jueves, 19 de julio de 2012

Áliva (Llébana) - Lechugales - Siella del Caballu - Ándara -H.itu d'Escarandi (Cabrales)

10 de Xunu de 2012

Track: Áliva (Llébana) - H.itu d'Escarandi (Cabrales)




Caberu día de la Travesera Picos 2011-2012 y el día anterior dexábanos a les clares, qu'esta estaya diba quedar nel aire hasta la mesma mañana na que llevantaríemonos y decidiríemos, ya que tol restu la tarde que pasamos nel chigre y l'hotel d'Áliva, descansando, duchándonos y cenando nun dexara d'orpinar nin un segundu y el ñublu yera fonderu.... había qu'esperar.

Poro, decidimos que lo más importante yera durmir hores, asína qu'a les 9 y cuartu tábemos bien fartucos del buffet llibre y lo pior o meyor yera que la ñebla pingaba pocu y paecía que yeramos acolumbrar dellos claros no más alto'l cielu.


Cabera estaya que parte d'Áliva (1660 ms)

Ye una situación abegosa, ya qu'albidramos que nun va tar fácil por mor de lo moyao de tola nueche y que lo mesmu, esos claros nun van ser tolo consistentes que debieran y les previsiones meteorolóxiques yeren bien males pa güei.


Esi tiempu sigue animándonos pelos puertos

Aún así.... envede facer casu a les pates cansaes d'ayeri, al tiempu y al sentíu... decidimos tirar alantre cola última ruta de la Travesera. Pa ello, baxamos del refuxu-hotel pelos puertos d'Áliva hasta la pista que baxaría a Espinama, pa meténos pel Campumenor y entamar un sele ascensu hasta'l colláu Cámara (1696 ms).


Aportamos al colláu Cámara (1696 ms) col día zarráu

El día sigue permurniu y lo que tendría que ser una maravilla de vistes hacia la canal de los Tornos y los pueblos cántabros del valle, quédase nun gris-ablanquiñáu y nun finu orbayu que sumáu a la moyadura que tien el tarrén va faciéndonos pescanciar lo erráu de la nuesa decisión.


Llarguísimu bordéu y baxada peles travieses de Somah.ía

Pero inda quedaba muncho más y esto ye que p'algamar el nuesu oxetivu... conocer la canal de Lechugales, teníemos per delantre una llarguísima travesía en baxada peles travieses de Somah.ía.

Éstes, que nun día espeyáu, tienen que ser una preciosidá, ya que van baxo los picos de Cámara, el Pozán, el Prau Cortés y el Picu Cortés y penriba de tol valle del ríu Deva y de los sos pueblos cántabros... simplemente son una desesperación d'una hora na que baxaremos pa enriba 300 ms de desnivel hasta l'entamu de la canal a los 1346 ms.


Primeros pasos pela canal de Lechugales

En total llevamos 2 hores y cuartu de camín, cuando encomencipiamos esta canal a la que teníemos bien de ganes y defechu, camiento que nel intre, solo esa ye la razón de que teamos lluchando a la escontra de llargues yerbes que faénmos tar empapaos del too.

Y ye que la primer parte de la canal, sedrá un continuu restolar un senderu afayaizu pente la yerba, hasta qu'aportamos a un pindiu canalizu de roca, que faínos camentar si lo que tamos faciendo tien dalgún xacíu ya, porque la cosa ta poníendose un pocu peligrosa y el día sigue ensín abrir.


Tramu delicáu de roca moyáo y canalizos pindios

Magar de llibrar esti canalizu per dientru y salir dempués pela mandrecha, con dellos trepes llaterales, aportamos a una fastera más sele de la canal y avanzaremos un pelín más tranquilos per pedreros algamando dalguna senda más marcada.

Quedamos pelín ablucaos con dalguno de los ñeveros qu'atopamos, pero nun somos capaces d'albidrar el so tamañu por mor de la ñebla y siguimos alantre, con un avanzar penosu nel que dacuando facemos dalgún descansu magar de superar dalgún pasu duru o complicáu.


Penmediu la ñebla travesamos una fastera más amplia con ñeveros

Esto sedrá a lo llargo d'una 1 h y40 minutos, hasta qu'a la fín, el día dános un respiru y ábrense unos claros teniendo la posibilidá d'acolumbrar dalgún picu que cierra la canal pela mandrecha, como'l Roque o las Tablas del Pino y Lechugales.

Ensín más, a la cota de 1915 ms y a la una de la tarde, decidimos parar un ratu, tamos teniendo'l meyor momentu del día, en cuanto al tiempu refiérse y tamos con meyor humor, ya que tola canal foi una auténtica llaceria de caleyar, ensín un senderu que siguir afayaizu, ensín vistes, ensín orientación... mal, mui mal agusto vamos.


El día dános un respiru abriéndose dalgún claru nos pedreros

Asína que descansaremos durante quince minutinos, nos que sácome les botes con desidia y apreto los calcetinos que veníen añagaos dafechu, sacando augua como pa enllenar una cantimplora.

Dalgo de xintar, dalgo de beber, dalgo de pies lliberaos al frescu... y otra vegada a poner les botes colos calcetinos y notalos como si fueren dos truches de piscifautoría... na... falamos Fernan y o... nun hai vuelta atrás y tampoco hai fartura fabes que se precie en Sotres... hai qu'acabar y fuera.

Siguimos alantre per pedreres hasta topános con una muria perpasaos los 2000 ms d'altor y llibrámosla per un canalizu con un bloque empotráu. Nun ye un pasu difícil, pero requier tar sollerte a los apoyos, ya que la caliza sigue ensín secase del tou.


Canalizu que nos saca a la parte superior y final de la canal

Apartir d'equí, vamos tar no que se supón parte final de la canal de Lechugales y meterémonos dafechu na parte más desesperante, ya qu'agora los pedreros son de piedra suelto y vamos dando un pasu alantre y dos p'atrás, lo qu'amestáu al cansanciu acumuláu de tres díes y al de güei en concretu, ta siendo perduru.

Llevamos unes 5 hores en total y casi 3 de canal y nun se por qué, quiciás por restolar un camín menos desesperante pente la ñebla, acabámonos pasándonos a la fastera central de la canal, p'avanzar aína al traviés de los ñeveros.


Enguedeyámonos na parte final de la canal

Esto foi un grandísimu erru, ya que metímonos tanto qu'acabamos baxo les parés de la Silla del Caballu Cimeru y ellí, nun alcontramos una salida afayaiza que nun mos diese la sensación d'acabar enriscaos.

Hai que dicir, que nel intre nun tábemos pa esperimentos con gaseosa, asína que buscamos una salida hacia la paré de la Morra, que ye per onde la canal tien salida, per onde va'l senderu y per onde deberíemos tar nós.


Pegámonos de más a la Siella'l Caballu alcontrándonos ensín salida

Finalmente, alcontramos un pasu al traviés d'una especie de morrena central, que separa en dos la canal y faciendo una travesía, non falta de dificultá y pelín aérea, algamos de nuevu la fastera esquierda de la canal.

Foi un auténticu aliviu, garrar de nuevu'l bon camín, porque les fuercies pa baxar munchos metros col envís d'empobinanos correutamente, diba ser la cotapada final al pocu xeitu montañeru que calteníemos nel intre.



Somos a pescanciar un pasu hacia'l h.orcáu de Lechugales

Cola tranquilidá de tar de nuevu nel track, facimos un esfuerzu más pel pedreru final, p'aportar nos 2385 ms del h.orcau de Lechugales magar de les 3 de la tarde, onde dexaremos les mochiles y descansaremos unos minutos.


Aportando al final de la canal nel h.orcáu (2385 ms)

Digo descansar unos minutos, porque vamos intentar facer al menos un cumal y pa ello, vamos empobinanos pela aérea cresta hacia la Silla del Caballu. Ye un crestéu entreteníu, pero que quiciás la fonda ñebla, fai menos atractivu al non ver les cayíes a ambos llaos.

Aún así, la primer parte va cenciello, complicándose dalgo más na so parte final, na que tenemos que llibrar un par de bloques con patiu, enantes de ganar l'ascensión final al cumal cimeru del Silla del Caballu colos sos (2427 ms)


Aérea crestina hacia'l cumal de la Siella del Caballu

Nun ye qu'esfrutásemos enforma d'esti cumal, pero al menos valíanos pa sacanos la semeyina de rigor, anque per dientru supiéramos que tábemos perdiendo nel día de güei unes vistes bien guapes de la Morra Lechugales y del macizu d'Ándara. Y ye qu'esti añu, esti macizu oriental nun mos traxo más que desilusiones, mal tiempu, ñebla y moyadures.

Aún así, ya que taba nel Caballu Cimeru, nun diba colar d'ellí, ensín averame a la otra parte de la siella. Poro, demientres Fernan, decidía tornar hacia'l h.orcáu onde taben les mochiles, yo restolé pente la ñebla hasta qu'alcontré la baxada hacia la Silla del Caballu Bah.eru.


Cumal de la Siella'l Caballu Cimeru (2427 ms)

La verdá ye que baxé simplemente por tachar esti cumal, que malpenes llevanta diez metros sol colláu pente les dos partes de la siella. Asína que namái, poner el gps na parte más alta (2325 ms), colé d'ellí pente la ñebla, casi corriendo pa nun facer esperar de más a Fernan.

A lo tonto, casi una hora más, perdía en facer estos dos cumales ya inda nun paráremos a xintar en condiciones, cosa que tampoco foi así, ya que magar de meté-y dellos mordiscos a un salchichón y dalguna barrina enerxética, tornamos a ponenos a caleyar pa finar d'una vegada la Travesera Picos 2011-2012.


Canal de Lechugales dende'l h.orcáu de Lechugales

Con casi 7 hores de ruta, vamos facer con una sensación de día perdíu tol restu de la baxada, que tenía que llevanos pembaxo los Picos del H.ierru y penriba de los Grah.ales hasta les cercaníes del Casetón d'Ándara... camín conocíu y desplicáu con xeitu ya ilusión na ruta de la Morra Lechugales.

Baxando hacia'l H.itu d'Escarandi mediu muertos y baxo un orbayu finu

Ilusión... yera una pallabra ausente nel tramu final del Casetón d'Ándara pela pista hasta'l H.itu d'Escarandi. Una pista, que nun mes y mediu, tragáramela dafechu en cincu vegaes. Dos intentones a la Morra y agora taba baxándola baxo un orbayu continuu, que yera la guinda final a un pastel que nunca nun debimos intentar coménoslu.

Les coses como son... hai díes que lo meyor ye resignase y siguir un instintu que tendría que llevanos a Sotres, con tranquilidá pela pista de las Vegas de Sotres, pa cellebrar una travesera más con una bona fabada.

A la escontra, metímonos pal cansáu cuerpu una ruta de 9 hores y 13 minutos, percorriendo 19,6 kms y superando 1640 ms de desnivel y 2027 ms de baxada, ensín conocer nada, ensín esfrutar de vistes, moyaos y con ciertu mal humor durante'l 90% de la ruta.

Menos mal... qu'a cachinos fuimos dándonos ánimos y al aportar al h.itu cellebrámoslo como un triunfu al aguante físicu y mental y un triunfu a l'amistá, ya que dos díes de tal dureza na montaña solo pue aguantase con un bon collaciu al to llau.

Fernan.... besarkada bat

Camudando'l Camín dando preste la Travesera 2011-2012

Nesta cabera estaya de la Travesera 2011-2012 ficimos la Silla del Caballu Cimeru(2427 ms) y la Silla del Caballu Bah.eru (2325 ms) pertenecientes al club 111 de PicosVer progresos en: Retos montañeros

miércoles, 18 de julio de 2012

Posada (Valdión) - Chavida - Frieru - Padiorna - San Luis - Áliva (Llébana)

9 de Xunetu de 2012

Track: Posada Valdión (Valdión) - Áliva (Llébana)



Ayeri aportáramos a Posada en compaña de los cántabros (Juan, Tino y Jóse) y de César, pero dempués de despedinos, quedamos Fernan y yo tola tarde pasiando pel guapu pueblu. Ye impresionante ver onde t'allugáu pente los macizos occidental y central, pero tamién ye esmolecedor comprobar como un domingu de Xunetu taba más bien ermu d'ambiente a pesiar de los munchos establecimientos qu'intentan vivir del turismu.

Sacante d'esto, la posada El Asturianu, foi un bon llugar pa cenar y descansar, pal día siguiente almorzar nun chigre d'al llau onde yeren más afayaizos col nuesu interés, que nun yera otru que salir a les 8 de la mañana.


Partimos de Posada (940 ms)

Travesera Picos 2011 - 2012

Del 7 al 10 de Xunetu de 2012 

Track: Travesera Picos 2011 -2012

Tercer travesera integral de Picos del GM Xuan de la Borrina y como siempre siguimos sorprendiéndonos con esti macizu montañosu, ya qu'anque camentábemos que nun diba ser tan dura como les anteriores... al final, foron les kilometraes a la escontra de los desniveles lo que la fizo perdura. 

En comparanza con otros años: 2009-2010 y 2010-2011, esti añu queríemos conocer un pocu meyor la fastera sur de Picos y pa ello, tocaba caleyar per requexos tan guapos y estensos como'l seutor de la Bermeh.a nel Cornión o les Peñes Cifuentes nos Urrieles. Poro, anque nun teníemos na tiesta'l sufrimientu de grandes canales como Dobresengros o Mueñu, al tener los finales d'etapes más altos nel sur, nun fuimos a pescanciar a les clares lo que nos diba costar aportar a ellos, travesando de norte a sur los macizos.

 
Estos fuimos los entamadores de la Travesera 2011-2012
 
Tamién, como novedá esti añu, dibemos facer dos díes nel macizu del Cornión y tan solo unu nos Urrieles, amestando-y a la travesera, la xatada de percorrelu d'oeste a este nel tercer día, coles patuques ya cargaes de dos díes anteriores. Otra novedá importante yera tener que cargar los 4 díes cola mochila hasta enriba, ya que nun teníemos furgo que nos ficiese la xera del avituallamientu. Echamos de menos a Mariano, que facía esi llabor con tan bon humor, pero más que cola perda de pesu... por tener un pocu d'allegría cuando llegamos dafechu esfondaos nes distintes estayes de la travesera. 
 
Dicir qu'a cambeu, tuviemos la suerte de poder aloxanos nel refuxu de Vegabañu, non masificáu y con duchina d'augua caliente y ya nun dicir na comodidá del hostal de Posada o nel hotel d'Áliva... too hai que dicilo, sufrimos pero llueu descansamos, jeje.
 
Fuimos capaces de xuntanos toos estos

Y como siempre... nesto de les traveseres unos van y otros vienen.... Lesiones, trabayos, vacaciones... quítenmos xente per un llau y per otru nos lu devuelven. Esti añu, tornó al sufrimientu Simón y Carlos nun pudo pol trabayu, Pangua tuvo qu'abandonar nel primer día, Tito debutaba con dos díes y Bittor fizo un día menos de lo normal y César tan solo dos.... pero tuviemos les grates visites de Bea y Josean y de los nuesos collacios cántabros, Juan, Tino y Jóse. 

Al final... quedamos Fernan y yo... qu'echándo-y arguyu y quiciás poca reflexión al asuntu... fuimos a finala nun cuartu día, nel que'l tiempu nun quiso danos un pelín d'aliendu y fizo más penosu'l nuesu andar pel macizu d'Ándara... eso sí... tanto tiempu solos... fízonos tener más que planificada la próxima travesera, jeje.

 
Y acabamos frayaos los de siempre... gracies Fernan
 

Ensín más... dar les gracies a los participantes: Tito, Bittor, Simón, César, Pangua, Bea, Josean, Juan, Tino, Jóse y la norabona a nós... Fernan y Berto, qu'enriba de planificala tenemos el puxu de completala. 

Besarkada bat collaciu A lo caberu, dicir que l'añu que vien... vamos intentar que seya un pelín más humana la travesera y que nun mos dexéis solos nestes aventures tan ceo como esti añu.

Un añu más, vamos dexar unos datos a modo resumen y les correspondientes entraes del blog:  

Estaya 1: 

Pandecarme (Cangues d'Onís) - La Torrezuela - Vegagüerta - Perru - Vegabañu (Sayambre - Llión)  

Duración: 9 h y 20 min 

Llonxitú: 21 km 

Ascensu: 1700 m

Descensu: 1480 m

Estaya 2: 

Vegabañu (Sayambre - Llión) - Perru - Bermeh.a - Bufón - Posada (Valdión - Llión)  

Duración: 8 h y 45 min

Llonxitú: 14,5 km

Ascensu: 1260 m  

Descensu: 1665 m

Estaya 3:

Posada (Valdión - Llión) - Chavida - Frieru - Padiorna - San Luis - Áliva (Lliébana - Cantabria)  

Duración: 11 h y 5 min 

Llonxitú: 20 km 

Ascensu: 2250 m 

Descensu: 1530 m 

Estaya 4: 

Áliva (Lliébana - Cantabria) - Cámara - Lechugales - Siella del Caballu - Ándara - H.itu d'Escarandi(Cabrales) 

Duración: 9 h y 15 min

 Llonxitú: 19,5 km 

Ascensu: 1640 m 

Descensu: 2030 m 

Totales 

Duración: 38 h y 25 min  

Llonxitú: 74 km 

Ascensu: 6850 m 

Descensu: 6705 m 

Más nada, la prósima l'añu que vien.... eso de xuru.