jueves, 14 de septiembre de 2017

Vegarredonda (Cangues d'Onís) - Caleyón del Frances - Aliseda - Ariu - Canal de Trea - Cares - Poncebos (Cabrales)

11 de Xunetu de 2017

Track: Vegarredonda (Cangues d'Onís) - Frances - Aliseda - Ariu - Trea - Cares - Poncebos (Cabrales)


Cabera estaya de la Travesera Picos 2016 - 2017 cola que damos puntu final al calendariu de rutes del GM Xuan de la Borrina pa esti añu montañeru. Tamos en Vegarredonda asitiaos dempués de que nun pudiéramos acabar la estaya anterior en Vega d'Ariu como teníemos planeáu.

Ante nós, tenemos una xatada perimportante hasta Poncebos, poro pelín enantes de les 8 la mañana, ya tamos con tou preparáu y col banduyu llenu del almuerzu pa entamar la xornada. Silvia, Haritz y yo, tendremos de travesar bona parte de la fastera norte del Cornión pa embocar hacia la canal de Trea y llueu percorrer la sienda'l Cares hasta Poncebos.

Partimos del refuxu de Vegarredonda (1460 m)

Ensín más salimos de Vegarredonda, con un día guapísimu que faime casi rabiar, por nun tenelu asína nel día anterior, quedándome ensín denguna ascensión en tola travesera. Colo que tenemos per delantre, güei tamién, con facer la travesía vamos sobraos.

Entamaremos saliendo del refuxu, garrando pelín enantes del antiguo refuxu, un senderu que sal a la manzorga y que nun ye otru que'l Caleyón del Francés. Esti camín, amuésase marcáu y va llevános hacia'l colláu'l Resquilón ensín mayores problemes.

Garramos el Caleyón del Francés baxo los cumales del Cornión

La parte final, ya la conocíemos del intentu a los Traviesos nel branu pasáu, nel que tuviéramos qu'abrir buelga como si tuviéramos en plenu iviernu, conociendo otra fastera más perguapa del Cornión como ye la cuenca'l Ridimuña.

Esta vegada nin tan siquiera somos a pescanciar los díes que-y queden a la Cemba Vieya, na nuesa Peñasanta. Casi da pena, echar un vistazu a los ñeveros de los Picos y ver como'l calecimientu y cambeu climáticu ta faciendo esaniciáse'l pocu xerme glaciar que nos queda per Asturies.

Pasamos pol colláu'l Resquilón navegando hacia'l canalón del Conh.urtáu

Plantámonos nel Resquilón abriéndose les vistes un pocu más hacia tol mar de ñubes que ye Asturies. Nós, dexaremos les vistes pa otru día, ya que'l "senderu" tórnase dafechu abegosu, al traviés de continos xubes-baxes pente h.oos y llambries.

Dicir qu'esti tramu, ye'l pior con diferencia no que ta ufiertándose como enllaz del Anillu Picos dende Ariu a Vegarredonda. Personalmente, con un mínimu d'inestabilidá nun lo recomendaría a naide, ya que ye necesariu conocer la fastera, saber orientase y empobinase de h.itu en h.itu ya que'l GPS tampoco va servinos de muncho.

Descendemos hacia Aliseda pa empobinanos hacia Ariu

Menos mal, que tuviera va menos d'un añu, tres díes patiando y ascendiendo cumales y ya xubiera pel valle Resecu conociendo tol canalón del Conh.urtáu col qu'empatamos casi na so parte final. Dende ellí, tocaba tornar una vegada más hacia Vega d'Aliseda, la cual tien munches visites pela mió parte, pero pa los collacios ye un preciosu descubrimientu.

N'aquellos tres díes, destacaría mi pasu per Aliseda pa les ascensiones de la Robriza y Peñeblanca pero si tengo alcordances de tar enmediu lo más xabaz del Cornión fue nel intentu a la Punta Gregoriana.... vaya sobraes que nos metíemos y güevos que-y echábemos.

Perguapu día colos Urrieles al fondu nel colláu Les Cruces

Llueu tocará l'enllaz, tamién pocu evidente d'Aliseda a la boquera de la canal de Trea nel colláu Les Cruces. Dicir que cualesquiera que conoza les salides de la Vega d'Aliseda hacia Ariu, va saber que difícilmente cada vegada que pases per ellí, nunca sedrá igual, jeje.

Ye ún de los sitios, con más h.itos del Cornión y supongo que caún lleva hacia un llugar diferente o toos al mesmu. El casu ye que lo meyor, tener claro cuala ye la to direición y siguila más bien con una bona orintación qu'en casu de borrina, lo meyor siguir un bon track de gps y tar sollerte a los h.itos y les posibles torques qu'alcontrémonos pel camín.

Entamamos col descensu de la canal de Trea

Magar de llevar a lo collacios, aproximádamente al traviés del colláu H.ermosu y los h.oos de la Mayada Vieya y de la Cistra, hasta'l colláu Les Cruces (1571 m), taremos en dimposición de sentanos un ratu y xintar con tola calma y la meyor de les vistes del macizu de los Urrieles.

Nel intre, paecía que ya taba too fecho, pero dempués del parón, tocaba tornar a baxar la Canal de Trea, igual que ficiéramos delles traveseres enantes. Como ya dixe, esta fue una travesera de canales y nun podía quedar nel tinteru la mítica Trea.

Avanzamos pela parte baxa de Trea col Cares a vista de páxaru

El primer tramu, pindiu enforma, fadrémoslu con un calor insoportable hasta aportar a la metá de canal, onde podremos garrar agua na fonte'l Peyu, refrescanos y facer el destrepe que danos pasu a cabera parte de la canal que na so parte final desvíase per una guapa y fresca viesca.

Una vegada que vemos la senda'l Cares, paez qu'animámonos a baxar lo más apriesa posible, como si nun mos quedara casi na por patiar. Gran error, ya que metíos nesi senderu estráu de senderistes, aparte de pasar calor, nos van venir a les pates y pies tolos kilómetros que llevábemos enriba, estos cuatru díes.

Metémonos la xatada del Cares coles pates y pies ya mui cansaos

Con más pena que gloria y dolor abondo nes plantes de los pies, vamos dando zapatu a caún de los kilómetros del Cares, parando a presentar los nuesos respetos a la canal de Sabugu, que tanto dañu fizo al grupu... que pindia y tiesa veíase dende la nuesa horizontalidá, jajaja.

Pasaremos en mou carrera de monte l'ascensión a los Collaos, por mor de les ganes d'aportar a Poncebos y ellí, con un bañu nes fríes agües del Cares, daremos fin a una estraña Travesera y a les 9 hores y media de ruta, 19,7 km de percorríu y más de 3600 m de desnivel con 2400 de descensu que fai les delicies d'unos cuadriceps bien cansaos.

Con esto... hasta la próxima temporada de monte

Camudando'l Camín dende'l coral del Cornión

No hay comentarios:

Publicar un comentario