martes, 30 de octubre de 2018

Directa Yerai (L.luna)

31 de Xunetu de 2018

Un branu pocu efectivu y desmotivante pa la escalada deportiva, fae que decida parar de trepar por un tiempu, siendo la idega colar pal pueblu y nun llevar res que tenga que ver cola escalada, poro sólo ropa pa correr pel monte y fuera.

Aun así, Dani ye a picame, enantes de colar, pa facer dalgo d'alpina y nun refugo'l convite, porque na realidá apetezme facer dalgo d'esguilada que tenga más que ver col monte y menos con intentar apretar a muerte nes escueles de deportiva.

Averamientu y entamu del primer llargu

Desempolvamos los trastos y a les 3 tamos tomando un café nel Alambique en Xixón y a les 5 tamos arrancando hacia'l pie de la vía en Rabanal de L.luna. El día, pues como siempre inmeyorable, de solana, pero a les hores qu'entamamos la vía como que nun mos esmolez precísamente.

Llevábemos un branu gafu cola meteo per Asturies y un escesu de sol casi hasta qu'apetez y como los graos de la Directa Yerai son agradables, pues nun díbemos tener dengún problema. La vía en cuestión, fué abierta per Ramón Canales a l'alcordanza del fíu d'otru gran montañeru como yera J. Blas, poro una vía con munchu sentir.

Pasándolo podre nuna reunión vexetariana

Como siempre, tenéis el croquis y una reseña detallada na páxina web del Maquis, poro nun me voi estender en graos, sinon en sensaciones como siempre. Nesto de l'alpina lo que más cuesta ye poner la tiesta nel sitiu y el primer llargu quiciás nun ye'l más afayaizu pa ello, ya que tenemos les mayores dificultaes concentraes nestos primeros 45 m.

Personalmente, costóme muncho entrar en xuegu, siendo una primer parte mui cenciella onde déxase protexer pa dempués tener los pasos duros de placa protexios per parabolts, pero bastante duretes con dalgún bloqueu fuerte pa salir a bon cantu.

Esfrutando a tope con llargos bien guapos

Namás salir de la placa entraremos na parte alta del "Sarcófago" onde la cosa se pon seria, al tar rota la roca y nun poder meter trastos p'asegurar. La verdá ye que voi solucionando'l percal como puedo y aporto a la reunión con muncha tensión y sin protexer tolo que diba prestame.

Na primer reunión, tocó baxar les pulsaciones, montar la reunión con calma y asegurar a Dani, que cuando llega dizme que paez que sufrí un pocu y que paez que vamos dir pillaos de tiempu. Por suerte, nel segundu llargu reláxome, la roca tórnase mui buena y déxase protexer, esfrutando esti llargazu munchísimu.

Dani colos sos retratos al vacíu

La verdá ye que ya pongo la directa y dempués del esfrute del segundu llargu, guapísimu d'escalar, zampo'l terceru con una tirada llarguísima (55 m) costándome alcontrar la reunión y métome nel cuartu qu'empobínase a un techín con una pinta preciosa de superar.

Enantes del techín, tenemos una placa fina mui disfrutona y la verdá ye que'l techu nun tien denguna dificultá y protéxese enforma, poro siguimos volando hacia l'últimu llargu de la vía, que ye un pilar IV grau, onde hai que dir negociando la roca más segura, por mor de dalgunos bloques sueltos.

Relaxación na última reunión de la vía

Ensin mayores problemes aporto al cumal de la Peña Rabanal, onde aseguro a Dani y queriendo dirse la lluz del día, facemos les semeyes de rigor y esfrutamos de la tranquilidá del atapecer, demientres recoyemos tol material.

Como tiros garramos la canal de descensu hacia la ermita de Pruneda, teniendo qu'andar sollerte pa nun enmarronanos per destrepaes innecesaries, tomando la canal siempre pela mandrecha y saliendo hacia unos praos enantes de tornar hacia la manzorga hasta la propia ermita.

Cellebrándolos y p'abaxo que se fai de nueche

Finalmente, un aciertu total averase hasta Rabanal a facer esta vía, quedándome con un perbon tastu nos 240 m de percorríu de la vía qu'anque de primeres fízome trabayar y sudar, dempués ya dexóse trabayar ensin dengún problema.

Tornaremos per Llión a por más... eso de xuru... la cordada con Dani Asturwaterman tien futuru jeje 

lunes, 29 de octubre de 2018

Llombera (Gordón)

29 de Xunetu de 2018


Finalizamos el finde d'escalada llionesa, tornando a una escuela que fai dos años, prestáranos enforma. Nun sabía de l'apertura d'otros dos seutores que dan vuelta a la peña, pudiendo tener varies orientaciones pa esfrutar d'una escalada a la solombra nos meses de branu.

Ensin madrugar demasiáu, más bien na, meyor dicho. Desperezámonos en Geras y magar del almuerzu, siguimos viaxe hacia la Pola Gordón, lléndonos hasta Llombera, onde aparcaremos y garraremos agua pa xubir hasta'l paré cimeru. 




Ana probando un sestu mui guapín

Tuviemos la suerte d'alcontranos con xente conocedor de la escuela y pudieron pasame una reseña de les nueves víes abiertes nos seutores a la solombra. Hasta ellí nos fuimos, intentando aprovechar lo máximu posible enantes de qu'entrase'l sol a facer protagonismu.


Un par de sextinos llargucos ye pa lo que nos dió tiempu, comprobando como les víes son buenes, pero la roca ye dalgo feble y queda muncho por sanear y romper. Si a esto sumamos, un cartelu de prohibición por añeramientu que nun diz de cuando a cuando ye la prohibición, pues acoyonamos un pelín y decidimos colar.

Tastiando la roca d'esti nuevu seutor

Pa cuando pasamos de nuevu pel seutor cimeru, decidimos baxar hasta'l pueblu de Llombera a tomar el vermú porque nun se paraba de calor. Nun digo na, de cómo entraben les clares al solete y de la xinta que nos metimos a la solombra de los portones de la furgo.

Hasta una señora siesta, tuvimos tiempu d'echar, ya que yera imposible dafechu, xubir a trepar de nuevu col calor que facía. A última hora de la tarde, cuando baxó'l calor, diónos por xubir un ratín hasta'l seutor pa facer unes cuantes víes.


Pie de vía cómodu pa esguilar cola calma


La verdá ye que dió pa muncho, anque fuesen namás que dos hores escases, ficimos unes 6 o 7 víes de plaquina cenciella. Lo máximu que treparíemos sedría un 6a probáblemente, pero prestó pola vida y quitamos un pelín esi picor, ya que la mañana quedara pelín curtia.


Jose fue más allá aún y se ventiló toles plaquines del seutor, ya que Pepa taba zángana y nun-y apetecía trepar. La verdá ye qu'esta escuelina ye bien guapa y camiento que paga la pena facer más visites y ponese en serio a trepar gradinos más duros.



Momentu siesteru con Kíla


Croquis modificaos de Llombera por mor de Infoescalada. Gracies y col so permisu.

---------------------------------------------------------

sábado, 27 de octubre de 2018

Beberino (Gordón)

28 de Xunetu de 2018

Cuando coláramos pol colar en Geras, tuviéramos cola mayor de les calmes tomando'l vermú, nun de los chigres del pueblu, apalancaos na terraza'l chigre como si nun hubiera mañana, siendo ún d'esos momentos en que tas tan a gustu que nun quies que pase'l tiempu.

Aún así, decidimos meneanos hasta otra escuela, contando con buscar dalgo onde la solombra nos dexara intentar esguilar dalgo más. Nun teníemos mui claru, si Beberino sedría un opción bona pero al menos, conoceríemos otra escuela d'escalada más.



Merendando a la espera de que baxase'l sol

D'esta miente, salimos de Geras en direición la Pola Gordón, parando dellos kilómetros enantes nel crucie pal pueblu de Beberino. Dende ellí, pudimos ver la pirámide que ye la escuela d'escalada y pudimos comprobar como'l solo pegaba con fuercia tovía.

Coles mesmes y aprovechando que teníemos qu'esperar por Ana que diba xunise al grupu pal finde, buscando dalgo de sombra, sacamos les meses y merendamos cola calma demientres tomábemos una birra a la espera de poder trepar.

Ablucante paré'l de Beberino

Cuando sentimos que'l calor diba baxando, garramos los trastos y empobinámonos canal arriba hacia'l pie de vía de la muria de Beberino. Namái aportar al paré, daste cuenta que pel momentu, nun ta la muria tolo aprovechada que pudiera y que la roca supera en calidá a la de Geras con muncho.

Por mor, de lo tarde qu'entra la solombra nel paré, nun mos dió muncho tiempo a trepar, pero al menos probamos un par de viuques cencielles a la manzorga del diedru que separa'l paré en dos seutorinos.

Noah atenta a la xugada nel pie de vía

Paezme que yeren un cuartu y un quintu pa calecer yemes y dempués metíme nun 6b llargu preciosu, un pelín suciu, pero con gran calidá na roca. Una pena, que nun pudiésemos tar más tiempu esguilando, porque viendo los croquis y les plaques, esta escuela si paga la pena otra visitina, asína que tornaremos de xuru.

Beberino (Gordón)

Croquis modificaos por mi de la escuela de Geras, por mor de Los Cuatro Valles. Gracies y col so permisu.

viernes, 26 de octubre de 2018

Geras (Gordón)

28 de Xunetu de 2018

Continuamos con el viaxe llionés d'escueles d'escalada y nun sé bien por qué, decidimos que'l nuesu campu base, dempués del pasu pela Peña Los L.lanos, fuese'l pueblu de Geras. Sedría l'embutíu d'alta calidá o nun saber que tipu d'aparcamientu pudiéramos tener p'apalancanos o que nun se nos ocurría otru sitiu onde poder tomar dalgo enantes de dir a durmir.

El casu ye qu'a la vera del rigu Casares, abellugámonos, non sin antes tomar dalgo tranquílamente nun de los dos bares abiertos nel pueblu, que por suerte, pudimos comprobar como ambos, paecen vivir bastante bien con nomada fama de comer bien y vimos a muncha xente averándose a Geras, en mou dafechu gastronómicu.

Almorzando en Geras... con tola tranquilidá del mundiu

Nós, magar d'un almuerzu en plena cai, non mui llegal, pero qu'a la xente del pueblu nun-y importó res y menos a los dueños de los chigres, que vieron como pasábemos a tomar otru café nos sos llocales y cerveces a posteriori de les escalaes, con llargues sesiones de terracéu. Al final, el mundu furgoneteru nun ta reñíu cola hostelería, aportando muncho más de lo que piensen y habiendo respetu mutuu, el tema fluye que da gustu.


Dicir que fueron increyíblemente amables y nós correspondimos col nuesu gastu correspondiente y sobretóu siendo respetuosos a la hora d'aparcar, ya que pela nueche ocupábemos muncho sitio, pero pa marchar a trepar siempre dexábemos les furgonetes en batería, ya qu'a la hora de xintar el pueblu petábase enforma y necesitaben sitios pa los fartones.

Cartelu clave pa nun perdese

A lo que vamos, que ye la escalada. En Geras tenemos una escuela perteneciente a esi llibretu d'Escalada en Cuatro Valles de Llión, que diónos por visitar por mor de l'amplitú de graos qu'a priori veíamos nos croquis.

D'esti xeitu, decidimos aventuranos a conocer la escuela y dicir que pa llegar a ella, hai que siguir carretera arriba hasta alcontrar una cai que sal a la manzorga, pasáu la piscina y onde alcontraremos esti cartelu que nun dexa llugar a dubies.

Nós, liámonos enforma saliendo per una cai antes y dimos tamién a la foz de Palanco, pero non sin lluchar con praos, cruciar la riega Palanco y dalguna aventurina y pinchazu nes pates, hasta aportar a la propia foz.

Entrada a la Foz de Palanco


Eso sí, la foz como tal, ye guapa y daría pa facer un paseín senderista estupéndamente. Al pocu d'entrar nesta, tendremos de remontar hacia'l crestón calizu, onde alcuéntrense toles víes, siempre a la mandrecha de la foz, según entramos dende'l pueblu.

El llugar ye guapu, anque ensin correr dalgo d'aire y a finales de Xunetu casi amoriamos de calor, poro trepamos hasta mediudía hasta que nun s'aguantaba más. Otra cosa ye la roca y en xeneral la calidá de les víes, que nun ye, personalmente, mui bona.

Vamos alcontranos con víes curties, mui a bloque, hasta pa los sestos baxos y los quintos, son de roca mediocre y pocu interesantes. Díbemos en dos cordaes, Pepa y Jose y Haritz y yo, entrando-y a los quintos (5c) según croquis, Pepa y Jose, diciéndonos que nun yeren mui recomendables.

Muries guapes pero poca calidá na roca y nes víes



Yo, dempués de mirar los croquis, nun sé como fice pa meteme nuna vía que pensaba que yera 6a y alcontréme con que nun venía reseñada, taba con spits y la reunión yera un cable que metía mieu pela cabeza p'arriba... por ciertu rondaría'l 6c.

Polo demás, dempués ficimos dos sestinos baxos mui bloqueros nel entamu y de placa dempués y por facer dalgo tamién los quintos non recomendables, que son un váter dafechu jaja. Los sestos, sobretou ún d'ellos yera guapín con un pasete de babaresa interesante, pero con víes tan curties ye que nin despegues a trepar.

En resume... una escuelina a la que nun se si paga la pena da-y otra oportunidá, anque na zona central de la muria sí que les víes ganaben n'altor y pudieren ser más interesantes, el tactu xeneral de la roca, yera de caliza vieyo con poca adherencia.

Geras (Gordón)

Croquis modificaos por mi de la escuela de Geras, por mor de Los Cuatro Valles. Gracies y col so permisu.

miércoles, 24 de octubre de 2018

Peña Los L.lanos (L.luna)

27 de Xunetu de 2018

Finde d'esos que danos a los collacios por colar pa dalgún llau y dedicanos a conocer escuelines d'escalada ensin mayor motivación que la de pasalo bien y conocer los llugares. Nesti casu, a finales de Xunetu y fartos d'un tiempu repunante per Asturies, tocó colar pa Llión.

Na primer tarde de Vienres, agarro a Kilina y tolos trastos posibles pal finde y salgo pitando hacia'l Güerna, col envís d'aprovechar la tarde. Pa ello, avérome hasta Caldas de L.luna, saliendo hacia la Peña Los L.lanos onde ya tuviera faciendo alpina va unos añinos, cola vía de la Feriona del Pilar.

Muria de la Peña Los L.lanos

Esta vegada la idega yera tirar de deportiva, anque tando nesta fastera la pena fue nun decidise a facer dalguna vía al menos. El casu ye que pa cuando aporté a la vera'l banzáu de L.luna, Pepa y Jose llevaben un ratín ya trepando, aprovechando les sos vacaciones.

Aparco y miro la pindia cuesta que tengo hasta'l seutor Placas, onde veo a la cordada esfrutando de l'adherencia llionesa. Mochila nel llombu y p'arriba cola calma, per onde meyor alcuentru camín, hasta aportar al pié de vía onde charramos un ratín y cuéntenme que tuvieren n'otru seutorín más a la manzorga onde había equipaes 4 víes más nel Puro.

Tamos enriba del banzáu de L.luna

Yo céntrome en pasar el ratu, demientres aporta tamién hasta ellí Haritz, pero viendo que tarda, faigo tres viuques rápides y siguimos hacia la mandrecha, encadenando vía tres vía, esfrutando d'unos gradinos plaqueros mui afayaizos pente'l IV+ y el 6a.

Pa cuando aporta Haritz, ponémonos a fueu a finiquitar les víes que me resten del seutor, faciendo les restantes, mui disfrutones, dándo-y tiempu a Haritz a poner la tiesta nel so sitiu un pocu, enantes de que nos tocase descender a les furgonetes col frontal.

Pepa y Jose plaquiando nos L.lanos

Deportivamente, nun ye que sea una gran escuela, pero l'amiestu pente víes de varios llargos semiequipaes d'alpina y un par de seutores de deportiva, pudieren facer pasar un día de lo más prestosu... habrá que volver.

Peña Los L.lanos (L.luna) (Seutores visitaos)

Croquis modificaos por mi de la escuela d'escalada d'Otura, por mor de Foropicos. Gracies y col so permisu.

lunes, 22 de octubre de 2018

Resistencia Reino Astur Nembra (Ayer)

21 de Xunetu de 2018

Track: Resistencia Reino Astur Curtiu (Ayer)


Web del Trail: Resistencia Nembra   

Clasificaciones: Clasificaciones 2018  

Magar del pufu de carrera que fice nel Trail d'Ubiña, retirándome nel Meicín, por una falta total de motivación y ganes de sufrir, tenía qu'entainar y volver a facer una carrera que me dexase con bon tastu pa siguir entrenando y corriendo con ganes.

Daquella carrera, lo pior de tou, fue dexar tirada a mi compi, Ana, que facía su primer carrera de monte y sólo pude acompañala hasta'l refuxu onde por mor del calor, decidí retirame. La verdá ye que descansando y volviendo a hidratame bien pudiera acabala pero fue más bien una falta total de ganes de sofrir... dexándome mui males sensaciones.

Alborecemos con un almuerzu pre carrera

Voi conociéndome y lo mesmu que fai un tiempu dexé de correr en grupu, por mor de llevar ritmos dixebraos unos d'otros, camiento que lo que realmente faime esfrutar de les carreres pel monte ye esa soledá qu'algames cuando ya van pasando los kilómetros y la carrera estírase.

Aparte, necesito dafechu sentir que voi en carrera, que voi dándolo too y si toca sofrir préstame sofrir individualmente. Soi un montañeru de grupu, llevo años llevando al mió grupu de monte y quiciás competir en carreres de monte, dame esi escape de llibertá pa dir a fueu pel monte, forciando tolo que pueda y esfrutando de correr, de la natura y sobretou de los mios camientos internos.

Esfrutando per senderos de monte y tramos correnderos

Sicasí, ún de les coses más prestoses de dir en carrera ye cuando a partir de la metá del percorríu, les distancies pente los participantes estírense y nin ves al de delantre nin al d'atrás y tas solu. Solu pa sentir cada pasu, solu pa sentir el to aliendu axitáu, solu pa escuchar los ruios nes viesques, solu pa sentir el to cuerpu.

Ya tenía ganes de correr en Nembra, quiciás ún de los pueblos d'Asturies y un conceyu, el d'Ayer, con mayor tradición en organizar carreres. L'oxetivu d'esti añu yera correr la carrera de 55 km de Resistencia Reino Astur, pero tuve que conformame cola media de 21 km, anque como pude comprobar el percorríu yera una pasada y nun eché de menos non poder correr la llarga.

Xubida durina hacia'l Picu Pedro García

Como siempre, salí atrás cola calma, intentado garrar ritmu nos primeros kilómetros más correnderos, p'avanzar posiciones pali pali. Según van pasando los kilómetos voi alcontrándome meyor y adelanto a muncha xente hasta aportar a la xubida al Picu Pedro García, onde tocó tirar de los entrenos pel monte y alcontréme perbien, aguantando unos ritmos altos y dando tolo que tenía dientro.

A partir del tramu más duru, pasábemos a otru más correnderu onde siempre xubiendo, diba ganando posiciones garrando a la primer clasificada nel cumal del Pedro García y baxando con ella durante munchos kilómetros a unos ritmos bien prestosos.

Baxando a fueu... pasándolo podre

Munchísimu barru nel tramu final, fizo que se me cargaren les pates enforma, teniendo que baxar un pelín el pistón, ya que nun tenía ganes d'acabar con calambres, ya que lleva siendo'l mayor problema de tola temporada.

Pese al baxón, nun perdimos posiciones, algamando finalmente en meta, el puestu 30 na clasificación xeneral y el 14 de la mió categoría. Nun tuvo mal, pa como siempre, nun entrenar específicu pero notábase que venía de dellos díes pel monte y nun hai meyor entrenu que dir de monte colos collacios.

Entrada en meta... con un resultáu perpositivu

A gustu totalmente col resultáu, coles sensaciones d'acabar una carrera apretando dende l'entamu hasta'l final, tocaba relaxase nel avituallamientu, xintando un bon platu de pasta y tomando unes cervecines que supiéronme a gloria, en bona compañía.

Quédame un pocu la espinina esta temporada de completar una bona carrera de llarga distancia, pero ye que tovía, agora mesmu, nun soi tan diesel como pensaba y apetezme más correr hasta media maratón y apretar a tope dando el másimu posible.

Como siempre, dar gracies a la organización, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos

viernes, 19 de octubre de 2018

Llánaves (Montaña Oriental) - Peña Prieta

17 de Xunetu 2018

Track: Llánaves (Montaña Oriental) - Peña Prieta


Dacuando, vas facer monte con unes precondiciones estrañes o cuanto menos, non tolo motivantes que debieren ser. Oyera falar de la Peña Prieta, que si yera una llomba, que si l'accesu yera feu, que si tal que si cual... y al final, hai que patealo y conocelo pa xulgar correutamente.

A dicir verdá, como nun esperaba gran cosa, esta ruta que ficimos prestóme enforma, y ye que tengo claro, que soi un montañeru d'ampliu espectru, que-y gusta por igual los grandes desniveles y cumales complexos de Picos, les kilometraes nos grandes valles nel cordal cantábricu y les pequeñes rutes per viesques y foces de la fastera central asturiana.

Semeya de grupu en Llánaves (1400 m)

lunes, 15 de octubre de 2018

Vidrieros (Montaña Palentina) - Pico Curavacas

16 de Xunetu 2018

Track: Vidrieros (Montaña Palentina) - Pico Curavacas


Tercer día de la nuesa Travesera, siendo'l nuesu oxetivu l'otru gran nomáu picu palentín: El Curavacas. Si'l día anterior esfrutáremos como neños, cola ascensión pela arista Este del Espigüete, esta vegada la idega yera conocer la ruta normal pel Callejo Grande y facer tol cresteríu pa descender pela fastera oeste.

Como siempre, de lo que se pretende a lo que se puede facer hai una llarga tirada. Nesti casu, averarémonos hasta'l pueblu vecín de Vidrieros dende'l campu base en Triollo y ya de camín nel coche, vamos viendo la típica boina nel Curavacas.

Grupu preparáu pa salir en Vidrieros (1321 m)

miércoles, 3 de octubre de 2018

Cardaño (Montaña Palentina) - Pico Espigüete

15 de Xunetu 2018

Track: Cardaño (Montaña Palentina) - Pico Espigüete 


Llevantámonos nel pueblin de Triollo, onde durmimos estupendamente tantos los furgoneteros como los aloxaos nel Albergue Curavacas. L'almuerzu fadrémoslu toos xuntos, pudiendo servinos con tola tranquilidá, tanto de cafés como de tostaes, bizcochu...

Vamos, que ponémonos hasta riba, y garramos enerxía enforma pa lo que tenemos per delantre, que nun ye otra cosa qu'ascender el picu Espigüete. Pa ello, fadremos una tiradina moderada de coche hasta l'aparcaderu que tenemos pente los pueblos de Cardaño d'Abajo y Cardaño d'Arriba, alcontrándonos colos restos de la folixa de la Montaña Palentina.

Y digo restos, porque de la que pasamos, col alborecer mui presente, entá queden folixeros que van a piques de tomar la última o buscar abellugu onde tirase a sobar delles hores, hasta que'l sol faiga xusticia y ponga los cuerpos a furrular, supongo que previu pasu pel rigu pa espabilar.

Partimos del aparcaderu pente los dos Cardaños (1344 m)