27 de Marzu de 2022
Track: Tarna (Casu) - La Bolera - La Salguerosa - Ventaniella - Valle Ambenes - Valloseru - Paréu
Cuando lleves dellos años faciendo monte per Asturies, munchos de los cumales cimeros, sobromanera de fasteres tan guapes y montunes como Casu o Ponga, tiéneslos toos nel llibretu de tachaos, poro prepares rutes cola idega de conocer requexos puntuales.
Na Travesera Casu-Pongueta d'esti últimu añu, Alberto y yo, conociéramos el cordal de Valloseru, descendiendo a la fastera casina, quedándonos con ganes de conocer la fastera pongueta y d'esti xeitu, preparaba una ruta circular, col envís únicu de descubrir dellos llugares.
Partimos del pueblu de Tarna (995 m)
Pelín antes de les 10 de la mañana, xustu'l día del camudu d'hora, tamos aparcaos y preparaos en Tarna, pa salir a caleyar. Fadrémoslo, siguiendo'l GR que tiraría pal Puertu Tarna, pa nun crucie indicáu con cartelu, salir a la manzorga hacia la carretera, la cual cruciaremos en Les Roces, onde garramos un camín, que métenos de plenu pel Pandu La Texera, nel ablucante y estensu monte Forcos.
Esfrutamos d'un agradable paséu pel Monte Forcos
Salvo de pasar per carretera y ver el fayéu, enxamás metiérame pel monte Forcos y según vamos caleyando, lo guapu del camín, lo sanu y llimpiu del fayéu, va ganándonos, asemeyándose a los meyores fayeos que pudimos cruciar na nuesa vida, quedándonos con ganes de conocelu en plena primavera o seronda y non nesta dómina post-iverniega con tol monte peláu.
Averámonos pali pali hacia la base de la Peña Montobiu
El casu ye que nun puntu, al pocu de cruciar una preciosa riega, vemos como'l monte baxa hacia una mayor, la de Bibosana, tomando esti puntu, como un bon momentu, pa entamar a ascender hacia la base de la Peña Montobiu a pinchu dafechu, aportando a un antiguu mayáu, que suponemos mui castigáu pelos ádenes, onde toca facer travesía pembaxo de tolos canalones que descienden dende esta guapa Peña Montobiu.
Aportamos a la Bolera, llugar escepcional y únicu llugar con cierta vida d'esta fastera del cordal
Nun yera'l día, pero si qu'entróme ciertu picor pa buscar una canal d'ascensu per eses pindies playes,, pero a cambiu, continuamos travesía cruciando antiguos argayos y dalguna pedrerina hasta travesar n'ascensu per una vallina preciosa hasta salir aun llugar increyiblemente guapu como ye la mayada La Bolera, en tolo alto del cordal homónimu.
Nel intre, les vistes amplíense al mil por mil, pero tenemos un día
borrinosu, nun sé si por culpa de la calima sayariana o por mor de los
incendios activos n'Asturies. El casu ye que vemos como non, a la nuesa
compañera de viaxe, la Peñe Maciédome y como non a les dos grandes peñes (Ten y Pileñes) xustu a la fastera contraria.
Continuamos pente rises hasta la collada Texediellu puntu de separación del grupu
Dexamos atrás, la Bolera y los pocos restos de vida ganadera qu'alcontramos en tola ruta y siguimos hasta la Collada Texediellu, onde despedímonos de Benjamín y Mario Gallego, que nun teníen ganes d'aventures o más bien, nun sabíemos a lo que díbemos enfrentanos a posteriori y decidieron acortar pela Cerru d'Altu Pasu pa siguir hacia Paréu y descender de nuevu a Tarna.
Descendemos pel monte La Salguerosa hacia Ventaniella
El restu, Charly, Mario y yo, que llevábemos preparando tol percal montañeru, tirámonos pel Monte La Salguerosa hacia Ventaniella, alcontrándonos de nuevu, con una viesca perguapa pela que caléyase tan bien, que dexámonos dir y perdemos el track que tendría de llevanos hacia la mayada la Salguerosa, la cual tendremos que dexar pa otra ocasión conocela, ya que dimos al final d'una preciosa riega qu'amestábase al rigu Ponga, xustu al altor d'alcontrar la pista que vien de la Salguerosa.
A bon ritmu, namái que tenemos que dexanos dir a la vera del rigu Ponga, p'alcontranos con ún de los llugares máxicos de Ponga, Ventaniella, llugar de pasu de gran importancia, antaño hacia'l puertu Ventaniella o puertu Tarna y darréu, llugar de pernocta pa dir de monte y sobretou, entamu de rutes hacia la Peñe Ten y Pileñes.
Descendemos la pista de Ventaniella hacia Cotiones onde toca cruciar el rigu Ponga
Garramos un segundín aliendu, aprovechando pa garrar agua na fonte de Ventaniella y entamamos un descensu per pista, demientres albidramos nueves rutes pa conocer dellos llugares y valles qu'entá tenemos per conocer. El nuesu destín agora, sedrá aportar a Cotiones y alcontrar una baxada al rigu Ponga, atopando un senderín pocu dempués del crucie col valle del rigu Cabañón, que baxa del Porrón de Viañu.
Del tramu de ruta siguiente, nun teníemos referencia denguna y al ver
dende la pista como paecía xubir enfrente nueso un senderu, tirámonos
abaxo penmediu del monte, pero nuna curva anterior, nuna baxada a una
cabaña garraríemos un camín al llau del rigu, que llevaríenos hasta'l puntu de crucie del rigu Ponga.
Alcontramos un prestosu camín hacia la Mayada Ambenes
Tamién vemos como más abaxo llega otru camín hasta esti puntu, poro viniendo en direición contraria, sería cenciellu atopar onde cruciar el rigu, eso sí, nesta dómina l'añu, toca descalzase o moyar playeros pa ello. Nun lo pensamos muncho, pesie a lo frío del agua y cruciamos, pa dempués de picar, conocer ún de los valles más guapos pelos que pude caminar na mió vida: Ambenes.
Nun me quedo curtiu, cuando digo que garrar esti camín hacia la mayada Ambenes, del que nun teníemos referencies nin tracks y pintara una xubida a man nel mapa pel valle Ambenes y nel más estrechu a la so manzorga, fue ún de los aciertos más grandes que tuviemos nestos años de monte.
Vamos ablucaos cola belleza del valle Ambenes
El camín va llevanos en xubida constante per delles envueltes al mayáu d'Ambenes, onde malpenes queda una cabaña en pie, pero onde'l tastu ganaderu y les increyibles vistes hacia'l Recuengu, Picu Zorru y Porrón de Viañu, son una auténtica maraviya.
Vamos alloriando, col senderu, col valle, colos paredones qu'acueyen esti valle, zarrándolo a un llau y otru, dexándonos tan solo caleyar cuesta riba, siempre cola imponente aguya que xixila dende'l crestón que baxa de la Colladina'l Valle, asina como dalgún güeyu que mirános dende'l crestón d'enfrente, per onde tendremos qu'alcontrar dalguna salida na parte alta.
El tiempu nun pasa per llugares tan increyibles como Ambenes
El tiempu paez nun pasar, namái acompañános nel nuesu andar, la nuesa respiración y dalgun robezu que crucia'l valle a toda velocidá penriba nuesa. Nun podemos más que dar la vuelta, mirar les vistes y baxar la cabeza y siguir siempre'l claru senderu que va llevándonos al nuesu destín nel Altu la Canal.
La salida final, una vegada más ensin referencies, amuésanos que ta too inventáu nesto del monte, pelos ganaderos como non y nuna envuelta hacia un paré, salimos pegadinos a esti, hasta una forcadina onde devolamos ganando vistes hacia'l valle del Corralín, pero onde descendiéramos a la Vega Baxu unos meses atrás.
Aportamos a una forcadina pa siguir en crestéu hasta la collada Valloseru
Llueu de casi 600 m de desnivel direutu pela canal, tócanos negociar un tramín de crestéu calizu, enantes de salir a la collada Valloseru, puntu casi máxicu nel cordal homónimu, col valle Corralín a la nuesa mandrecha y el de Valloseru a la nuesa manzorga, más estrechu que'l d'Ambenes pero accesible creyemos tamién.
Continuamos cruciando tola viesca hasta Paréu
Con una sensación d'ésitu irrefutable, continuaremos per senderu, travesando tola parte alta del valle Corralín, ye dicir, faldeando'l cordal de Valloseru, envede crestialu pela Cerra d'Altu Pasu, como ya ficiéramos, alcontrando senderu, hasta cruciar la riega Corralín, onde debemos siguir ascendiendo hasta topar el camín que baxa d'Altu Pasu y qu'axúntase cola del colláu Gambiteros pa dexanos na collada Paréu ensin mayores dificultaes.
Descensu percómodu hasta Tarna pasando poles "Paraes"
Escaparemos de Paréu hacia un pocu más abaxo, que ta pelín fríu pa comer el pinchín, parando a la vera la cabaña de la Parada d'Arriba. Col banduyu enllenu, siguiremos per cómoda pista pasando pela Parada d'Abaxo, pa finalmente aportar a Tarna de nuevu pel Grayal.
Les cerveces na terraza del Bar Nalón en Tarna, colos últimos rayinos de sol del día, fue la guinda a una ruta d'aventura y a les ganes de conocer más llugares de Reres y Ponga, con tramos fechos penriba'l mapa, saliéndonos una circular perfeuta de 17 km, +/-1300 m de desnivel nun total de 8 hores de total disfrute montañeru.
Camudando'l camín na amplia redolada de Tarna
No hay comentarios:
Publicar un comentario