Track: El Campu (Casu) - Peña'l Casar
Siguimos col ivernu, pesie a que la primera ta a piques d'entrar, pero esti añu n'Asturies ta siendo un iviernu de los de verdá. D'amuesa, tamos n'El Campu, na capital del conceyu casín y les previsiones son tan dixebraes unes d'otres que danos lo mesmu y decidimos salir a patiar.
Diba dicir que como siempre, p'aportar a El Campu nun tenemos más que garrar la minera en Xixón hasta'l desvíu del corredor del Nalón, percorrer los conceyos dempués de Llangréu, Samartín del Rei Aurelio y Llaviana pa entrar nel conceyu de Sobrescobiu.
Partimos d'El Campu (565 m)
Una vegada que tamos en Sobrescobiu ya pasaríemos a Casu nunos 10-15 minutos, que nós si que pudimos facer, pero qu'a los pocos díes por mor d'un argayu en Ansó, cortóse la comunicación pol Nalón d'un conceyu tan guapu y grande como ye Casu.
Meses dempués, pasaes les vacaciones de primavera y entrando'l branu, pudieron recuperar la normalidá si ye que dalgún vegada la tuvieron, porque lleven años pidiendo qu'arréglese la carretera a L'Infiestu pa tener dalguna salida más... pues asina lo tuvieron los probes vecinos d'esti conceyu... enzarraos pol so propiu gobiernu y su falta d'oportunidaes pa col mediu rural... eso sí, l'AVE ye perimportante.
Entamando a bregar col tiempu casi dende los primeros pasos
Lo dicho, si sois capaces d'aportar al conceyu de Casu y al so parque de Reres, podríes salir pela ponte que crucia'l Nalón al final del pueblu y siguir per una pista paralela al rigu aguas abaxo, hasta na fastera de la Carrera, camudar el sen pa dar varies envueltes hacia Anabeli.
A esti altor de ruta, llevaba un bon ratín copiando y el paisaxe gris
y murniu diba tornándose en blanquecín, tanto nel cielu como pel
tarrén. Paez mentira, pero en menos de diez minutos diba cubriendo pali
pali, cosa qu'ameyoraba ya de por sí un guapu paisaxe nel nuesu andar
hacia Carecea.
Caleyaremos hacia Carecea con paisaxes ñevaos
Pasando Carecea, tendremos un tramu pel monte Allende, col senderu muncho más difuso, contando con que la ñeve y dellos argayos y vallines, faenos que cueste abondo alcontrar cuales son los meyores pasos.
Aún así, la idega ye ascender hasta'l colláu de Sobrecantu onde alcontramos de les meyores vistes del día, hacia la fastera de Valdunes y los pueblos de la Sotu, Bezanes y la Foz. Dende los 1030 m de Sobrecantu, pudiera pedinos el cuerpu garrar un senderu colgáu per monte baxo, pero pinta dafechu esaniciau, poro descenderemos en fuertes envueltes hasta'l Llosón y más tarde a los Zreizales.
Ascendemos a Sobrecantu pa descender al Llosón
Equí, alcontrarémonos con una amplia pista que vien dende Belerda, lo que nel intre, llévanos a la tiesta a l'alcordanza de la nuesa prestosa ascensión al Visu La Grande. Varios fuimos los que tuviéramos nesa aventura y tamién vienme a la memoria'l collaciu Klaus, que morriera faciendo actividá nes cercanes canales del picu Cuervu.
Nunca sabemos onde la tenemos, poro nun queda otra que siguir alantre cola nuesa vida, intentando facer lo meyor que podemos les nueses actividaes y cola mayor de les seguridaes, pero como siempre, esi cumera de posibilidaes, torgues o decisiones que tomamos, marquen y muncho'l nuesu destín.
Aportaremos a les collaes d'Incós (1210 m)
Pel momentu, el nuesu destín tendría de llevanos dende los Zreizales al travíes de la Llera y Villanueva, hasta les collaes d'Incós, siempre con vistes al valle de Quixaoriu, pel que xubiéramos va dos años na nuesa ascensión al Visu la Grande.
Dende Incós, namái que nos quedará empobinanos sin perda hacia les Peña'l Casar, onde enantes d'aportar a la fastera de calizu, tendremos que triar pente la cotoya a la gueta del meyor y menos embarráu camín posible.
Facemos l'ascensu al nuesu destín... les peñes del Casar
La parte cabera de l'ascensión sedrá pente les peñes del Casar, con dalguna trepadina entretenida, siempre siguiendo los fitos y un pocu la intuición hacia'l puntu más altu de la Peña'l Casar, tamién nomáu como la Conyonada (1408 m).
Les ñubes tan a medies de dexanos esfrutar de bones vistes, pero quedámonos cola sensación de que'l llugar tien muncho de bon mirador, a sabiendes de tar arrodiaos de guapos montes: Requexón de Valdunes, Visu la Grande, Retriñón...
Cumal na Peña'l Casar (1408 m)
Vemos venir una ñubona blanquecina dende la fastera del Retriñón, poro decidimos baxar a xintar nun meyor llugar y ya demientres vamos descendiendo, cayenos una pequeña esbastiada pa parar al pocu n'Incós.
El día nun pue tener más meteoroloxía cambiante, lluvia, fríu, ñeve, sol, calor, granizada,... aún así, siguimos alantre descendiendo direutos hacia'l valle de Viciella, pasando a lo primeru peles Cabañes de Pedroses onde paramos a xintar daqué al momentáneu sol.
Descenderemos dende Incós peles Pedroses hasta la riega la Viciella
Dende les Pedroses diremos llibrando nel descensu viesques de carrascu hasta aportar a la cabecera de la riega la Viciella, onde cruciamos a lo otra vera alcontrándonos tarrén enllamargáu, hasta que garramos el camín empedráu qu'aporta a la foz de Cebatón.
Esta curtia pera guapa foz, formada pente la muria de Peñablanca y la crestería que vien dende'l Casar, sedrá un final estupendo pa una ruta, que pesie al tiempu, fue dexándonos descubrir requexos perguapos.
Perguapa foz de Cebatón nel descensu hacia Cueva Deboyu
Magar del descubrimiento de la foz de Cebatón, garraremos pista tranquilamente hasta aportar a la mecedura de la Viciella col rigu Nalón, na nomada Cueva Deboyu. Equí, aparte d'escalar ye d'obligada parada echar un vistazu a la cueva per onde desapaez dellos metros el Nalón carboneru que decía Nuberu.
Nós, pudimos mirar pocu pal rigu, porque'l so agua nun yera l'únicu que tenía ganes de moyar, ya que pa completar la ruta pela carretera de vuelta al Campu, cayónos un chaparrón de los de llibru pa llegar pingando a los coches jeje.
Aún así, tengo que dicir que los 14,7 km del percorríu colos sos 1070 m de desnivel, fueron de lo más sorprendente nes casi 7 hores qu'anduvimos pelos montes casinos.
Ta la próxima....
No hay comentarios:
Publicar un comentario