Altu Ventaniella (Ponga) - Ten - Pileñes

23 d'Ochobre de 2010

Track: Altu Ventaniella (Ponga) - Ten - Pileñes

Mayu d'esti mes mesmu añu, veíanos dar intentona a esta peña, la cual teníemos en mente, dende rutes como Peña'l Vientu, pero fuimos topar con un día malu, y quiciás, cola cabera gran ñevada de la temporada, poro foi completamente imposible nin siquiera entamar a xubir pela interminable arista de Ten. A cambiu, descubrimos un pueblu perguapu, Sobrefoz, y un sitín pa xintar inmeyorable, Casa Severa.

Esta ruta quedó pa prau, durante unos mesinos, hasta qu'entamamos la nueva temporada, na cual tamos quitando les que nos quedaron del añu anterior, y como non Peña Ten, taba nes nueses mentes. Asína pues madrugón de la hostia, pa salir de Xixón, garrando l'autovía cantábrica, hasta Lloviu, onde tiramos hasta Les Arriondes y d'ehí a Cangues d'Onís.

Ellí, almorzamos, nel únicu sitiu qu'atopamos abiertu, demientres vemos a los Red Bull sobá-y el morru al Ferrari d'Alonso na clasificación, lo cual esmoleznos res, y partimos otru bon trechu de viaxe garrando la N-625 onde pasaremos pelos pueblos de Cañu y Tornín, cruciaremos el puente Dobra, pa entrar nel conceyu d'Amieva, onde travesaremos los pueblos de Buxil, Corigos, Pervís, La Vega Pervís y los Grazos onde topámonos col ríu Ponga.

Equí, tomamos la carretera que sal a la manzorga (AS-261), y nella travesaremos los pueblos de Parcia, La Vega de Sebarga, Les Polvoroses, Santoveña llegando a Sellañu, onde entramos en Ponga. Equí siguimos pela mesma carretera, pasando por Pilanegru, Sotos y La Casona de Mesta, hasta garrar la PO-3, que nos llevará al traviés d'Abiegos y Yanu a la fin a Sobrefoz.

Hai que dicir, que ye ún de los acesos más llargos en coche, que se pue facer n'Asturies práuticamente. Pero nun ye'l final, ya qu'inda tenemos que garrar una pista de tierra al final del pueblu, que nos lleva nun bon ratu hasta l'Altu Ventaniella (1187 ms), onde hai una capilla, un hostal y sitiu pa dexar el coche.

Primera intentona y la definitiva nel Altu Ventaniella (1187 ms)

Paez mentira, pero con salir del coche, y ver el valle onde nos alcontramos, ya ún escaez les penuries del viaxe tan llargu, y pónese les piles p'aniciar una ruta nun de los conceyos más guapos y vírxenes d'Asturies, Ponga. Nesta dómina del añu, sacante'l afán montañeru nuesu, merez la pena visitar les viesques, onde'l xuegu de collores de la seronda, da más valir si cabe, a averáse per estes fasteres.

Primeros pasos hacia'l puertu Ventaniella

Magar de mudanos, Simón, Charly y yo, ponémonos a caleyar col pensamientu del esfuerzu de la vegada anterior, anque bien ceo, dámonos cuenta, que nun diba ser pa tanto, ya qu'ensín danos cuenta, aportamos a la mayada'l Xerru, y d'ellí al puertu Ventaniella (1429 ms), en media horina de camín.

Na Mayada'l Xerru

D'esti pasu d'alta montaña, enmuriáu pente Los Llobiles (Baxeru y Cimeru) y les primeres estribaciones de Pileñes, Pandes de Pileñes, baxamos por el Camín de Ventaniella, al crucie de dos riegues, la del Puertu y la Mayada de la Castellana, los cuales formarán el riu Esla.

Dos vistes bien dixebraes de la Peña Ten

Nós, equí veremos a les clares, que grandísimu peñón tenemos enfrente, y lo pindia y llarga que será la xubida hasta'l cumal. Sin da-y más a la tiesta, garramos paralelamente'l cursu de la riega que vien del pasu ente Pileñes y Ten, y xubimos con él un trechín, hasta que vemos bon sitiu pa travesalu y tomar les primeres rampes de la Peña Ten.

Baxando l'Arroyu de la Mayada Castellana pa entamar a xubir Ten

Demientres vamos ascendiendo, tenemos la suerte del compangu del día, el cúal amósanos dellos retos futuribles, como'l macizu del Mampodre, que tíranos de xemes en cuando de la camiseta, pa que lu miremos. Dicir que ye una xubida llarga y tendía ye quedáse cortu, ye de les más dures que fice mentalmente, ya qu'hai que garrar siempre praos mui pindios en ciszas, y cuando paez que s'acaba vuelves a garrar otru y así "sustantivamente", jeje.

Esi Simón dando-y duru p'arriba y el Mampodre glayando Miráime!!!

El casu ye que, Simón desde que va ser pa, ta a tope, y puso un ritmu endiañáu, al que me xuní de bona gana, y ello fizo que Carlos, poco más y nos mandara a tomar pol culu, pero como ye una persona tranquila y relaxada, garró su ritmu, y fizo l'ascensión al so xeitu, falando con un grupu de montaña de Santurtzi.

Ablucante paré sur de Ten y crestéu hacia'l cumal

Enantes de facer la cresta final, quedámonos a esperalu, y bien pagó la pena, ya que la semeya, del paredón Sur de la Ten, ye impresionante. Como suel pasar nestos casos, namái qu'arribó Carlos al nuesu llau, tábemos con ganes de siguir, ... gran paciencia que tuvo, jeje. Asína pues, siguimos la cresta hasta facer cumal, con bon esfuerzu nes pates, nos 2141 ms de la Peña Ten.

Al fin, preste a la Peña Ten (2141 ms)

Tres hores foron necesaries pa dar preste al puntu más altu de Ponga, pero siendo sinceros nun lo esfrutamos como se merez, porque la cume taba ocupada, por venti persones, y rayámonos un pelín, más aún si ves un paisanu mayor tirar una cáscara plátanu como si nun fuera na. Xente gocho hailo de tolos llaos y de toles edaes. Por favor, nun tirar mierdes de plátanu nin de mandarines nos cumales de los montes, que por mui bio que sea, tarda varios meses en descomponese, y amuesa a les clares, qu'onde pisa l'humanu, enllénase de basoria too. Mierda d'especie.

Vista atrás al glaciar de Ten, y na Vegadona (2079 ms )con Picos detrás

Llueu de sacar la semeya de rigor, siguimos crestéu escapando lo antes posible d'aquel baruyu, y dimos cuenta d'otru dos mil de Ponga, la Vegadona de 2079 ms, en menos de media hora. Equí, ya si picamos dalguna barrina y chocolate, y dispusímonos, dempués de mirar un pocu más pa picos, a dar baxada hasta'l valle qu'hai pente la muria de Ten y el Pileñes, qu'anque ye más pequeñu nun lu fai nada mal tampoco.

Baxando hacia Les Arriondes de la Vegadona

Pa ello, tornamos un pelín so los nuesos pasos, y vamos perdiendo altor, per praos, salvando toles caídes que vamos atopando, hasta qu'alcontramos una canal que paecía afayaiza. Nun ye que nun acertáramos, pero tampoco dimos nel clavu precísamente, ya que con pocu más que siguíesemos pelos praos, baxábamos hasta abaxo ensín peligru. Nel nuesu casu, tampoco queríemos siguir muncho hacia la manzorga, ya que la nuesa intención (al menos la mía), yera xubir pola arista oriental al Pileñes, y así machacar los 3 dos miles de Ponga na mesma ruta.

Pileñes y Ten (perí baxamos???)

Darréu de llibrar delles dificultaes: piedra suelto, malos agarres pa manos y pies, peligru de tiranos piedres,... dimos bona cuenta del final de la baxada, que foi un pedreru inmensu y prestosísimu, nel qu'esquié hasta'l so final, frayando un pelín más les "botes nueves".

Una vista preciosa de Picos pente la Ten y Pileñes

Yeren les dos de la tardi, y faltábanos otru monte mui considerable por facer. Yo digo, que tiro p'alante, que si queréis vemonos nel otru colláu al final de l'arista oeste. Carlos, va madurín ya de la xubida y baxada de Ten, y decide veme ellí, y Simón anímase a venir conmigu, poro entamamos una ascensión en llama, ensín danos cuenta, que vamos facela pela arista más dura. Y así fue, les pates, dieron bona cuenta d'esti cumal tamién, pero nun desmerez a la so hermana mayor, porque los praos pelos que se xube, son igual de pindios.

Simón poniendo pasu hacia'l Pileñes y cumal de Pileñes (2024 ms)

Tamos nel últimu del día, son les 3 de la tarde (5h y 25' de ruta) y tenemos una fame pa morrer, poro... semeyes con cara cansanciu, acolumbramos tolos picos posibles dende riba, y ponémonos a baxar porque tenemos a Charly una hora esperándonos pa xintar.

Vistes dende'l Pileñes

Aportamos al sitiu onde ta tiráu, y dempués de xintar apriesa, siguimos baxada intentando cortar lo más posible hacia'l Altu Ventaniella. Pa ellos baxamos per una canal na Campera Llarga, que fina nos Foyos del Agua, onde fadremos l'últimu ascensu del día, hasta'l colláu Miédome, pasu ente les Pandes de Pileñes y el Polleru. D'equí baxaremos ensín descansar peles camperes de Miédome, pasando pola fonte de Miedomecina, hasta dar con una viesquina de fayes, la cual travesamos hasta dexanos casi na puerte'l coche.

Canalina de baxada del Pileñes y viesca enantes d'aportar a Ventaniella

Al fin tamos, dempués de 7 hores y media, nel coche mudándonos de ropa. Foron 15 kms de ruta, y 1600 ms de desnivel acumuláu, p'algamar estes dos peñes, Ten y Pileñes, que sigún se diz, una ye bona pa les cabres y otra pa les oveyes. Nós fuimos esta vegada más cabres qu'oveyes, y cansaos baxamos hasta Sobrefoz, pa tomar una caña bien merecía, y dempués facer el llargu viaxe hasta Xixón.

Camudando'l Camín dende'l Pileñes

Nesta ruta ficimos los 3 dos miles de Ponga y cotes másimes: Peña Ten (2141 ms), Vegadona (2079 ms) y Pileñes (2024 ms). Peña Ten aparte ye vértice xeodésicu tamién.

Ver progresos en: Retos montañeros