viernes, 25 de noviembre de 2011

Puertu Ventana (Teberga) - Güertu'l Diablu

20 de Payares de 2011

Track: Puertu Ventana (Teberga) - Güertu'l Diablu



Cabera ruta del mes de Payares de Xuan de la Borrina, na que vamos averanos una vegada más al conceyu de Teberga, y más en concretu al Puertu Ventana pa facer una visitina a dellos cumales nortiegos del macizu d'Ubina.

Pa ello, como ye vezu, saldrán de Xixón, Simón, Carlos, Cantarero y Pangua, y esta vegada de Llugones lo fadrémos Paula y yo. El puntu d'alcuentru sedrá en La Plaza en Teberga onde tocará desayunar tranquilamente.


Semeya de grupu nel Puertu Ventana (1583 ms)

Asína qu'a partir de l'autovía "Y", garraremos l'autovía a Grau, pa salir hacia'l valle del Trubia y travesar los conceyos de Santu Adrianu, Proaza y nel pueblu de Caranga Baxu, tomar direición a Teberga entrando n'él pol pueblu d'Entragu, hasta parar na capital tebergana de La Plaza.

Magar de llenar l'estómagu, ponémonos en marcha hacia'l puertu Ventana pasando pelos pueblos teberganos de Las Veigas, Riel.lu, El L.lanu y Parmu antes d'atacar la parte final del puertu, que fadráse pelín llarga baxo un sele orbayu, qu'amuesa si cabe lo murniu del día que vamos sofrir.


Selemente y baxo l'orbayu vamos dexando atrás el puertu

Dempués d'abriganos y complétamente solos nel puertu Ventana (1583 ms), salimos con cierta galvana y baxo un amiestu de borrina y orpín empobinámonos al traviés de la pista que va pa Torbaniel.lu, desviándonos al aportar a Braña Nueva, pa entamar les envueltes que nos van averar al Penón de Ventana, dexándolu embaxo nuesa y pegándonos a la cayida hacia la fastera l.lionesa de Santumil.lanu.


Garramos la na Braña Nueva, pa entamar a xubir n'envueltes

La ruta que vamos facer tien de llevános hasta'l Güertu'l Diablu, y pertenecería a una de les rutes que puse por Diego y Pilar, ya que les qu'escoyeron ellos, queden pal añu que vien cuando puedan volver al líu montañeru. Nun se si lo dixe ya, pero van ser padres de Nel, que pol momentu inda ta al calecer de la so ma, pero cuando salga sedrá'l segundu borrinu, detrás d'Olayina.


Siguimos avanzando pente la ñebla

Como nun vemos nada pola ñebla, siguimos tirando del gps pa empobinanos con tranquilidá hacia'l cumal de las Rebol.losas (1930 ms), onde Bea y Jose, diéranse la vuelta'l día que xubimos al Penón Amenu y la Pena Sol Tambarón.


La boina de Pangua que paez que da xuegu

Tamos de rises y nun tenemos priesa, asína que vamos xugando cola boína de Pangua, demientres caleyamos, asemeyándonos a los antiguos maquis, qu'anduvieron per estos montes atrincheraos en delles costrucciones afortificaes qu'inda caltiénense anguaño.


Xubiendo y baxando a las Rebol.losas (1930 ms)

En pocu más d'una hora y cuartu, taremos baxando dende Las Rebol.losas al col.áu Socel.lares de 1853 ms, onde aniciaremos de verdá la primer ascensión del día. Nel intre, el día paez que dános un respiru y somos a ver la veiga Socel.lares, y dalgunos cumales d'Ubina, como'l Campu la Faya, Penón Amenu, Pena Sol Tambarón y Picu sol Prau la Siel.la.


Aportando al Col.láu Socel.lares (1853 ms)

Nesti nomáu col.láu, vamos separtános ya que yo decido xubir a güevu a la Pena Mel.luque pela so falda noroeste, demientres los demás, garrarán el canalizu que xube pente la Mel.luque y l'espolón que xube a la Pena Socel.lares hasta'l col.láu del Güertu'l Diablu.


Les ñubes colen por un migayín y dexen ver estos guapos cumales

L'ascensión a la Pena Mel.luque per esta cara, nun tien mayor dificultá, sacante de que tengo les botes mui gastaes na suela, y resbaríu, más de lo que me prestara, cola ñeve qu'a partir de los 1950 ms voi alcontrándome.


Abandono'l grupu p'ascender darréu a la Pena Mel.luque

Con pocu más que facer delles envueltes pa que nun se me faiga mui pesáu lo pindiu del tarrén, aporto a los 2053 ms d'altor de la Pena Mel.luque, superando del tirón 200 ms de desnivel en venti minutinos aproximáu.


Cumal de Pena Mel.luque (2053 ms)

Ye una pena'l día, porque dende equí, les vistes a tol val.le de Santumil.lanu, a ablucantes cotes d'Ubina (como Picos del Fontán más al sur) ya inclusu al Picu la Ferreirúa al occidente, tienen que ser una pasada, pero mi únicu agasayu al aportar al cumal, foi un vientu que xelábame hasta les barbes.


Baxando de la pena Mel.luque pente la ñebla

Dempués d'unos minutinos dando paseos pol cumal, a la espera de que los collacios xubieran dende'l Güertu'l Diablu, pego un par de glayíos, porque nun-yos veo, pa ver si van xubir y contéstenme que non, poro, magar de los cagamentos davezu, saco una semeya en solitariu, y baxo cagando xelu, porque nun aguanto res ellí enriba.


Entamamos l'ascensión a la Pena Socel.lares con friu

Aportaré al grupu pente la ñebla, como si fuera'l mesmu Xuan de la Borrina, y toos xuntos, entamamos selemente l'ascensu a la Pena Socel.lares (malnomáu Güertu'l Diablu Norte). Por dalgún motivu, nun pega tanto'l vientu y esti faise cenciellu, hasta un hombru de 2074 ms que de primeres creemos que ye la cume, pero non.


La ñebla y el fríu nun mos escaez durante tola xubida

Tendremos que baxar d'esti hombru, unos metrinos, hasta garrar la xubida final, que como tol tiempu, va llevános pente la roca y la ñeve, hasta los 2107 ms d'altor de la Pena Socel.lares, onde una vegada más, el fríu ye fuerte y les vistes nules, dando poques ganes de tar más tiempu enriba.


Cume na Pena Socel.lares (2107 ms)

Con dos hores y media de ruta nel cuerpu, dimponémonos a baxar al col.láu que separa la Pena Socel.lares del Picu'l Guertu'l Diablu y que tien bones cayíes sol L.laseiru, pero como non, nun somos a velu por mor de la borrina.


Baxamos hacia'l Güertu'l Diablu

Tampoco nos vamos desesperar por eso, asína que siguimos alantre, y esfrutamos d'una ascensión más, y que neesti casu, tien ñeve abondo, dándonos un plus de disfrute, ya que queda mui lloñe l'última ruta con dalgo curiosu de ñeve.


La ñeve protagonista nel ascensu al Picu' Güertu'l Diablu

En menos de media hora, diremos aportando toos al cumal del Picu'l Güertu'l Diablu de 2134 ms. Los últimos en llegar seremos Paulina y yo, ya qu'ella nun t'avezada inda a estes ascensiones cola ñeve, pero hai que dicir que lu pasamos de luxu los dos.


Un grupu de Maquis y cume algamada del Picu'l Güertu'l Diablu

Cuando ficimos cume, alcontrámonos con un grupu de maquis, refuxándose nuna trinchera que sirviónos como nunca pa tar un pelín cómodos pa xintar los bocatas, ya que'l fríu una vegada más yera perfuerte.


GM Xuan de la Borrina nel Picu'l Güertu'l Diablu (2134 ms)

Lo guapu del monte y sobretou d'estos montes altos, ye que nun sabes cuando les ñubes van desapaecer y van ufrirte un bon espeutáculu. Nesti casu, nun faltó a la so cita, Xuan de la Borrina y regalónos durante un ratín les vistes hacia'l Puertu Agüeria, la Pena Ruea y quiciás un de los picos que más ganes-y tengo, El Ranchón.


A pesar del fríu les rises y les vistes nun faltaron, como'l ablucante Ranchón

Unos 25 minutinos, yeren más que suficiente pa xintar dalgo y quedar xelaos, asína que decidimos baxar de los altores ya intentar una baxada pocu caleyada y de la que poca información algamé.


Garramos baxada hacia la Veiga Los Pozos

La primer parte, yera baxar a la Veiga los Pozos y ficímoslo ensin problemes aportando al Trabe Rolamuela (2007 ms), que ye'l colláu onde finaliza'l Canalón de Rolamuela, que xubiría perpindiu dende'l Puertu Agüeria hasta la Veiga Los Pozos pente'l Picu'l Güertu'l Diablu y la Pena'l Ranchón.


Descensu del Trabe Rolamuela a la veiga L'Arca

El siguiente tramu sera'l más complexu y tien de llevános dende'l colláu anterior hasta la Veiga L'Arca. La primer parte sedrá baxar per un amiestu de prau y roca cenciello, pero a partir d'una estrechez, el prau empíndiase enforma, y cualesquier rastru de sienda, paez perdese a cada pasu que damos.

El resultáu d'esto, sedrá una baxada per onde mayor se pueda, llibrando esi tarrén tan caráuterísticu n'Asturies, de rebolles amestáu a caliza afilada, na qu'hai qu'andar sollerte d'au vamos poner el pie nel siguiente pasu.


Na veiga L'Arca descansando

Dalgo más d'una hora tardaremos en baxar dende'l Picu'l Güertu'l Diablu hasta L'Arca, onde descansaremos un ratín, ya que la baxada nun foi fácil del too, anque sirviónos, al menos a mi, pa descubrir el camín que xube dende la Veiga L'Arca hasta'l col.láu de la Muezca Cigacha, que va dános posibilidá nun futuru de conocer dellos cumales d'esta fastera tan guapa d'Ubina, como son La Cigacha o el picu Colines, entre otros.


Ascensu al col.láu onde veremos l'arrodiada del val.le de Campu Formosa

Al borde de les 3 de la tarde, vamos baxar un pelín hasta los restos de cabañes de la Veiga L'Arca y ellí abandonaremos la val.lina L'Arca pa xubir un colláin en direición norte, onde veremos tol val.le de Campu Formosa, y responderemos la última entruga que teníemos: esiste una sienda qu'arrodia esti val.le hasta'l Penón de Ventana?


La Cueva Mel.luque pa garrar la otra fastera'l val.le

De primeres asáltenmos les duldes, ya que na otra fastera'l val.le nun se dixebra en dellos tramos si esta va cortáse o non. Con esto, toles miraes apunten a mi, como siempre, por dir a la gueta d'un camín nuevu y facer lo más circular posible les rutes, jeje.


Travesando un tarrén peramestáu: pedreres, arbustu baxo,..

Pero finalmente, tiramos alantre, pasando unos cien metros pembaxo la Cueva Mel.luque, y ganamos la otra fastera'l val.le, que travesando dalgún pedreru y con dalgun xube-baxa, nun va cortáse en dengún momentu, faciéndose'l caleyar a pesar del cansanciu perentreteníu.


Caberu vistazu a les cotes de la fastera norte d'Ubina y el val.le de Santumil.lanu

Y digo que foi entreteníu, porque tardamos un hora n'aportar a esi collaín de nuevu, que ta enriba del Penón de Ventana. A esto, aidó un pelín, mirar de xemes en cuando atrás y ver dalgo del murallón oeste del macizu d'Ubina que cae sol val.le de Santumil.lanu, tando ésti colos colores más guapos de la seronda, amosaos en viesques roxices y marielles.


De nuevu tornando al Puertu Ventana

La parte final, fadrémosla casi a la carrera, Paula y yo, pa garrar a los Carlos que diben falando gayoléramente y asína facer l'últimu tramu hasta'l puertu Ventana onde Simón y Pangua taben ya mudándose de ropa y l'Sporting perdía xusto nesi momentu por 0-1 a la escontra'l Getafe.

Menos mal, que nun chigre na Plaza, vimos como remontaba'l resultáu, dando-y un tastu más dulce si cabe a esti día, nel qu'a pesar del tiempu, percorrimos unos 12 kms en 6 hores y superamos un desnivel acumuláu d'unos 800 ms.


Camudando'l Camín una vegada más nel macizu d'Ubina

Nesti murniu día pol Macizu de Penaubina algamos los siguiente dos miles, pertenecientes al Club 58 d'Ubina: Picu'l Güertu'l Diablu (2134 ms), Pena Socel.lares (2107 ms) y Pena Mel.luque (2053 ms)

Ver progresos en: Retos montañeros