Llombera (Gordón)

29 de Xunetu de 2018

Finalizamos el finde d'escalada llionesa, tornando a una escuela que fai dos años, prestáranos enforma. Nun sabía de l'apertura d'otros dos seutores que dan vuelta a la peña, pudiendo tener varies orientaciones pa esfrutar d'una escalada a la solombra nos meses de branu.

Ensin madrugar demasiáu, más bien na, meyor dicho. Desperezámonos en Geras y magar del almuerzu, siguimos viaxe hacia la Pola Gordón, lléndonos hasta Llombera, onde aparcaremos y garraremos agua pa xubir hasta'l paré cimeru. 

Ana probando un sestu mui guapín

Tuviemos la suerte d'alcontranos con xente conocedor de la escuela y pudieron pasame una reseña de les nueves víes abiertes nos seutores a la solombra. Hasta ellí nos fuimos, intentando aprovechar lo máximu posible enantes de qu'entrase'l sol a facer protagonismu.


Un par de sextinos llargucos ye pa lo que nos dió tiempu, comprobando como les víes son buenes, pero la roca ye dalgo feble y queda muncho por sanear y romper. Si a esto sumamos, un cartelu de prohibición por añeramientu que nun diz de cuando a cuando ye la prohibición, pues acoyonamos un pelín y decidimos colar.

Tastiando la roca d'esti nuevu seutor

Pa cuando pasamos de nuevu pel seutor cimeru, decidimos baxar hasta'l pueblu de Llombera a tomar el vermú porque nun se paraba de calor. Nun digo na, de cómo entraben les clares al solete y de la xinta que nos metimos a la solombra de los portones de la furgo.

Hasta una señora siesta, tuvimos tiempu d'echar, ya que yera imposible dafechu, xubir a trepar de nuevu col calor que facía. A última hora de la tarde, cuando baxó'l calor, diónos por xubir un ratín hasta'l seutor pa facer unes cuantes víes.

Pie de vía cómodu pa esguilar cola calma

La verdá ye que dió pa muncho, anque fuesen namás que dos hores escases, ficimos unes 6 o 7 víes de plaquina cenciella. Lo máximu que treparíemos sedría un 6a probáblemente, pero prestó pola vida y quitamos un pelín esi picor, ya que la mañana quedara pelín curtia.


Jose fue más allá aún y se ventiló toles plaquines del seutor, ya que Pepa taba zángana y nun-y apetecía trepar. La verdá ye qu'esta escuelina ye bien guapa y camiento que paga la pena facer más visites y ponese en serio a trepar gradinos más duros.

Momentu siesteru con Kíla

Llombera

Croquis modificaos de Llombera por mor de Infoescalada. Gracies y col so permisu.

---------------------------------------------------------

3 de Xunetu de 2016

Completamos el segundu finde d'acampaes trepadores na escuela d'escalada de Llombera nel conceyu de Gordón. Magar d'una nueche de rises na capital La Pola, espertámonos nel xeláu camping del pueblu y toca esperazase ya intentar amatagar los cambeos de temperatura d'esti pueblu.

Averamientu cómodu al pié de vía... anque calurosu ya

De baxar a unos 6 graos na nueche, pasamos a más de 30 pel día y el nuesu pelleyu asturianu sopórtalu como meyor puede. Aún así, con una resaca de puta madre de dalgún del grupu, almorzamos lo qu'entra pal cuerpu y tiramos esta vegada pal pueblu de Llombera, que caltien una bona páxina con parte del so repertoriu del nuesu idioma asturillionés. 

Haritz y Zori progresando peles plaques tumbaes

Aportamos al pueblu que taba tamién de resaca... de resaca de fiestes patronales y colamos d'ellí nun vaya ser que xunámonos al vermú, el rosariu o lo que seya con tal de siguir de comedia. Tornamos col coche del pueblu p'atrás, hasta topar les indicaciones de dellos paisanos y entamamos a ascender hacia'l pié de vía con un calor de tres pares de coyones.

Detalles de Richar y Haritz en pasinos

Bufff... resoplamos y metémonos baxo la solombra al igual qu'otros trepamuros qu'hai pelos pies de vía, demientres vamos poniendo los arneses camentando cuanto tiempo vamos ser a aguantar. Metémonos en faena y somos a esfrutar d'unos placones ablucantes con víes en torno al V grau... toes de gran calidá.

Zori y una caparina

Facemos per turnos les víes de la manzorga de la placa principal y salímonos restolando menos sal a les víes de la manzorga, onde hai árboles más altos y cuerre dalgo l'airín pudiendo tase. Ellí, camudamos les víes de placa clásica con bonos metros de llargura per otres un pelín más verticales que ronden el V+, siendo estes muncho más complicaes y a tope de cuerda.

Richar nun V+ cabrón, cabrón... más finu que la hostia

La mañana escuerre ya llega la hora de picar daqué, quedánonos adulces ensin agua p'aguantar un calor xabaz, asína que despedímonos dempués de 6 víes con un últimu pegue a un 6b qu'avanza a la mandrecha d'un furaco na paré.

Enchufando un 6b+ bien prestosu

La vía, aparte de salir a vista y ser mui guapa, sirve p'amatagar les ganes de trepar un pelín más duru y recoyemos los trastos con ganes de tornar al camping y metenos na piscina ensin remediu. Otru finde increyible, en gran compaña, esguilando, echando unes rises y esfrutando de la vida.