jueves, 26 de julio de 2018

La Puente (Morcín)

Hestoria d'escalada de la Puente

Probáblemente, si nun recuerdo mal, a entamos del branu del 2015, magar de salir de trabayar, dizme un collaciu de dir ver una vía qu'abriera n'artifical venti años atrás. Dizse prontín, pero venti años son munchos, asina qu'avérome con él hasta Morcín.

Aparcamos nel pueblu de la Puente y caleyamos un pelín per carretera hacia la Foz, hasta qu'atopamos una valla antiargayos, la cual pasamos pela mandrecha y entramos nun auténticu bardial, pel que malpenes somos a ascender... menos mal que dixera que pantalón de monte y de los fuertes.

La escuela de la Puente a vista de páxaru


Averamos al pié del paré, del que cuesta ser capaz de ver rastru de nenguna apertura, hasta que dizme que mire penriba d'unos 15 m onde vezse un cáncamu más vieyu que les sableres. Sacamos trastos d'artificial y metémonos nel tayu, pasando yo más mieu qu'él, demientres tira de gancheos pa dir avanzando y llimpiando la vía.

Daquella, magar del trabayu y de pasar más tensión que toa mi vida, viendo pegar saltinos sol estribu pa ver si aguantaba'l ganchu, aportamos a esi cáncamu, vieyu enforma, que valió p'afitar una cuerda y dexar montáu lo que sería l'entamu d'un trabayu descomanáu de llimpieza y de ganá-y metru a metru a un paré calizu preciosu.

Detalles del pié de vía y la placa caliza de perbona calidá

La vía orixinaria, nomábase la Cabrada, a la que-y venía'l nome que nin pintáu, ya que pa xubir hasta'l pié de vía, había que ser cabres más menos. Pasó dalgún tiempu y pesie a prometer que diba siguir echando un gabitu, tuve un mesín y picu trepando duro y pa cuando volví ya tenía los dos llargos orixinales de la Cabrada llimpios ya equipaos, siendo más tarde cuando finaría la vía hasta los 4 llargos actuales.

Col pasu'l tiempu, pa finales d'Avientu del 2015 ya tuviera per ellí trepando y probando les víes, pa da-yos un grau afayaizu, cuntando col nivel de graos un pocu d'esti monte sacru, yendo un pocu en comparanza colos graos de la escuela d'Otura que yera la referencia más averada.

Esfrutando de les nueves víes y los equipadores faciendo varios llargos

Tamién, fueron saliendo víes tieses como variantes a esa primer ruta orixinal que surcaba los requexos más febles d'una placa que n'aquella pa facer en llibre debía dexase protexer más bien pocu o nada. Col primer día d'artifo, ya tuviera pa una bona temporada de nervios, sicasí ver agora como'l paré convertíase nuna pequeña escuela de deportiva paecíame más brutal entá... vaya trabayu.

De primeres, escuela secretiva, yera normal tando nun llugar tan cerquino de la carretera, que la xente llevantara la tiesta y viera esguiladores na parea. El siguiente pasu, yera averase a ver aquello y si taben los equipadores per ellí, pues poquín a pocu fueron rulando croquis y el boca a boca fizo'l restu.

Más detalles de les víes y del pié de vía abarrotáu

Pal branu del 2107, con casi toles víes esistentes anguaño, averéme un día más per ellí, cuando ya taba'l seutor Escombrera tamién abiertu y alcontréme col collaciu, arrequexáu a esti seutor y toles víes del placón principal ocupaes dafechu.

Lo primero que me dixo, fué... morrió d'ésitu. Normal, pensé... a 5 minutinos de la carretera, equipadina pa niveles baxos, ensin sartenazos y a la solombra en plenu branu... diba masificáse. Asína que cuando díxome que diba desequipala esi branu, p'acabar de trabayar les víes y a otra cosa mariposa, paecióme de lo más normal, ya yera imposible caltenela en secretu, tando al llau de la carretera que baxa d'Otura, la gran escuela morciniega.

Xente enforma trepando nes guapes víes de la Puente

Llueu del branu, tornóse a colocar les primeres chapes y finóse d'equipar lo que quedaba dexándola nel estáu actual, que pa munchos tendrá coses que meyorar, que si nun hai grau duru, que si ta cosida... yo digo que vengan, que llimpien un paré enteru, que faigan un pié de vía onde nun lo había, que faigan un senderu onde nun lo había... y llueu que digan lo que quieran.

Esta placa caliza nel pueblín de la Puente, fízonos y va facenos pasar munchos bonos momentos a los que nos presta esguilar cola calmina, una tarde de branu o una mañana d'iviernu al solín, paseándonos o apretando n'arba del nuesu máximu grau ensin grandes vuelos.

Camudando'l Camín na Puente

Por suerte, a mi mou de ver, l'espoxigue de la escuela de Figares, otra ayalga del conceyu de Morcín, que tamién entrá-y la solombra a primeres hores de la tarde, fai que la xente vaya repartiéndose, asina como n'Otura na parte alta de Nuberu y que la plaquina de la Puente, pueda ser escalada más tranquilamente, ensin xente casi penriba unos d'otros y pidiendo turnu pa probar les víes.

Tan sólo, dende equí, dicir que se cuide entre toos la escuela, que nun se dexe basoria, nin se mexe nos piés de vía, asína como minimizar el griteriu cuando axúntase muncha xente, porque'l meyor puntu d'alcuentru colos vecinos aparte d'aparcar lo meyor posible, ye que nin se nos sienta cuando paseen pela sienda pente la Puente y la Foz.

Per últimu, voi espublizar los croquis, viendo que casi tol mundiu los tien nel so móvil, al traviés d'esi guaxap volador. Como siempre, van apuntaes les víes que me queden per probar y encadenar, pero bono... eso ya ye dalgo personal, quedáivos colos graos orientativos y col gran trabayu de los equipadores.

La Puente
 
Croquis fechos pelos equipadores d'esta grandiosa escuelina, que prefieren remanecer nel anonimatu, que tantos bonos momentos ta dándonos a munchos escaladores de la fastera central d'Asturies

viernes, 20 de julio de 2018

Trail de Portudera (Cabrales)

7 d'Abril de 2016

Track: Trail de Portudera (Cabrales)


Web del Trail: Trail de los Pastores de Portudera

Clasificaciones: Clasificaciones 2016  


Como bon ser humanu, tornamos otra vegada a tropezar na mesma piedra y esto va en munchos sentíos. El primeru, dempués de lo mal que lu pasé na Cangues Montain volver a correr ensin preparame en condiciones.

Segundu, dir a una carrera qu'anque dígome a mi mesmu que nun quiero pasar de los 30 km porque tengo problemes musculares, pues tamos falando de 26 km y 4900 m de desnivel, poro tamos falando d'una dureza estrema.

Tercer y últimu puntu, la organización tien d'amosar un interés polos corredores y la carrera que prime al ganar perres y van dos organizadores que dan pena nesti sentíu. Unu ye los de Langreo Skuls organizadores de la Cabeza L'Arcu y dalguna más por ahí que van inventando y otra ye los organizadores de les pruebes de Cabrales.

Tanto unos como otros dexen muncho que deseyar a la hora d'avituallamientos y bolsa del corredor. Pa unos ye mui cenciello, facer una carrera per un PR pel que casi nun tienen que marcar, cobrar como en toles carreres y nun dar una puta mierda na bolsa del corredor y ya ensin falar del agua fría na meta.

Pa los de Cabrales, tienen la suerte de tener el meyor tarrén de xuegu pa les carreres de montaña, cobrar lo que-yos dea pola gana y nun tener nada n'absolutu nada decente nos avituallamientos, diciendo que los de carrera nun taben mal, pa los primeros claro, pero na meta que nun tengas un malditu bote d'isotónicu, dalgo de comida potente (empanada, tortiella...)

Baxando ya hacia Arenas de Cabrales



Nesti casu tienen la gran suerte de la participación vasca y cántabra al quedá-yos cerquina, pero tengo que dicir que nun tien na que ver coles organizaciones nel centru d'Asturies (Ayer, Penubina,...), Occidente (Mual, Cangas del Narcea...), Seronda Trails, Diantre... y munchísimes nes que participé y de xuru que munches otres nes que no participé.

Fai dos años, alcuérdome de denuncies por nun llimpiar el percorríu dempués de la carrera, esti añu faltó un tris pa que se matáse un corredor al cayer nuna torca, lo cual nun quita que nun tuviese bien marcáu'l percorríu, al menos asina me lo paeció, pero camiento que les carreres deben dir a la escelencia participativa y non a sacar perres.

En parte, hai que dicir que tamos ante un deporte de riesgo, nel que corremos lo más fuerte y rápido que podemos y ye d'agradecer dempués de pagar un bon dineru, tener dalgo que xintar curioso cuando totalmente fundíos al entrar en meta o recibir un pequeñu agasayu na bolsa del corredor en forma de prenda con un mínimu grabáu y non un pañuelu roñoso o un xilecu polar lo más batalleru qu'alcuéntrase nel mercáu.

No que se refier a lo deportivu, la carrera ye monte puru y duru, va dos años tocárame facer el trail más curtiu ensin baxar a L'Entreh.anu ya ensin pasar por Vierru y nótase enforma, ya qu'esta parte fízoseme durísima y tuve abondos problemes de calambres por mor de la dureza.

Fue una pena porque llevé un ritmín tranquilu na canal de Somas y apreté muncho per Portudera hasta baxar a L'Entreh.anu. Ellí, el descensu diba bien hasta un par de resbariones nel que ví como se cargaben los cuadriceps y diba tocar sofrir.

Pesie a les pastilles tuve que dir regulando'l restu de la carrera, controlando munchísimu nel tramu quebrapates hasta la baxada de Calluenga, na que nun tuve problemes, pero tampoco pude baxar como me diba prestar.

La llegada a meta, como siempre mui prestosa, con muncha xente nel pueblu, munchos conocíos, pero alcontrate con esi avituallamientu de meta, con coca cola o agua, cuatro frutes y cuatro cachos de chocolate, a lo que sumamos una guapa ducha fría, pónete d'unos coyones finos.

Lo de siempre... al final volveremos porque ye un carrerón, pero la culpa ye nuesa, porque nun deberíemos dir a carreres onde camiéntase que'l corredor ye lo de menos, la seguridá en cuanto a voluntarios nun ye la más afayaiza, al menos fai dos años fuera así y sacar perres ye l'únicu interés. 

Como siempre, dar gracies a voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Mariaw...) 

-------------------------------------------------------------------

jueves, 19 de julio de 2018

Margalef de Montsant (Tarragona)

Del 24 al 29 de Marzu de 2018

Bono, pues como en delles empreses y nun estáu laicu se supón, oblíguenmos a garrar díes por fiestes relixoses, tocaba aprovechalos y como non, un viaxín d'escalada ye lo que más presta magar d'un iviernu gafu de meteo n'Asturies.

Magar de dar munches vueltes y aldericar sobre cual yera'l meyor destín, cuntando con que nun daben bon tiempu pa casi dengún llugar, decidimos metenos la xatada de furgo hasta'l parque del Montsant en Tarragona.

Espertamos nel aparcaderu del Pantà de Margalef

Nesti parque hai delles escueles conocíes, pero nun sé si polo míticu de los últimos años, prestábanos conocer Margalef. Y ye que falando de víes de gran dificultá, quiciás Margalef ye de les escueles que más escaladores profesionales suel visitar y a los prubinos tamién préstanos conocer, anque seya dende baxo, delles víes nomaes, como Demencia Senil, col míticu videu d'Iker Pou.

Aportamos per ellí, el sábadu 24 totalmente de nueche, dempués d'un viaxe con calma de milenta hores, metiéndonos hacia'l Pantá de Margalef onde sabíemos qu'habia aparcaeros pa pernocta. A la hora que llegamos, metímonos al sobre ensin dudalo, esperando que'l día siguiente llevantárase con solete.
La llarga muria d'Espadelles centró la nuesa atención casi tolos díes

Tamos na selmana anterior a la selmana santa y la verdá ye que nun hai muncha xente, poro se ta bien y prepares almuerzu mañaneru con una tranquilidá total. Pela zona, andaben Cedric Lachat, Nina Caprez.. y Lolo y Kíla, a los que se-y la suda quien tea... van saludar a tol mundiu.

Magar del almuerzu, salimos del aparcaderu, dempués de pagar la primada correspondiente, queriendo conocer un pocu más el pueblu y tomar otru café, nel meyor sitiu de Margalef, Ca Velnet, el cual convertiríase nel nuesu campu base particular.

Ablucante ver a Javi moviéndose cenciello pelos desplomes

Col pueblu perconocíu, decidimos entamar xubir al seutor d'Espadelles, una muria de cientos de metros d'estensión, anque non munchos metros d'altor. La verdá ye qu'a lo llargo d'Espadelles, tenemos graos pa tolos gustos, pero Vane y yo, pal primer día decidimos visitar pa calentar el Totxo d'Espadelles y llueu la Punta Espadelles.

El Totxo ye un sectorín feu de placa tumbada, que facese a los furacos nun mos vino mal del too, anque tampoco ye pa repetir. Llueu arimámonos a la Punta Espadelles onde hai unos graos vien prestósos pente 6a+ y el 7b, marchando con 6b víes a vista hasta 6c que sumaes a otres 3 nel Totxo, facíen un primer día más que perfeutu pa pillá-y el puntín a la roca.

Ye de recibu echar un vistacín a mítiques víes como Demencia Senil

Esa tarde, averábase hasta Margalef tamién Montse, y muncho más de nueche Javi y Olaya, que tuvieren aventura pa salir de la Hermida, por mor de les ñevaes. Así qu'al día siguiente tamién decidimos xubir hasta Espadelles pa que la xente pudiera esfrutar d'esti guapu llugar.

Por suerte, el sol saliera y pudimos esfrutar d'un día bien prestosu d'escalada, ya que n'Asturies nun viéramos el sol dende cuantayá. Esta vegada tuviemos pegándonos tola mañana nel Racó d'Espadelles onde quédome con dos víes increyibles, Setareb (6c) y la so compañera a la manzorga, la cual siempre taba ocupada y nun pude rematala.

Faciéndose a los furacos de Margalef

Los demás díes fuimos turnando visites a Espadelles, con visites a seutores na otra fastera, sobretou nel supuestu día de descansu, onde dimos un paseín a conocer la Catedral al otru llau del barrancu, onde malpenes dí un peguin a un 6c perinteresante que pringué nel pasu.

Como siempre, nestos viaxes suelo dir baxando intensidá y ye qu'a vegaes nun sabemos controlar les fuercies y el día que vémonos bien, apretamos con tantes ganes qu'andamos penando'l restu de los díes, dexando varies víes ensin encadenar a pesar de tar a un pegue del encadene.

Visitamos otros seutores buscando solombra o sol dependiendo del día

Al menos, nesti viaxe de total disfrute y bon ambiente, quedéme col encadene de mi primer 7a (Que pasa neng!) al primer pegue nel Racó d'Espadelles. Al marxe de lo pocu importante d'esta nota, la vía en sí, ye una preciosidá con un bloque inicial y una placa vertical de furacos mui prestosa.

Al igual que nel primer seutor del Racó, la so hermana xemela de la manzorga yera tamién una gran vía, anque pa mi idega'l bloque salía más duro d'un bideu, mancándome nel antebrazu al salir tan fuerte de bloque.

Despedímonos de Margalef hasta la próxima vegada

Xustu esti día, nel que manquéme nel antebrazu, decidí dexar d'escalar y colar pal mió pueblu a pasar el restu de les vacaciones. Yera dalgo que tenía na tiesta, pero dexaba abiertu hasta cuando diba tar trepando, lo cual fue un total aciertu ya qu'al día siguiente tuvieron un día perfrío en Margalef y el restu del grupu tamién decidió abandonar tierres catalanes.

Al igual qu'esi viaxe a Rodellar, que ficiera l'añu pasáu, tengo claro que marcho de Margalef con munches ganes de volver, pol sitiu que ye bien guapu tamién, quiciás non tanto a nivel de pueblu, pero si que'l barrancu pagaba la pena y la xente del pueblu agradecía pol turismu escalador tamién.

Tornarem...

Margalef (Seutores visitaos)
 
Croquis modificaos por mi de la escuela d'escalada de Margalef, por mor de En La Vertical. Gracies y col so permisu.

miércoles, 4 de julio de 2018

El Campu (Casu) - Peña'l Casar

17 de Marzu de 2018

Track: El Campu (Casu) - Peña'l Casar


Siguimos col ivernu, pesie a que la primera ta a piques d'entrar, pero esti añu n'Asturies ta siendo un iviernu de los de verdá. D'amuesa, tamos n'El Campu, na capital del conceyu casín y les previsiones son tan dixebraes unes d'otres que danos lo mesmu y decidimos salir a patiar.

Diba dicir que como siempre, p'aportar a El Campu nun tenemos más que garrar la minera en Xixón hasta'l desvíu del corredor del Nalón, percorrer los conceyos dempués de Llangréu, Samartín del Rei Aurelio y Llaviana pa entrar nel conceyu de Sobrescobiu.
Partimos d'El Campu (565 m)