jueves, 29 de julio de 2021

Travesera Picos 2020 - 2021

10, 11, 12 y 13 Xunetu de 2021

Track: Travesera 2020 - 2021


Ya vamos más de diez años de Traveseres per Picos d'Europa (Asturies, Llión, Cantabria), Montaña Palentina... y esti añu quisimos facer un patéu de 4 díes pelos parques naturales de Redes/Reres (Casu) y Ponga. En plena pandemia, nun mos prestaba muncho dir a los refuxos de Picos, por mor de la masificación y decidimos investigar, facer loxística y preparar un percorríu novedosu.

Entamaba la Travesera 2020 - 2021 dende Bezanes

Por suerte, la xente motivóse y animámonos hasta diez persones pa dir a patear pelos montes astures, qu'esti añu más que nunca taben xabaces enforma. Les mayores dificultaes de los dixebraos díes, nun fueron les grandes ascensiones nin les kilometraes infames, sinon la broza, les siendes tomaes y tola variedá d'escayoes, ortigues, cotoyes, urcies que nos ficieron tener qu'entreganos con tolo que teníemos dientru.

La vexetación taba en plenu espoxigue

Salíemos el sábadu 10 de Xunetu, con un día perguapu de solín, pa facer una travesía pente Bezanes y Brañagallones, con munches variantes pa tolos miembros del grupu, ya que 10 persones y varios díes de camín, siempre obliga a preparar escapatories pa reservar fuercies.

Felices en Brañagallones... un llugar increyible pa terminar una xornada montañera

Como siempre, por muncho que prepares, el monte te da y te quita y lo dificultosu d'avanzar pel percorríu que teníemos en mente, fizo que tuviésemos que retiranos tol grupu pel camín más curtiu hacia Brañagallones, onde tuvimos tan a gustu, que ya tenemos claro volver un finde, preparando un par de rutes per esta fastera de Redes.

Salimos dende Brañagallones hacia'l Cantu L'Osu

El domingu 11, continuábemos en ruta, Mario, María, Simón, Charly, Alberto y yo, mientres que Benjamín y Natalia baxaben pela pista hacia Bezanes y Carla e Isa, diben intentar xubir a la Peña'l Vientu y garrar tamién retirada hacia Bezanes.

Esfrutando d'un día preciosu nel Cantu L'Osu

El grupu monte, tendría un día muncho menos complexu que l'anterior y completamos la ruta ensin mayores contratiempos, esfrutando de tol camín, pesie a dalgún embarque cotoyeru, aportando al segundu puntu de descansu, que teníemoslu asitiáu en Tarna.

Gran xornada de Parchís, chigréu y final de Eurocopa en Tarna

Dende equí dar les gracies, al Bar Nalón, lo cuales tamién lleven los Apartamentos Tarna dándonos la posibilidá de pernoctar pa dar preste a este tipu de travesíes. Dicir que nun ye cenciellu, alcontrar llugares pa dormir una nueche los montañeros y la media pensión qu'ufreciéronmos dende'l Bar Nalón, rayó la perfeución... Milentra gracies de nuevu.

Salimos de Tarna nun tercer día dalgo más murniu

Llevantarémonos el llunes 12, con cierta resaca, dempués de tar de comedia xugando al Parchís y viendo la final de la Eurocopa nel chigre. Dacuando, aportar demasiáu ceo al refuxu, conlleva tener muncho tiempo pa tomar cerveza y nesti casu, al día siguiente, nun mos llevantamos cola meyor de les cares la mayoría.

Despedímonos de María, Mario y Charly que baxen a Pendones

Teníemos per delantre un día de monte, completísimu, pero la meteo fue empuercándose, con borrina baxa, orpín y finalmente orbayu, lo que nos fizo tener que camudar los planes y empobinar a Simón, hacia Pendones, onde tamién diben con anterioridá María, Mario y Simón.

Simón despídese al altor de la Vega Baxu

Alberto y yo, magar de dexar a Simón na Vega Baxu, teníemos per delantre una soba terrible, pa remontar de nuevu hacia'l Maciédome y baxar hacia la fastera pongueta. Por suerte, tamos bien físicamente y anque nun ficimos cumal, conocimos llugares de cuentu, que visitaremos de xuru nun futuru non mui llonxanu.

Aportamos a Abiegos con una soba importante nel cuerpu

Pingando como pitinos, aportamos a Sobrefoz, con una kilometrada nes pates y un fríu metíu nel cuerpu, que sólo fué a quitalo la duchina d'agua caliente, la chimenea y una cena bien rica por parte del chigre-tienda El Cascayu.

La meteo sigue ensin danos tregua saliendo en travesía a Bezanes

Magar del desayunu y despedida de los collacios d'El Cascayu que tan amáblemente tratáronmos, salimos a cumplir col final de la Travesera. Tolo que teníemos en mente, ya vemos que ye imposible, ya que tuvo lloviendo tola nueche, asina que ponémonos col mapa enriba la mesa y trazamos camín so la marcha.

Finalizamos esta Travesera 2020 - 2021 en Bezanes de nuevu

Lo guapo, de conocer Asturies perbien, ye que podemos decidir per onde tirar según la meteo y el monte, que siempre fué poniéndonos en problemes, poro, aportaremos de vuelta a Bezanes, llueu de pegar otra pateada complexa por dir moyaos de siguíu y por decidir en cada momentu per onde siguir camín, pero mui contentos polos 4 díes de monte xabaz.

Alberto y Berto... los dos últimos supervivientes de la Travesera

La cerveza de fin de Travesera, supo tan bien que quitónos esi tastu amargu de les milenta ortigaes, escayaes, en seco y en moyáu y de tener que camudar de planes de día en día. Enxamás, tuvimos que bregar tanto pel monte, p'algamar el final d'una Travesera distinta, perguapa, pero con mala suerte no meteorolóxico y no abegosau pa caminar.

Despedímonos encantaos y felices hasta la próxima travesera

Como siempre, vamos dexar unos datos a mou resumen y les correspondientes entraes del blog:

Estaya 1: Bezanes (Casu) - Monasteriu - Brañagallones (Casu)

Duración: 9 hores
Llonxitú: 16 km

Ascensu: 1125 m

Descensu: 545 m


Estaya 2:
Brañagallones (Casu) - Cantu L'Osu - Tarna (Casu)

Duración: 7 hores
Llonxitú: 11,5 km

Ascensu: 815 m

Descensu: 1065 m

Estaya 3:
Tarna (Casu) - Vega Baxu - Altu Ponga - Solafoz - Abiegos (Ponga)

Duración: 9 hores y 30 min
Llonxitú: 22 km

Ascensu: 1370 m

Descensu: 1855 m


Estaya 4:
Abiegos (Ponga) - Brañadosu - Mayá Tiatordos - El Xuacu - Bezanes (Casu)

Duración: 8 hores
Llonxitú: 19 km
Ascensu: 1225 m
Descensu: 1100 m

Totales:
 
Duración: 33 hores y 30 min
Llonxitú: 68,5 km
Ascensu: 4535 m
Descensu: 4565 m   


No hay comentarios:

Publicar un comentario