Tarna (Casu) - La Bolera - La Salguerosa - Ventaniella (Ponga) - Valle Ambenes - Valloseru - Paréu

27 de Marzu de 2022

Track: Tarna (Casu) - La Bolera - La Salguerosa - Ventaniella - Valle Ambenes - Valloseru - Paréu

Cuando lleves dellos años faciendo monte per Asturies, munchos de los cumales cimeros, sobromanera de fasteres tan guapes y montunes como Casu o Ponga, tiéneslos toos nel llibretu de tachaos, poro prepares rutes cola idega de conocer requexos puntuales.

Na Travesera Casu-Pongueta d'esti últimu añu, Alberto y yo, conociéramos el cordal de Valloseru, descendiendo a la fastera casina, quedándonos con ganes de conocer la fastera pongueta y d'esti xeitu, preparaba una ruta circular, col envís únicu de descubrir dellos llugares.

Partimos del pueblu de Tarna (995 m)

Pelín antes de les 10 de la mañana, xustu'l día del camudu d'hora, tamos aparcaos y preparaos en Tarna, pa salir a caleyar. Fadrémoslo, siguiendo'l GR que tiraría pal Puertu Tarna, pa nun crucie indicáu con cartelu, salir a la manzorga hacia la carretera, la cual cruciaremos en Les Roces, onde garramos un camín, que métenos de plenu pel Pandu La Texera, nel ablucante y estensu monte Forcos.

El Campu (Casu) - El Pandu - El Piqueru

3 d'Ochobre de 2021

Track: El Campu (Casu) - El Pandu - El Piqueru

Magar d'un día perbono, con tolos collacios del GM Xuan de la Borrina, xubiendo al Cullargayos, xintando, pasando la tarde per Soto y cenando mui rico de vuelta nel Albergue Cantu L'Osu, despertamos na furgo dempués d'una nueche lluviosa.

Demientres almorzamos y aldericamos si arriesgar a facer daqué nesti domingu de ñubes y claros, veo que'l grupu nun ta pa munches hestories. Pente café y café, nun tengo mui claro si tirar pa Morcín a esguilar o salir a dar un patéu rápidu con Kila, decidiéndome polo último, aprovechando que toi en Reres.

Partimos d'El Campu (545 m), capital del conceyu casín

Nun sé mui bien, como ta d'animada Kíla y el día sigue amenazante, asina que déxola dar una vueltina pel aparcaderu de Soto y dempués d'un ratín, decidimos salir hacia El Campu, capital de Casu, onde tengo pendiente un monte cimeru d'Asturies dende cuantayá: el Monte Piqueru.

Abiegos (Ponga) - Brañadosu - Mayá Tiatordos - El Xuacu - Bezanes (Casu)

13 de Xunetu de 2021

Track: Tarna (Casu) - Vega Baxu - Altu Ponga - Solafoz - Abiegos (Ponga)

Ún día más, continuamos na Travesera Casina-Pongueta de 2020-2021 quedando namái qu'Alberto y yo, pa terminar estos cuatru díes de patéu, dando final de nuevu en Bezanes. Magar del día anterior, nel que tuvimos qu'abortar pola meteo planes d'ascensión a la peñe Maciédome, quedándonos col maraviyosu descubrimientu de la fastera del valle Corralín y Solafoz.

Llevamos tres díes sofriendo l'abondosa vexetación astur, d'esti branu primaveral de lluvies y sol, poro tenemos claru, que nun podemos facer lo que teníemos en mente, sobretou, dempués del día anterior cola moyadura que pillamos.

Partimos d'Abiegos (516 m) con un día pelín murniu

D'esti xeitu, pelín cansaos de padecer nesta travesera, miramos mapa y decidimos dar la vuelta al Picu Tiatordos y continuar hacia Bezanes (Casu), ascendiendo cualesquier otru monte como la Becerrera, la Llambria o el Picu Cornielles.

 

Pa ello, salimos d'Abiegos en direición Tanda col envís d'empobinanos hacia Taranes y xubir pela foz de la Escalada, pero topámonos con unos cartelos qu'indiquen Tiatordos y por conocer per onde nos manda, los siguimos viendo pocu a pocu como van llevándonos hacia Llames.

Tarna (Casu) - Vega Baxu - Altu Ponga - Solafoz - Abiegos (Ponga)

12 de Xunetu de 2021

Track: Tarna (Casu) - Vega Baxu - Altu Ponga - Solafoz - Abiegos (Ponga)

L'homé propón y el monte o la meteo dispón. Nesti casu, esti paisanu, prepara unes travesíes y unos "tracks" con detallín, con posibles ascensiones, con planes A, B, C... y a la fín, la meteo y el monte, dicen que tiés que facer esto o aquello y nun hai más... toca tirar d'esperiencia y ver cual ye la meyor opción pa salir del enguedeyu.

Tamos na tercer estaya de la Travesera 2020 - 2021, coles patuques ya en forma y el banduyu enllenu del almuerzu, poro entamamos a caleyar peles cais de Tarna en Casu, non ensin antes despedinos y agradecer el bon tratu del Bar Nalón, dándonos abellugu y xinta pa facer estes travesíes.

Preparaos un día más en Tarna (1057 m)

 

Saldremos del pueblu y a la manzorga garraremos un camín qu'al pocu dixébrase, garrando la más direuta a la mandrecha, hasta dar con una pista nel Grayal. Equí, siguiremos comodu y guapu camín per GR, esfrutando de les vistes hacia la Peña Montobiu a la nuesa mandrecha y baxo los parés de la Xerra Tables.

Brañagallones (Casu) - Cantu L'Osu - Tarna (Casu)

11 de Xunetu de 2021

Track: Brañagallones (Casu) - Cantu L'Osu - Tarna (Casu)

Segundu día de Travesera, alboreciendo con un día d'espatarrar y nel puru coral del parque de Reres. Almorzamos con calma, nel refuxu de Brañagallones, onde pasamos una tarde/nueche estupenda y vamos preparando les mochiles y organizando les despedíes de la xente, ya que dalgunos del grupu ya nun continuarán de travesía.

Benjamín y Natalia, pesie a dir sobraos físicamente, deciden baxar pela pista a Bezanes de nuevu y Carla ya Isa, van intentar ascender a la Peña'l Vientu, ya que'l nuesu destín, el Cantu L'Osu ya lu ficieron nun va munchu tiempu, tamién dende'l refuxu.

Partimos con un día brutal de Brañagallones (1245 m)

 

El restu (Alberto, María, Mario, Carlos, Simón y yo) vamos entamar a calecer pates saliendo del refuxu, non sin antes agradecé-yos el tratu, teniendo mui presente reservar pal Aniversariu del GM Xuan de la Borrina, nos próximos meses.

Bezanes (Casu) - Monasteriu - Brañagallones (Casu)

10 de Xunetu de 2021

Track: Bezanes (Casu) - Monasteriu - Brañagallones (Casu)

Travesera, esa pallabra que resuena nes cabeces de los corredores pel monte y tamién nes de los miembros del GM Xuan de la Borrina, por mor, de les milenta aventures y grandes xataes que nos pegamos durante 4 díes per Picos d'Europa o pero onde decidamos esi añu.

Esta vegada, dempués de facer la ruta pela contorna de la Xerra de Brañapiñueli, gustárame tanto'l trazáu del rigu Monasteriu, que paecióme interesante repetir la ruta, terminando a dormir en Brañagallones, ya que nunca lo ficiéramos como grupu enantes.

Partimos de Bezanes (634 m) nun día ablucante

D'esti xeitu, saldríemos pelin enantes de les 10 de la mañana del aparcaderu de Bezanes, magar de facer dalgún tresvase de coches qu'otru pa posibles escapatories. El nuesu caleyar, llevarános per Sobrecastiellu, penriba la carretera, teniendo incluso que caminar dellos metros per ella, pa garrar otru camín que ya sí empobínanos pela Llana Pandu hasta la Corona, onde empatamos cola pista davezu que vien dende Belerda.

Travesera Picos 2020 - 2021

10, 11, 12 y 13 Xunetu de 2021

Track: Travesera 2020 - 2021

Ya vamos más de diez años de Traveseres per Picos d'Europa (Asturies, Llión, Cantabria), Montaña Palentina... y esti añu quisimos facer un patéu de 4 díes pelos parques naturales de Redes/Reres (Casu) y Ponga. En plena pandemia, nun mos prestaba muncho dir a los refuxos de Picos, por mor de la masificación y decidimos investigar, facer loxística y preparar un percorríu novedosu.

Entamaba la Travesera 2020 - 2021 dende Bezanes

Belerda (Casu) - Monasteriu - Campiza - La Roza - Canalina - La Cabritera - Vallines

25 d'Abril de 2021

Track: Belerda (Casu) - Monasteriu - Campiza - La Roza - Canalina - La Cabritera - Vallines

Ruta que sacamos del bolsiellu de les pendientes, ya que tenía bien de ganes de conocer esta fastera del monte de Reres, dende cuantayá. Quiciábes, dende que tuviéremos faciendo una guapa ivernal al Visu La Grande ya viéramos a la baxada esos paredones de la xerra de Brañapiñueli, quedándonos pelin ablucaos polo vertical del xerrón pela so fastera norte.

D'esti xeitu, arrimámonos hasta Casu, parando como non, nel balcón de Redes en Rusecu a echar un cafetín, pa continuar hasta'l pueblu de Belerda, onde preparámonos pa entamar a patiar. Tamos cola mosca tres la oreya, por mor de les previsiones tormentoses pa la tarde y pola llargura la ruta.

Partimos de Belerda (655 m)

Salimos pueblu alantre, pa bien ceo, garrar una pista formigonada que nuna envuelta nos fai salir penriba'l pueblu, pa siempre nun pindiu ascensu, pasar peles cabañes del Pozobal primeru y La Corona dempués, hasta aportar a la Gobia, onde aparte de tener les primeres vistes del Cantu L'Osu y la pista que xube a Brañagallones, tenemos el nuesu desvíu hacia'l valle'l Monasteriu.

Tarna (Casu) - Tabayón del Mongallu - Cuetu Negru - Vega Pociellu

 27 de Setiembre de 2020

Track: Tarna (Casu) - Tabayón del Mongallu - Cuetu Negru - Vega Pociellu

Día serondiegu enforma, con frescu mañaneru pero con unes previsiones perbones de sol tol día, poro espérase un "llenu" nel monte astur, ante la nueva moda que tamos sofriendo. Ye lo que traen les pandemies, camudos de vezos na xente y al non poder salir d'Asturies dalgunos meses, la xente descubrió lo que tenía en casa.

 

Nun tengo mui claro entá, si esto ye positivu o non, por un llau que la xente avérese al monte, pue dar de sí un mayor interés nos conceyos y nel país por caltener les siendes llimpies, al menos los PR y GR, pero paezme que sedrán la sociedá la que dicte sentencia y la masificación acabará por crear problemes mediuambientales y pente la xente llocal y los foriatos.

Partimos del pueblu casín de Tarna (985 m)

La Cueva Deboyu (Casu)

28 d'Agostu de 2020

Casi tres añinos que nun tornaba pela Cueva Deboyu, a esguilar ya que sí que pasara per ellí de ruta, un día d'estos de monte de los guapos, con sol, ñeve, fríu, calor, lluvia.... un amiestu perinteresante na ascensión a la Peña'l Casar.

Rúben a la preba de Sieteacabo

El casu ye qu'axuntámonos un vienres d'ERTE Iván, Rubén y yo, equipu chancleta completu, conocíu pel vidiu de Figares pringando los tres nel mesmu pasu. Esta vegada, nun día orbayando que llueu escamplara, fuimos direutos a la fastera de Paré Roja/Area Reservada onde centrámonos en probar Acabete, un 7a+ en dalgunos croquis, anque más bien sedrá 7a y non mui difícil.

Encadenando Acabete otru 7a/+ de Cueva Deboyu

 

La verdá ye que sorprendióme polo guapa de la vía, de tramos de desplome y bon cantu, con dellos reposos, lo cual facía l'encadene mediánamente cenciello. A los fechos, remítome, encadenando los tres al segundu pegue y faciendo na mió cuenta particular el sétimu númberu 100, lo cual nun ye gran cosa pero a mí fízome illusión.

Cueva Deboyu
Croquis disponibles nun panel al llau de la carretera, anque tan mui desactualizaos 

--------------------------------------------------------------------- 

 

Caliao (Casu) - Peña Riegos

31 de Mayu de 2020

Track: Caliao (Casu) - Peña Riegos

Siguimos saliendo n'Asturies del confinamientu y les ganes del GM Xuan de la Borrina de salir al monte yeren inmenses. Por dalgún motivu, tornamos pa Casu de nuevu, por tercer vegada consecutiva, teniendo como oxetivu la Peña Riegos, la cúal tenía pendiente dende va tiempu.

Partimos de Caliao (660 m) con un día murniu

Pendones (Casu) - Palombar - Fusu La Muyer - Pandellanza - Congostín

24 de Mayu de 2020

Track: Pendones (Casu) - Palombar - Fusu La Muyer - Pandellanza - Congostín

Segundu finde dempués del confinamientu, nel qu'enmediu de la fase 0 o 1 o yo que sé, pente ponte bien y tate quietu si tas federáu o non tas federáu, de si nel conceyu tuyu si pero nel d'al llau non. El casu ye que plantámonos en Casu de nuevu y axuntámonos Montse y yo pa facer compaña a Pepa y Jose que queríen da-y un tientu al Fusu La Muyer.

Grupín con ganes de patéu postconfinamientu

Caliao (Casu) - Valle'l Cotu - Peña Rosques - Valle Xulió

16 de Mayu de 2020

Track: Caliao (Casu) - Valle'l Cotu - Peña Rosques - Valle Xulió

Primer finde que con cierta xustificación, los montañeros podíemos tornar al monte fuera del nuesu conceyu, ye dicir, la xustificación yera tar de camping, asina que fuimos pal de Caliao, que nun lo conocíemos y de pasu podíemos tornar al monte, a ver el verde de les viesques, oyer el ruxir del rigu y tomar una botellina sidre colos collacios.

Partimos de Caliao camín de los Arruos

Gobezanes (Casu) - Peña Busllar - Prieres (Casu)

7 de Marzu de 2020

Track: Gobezanes (Casu) - Peña Busllar - Prieres (Casu)

Siguimos col aportar de la primavera, nun añu de poca carga de ñeve nos montes, munchos díes de sol y l'amenaza ya bien presente del coronavirus. Nesti día, teníemos una ventanina de bon tiempu pal sábadu, poro decidimos facer una ruta qu'entrase nel intervalu que manexábemos y como non, tornar pel parque natural de Reres siempre ye perbona opción.

Salida del grupu dende Gobezanes (627 m)

Bezanes (Casu) - Peña Les Príes (La Senda)

27 d'Ochobre de 2019

Track: Bezanes (Casu) - Peña Les Príes

Como ye vezu, tornar a patiar pelos montes del parque natural de Reres, ye un placer y como ye vezu, siempre andamos restolando que viesques, riegues o cumales nun conocemos entá, poro, echo un vistazu a la carpetina de pendientes y anque siempre la tenía presente pa una ivernal, la peña Les Príes o picu La Senda diba tener la so visita.

Partimos dende Bezanes (655 m)

Caliao (Casu) - Los Arrúos - Picu Corteguerón - Les Campes

31 Marzu de 2019

Track: Caliao (Casu) - Los Arruos - Picu Corteguerón - Braña Vieya

De los grandes montes del parque natural de Reres, pocos me quedaben por encumar y a dicir verdá, tan sólo, paezme que'l Picu Corteguerón resistíase a les munches rutes que tenemos feches pelos conceyos de Casu y Sobrescobiu. Pa facelu, averarémonos al pueblu casín de Caliao (680 m), pel camín davezu saliendo de Xixón pela autovía minera y a l'altura de Llangréu, tomaremos el corredor del Nalón que traviesa los conceyos de Llangréu, Samartín del Rei Aurelio y Sobrescobiu.

Magar del cafetín y pinchu tortiella nel chigre de Rusecu, garraremos namái pasar el banzáu de Tañes, la carretera que nos empobinará a Caliao dempués de cruciar los pueblos de Coballes y La Encruceyada. L'aparcaderu de la ermita de San Antonio, sedrá'l nuesu llugar de salida pa empobinanos hacia'l más que míticu desfiladeru de los Arrúos.

Partimos del perguapu pueblu de Caliao (680 m)

El Campu (Casu) - Peña'l Casar

17 de Marzu de 2018

Track: El Campu (Casu) - Peña'l Casar

Siguimos col ivernu, pesie a que la primera ta a piques d'entrar, pero esti añu n'Asturies ta siendo un iviernu de los de verdá. D'amuesa, tamos n'El Campu, na capital del conceyu casín y les previsiones son tan dixebraes unes d'otres que danos lo mesmu y decidimos salir a patiar.

Diba dicir que como siempre, p'aportar a El Campu nun tenemos más que garrar la minera en Xixón hasta'l desvíu del corredor del Nalón, percorrer los conceyos dempués de Llangréu, Samartín del Rei Aurelio y Llaviana pa entrar nel conceyu de Sobrescobiu.

Partimos d'El Campu (565 m)