Cardaño (Montaña Palentina) - Pico Espigüete

15 de Xunetu 2018

Track: Cardaño (Montaña Palentina) - Pico Espigüete 

Llevantámonos nel pueblin de Triollo, onde durmimos estupendamente tantos los furgoneteros como los aloxaos nel Albergue Curavacas. L'almuerzu fadrémoslu toos xuntos, pudiendo servinos con tola tranquilidá, tanto de cafés como de tostaes, bizcochu...

Vamos, que ponémonos hasta riba, y garramos enerxía enforma pa lo que tenemos per delantre, que nun ye otra cosa qu'ascender el picu Espigüete. Pa ello, fadremos una tiradina moderada de coche hasta l'aparcaderu que tenemos pente los pueblos de Cardaño d'Abajo y Cardaño d'Arriba, alcontrándonos colos restos de la folixa de la Montaña Palentina.

Y digo restos, porque de la que pasamos, col alborecer mui presente, entá queden folixeros que van a piques de tomar la última o buscar abellugu onde tirase a sobar delles hores, hasta que'l sol faiga xusticia y ponga los cuerpos a furrular, supongo que previu pasu pel rigu pa espabilar.

Partimos del aparcaderu pente los dos Cardaños (1344 m)

Nós, vamos a lo nueso, así que pente rises siguimos camín hasta l'aparcaderu, onde la xente ta nervioso, casi ansioso. Tanto ye, que demientres vamos preparando'l calzáu montuno, metemos dalgo de ropa na mochila y arrancamos gps y demás, hai dellos que nun s'aguanten y albidrando que'l so ritmu de patéu va ser menor, salen como postes hacia l'arista Este del Espigüete.

Poro, facemos la semeya de salida los que quedamos y cola calma, vamos garrando ritmín per un claru senderu, que faciendo envueltes, va llevanos a les primeres peñes calices d'esa increyible, llarga y guapísima arista Este del Espigüete.

El camín ye claru... arista p'arriba y a ganar altor pali pali

Nun hai perdá dala, namái tenemos que siguir un trilláu senderu que caltien tramos de caleyar cenciello, con dalgún sofitu de manes, pero sobretou nesta primer parte, nun tendremos problemes y el físicu ye lo únicu que pue tiranos atrás, anque ye tan entreteníu d'ascender que raro sería.

Aportaremos al colláu Cerrunal (1933 m), magar d'una hora d'ascensión y los grupos van faciéndose más evidentes. Pepa, Jose y Haritz van más menos a la cola, con un ritmu calmáu, los vascos más o menos a su bola nel centru y Benjamín, qu'entamó quiciás mui fuerte, va de los primeros puestos a baxar la intesidá del caleyar.

Alcontrámonos con vistes hacia Peña Prieta demientres facemos metros cenciellos

Yo, xuntéme con tres moces qu'anden de coyones y tocóme dir aguantando'l ritmu como meyor podía. Ana, Montse y Andrea van sobraes y yo nun toi en mi meyor momentu físicu, pasáu dalgo de peso, anque tiramos de fondu y vamos azorrando, sacando semeyes y xugando coles perrines pa ver si les despisto y paren un ratín al menos.

Un pocu antes d'aportar a la parte más espuesta de l'arista, ya vamos en cabeza y diremos guiyando l'ascensión pero onde más nos peta, demientres les ñubes entamen a xugar col cumal y antecumales del Espigüete.

L'arista afílase y nes travesíes de les cimes secundaries tendremos les úniques dificultaes

Sicasí, vamos esfrutando a tope, ya que me paez una de les aristes más guapes, a la par que cencielles, que fice nunca y namái tendremos un destrepe al baxar de l'antecume Este, enantes d'entainar hacia los 2452 m del picu.

Na cabera parte del averamientu, baxamos un pelín el ritmu, ya que les ñubes y la distancia que llevamos sobre'l restu del grupu faenos camentar que vamos pasar fríu a la espera. Pero ye lo que somos, un grupu, anque caún lleve'l so ritmu, la semeya grupal na cume, les reuniones y la xinta en comuna tienen de ser obligatories.

Preciosa ascensión al cumal del Espigüete (2452 m)

La verdá ye que nun ví nenguna dificultá n'arista, poro diónos por tirar p'alantre, sinon lo normal, ye qu'espere nos pasos más complexos. Aún así, tuviemos esperando un ratín, cola suerte que'l solete tuvo ganes d'apaecer y diónos una plácida y cómoda espera nesti grandísimu monte que ye l'Espigüete.

Mil semeyes dempués y dalgo de picotéu y entamamos a pensar en baxar. Somos un grupu numberosu y yo tenía pensáu facer l'arista norte en baxada, pero con tanta xente y ensin llegar tol mundiu a tope precisamente, toca descartalu de secute.

Entamamos el descensu pela caliza canal norte

La otra opción ye la canal norte, que conlleva garrar una llerona del tipu de Picos y descender per dalgún ñeveru qu'otru, sinon queremos desfacer l'arista Este de nuevu o baxar per una cansina panda sur hacia Cardaño d'Abajo.

El día, paez qu'atrévese a abrir del tou y la opción más divertida ye la canal norte, asina que tirámonos abaxo, Fernan y yo, siguiendo un claru senderu hasta qu'aportamos al primer neveru, tocándome facer camín a mi y quedándose Fernan a echar un gabitu a la xente y avisando de nun tirar piedres qu'aquello ye una auténtica bolera.

Pali pali la canal ábrese dando un espectáculu mui de los nuesos Picos

Llueu del primer ñeveru, al qu'aportamos per una ribaya pelín abegosa, vamos saliendo a un segundu ñeveru que perpasaremos ensin problemes en diagonal y metémonos na llerona, col típicu regatu de piedra fina, pel que baxamos corriendo como chiflaos.

Pa l'alcordanza quedará Andrea, baxando corriendo y dando palmes d'ilusión, ya que nun baxara esnalando per un pedreru enxamás, jaja. Eso sí, "las bambas" de trekking pasaron a meyor vida... ye lo que tien esti tarrén calizu, que tanto fízome alcordame de mis queridos Picos y que va siendo hora de volver a percorrer con ganes.

Finalizamos con una visitina al tabayón del Mazobre

Como ye normal, aportaremos un colláin central onde reunímonos y siguiremos más sele, per senderu de piedra más grande, dando la vuelta ca pocu col envís d'echar un vistazu a la perguapa baxada que tábemos faciendo y que na so parte final tórnase más vexetal, dando vista al tabayón del Mazobre, el cual nun puede quedar ensin visitar.

Magar de les semeyes nel Mazobre, garraremos la pista que tien de depositanos nun cómodu caminar al llau del rigu homónimu, hasta l'aparcaderu pente los pueblos de Cardaño, dende'l que partiéramos 6 hores y 40 minutos atrás.

En resume, ascensión imprescindible de les que presten pola vida, cenciella y d'una llargura mui afayaiza, na que tendremos que superar un desnivel acumuláu positivu de 1140 m y namái que percorrer un total de 8,8 km... eso sí, tolos kilómetros d'esfrute montañeru total.

Camudando'l Camín en tierres palentines

Quiero facer alcordanza d'un montañeru palentinu, Sergio Arenas,  que morrió dellos díes dempués d'esta ruta y que nun conocí personalmente, pero que sé qu'amaba'l monte y el picu Espigüete sobromanera... Que tu monte t'acueya pa siempre.