domingo, 8 de octubre de 2017

Cuevas de Mar (Llanes)

Branu del 2017

Un par de díes tornamos a la escuela d'escalada de Cuevas de Mar en Llanes, como non, enantes de que zarren l'accesu a los perrinos y puea bañame con Kilina. Tamos en tiempos de trepar muncho nel roco y na roca, siendo esti branu de xuru'l que más esguilé nes escueles asturianes.

Esguilar muncho sí, sacar semeyes o vidios decentes va ser que non. Así que fadremos un pequeñu repasu escrito de los munchos díes, durante los meses más soleyeros, que pasé esguilando con bonos collacios que fice durante los entrenos nel roco y les tardes de sol, roca y birres.

Cuantayá tuviera per Abril, estrenando estos dies llargucos trepando en Cuevas y centrárame, aparte de montar víes pa los collacios en ver si yera a encadenar Los Templarios (7a), la cual tirábame un pasu atrás, sobretou por mieu a picar suelu.

Por suerte, viniera Javi del roco a trepar con nós, portando un panic que vínomos al pelo, pa poder montar la tercera chapa y poner una cintuca llarga qu'afalagaba'l chapaxe dende un bloqueu invertíu y dende ehí ya tocaba pegarse dos dinámicos curiosinos con vuelu llateral pero con otru xeitu al tar protexíos.

Al final, cayó pal bolsiellu nel primer pegue magar del montaxe y siguimos faciendo víes con tola tranquilidá pero ensin probar namás apretón. El día púnxose un pelín repunante y tocó dexar de trepar por mor d'un vientucu fríu pocu afayaizu pal mes d'Abril.

Un segundu día, namás salir de trabayar, tocó tirar con una collacia a dase'l primer bañín del añu, esguilar un puquiñín faciendo milenta graos tranquilinos y aprovechando que ta entamando nesto de la escalada que se fuera fogueando.

Como casi siempre, cuéstame salir de la zona de confort y cuando pongo'l chip d'esguilar sele y montar víes a otra presona, ya nun soi a meteme a probar na duro... pero vamos... suel ser un clásicu nos mios díes d'escalada.

Pero bono... nun too ye apretar a fueu... hai díes nos que disfrútase de la compañía más que de la propia escalada y esti fué unos d'ellos.

Cuevas de Mar (Seutores visitaos)

Croquis modificaos por mi de la escuela d'escalada de Cuevas de Mar, por mor del blogue Escalada en Llanes, Entretenimiento Vertical  y de Piratas Free. Gracies y col so permisu.


 ------------------------------------------------------------------------- 

jueves, 5 de octubre de 2017

Güeyinos del Diablu (L.lena)

2 de Setiembre de 2017

Track: Güeyinos del Diablu (L.lena)


Web del Trail: Güeyinos del Diablu 2017

Clasificaciones: Clasificaciones 2017  


Casi 6 meses dempués, vuelvo a meteme nuna carrera pel monte y faigolo cola mió primer maratón. Nun camentaba tar nin preparáu, nin entrenáu pa facer una carrera d'esta llonxura, pero taba pagao y tenía ganes de conocer el percorríu, asina que tirámonos a la piscina en doble tirabuzón y que fuera lo que tuviera que ser.

Namás que con dos o tres entrenos llargos de más de venti kilómetros, ya intentar correr tiraes curties pero rápides casi tolos díes, dende Agostu, diba a la maratón. Dicir que dir de monte, como otres vegaes, tampoco fizo d'aida pa tener al menos el vezu a les fuertes ascensiones.

Con too, plantéme na salida con ilusión, anque sin grandes espectatives. Lloñe quedaba esi bon estáu de forma, que caltuve dende les Seronda Trails hasta les primeres carreres curties del añu, sobretou hasta la de Cabeza L'Arcu, onde camiento que manqueme daveres.

Enantes de salir de Tuíza Riba


Llueu, vendríen dos carreres importantes como la Cangues Mountain y Puerta Muniel.los onde corrí dafechu llesionáu. Poro, tábemos equí pa zarrar la temporada trailera como lo ficiéramos l'añu pasáu nel Quebrapates.

Dende bien ceo, axúntome colos collacios del Asgaya Team pa recoyer dorsales y pillar el bus pa Tuíza Riba. Ellos ya vienen con bon entrenu de más maratones y de nun parar de correr en tol añu, lo que dame cierta envidia, pero tranquilidá pa intentar segui-yos el ritmu y que me faigan un pocu de llebre de cara a nun salir como un bestia.

Ponémonos de pareya Illán y yo, tomando la salida con tranquilidá, parando incluso a saludar a Noe y Wifre, como presta tener collacios animando. Aportaremos al Meicín, en pocu más de media hora, con un ritmín que fáiseme hasta llentu, poro decido intentar poner un pocu d'allegría na xubida hacia'l Puertu Cerreos.

Pasando pente l'Alto'l Palo y los puertos de la Val.lota

En tou momentu, va controlándome Illán, frena un pocu que queda muncho, pero aún así vamos ganando posiciones, aportando al puertu sobre'l 30 más menos. Nel intre, vien el tarrén que más mieu me daba, llargues vegues de transición, onde toca correr de verdá pero pa sorpresa la pata va respondiendo más o menos bien.

Aportaremos al Alto'l Palo, con bones sensaciones, xintando daqué y tiraremos pa ún de los tramos guapos del día: El crestéu per Penatolóbriga y la Magrera. Otros años, garrábase la pista de la Val.lota pa descender dempués hacia'l Meruxal, pero esti añu, aumentaron desnivel con esti crestéu pero muncha guapura nel percorríu.

Na baxada, pónse Illán a tirar y siguimos adelantando posiciones, esfrutanto munchísimu del descensu pela Caviyera, un guapu camín empredráu que traviesa una viesca de les d'ensueñu, que nel futuru espero facer conocer al grupu montaña.

A bon ritmu pela Veiga Candioches

Aportaremos a Teyeo, onde tenemos el primer avituallamientu en mou pueblu, con casadielles y demás dulciayaes, qu'aporten enerxía, pero cayéronme dalgo pesaes. Ésto notelo muncho, na pindia ascensión que sal de Teyeo hacia Xomezana y ye qu'anque paezan piquinos de nada nel perfil, esti tramu intermediu del maratón marca y muncho la carrera.

Más menos, los pasos por cada pueblu lleven a travesar d'un valle a otru y toquen pindios ascensos y baxaes rápides y equí na baxada hacia Xomezana, ye onde veo que nun soi a siguir a Illán. Ye'l kilómetro 25 y decidimos separanos, ya que ta faciendo un carrerón y va ensin cadena, poro toca aceptar que vamos bregar en solitariu pa finar la carrera.

La mió cara, nun ye mui bona, llego blanquín a Xomezana, vuelvo a intentar xintar daqué pero nun m'entra res, falo con Sergio, que va controlando al so pa, que tamién corre y digo-y que voi siguir hasta Zurea, que si veo que nun voi, quédome a esperalo nel pueblu y baxo con él.

Xustinos, xustinos arribamos a meta

Siguimos carrera alantre y pongo el mou "evitar calambres" tirando de bastones y lo que me sorprende ye qu'anque veo que voi cargáu de pates, la novedá ye que'l piramidal nun paecía que tuviese faciendo efeutu como nes carreres de Marzu. Voi cargáu de cuadriceps de les baxaes sobretou, pero de xemelos y parte posterior de les pates voi bastante bien.

Finalmente, llego a Zurea con meyores sensaciones y esta vegada sí que soi a xintar daqué: frutos secos, frixuelos riquísimos, chocolate y paez que me vengo un pelín arriba. En Zurea alcánzame Fran y tiro con él tol enllaz hasta'l Val.le Zurea, onde entama la mui temida ascensión hasta Brañavalera, cuando ya llevamos 33 km.

Fran va como un titán y decido baxar ritmu, nun vaya ser que venga'l tío del mazu, anque realmente nun fizo falta, ya que'l calor y lo pindiu del senderu va amatagándome hasta tener que parar polos temidos calambres.

Nun llevo nin la metá de la xubida y voi totalmente fundío físicamente, teniendo que parar a esperar que se me baxen los cuadriceps del pescuezu lo menos. Aún así, voi tirando intentando siguir a la xente que me va garrando, pero cuando algamo ritmu, les pates vuelven a dicir que non, que calambre al cantu y a parar.

Unes birres pa cellebralo na Pola

Enxamás sufriera nuna carrera d'esta manera, pero ye lo que toca, ponemos el mou "aportar a meta como sea" y somos a facer cumal na Pena'l L.lagu pa entamar un penosu descensu hasta Brañavalera onde garramos agua, entrugamos por sales y cola rempuesta negativa, siguimos descensu hacia la Pola L.lena.

Un descensu de 8 km, que bien pensé que nun diba ser nin a correr, pero fui garrando un ritmín trotecochineru que caltúvome más menos nes posiciones que llevaba, hasta arribar a Otero, onde a falta de 3 km nin siquiera paré nel avituallamientu.

Menos mal que la propia baxada per camín, dexábanos na mesma Pola y nun había dengún kilómetru llanu d'asfaltu qu'acaba por machucate. Poro, llueu de caleyear un pocu animáu pola xente, entré na recta final, onde munchísima xente glayaba hasta'l puntu de saltáseme les llárimes y llegar emocionáu enforma.

Fízose durísimu... pero fuimos a sacalu alantre!! Un placer alcontrame con collacios como Noe, Wifre, Gael, Sergio, Kath y Ana que taba más emocionada que yo cuando llegué y que viniera d'animar a los de la ultra en Pena Ruea.

Un abrazu pa toos... al final llegar el 38 na primer maratón ye pa tar arguyosu.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Lastra, Maeve, ...) 

martes, 3 de octubre de 2017

Vixidel (Teberga) - Picu Baxinas

17 de Setiembre de 2017

Track: Vixidel (Teberga) - Picu Baxinas


Entamamos temporada montuna y un añu coincide'l finde cola maratón d'escalada de Quirós, asína que toca restolar nel llibretu de montes pendientes p'alcontrar daqué afayaizu per esta fastera. Esta vegada vínome a la tiesta conocer el valle de Cualmundi dende Vixidel y de pasu xubir al picu Baxinas.

P'aportar al pueblu de Vixidel, como saldríemos de Xixón pela Y griega hasta Uviéu onde tomaríemos l'autovía hacia Grau, desviándonos pal valle'l Trubia, perpasando los conceyos d'Uviéu, Santu Adrianu y Proaza.

Partimos del pueblín de Vixidel (704 m)

viernes, 15 de septiembre de 2017

Travesera Picos 2016 - 2017

Del 8 al 11 de Xunetu de 2017

Track: Travesera Picos 2016 - 2017 


Otru añu más, afrontábemos el final de la temporada 2016-2017 nel GM Xuan de la Borrina y como non, facíemoslo cola nuesa mítica Travesera per Picos. Tengo que dicir, que nun fue'l meyor añu de monte, sobretou na parte final de la temporada y la Travesera diba ser el remate final.

La verdá, ye que cuando les coses déxense un pocu al debalu, pues acaben por pasar coses así. La mió desmotivación nel monte, dexaron los preparativos de la Travesera pa demasiáu tarde y llueu por mor del lleno nun refuxu, tuve que camudar los planes.

Bayurosu grupu nel entamu de la Travesera en Poncebos

jueves, 14 de septiembre de 2017

Vegarredonda (Cangues d'Onís) - Caleyón del Frances - Aliseda - Ariu - Canal de Trea - Cares - Poncebos (Cabrales)

11 de Xunetu de 2017

Track: Vegarredonda (Cangues d'Onís) - Frances - Aliseda - Ariu - Trea - Cares - Poncebos (Cabrales)


Cabera estaya de la Travesera Picos 2016 - 2017 cola que damos puntu final al calendariu de rutes del GM Xuan de la Borrina pa esti añu montañeru. Tamos en Vegarredonda asitiaos dempués de que nun pudiéramos acabar la estaya anterior en Vega d'Ariu como teníemos planeáu.

Ante nós, tenemos una xatada perimportante hasta Poncebos, poro pelín enantes de les 8 la mañana, ya tamos con tou preparáu y col banduyu llenu del almuerzu pa entamar la xornada. Silvia, Haritz y yo, tendremos de travesar bona parte de la fastera norte del Cornión pa embocar hacia la canal de Trea y llueu percorrer la sienda'l Cares hasta Poncebos.

Partimos del refuxu de Vegarredonda (1460 m)

jueves, 31 de agosto de 2017

Caín (Valdión) - Canal de Mesones - H.usantu - Vegarredonda (Cangues d'Onís)

10 de Xunetu de 2017

Track: Caín (Valdión) - Canal de Mesones - H.usantu - Vegarredonda (Cangues d'Onís) 


Tercer estaya de la Travesera del GM Xuan de la Borrina y equí siguimos el grupu reducíu de tres miembros. Magar d'una nueche de birres, vinu, cena... y durmir como bardiones, llevantámonos con munchísimu ánimu.

Aparte, miramos pal cielu, que tirara agua con rabia durante la tarde y vemos ñubes y claros, dándonos munchísima esperanza pa la ruta que queríemos facer. Personalmente, llevántome motiváu a tope, contando con qu'al fin, pueda salir de les travesíes y del patéu, amestándo-y un toque picantín al día con dalguna ascensión curiosina.

Entamu de ruta en Caín (453 m)

viernes, 25 de agosto de 2017

H.ou Los Cabrones (Cabrales) - H.orcada d'Arenizas - Canal de Dobresengros - Caín (Valdión)

9 de Xunetu de 2017

Track: H.ou Los Cabrones (Cabrales) - H.orcada d'Arenizas - Dobresengros - Caín (Valdión)


Son les 8 y media cuando tamos preparaos pa siguir cola Travesera y tamos preparaos pa continuar namáis que tres miembros: Silvia, Haritz y yo. Durante la nueche, Alberto tamién decide que nun puede siguir por mor de dolores nuna rodiella.

Con esti plan, alcontrámonos con que tenemos tres díes de travesía en grupu pequeñu. Nun soi a alcordame que pasare na asemeyao nos años que llevamos de traveseres, pero bono esto ye lo qu'hai y tenemos bon tiempu hasta la tarde, poro debemos aprovechalo.

Partimos del H.ou Los Cabrones (2039 m)

martes, 22 de agosto de 2017

Poncebos (Cabrales) - Canal de Sabugu - Amuesa - H.ou Los Cabrones (Cabrales)

8 de Xunetu de 2017

Track: Poncebos (Cabrales) - Canal de Sabugu - Amuesa - H.ou Los Cabrones (Cabrales)


Tamos en Poncebos, preparaos, ilusionaos, cargaos coles mochiles y con muches ganes de pasar cuatru díes pelos Picos. Los planes A... preparaos, los planes B... nel bolsiellu por si les mosques y los planes C... na tiesta dempués de dellos años patiando, lo cual va dándonos una migayina d'esperiencia.

A lo que vamos, magar d'un madrugón curiosu y de dellos enguedeyos a la hora de quedar, arrcamos cola furgo hacia Cabrales, pel camín clásicu de l'Autovia'l Cantábricu, Posada, Altu H.ortigueru y Arenas nel conceyu Cabrales, onde como ya dixi na entrada resumen... almorzamos toos xuntos.

Partimos de Poncebos (251 m)

viernes, 4 de agosto de 2017

Colláu Angón (Amieva) - Cantu Cabroneru

11 de Xunu de 2017

Track: Colláu Angón (Amieva) - Cantu Cabroneru


Seguimos con niveles de suerte ablucantes pal final de temporada del GM Xuan de la Borrina. Nesti casu, les nueses intenciones diben por conocer el nomáu traveséu de Peña Beza más l'ascensión al Cantu Cabroneru, pero como ya nos pasara na Travesera del añu pasáu, tuviemos qu'abortar la xera por mor del borrín.

Aún así, axuntáramonos un bon garrapiellu xente del grupu y con bon ánimu, entamamos a caleyar dende'l colláu Angón, onde ya tuviéramos va unos añinos p'ascender la guapa Porra Valdepinu. N'aquella ocasión tamien percorriéramos la trillada sienda del Arcedianu que si nun la conoces y ties bon día, ye agradable de patiar.

Cartelu del conceyu d'Amieva n'Angón (823 m)

P'aportar al aparcaderu d'Angón tenemos qu'aportar a Cangues d'Onís pel camín davezu dende Xixón y siguir pela N-625, pasando pelos pueblos de Cañu y Tornín, cruciando la ponte Dobra, pa entrar nel conceyu d'Amieva. Nesti conceyu travesaremos los pueblos de Miyares, Corigos, Pervís, La Vega Pervís onde topámonos col ríu Ponga nesti casu, y siguimos camín pasando per Santiyán, Precendi, Les Vegues, Campurriondi y Ceneya d'au saldrá a la manzorga la carreterina que xube hasta Amieva.

Al entamu del pueblu, sal una pista a la mandrecha, qu'empobinarános durante un llargu tramu hasta'l colláu Angón a 823 ms d'altor. Ellí como ya dixe, saldrá la sienda l'Arcedianu qu'aporta hasta Oseya de Sayambre.

Averándonos pel Arcedianu a Saubu

miércoles, 26 de julio de 2017

Tuíza Riba (L.lena) - Práu L'Albu

4 de Xunu de 2017

Track: Tuíza Riba (L.lena) - Práu L'Albu


Hai díes, nos que paga la pena quedase en casa o camudar los planes que ties d'entamu. Pero a los que nos presta dir de monte, nun sabemos de malos díes, nun sabemos de negatividá y siempre tenemos na tiesta la idega de xubir y a ver que pasa.

Que pasó esta vegada? Pues que ficimos tola ruta penmediu d'una borrina fonda y anque fizo dellos amagos de querer abrir pelos altos, nun fuimos a ver el sol en tol día y namái que lu sentimos calecer el pelleyu en contaes ocasiones.



Partimos dende'l refuxu del Meicín (1210 m)

miércoles, 19 de julio de 2017

San Andrés (Uviéu) - Guanga - Plantón - Grandamiana - Villanueva

20 de Mayu de 2017

Track: San Andrés (Uviéu) - Guanga - Plantón - Grandamiana - Villanueva


Paez ser que ta moda la ruta los tabayones de Guanga, lo cual ye mui d'agradecer ya que paezme una ruta cenciella y mui divertía de facer. Dígolo, porque la casa conceyu d'Uviéu a petición de Somos, quier facer d'esta ruta un atrautivu turísticu.

Personalmente, siguiendo coles entraes de los collacios Cienfuegos, Los de las Claras... faigo mi particular visión d'esti sistema de saltos d'agua, que puen facer les delicies de los senderistes nun día de calor pesáu como'l que tuvimos nós.

Preparaos na ponte sol ríu Trubia (X m)

martes, 27 de junio de 2017

Pendones (Casu) - Maciédome - Pandellanza - Tiatordos

7 de Mayu de 2017

Track: Pendones (Casu) - Maciédome - Pandellanza - Tiatordos


Tamos en mayu, díes llargos y rutes llargues suel ser el denominador común nel GM Xuan de la Borrina. Plantegábanos Benjamín una de les sos rutes d'esti añu, xuntando la Peñe Maciédome y el Tiatordos pela preciosa viesca de Pandellanza y como nun podía ser d'otra manera tocaba facelo realidá.

Otra cosa ye cuantos del grupu taben dimpuestos a facer una xatada tala. La verdá ye que nun creo que fuera pola ruta en sí, pero xuntámonos más bien pocos pa intentalo y Zori ya tenía claro que diba ser muncho pa ella y d'otra miente, Jenni que ta entamando a venir de monte nin siquiera diba plantegáselo.

Entamamos en Pendones (765 m)

martes, 20 de junio de 2017

Iondokorta (Bizkaia) - Lekanda

23 d'Abril de 2017

Track: Iondokorta (Bizkaia) - Lekanda


Segunda ruta de la Xuntanza 2016-2017, na que daremos un paseín mañaneru con ascensión al picu Lekanda. Pa ello, dempués del almuerzu, preparámonos nes afueres del refuxu del Baskonia y salimos caleyando pista un bon garrapiellu de montañeros.

Posando nel refuxu de Iondokorta (721 m)

viernes, 16 de junio de 2017

Atxarte (Bizkaia) - Alluitz

22 d'Abril de 2017

Track: Atxarte (Bizkaia) - Alluitz


Hai rutes, nes que según vas caleyando, ascendiendo, descendiendo, pasando les hores... nun yes a sintir otra cosa que plenitú. Plenitú total nel percorríu, plenitú total nel ambiente, plenitú total na belleza del llugar...

Y ye que nun pueu imaxinar, una ruta más perfeuta pa les hores de les que dimponíemos, ya que nes xuntances la parte montuna ye perimporante, pero tamién la parte folixera y tar nuna mesa d'alderique o tranquilamente nel pueblu de turnu tomando una cerveza, ye necesario enforma.

Poro, dar les gracies a Fernan y a Tito, por amosanos una ascensión entretenidísima, completa y que casi ensin querer faise hasta curtia de lo disfrutona. Agora, quédome cola sensación de que van tenelo complicáu p'alcontrar dalgo que lo supere jeje.

Puntu partida n'Atxarte (285 m)

viernes, 9 de junio de 2017

Xuntanza Asturvasca 2016 - 2017

22 y 23 d'Abril de 2017

Sétima Xuntanza Asturvasca (Eusko-Astur Biltzarra, esta vegada en tierres hermanes vasques, tomando como campu base, el remocicáu refuxu del Baskonia Mendi Taldea. Tenemos que dicir, antes de na, que tuvimos tan a gustu y prestónos tanto'l llugar, que pola nuesa parte, taríemos encantaos de tornar tolos años a Iondokorta.

Nós, como somos probetayos, tenemos qu'andar moviéndonos d'un llau a otru d'Asturies, non tanto a la gueta de nueves rutes que compartir, sinon d'un llugar afayaizu onde sintámonos a gustu y podemos xuntanos la mayor cantidá de xente posible.

Escudu del Baskonia Mendi Taldea

Darréu, camiento que n'Asturies sedrá imposible nin tan siquiera averáse al númberu de participantes d'esti añu y ye que la llamada a la nuesa visita nel Baskonia fué acoyida de bon gustu y pudimos poner cara a munchísima xente del grupu que tovía nun tuviéramos el placer de conocer.

Como non, tampoco faltaron na nuesa particular collación Bittor, Oscar, Mariano, Jose Antonio y Bea, que suelen ser xente avezao a estos alcuentros. Los demás, anque nun mos conocíen más que d'oídes tratáronmos como si nos conociesen de tola vida y eso ye mui d'agradecer, poro nun pudimos colar más contentos d'Euzkadi.

Cocina y habitaciones del refuxu de Iondokorta

Sábadu 23 d'Abril:

Axuntarémonos nel polideportivu de Basauri, magar de madrugar de más, ya que nun controlamos mui allá los tiempos del viaxe y tuviemos que parar a almorzar una primer vegada y como llegamos sobraos, pues almorzamos con caña incluida una segunda nel propiu polideportivu.

Pali pali, vamos alcontrándonos con xente conocío y con xente nuevo, hasta formar el grupín de vascos y asturianos que van dir de monte. De tarde, tendremos la suerte de conocer a munchísima xente más nel refuxu.


Echando un gabitu na colocación de la bandera'l Baskonia

Conformáu el grupu, salimos en caravana hacia Atxarte, llugar pernomáu por allugase una escuela d'escalada con hestoria: Atxarte y una horripilante cantera que casi acaba con esti guapu llugar. Nós, dexaremos los coches y fadremos la siguiente ruta:

Atxarte (Bizkaia) - Alluitz

Dempués d'esfrutar d'una de les rutes más prestoses de los últimos tiempos, saldremos d'Atxarte hacia Durando, p'ascender el puertu d'Urkiola y dir a tomar un merecíu refrescu nel pueblu d'Otxandio, llugar de triste hestoria, con bombardeos al entamu la guerra civil que casi desanició tol pueblu.

Aparte de la hestoria, el pueblu tien un merecíu paséu, con muncha cai empedrao onde tomar dalgo nos chigres y tar a gustu. Esta vegada, tuvimos a bien tomar un pocu de txakolí, teniendo que colar d'Otxandio, más pola hora de la cena que poles ganes.

Momentos de folixa na cena y na post-cena

Colaremos d'Otxandio y fadremos un enguedeyáu camín hasta pillar la pista en Ipiñaburu que nos tien de depositar dempués de muncho xubir al refuxu del Baskonia Mendi Taldea en Iondokorta, onde pasamos al momentu d'abrazos y presentaciones.

Con ambiente increyible, diremos garrando sitiu nes habitaciones, duchándonos por turnos y pasando una agradable precena, compartiendo rises, culetes de sidra, cerveces... hasta qu'aportó la cena. Nun podemos más que dar les gracies pol menú que nos ufrecieron con un bacalao que saltábense les llárimes.

De la parte postcena, ya nun falamos, porque si amestamos el vinín de la cena, que taba bien rico, colos oruxos posteriores y hasta sidra escanciao a la lluz del frontal... ye cenciello imaxinar como fuimos la mayoría pa la cama.

Domingu 26 d'Abril:

Al día siguiente, llevantámonos con dalgo de resaca dalgunos y otros con muncha, pero como ganes de tornar al monte siempre tenemos, almorzaremos pa poner el cuerpu un pocu a tonu positiviu y ponemos les botes pa salir de monte dende'l propiu refuxu, faciendo la siguiente ruta:

Iondokorta (Bizkaia) - Lekanda

Dempués d'una rutina muncho más sele que la del día anterior, vamos llegar con un secañu perimportante tanto pol calorón que facía, como polos escesos de la nueche anterior. Asina que tocó rehidratase con calma y hasta echase un ratín una siestina enantes de xintar.

Semeya de grupu nel domingu pela mañana

La xinta y el montaxe, de primera otra vegada más, colos clásicos caparrones, que son unes fabes pintes a los qu'amiéstase-yos una especie de compangu, asína que la fartura y recuperar el cuerpu enforma yera dalgo cenciello.

Dempués de la nueche anterior, tol mundiu fue muncho más comedíu coles bébores espirituoses y poquín a pocu fuimos amatagando y dexándonos dir a una relaxada sobremesa, hasta que la hora convidábanos a recoyer y preparar la vuelta a la realidá.

Preparaos pa la xinta dempués de dar un bon paséu

Una realidá que diba llevanos a tener que conducir durante unes horines hacia la nuesa Asturies. Con un pocu de pena, ya que pasábemos otru día de xuru peles tierres hermanes vasques, vamos despidiéndonos ún a ún, con un esto hai que repetilo y nun ye que nos faiga falta decilo, porque ya van 7 años de xuntances y les que nos queden.

La próxima más... y n'Asturies.

Xente astur que vieno a disfrutar: Raúl, Richar, Zori, Alberto, Natalia, Carlos, Benjamín, Haritz y Berto.
Xente vasco que trabayó y tamién disfrutó:
A la cocina Pedro y Edurne como xefes, cola aida d'Iñaki y Aitor y la collaboración de otro Iñaki y otra Edurne y los pinches de cocina: Mariano, Oscar y Konstan controlando

En la parte montañera del Alluitz Tito y Fernan, y de sofitu per Urkiolamendi Txutxi, Angel y Loli.
Al Lekanda ficiéronmos compaña Kike y Aurea, Juanan, Bittor, Jose Antonio, Bea y Txemi.

miércoles, 31 de mayo de 2017

Castroviejo (Soria) - Muñalba - Tres Provincias

15 d'Abril de 2017

Track: Castroviejo (Soria) - Muñalba - Tres Provincias


Casi vien siendo una tradición, que los díes que paso en Soria de vacas, faiga una escapadina a dar una vuelta a los montes más altos de la provincia. Esta vegada quería conocer un pelín meyor los Picos d'Urbión entrándo-yos pela so fastera más occidental.

Pa ello, Miguel y yo, vamos averanos hasta Duruelo de la Sierra, siendo'l camín dende'l Burgo de Osma, direición Soria pela N-122 hasta'l desvíu de la SO-910 hacia Abejar. Ellí, garramos la CL-117 que va pal banzáu de la Cuerda del Pozo y bordiándolo pela manzorga, pasaremos per Molinos de Duero, Salduero, Covaleda y enantes d'entrar a Duruelo, saldrá una carretera hacia Castroviejo.

Saldremos de Castroviejo (1554 m)

jueves, 25 de mayo de 2017

Altu Ventaniella (Ponga) - Les Pandes - Pileñes - Miédome

9 d'Abril de 2017

Track: Altu Ventaniella (Ponga) - Les Pandes - Pileñes - Miédome


Cuantayá que nun tornaba pel Altu Ventaniella, anque facía menos tiempu que tuve per dalguna de les sos mítiques peñes. La primer vegada, nel 2010, facíemos Ten y Pileñes y fae muncho menos tiempu, tuviéramos en Ten saliendo dende la Uña.

Esta vegada, la idega yera ascender al Pileñes y facer una circular conociendo fasteres del norte d'esta peñe. Pa ello, aportaremos al Altu Ventaniella , dempués del llarguísimu viaxe dende Xixón per Autovía'l Cantábricu y N-625 que dende Lloviu déxanos en Cangues d'Onís.

Grupu nel Altu Ventaniella (1194 m) preparaos p'andar

miércoles, 17 de mayo de 2017

La Pesanca (Piloña) - Foz del Infiernu - Foz de los Cubilones - La Becerrera - Foz de Moñacos

2 d'Abril de 2017

Track: La Pesanca (Piloña) - Foz Infiernu - Foz de los Cubilones - La Becerrera - Foz de Moñacos


Hai díes y son munchos, qu'escoyemos les rutes non por facer un cumal en cuestión, sinon por conocer un posible camín que nos tien de llevar a la base d'esi cumal. Otres vegaes, anque seyan les menos, vamos a conocer pasos y accidentes xeográficos de la nuesa Asturies y de les más ablucantes son les foces. 

Una foz ye un pasu pente peñes nes que davezu pasa una riega y na fastera del ríu Infiernu, tenémosles de tolos collores, poro, preparar una rutina pa conocer les siendes qu'intenten travesales yera dalgo que tenía na tiesta dende cuantayá.

Salimos dende La Pesanca (415 m)