viernes, 20 de julio de 2018

Trail de Portudera (Cabrales)

7 d'Abril de 2016

Track: Trail de Portudera (Cabrales)


Web del Trail: Trail de los Pastores de Portudera

Clasificaciones: Clasificaciones 2016  


Como bon ser humanu, tornamos otra vegada a tropezar na mesma piedra y esto va en munchos sentíos. El primeru, dempués de lo mal que lu pasé na Cangues Montain volver a correr ensin preparame en condiciones.

Segundu, dir a una carrera qu'anque dígome a mi mesmu que nun quiero pasar de los 30 km porque tengo problemes musculares, pues tamos falando de 26 km y 4900 m de desnivel, poro tamos falando d'una dureza estrema.

Tercer y últimu puntu, la organización tien d'amosar un interés polos corredores y la carrera que prime al ganar perres y van dos organizadores que dan pena nesti sentíu. Unu ye los de Langreo Skuls organizadores de la Cabeza L'Arcu y dalguna más por ahí que van inventando y otra ye los organizadores de les pruebes de Cabrales.

Tanto unos como otros dexen muncho que deseyar a la hora d'avituallamientos y bolsa del corredor. Pa unos ye mui cenciello, facer una carrera per un PR pel que casi nun tienen que marcar, cobrar como en toles carreres y nun dar una puta mierda na bolsa del corredor y ya ensin falar del agua fría na meta.

Pa los de Cabrales, tienen la suerte de tener el meyor tarrén de xuegu pa les carreres de montaña, cobrar lo que-yos dea pola gana y nun tener nada n'absolutu nada decente nos avituallamientos, diciendo que los de carrera nun taben mal, pa los primeros claro, pero na meta que nun tengas un malditu bote d'isotónicu, dalgo de comida potente (empanada, tortiella...)

Baxando ya hacia Arenas de Cabrales



Nesti casu tienen la gran suerte de la participación vasca y cántabra al quedá-yos cerquina, pero tengo que dicir que nun tien na que ver coles organizaciones nel centru d'Asturies (Ayer, Penubina,...), Occidente (Mual, Cangas del Narcea...), Seronda Trails, Diantre... y munchísimes nes que participé y de xuru que munches otres nes que no participé.

Fai dos años, alcuérdome de denuncies por nun llimpiar el percorríu dempués de la carrera, esti añu faltó un tris pa que se matáse un corredor al cayer nuna torca, lo cual nun quita que nun tuviese bien marcáu'l percorríu, al menos asina me lo paeció, pero camiento que les carreres deben dir a la escelencia participativa y non a sacar perres.

En parte, hai que dicir que tamos ante un deporte de riesgo, nel que corremos lo más fuerte y rápido que podemos y ye d'agradecer dempués de pagar un bon dineru, tener dalgo que xintar curioso cuando totalmente fundíos al entrar en meta o recibir un pequeñu agasayu na bolsa del corredor en forma de prenda con un mínimu grabáu y non un pañuelu roñoso o un xilecu polar lo más batalleru qu'alcuéntrase nel mercáu.

No que se refier a lo deportivu, la carrera ye monte puru y duru, va dos años tocárame facer el trail más curtiu ensin baxar a L'Entreh.anu ya ensin pasar por Vierru y nótase enforma, ya qu'esta parte fízoseme durísima y tuve abondos problemes de calambres por mor de la dureza.

Fue una pena porque llevé un ritmín tranquilu na canal de Somas y apreté muncho per Portudera hasta baxar a L'Entreh.anu. Ellí, el descensu diba bien hasta un par de resbariones nel que ví como se cargaben los cuadriceps y diba tocar sofrir.

Pesie a les pastilles tuve que dir regulando'l restu de la carrera, controlando munchísimu nel tramu quebrapates hasta la baxada de Calluenga, na que nun tuve problemes, pero tampoco pude baxar como me diba prestar.

La llegada a meta, como siempre mui prestosa, con muncha xente nel pueblu, munchos conocíos, pero alcontrate con esi avituallamientu de meta, con coca cola o agua, cuatro frutes y cuatro cachos de chocolate, a lo que sumamos una guapa ducha fría, pónete d'unos coyones finos.

Lo de siempre... al final volveremos porque ye un carrerón, pero la culpa ye nuesa, porque nun deberíemos dir a carreres onde camiéntase que'l corredor ye lo de menos, la seguridá en cuanto a voluntarios nun ye la más afayaiza, al menos fai dos años fuera así y sacar perres ye l'únicu interés. 

Como siempre, dar gracies a voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Mariaw...) 

-------------------------------------------------------------------


16 d'Abril de 2016

Track: Trail de Portudera (Cabrales)


Web del Trail: Trail de los Pastores de Portudera

Clasificaciones: Clasificaciones 2016  


Tornamos a les carreres pel monte col Trail de Portudera y el mieu invade'l nuesu cuerpu, ya que cola falta del mi hermanu, vamos xuntanos los Bertos, pudiendo animanos a xubir el ritmu de más, lo que pudiera llevanos a pasales putes al final.

Aportamos a Arenas, onde intentamos echar un cafetín tranquilu nel Cares, tando'l chigre a rebosar, anque esta vegada vinimos sobraos de tiempu y finalmente, podemos xintar un cafetín con un donut pa garrar dalgo azucre estra.

Caleciendo col día perruno
Preparámonos, con mochila, cortavientos y tolo que nos pide la organización ya que dende que saliéramos de Xixón, nun parara d'orbayar y nel intre, failo, más sele pero orbaya. Pa cuando sal la carrera, máxicamente esapaez la lluvia y na meta, al llegar un pocu tarde casi nun somos a pasar pola puerte pa que'l chip s'active y con ello tócanos salir más alantre de lo deseyáu.

Y pior aún, salir alantre llevónos a siguir el ritmu nos primeros kilómetros de carretera, colo que calculo qu'entraríemos na primer cuesta entre los 50 primeros, un ritmu qu'erróneamente caltendríemos nel camín dende'l canal d'agua hasta l'entamu de la canal de Somas.

En Somas entamó l'infiernu, siguimos apretando ensín xacíu, siendo pasados por poca xente tou seya dicho y ficimos el kilómetru vertical hasta l'avituallamientu nuna hora. Mil metros nuna hora... nun tamos avezaos a ello y díbemos pagalo.

Travesando Portudera hacia Caoru

Llegamos muertos al avituallamiento, cola segunda clasificada de la xeneral, paramos a xintar daqué y sorprendéntemente recuperamos munchísimu, faciendo tol restu de la carrera por Portudera a un ritmu mui curiosu, recuperando posiciones hasta la Cabeza Blanca.

A la vuelta, hacia la mayada de Tordín, paramos tamién a reponenos con cierta calma, pero ya díbemos viendo que nun diba ser tan cenciello esta vegada. Díbemos corriendo, pero los xemelos diben avisando y los cuadriceps taben a piques d'ello tamién.

Fuimos aguantando hasta l'entamu de la baxada per Caoru, onde un resbarión nuna peña, fizo que se me xubiesen los dos cuadricpes. Increyible... nunca me pasara... ellí tuve tiráu en suelo, hasta que'l pasu del tiempu fue relaxando los músculos.

Entrando n'Arenas... dando una vueltina pel pueblu

Siguimos descendiendo pero cuando animábame un pelín a da-y cera, xubíase de nuevu y así hasta 3 vegaes, hasta que'l desnivel ya nun fue tan pindio y nun había qu'afitar les pates con tanta fuercia y fuí alcontrándome meyor.

Ehí, fué cuando la mió tortura acabó y entamó la de Alberto, teniendo xubides continues de cuadriceps y dalguna de xemelu. Asína ficimos el restu de la carrera entre caleyar, correr y parar por mor de los callambrazos.
La cara sorriente d'Alberto nun diz la verdá... durísima

Dicir que fízose infernal el final de la carrera y que nunca enxamás llegue tan cansáu y na llende del sufrimientu muscular a la meta. Los llargos minutos de tar tiraos na plaza d'Arenas tomando bebida isotónica xunto una montonera de corredores na mesma situación yera la meyor amuesa de la dureza del percorríu.

Pa l'alcordanza quedarán los acompasados ayes de la xente descendiendo Caoru y la fartura en casa Niembro n'Asiegu magar de pasar pel Cares pa refrescase y relaxar les pates, lo cual nun furruló del tou mal.

No hay comentarios:

Publicar un comentario