lunes, 8 de febrero de 2010

Orllé (Casu) - Picu'l Mayáu

7 de Febreru de 2010

Track: Orllé (Casu) - Picu'l Mayáu



Nuevu día de ruta montañera dempués de dos selmanes ermes de viciu, poro había bien de ganes de caleyar y aún más de probar como andaba la patuca dempués d'un lesión más. Pa ello, teníemos pensáu averanos al pueblu casín de Orllé, cerquino de la capital de conceyu d'El Campu.

Salimos de Xixón, sobre les 8 y media de la mañana y garramos la autovía minera, pa tomar en Llangréu, el corredor del Nalón, pasando polos conceyos de Llangréu, Samartín del Rei Aurelio y Llaviana, metíendonos a la postreru nel Parque de Redes a traviés del conceyu de Sobrescobiu, pasando'l banzáu y pueblu de Rusecu y el pueblu y banzáu de Tañes hasta llegar al fin a El Campu, onde tomamos un cafetín tranquilamente col nuevu miembru del GM Xuan de la Borrina, Diego Pangua.


Semeya de grupu n'Orllé (649 ms)

Dempués del café, salimos hacia Orllé, onde aparamos los coches delantre'l cementeriu'l pueblu, onde hai un sitín bien guapu, pa poder mudanos de ropa, y entamar la ruta pente les cais del pueblu, siguiendo'l track, pa nun acabar xubiendo per un regatu, como nos pasó a nosotros.

Magar que tamos nel barriu de Cimalavilla, sal una pista formigonada, que nos llevará siempre al empar del ríu Quixáes y garrando altor fácilmente, hasta'l colláu de la Calavera, onde fadremos un par de curves que nos empobinarán al nuesu primer descansu, Cañandi.



Na pista en direición a Cañandi

Cañandi (1150 ms) ye un guapu mayáu con cabañes, que nesta dómina del añu taba con un nivel de ñeve perimportante lo cual fízonos complicar el nuesu oxetivu cimeru, Peña Crespa. Y ye que, a eso veníemos esti día. La ruta marcada yera Orllé - Peña Crespa o los Tornos, pero sigún fuimos avanzando pela ñeve, facíase más cuesto abrir buelga y pa rematalu, ya llegué yo, que caberamente, nun liaba nenguna, porque siguía más el gps que la mio intuición, jeje.


Semeyes na ñeve de Cañandi

El casu ye que, de Cañandi, salimos con fuercies, y xubimos aína, viendo pocu dempués qu'al tar a un altor curioso (1350 ms), paecía que nos pudiera quedar bien pocu pa llegar a Peña Crespa, polo que confundimos lo que víamos dende Cañandi (ver semeya d'abaxo) con Peña Crespa y non yera así, ya que lo que víamos yera una crestería que llegaba al Picu'l Mayáu.


En direición al Picu'l Mayáu al fondu

Asína que, pensando que teníemos el final de la ruta cerca, decidí facer tola crestería porque podía tar bien y dellos collacios siguiéronme. Disculpes dende equí, anque ya les diera personalmente. Nun fai falta dicir, qu'una vegada que tábemos arriba dímonos cuenta, de que Peña Crespa, quedaba a tomar pol culu, y que cola cantidá de ñeve, en tornu a un metru en dellos sitios, nun mos diba dar tiempu a da-y preste a la ruta.

Al final, dempués de xubir a la cresta, agüeyar una caída acoyonante a la nuesa mandrecha, pasar dellos pasos complicaos y pensar mil vegaes n'onde coño metí a la xente, decidimos baxar enantes d'esguilar al picu más importante de la cresta. Nun foi una decisión a lo xole, ya que camentamos que podría esperar detrás del picu, si tendríemos una caída jodía de destrepar o non, y encima la pila ñeve qu'había poniéndolo too más difícil.


Entamando la liada pol crestéu

Sinceramente, pensando dempués fríamente les coses, ficimos bien en baxar, porque ensín saber lo qu'había tras el picu, y viendo lo feu que se nos ponía l'asuntu poquín a pocu, foi lo más sensatu. Asína que, darréu de la baxada (nada fácil), arrodiamos tola cresta, y xubimos pel colláu ente'l cresteríu y lo que finalmente foi'l fin de la ruta, el Picu'l Mayáu de 1475 ms, onde nos esperaben dende un bon ratu, los que decidieron siguir el track, jeje, y bien que ficieron.


Na cume del Picu'l Mayáu (1475 ms)

Dempués de varios cagamentos, que tornáronse en rises más tarde, pudimos xintar tranquilamente na cume, esfrutando d'unes vistes ablucantes del parque de Redes, y de toa Asturies en xeneral nevada. Así que finalmente, esti piquín foi un descubrimientu por tar nuna posición privilexiada, dándonos visión d'esquierda a drecha mirando al norte, de picos como'l Vizcares, Maoñu, Peña Crespa, Peña Taranes, Peña Carasca y más al fondu los picos más altos de Redes (les Rapaines, Peña'l Vientu, Torres, etc...)



Lo meyor de la ruta: les vistes


Quiciás, acolumbrar semeyante paisaxe, calma los ánimos, sobretoo los míos, ya que díme cuenta que yera'l más enfadáu de toos, pola cagada que cometiera un ratu enantes, de la cual espero deprender pa les siguientes rutes. D'equí solo nos quedaba baxar pol sitiu correutu (track marcáu) y pasalo de puta madre cola cantidá de ñeve caída.


Na baxada esfrutando de la ñeve

Prestaríame que quedáse esta entrada pa dar exemplu de que munches vegaes, alcuéntranse picos y rutes alternatives a les que quies facer y nun pues por dellos motivos: erros nel camín, malos preparativos de la ruta, sobraes by Berto, etc...

Así que paezme adecuáu recomendar esta rutina corta de 10 km en total, pero con un desnivel acumuláu de 900 ms, que faciéndose con bona cantidá de ñeve (mui recomendable pa raquetes), pues ser mui prestosa na dómina ivernal del añu.

Nota: Agradecer dende equí a los collacios blogueros n'asturianu y los sos votos que me ficieron quedar novenu nel concursu a meyor blogue del añu. Too un arguyu pa min, que dalguien me llea y más aún que-y preste facelo.