocer la fastera pongueta y d'esti xeitu, preparaba una ruta circular, col envís únicu de descubrir dellos llugares.

Partimos del pueblu de Tarna (995 m)

Pelín antes de les 10 de la mañana, xustu'l día del camudu d'hora, tamos aparcaos y preparaos en Tarna, pa salir a caleyar. Fadrémoslo, siguiendo'l GR que tiraría pal Puertu Tarna, pa nun crucie indicáu con cartelu, salir a la manzorga hacia la carretera, la cual cruciaremos en Les Roces, onde garramos un camín, que métenos de plenu pel Pandu La Texera, nel ablucante y estensu monte Forcos.

Veigadhorru (Cangas del Narcea) - La Folgueirosa - La Ubia - La Viña

13 de Marzu de 2022

Track: Veigadhorru (Cangas del Narcea) - La Folgueirosa - La Ubia - La Viña

Continuamos intentando conocer Asturies fondamente y aprovechando los llistaos que ficimos, dámonos cuenta, que la fastera suroccidental ye'l gran nuesu desconocíu, poro, restolamos que monte pudiera ser el siguiente y descubrimos que nel nuesu llistáu de Montes Cimeros d'Asturies, el Chanu La Ubia en Cangas del Narcea, tenémoslo pendiente.

D'esti xeitu, magar d'un cafetín na capital, siguiremos camín pela As-29 hacia'l conceyu vecín d'Ibias, parándonos nel pueblu de Veigadhorru, llugar onde ya tuviéramos va dellos años, p'ascender al monte xemelu al Chanu La Ubia, el Picu Tunón.

Salimos del pueblu cangués de la Veigadhorru (675 m)

Entamamos camín carretera alantre, en direición Ibias, faciendo una primer intentona, per una pista que, según los mapes, diba dexanos a metá de la faza oriental del monte. Pero, ésta como bien comunicónos un ganaderu, taba dafechu tomada y namái que caltiénense les pistes de la Folgueirosa y la Viña pa esti llau del valle, poro caleyaremos carretera alantre hasta l'amestaura de los ríos del Coutu y la Braña, onde sal la pista hacia la Folgueirosa.

Baíña (Mieres)

20 de Marzu de 2021 y 12 de Marzu 2022

Casualidaes y cierres por regulación paxarera, faenmos tornar al pueblín de Baíña, na bas de la xerra de Llagos. En 2021, en plena pandemia, a la gueta de llugares tranquilos pa trepar, averámonos hasta Baíña col envís de conocer el seutor Frae del qu'oyéramos per collacios que taba recién reequipáu, metiéndose delles víes nueves.

Ensin croquis, fuimos de paseín Anna y yo, xubiendo la furgo hasta les Cuestes de Baíña, lo cual ye un error y nun debemos facelo, ya que nun hai sitiu pa los pocos vecinos, como pa que se-yos pete d'esguiladores con sus furgos, les cuales pasen mui mal pel caleyu o coches en so defeutu.

Vista dende Les Cuestes de Baíña del seutor Frae

Dende equí, encomiendo a qu'aparquéis nel pueblu de Baíña y déis un paseín cola mochilina, siendo lo más duro, la pindia cuesta hacia'l pueblín superior, pero nel que tenéis xustu enantes de garrar el camín hacia'l seutor Frae un bancu y una fonte pa descansar y cargar agua.

Camín hacia'l seutor Frae, bien indicáu y desbrozáu

El seutor Frae ye un evidente espolón, con una antena enriba l'arista, a la mandrecha d'una especie de ferradura caliza, que ye'l Cantu Roblón, con un pindiu prau enmediu. Vese cláramente dende'l pueblu y namái que tendremos que siguir los cartelos y fitos que vamos dir alcontrando pel camín, siendo una pasada, el trabayu de desbroce que ficieron los collacios d'Asturvertical (facéivos socios) que llueu queremos toos esguilar.

Pié de vía recién desbrozáu y parés Este y Oeste del seutor Frae

Los croquis que recién espublizaron Astuvertical correspuenden a los seutores Este (enantes nomáu Cuidáu cola Zapiquera) y Oeste (Hai más víes arriba), anque nel Oeste hai una muria ablucante, pelín más arriba qu'a simple vista paez tener más grau y llargura nes víes que'l restu del seutor, anque entá nun hai croquis disponibles.

Visita coles perrones per tol Cantu Roblón

Daquella, probáremos un evidente diedru que corresponderíase con Baiña Resurrection, nel qu'alcuérdome que partíoseme un cantu abaxo, continuando montando la vía, con cuidadín, pa que llueu Anna la encadenase. Como nun andábemos mui motivaos y facía munchu fríu esi día, dexamos d'esguilar y fuimos dar un paseín coles perrines (Xena y Kíla) yendo con elles a conocer tola ferradura interior del Cantu Robón, alcontrándome con víes sueltes antigües en varios parés.

Tornamos al seutor Frae n'otru día pocu afayaizu pa esfrutar de la esguilada

Un añu dempués, axúntome con Lau, Suco y Maia y vamos tornar a Baíña, con ganes de rodar y ver como evoluciona la lesión nel antebrazu. Aportamos cola sudada al pié de vía, estráu de xente por mor de los cierres en Morcín y bien ceo, vemos que nun va ser tampoco'l día pa esfrutar d'esti llugar, ya que'un vientu fuerte y fríu fai que desistamos d'esguilar dempués de facer un par quintos na parte baxa del seutor de la Zapiquera.

 

Visitina aventurera al antiguu seutor de Valmenor

Aportamos a les Cuestes de Baíña, camentando la posibilidá de dar un paseín hasta'l seutor de Valmenor ensin mochiles, más por conocelu y por nun metenos nel chigre tan aína. Lau y Maia, van dir baxando y Suco y yo, dexamos les mochiles penriba la última casa y garramos un prestosu camín con vistes hacia'l llugar de Frechura y el Salgueiru, na faldera del Monte Llusuriu.

Ablucante seutor de Valmenor en Baíña

Aportamos más menos, sin probemes hasta l'antigua braña de Valmenor, un llugar increyible, con grandes cabañes y horros ya esaniciaos, pero qu'indiquen que nun yera un braña cualesquiera, sinon que vivióse de continuu lo cual amuesa la dureza de la vida que llevaben los asturianos antaño.

Vistes a Frechura, Salgueiru y Figares dende Valmenor

Al pocu de pasar la braña de Valmenor, tendremos el pior tramu del camín, nel que la sienda piérdese pente los escayos y cotoyes, teniendo que bregar enforma p'aportar al seutor. Dicir que paga la pena'l paséu, el paré ye ablucante y les víes tienen una pinta brutal, poro cuando termine la regulación por Zapiquera, tornaremos per Valmenor a llimpiar, esguilar y echar un gabitu a Asturvertical pa continuar cola recuperación d'un seutor nel que ya sólo dar un paséu hasta'l so pié de vía ya paga la pena enforma.

Baíña (Seutores visitaos)

Croquis modificaos por mi de la escuela d'escalada de Baíña, por mor del club d'esguilada Asturvertical. Gracies y col so permisu.

Entragu - Pena Gradura (Teberga)

Antroxu 2022

Un nuevu antroxu nel qu'escapámonos hasta Teberga, conceyu montañeru y escalador por escelencia, nel que como ye vezu, asitíamonos n'Entragu, nel so area recreativa, que como pudimos comprobar ya pasó per meyores momentos, gracies a la mala xestión del ayuntamientu teberganu, con un claru abandonu de les istalaciones.

En cuantu a la escalada, dividímos los díes pente Entecampos y Bóvedas, centrándonos los dos primeros díes, por desgracia, na Molinera (7a+), la cual escapóse esi primer día, anque sintiera que pudiera salir al segundu pegue.

Pegues intensos a la Molinera (7a+) nel seutor Entecampos (semeyes d'Ani)

El casu ye qu'enguedeyéme nun par de pegues na parte media, dándo un bon últimu intentu y hasta'l día siguiente, teniendo males sensaciones con otru vuelu, nun pude facela magar de relaxame y baxar a dar un paséu con Kíla y ye que pente la 3er y 4ª chapa nun mola cayer y fízome dir mui tensu, faciendo la parte dura d'arriba más centráu y llevándomela al novenu pegue en total y cuartu del día.

Ambientín de collacios pelos seutores con pegues fanáticos (Anna, Rubén)

Demientres el restu del grupu de collacios, daba los sos pegues a les víes qu'escoyíen tanto Anna como Suco tuvieren conmigo na Molinera, sacando Anna un métodu, pa echar de comer aparte, saliendo al rectu na parte dura y como non, encadenándola con eficiencia y una pegada fuera de bolos, anque hai que dicir que'l día anterior tamién se-y escapó saliendo a la placa final.

Pegue d'encadene a la Molinera (semeyes d'Anna y Richie)

Llueu de los dos primeros díes, tocó camudar de seutor averándonos hasta Bovedas, onde'l Dream Team resacosu (Iso, Suco, Lau y yo) fuimos a echar un tientu a Derecho de Pernada (7c). Que puede salir mal de metese nun 7c, nunes condiciones pocu favoratibles pa escalar, pues qu'algamamos a montala al tercer paisanu que pasó pela vía, que nesti casu fuí yo.

La perrada asoleyando pelos seutores

La verdá ye que'l trabayu n'equipu furruló y al día siguiente cola vía montada, pero con un día gafu con amenaza continua de llover y un rescate d'una chica gallega pol mediu, tan sólo-y metí otru pegue pa encadenando hasta'l pasu desplomáu, previu al bloque de placa, repitiéndolu col mesmu métodu y viéndo-y munchu color, poro tocará dir a por ella y restolar dalguna rodiella de reposu.

A la preba de Derecho de Pernada (7c) en Bóvedas

Demientres, taba con Derecho, Anna engorilóse n'encadenar la Chimos, un 6c+/lo que quieras facela de dura, que cayó al segundu pegue del día, dempués del llargu parón pol rescate. Dende equí, dar les gracies a los Bomberos d'Asturies, pola rapidez n'aportar col helicoteru y la profesionalidá pa rescatar a la compañera gallega, la cuál franciera un todiellu nun mal vuelu.

Deséa-y una bona recuperación y que veámosla nos seutores ceo de nuevu.

 

Kíla feliz nel pié de vía d'Entecampos

Entragu - Pena Gradura (Teberga)

 

Croquis modificaos por mi de la escuela d'escalada de Entragu, alcontraos en La noche del Loro, el Club Aguja de Sobia, Desnivel del añu del tabacu... Gracies y col so permisu.

---------------------------------------------------------------------