viernes, 4 de noviembre de 2011

Sobrevil.la (Teberga) - Pena Sobia - La Siel.la

23 d'Ochobre de 2011

Track: Sobrevil.la (Teberga) - Sobia - Siel.la



Una día más, axuntámonos un bon garrapiellu xente pa llevar alantre una ruta del GM Xuan de la Borrina. Esta vegada díbemos visitar el conceyu Teberga, y lo que pudiera ser la so peñona más mítica, La Pena Sobia. Pa ello, xuntaríemonos a desayunar nel pueblu teberganu de La Plaza: Carlos, Pangua, Cantarero, Simón, Diego Currás y Silvia y Toni, que facíen la so primer ruta con nós.

Paula y yo, salimos dende Llugones garrando la A-66 arrodiando Uviéu, pa meténos na que tira pa Grau, saliéndonos al pocu, pa facer tol valle del Trubia, travesando los conceyos de Santu Adrianu, Proaza y nel pueblu de Caranga Baxu, tomamos direición a Teberga entrando nel conceyu pol pueblu d'Entragu, hasta parar en La Plaza.


Entamamos nel pueblu de Sobrevil.la (664 ms) cola Sobia detrás

Magar de los desayunos y presentaciones debíes, partimos en direición Puertu Ventana, pasando pol pueblu de Las Veigas, onde pocu dempués, tomamos un desvíu a la manzorga que nos fadrá pasar por Monteciel.lu hasta Berrueñu, onde tomaremos otra vegada la carretera esquierda hasta'l guapu pueblu de Sobrevil.la.

Equí apartaremos los coches onde menos molesten y preparámonos pa facer l'ascensu a la Sobia pela Canal de la Faya. Nun ye la ruta davezu, ya qu'ésta faise dende'l pueblu de Carrea ensín mayor dificultá que soportar una aburrida pista n'envueltes. Por suerte, apocayá'l collaciu montañeru y blogueru Cienfuegos, pusiérame col so relatu sobre la ruta más prestosa pa xubir esta mole caliza.


Averándonos a la base d'esti peñón calizu

Con bonos ánimos, vamos salir un pelín más tarde de les 10 de la mañana, pente les cais de Sobrevil.la (664 ms) col envís d'averános siempre n'ascensu, hasta'l Picu'l Pueblu, onde tomaremos una pista hasta un depósitu d'augua. Pocu dempués, abandonaremos esta mesma pista que sigue hacia la manzorga, pa dir poles vegues de L.laneces, siempre cola vista hacia l'entamu de la canal.


Ascensión de la canal de la Faya

Aportaremos al muru inicial de la canal, dempués de travesar un amiestu de tarrén herbosu, dalgún pedrerín ya inclusu una pequeña viesca y en media hora dende que saliéramos del pueblu, tamos ante lo más difícil de la ruta, la entrada a la canal.


Nes cercaníes de la canal

Como siempre, hai duldes en como metése nella, pero dende un pocu más abaxo, ya me paeció ver la llínea en Z que debíemos tomar p'aupános a la canal. Asína que nos primeros pasos de caliza, ficimos una travesía casí ensín ganar altor hacia la manzorga pa facer una envuelta y enfilar n'ascensu y con dalguna trepaduca otra travesía hasta pegános contra una pequeña muria paralela a los paredones de la Sobia.


Primeros pasos de canal más verticales

Así de primeres, tengo que dicir que nun ye mui difícil l'entamu de la canal, pero sí qu'hai qu'andase con güeyu porque si tuviera moyáu la sensación d'aéreu y poca seguridá convertiríase en poder pasalu mal.

Dende equí, ya vamos avanzar pegaos a esta muria hasta un bloque empotráu, que podemos llibrar pasando pola manzorga o pembaxo'l furacu que dexa. Si pasamos pel furacu vamos llibrar una tramu pindiu de trepe que ta protexíu con una cuerda afitada.


Pasu que llibra les cuerdes afitaes

La verdá ye que nun la veo mui necesaria porque'l pasu en sí pue llibrase tamién con una envuelta un pocu más pola manzorga. Aún así, si la garráis comprobá-y que ta fuerte, porque paez que lleva un bon tiempu per ellí.

Dempués d'esti tramu "aseguráu", siguiremos pegaos a la muria hasta poder salínos a la mandrecha, travesando agora un amiestu de caliza, cotoya y escobón, que fai raru l'avance, hasta un pedreru onde detrás d'una peñona, protexerémonos y descansaremos.


Descansu enantes de garrar el pedreru

De que tuvimos que protexenos?? Pues d'un fuerte vientu, que sigún díbemos ganando altor, facíase más xabaz y enfriaba l'ambiente más de lo qu'asperábemos. Magar de picar dalgo ponémonos en marcha siguiendo'l pedreru nuna parte muncho más ancha de la canal.


Paredones de la Pena L.lana demientres aportamos al colláu

L'avance sigue siendo un pelín abegosu y tenemos esi amiestu de tarrén herbosu y calizu que nun dexa dir mui rápidu, poro'l grupu va dir separtándose pocu a pocu, yendo per delantre, Pangua, Silvia, Toni y Currás, y quedarémonos un pelín más atrás, Carlos, Canta, Simón, Paula y yo.


Ascendiendo pegaos a un arcu de roca perguapu

De xemes en cuando, echar un vistazu a lo lloñe que queda'l pueblu de Sobrevil.la, da ánimos, ya que la canal ta siendo llarga (dalgo más de 500 metros d'altor direutu en total) . Tamién, entretienen y muncho les formaciones rocoses de les parés de la mandrecha siendo una visita obligada l'arcu y cueves de la semeya, que da pasu a otra canal que tien el so final trancáu o eso paez.

Al final, con un pocu más d'esfuerzu y guiándonos por una peñona que sirve de h.itu (dir siempre al so alcuentru) aportaremos al colláu (1407 ms), dempués de dos hores de xubida direuta y ensín nengún descansu.


Aportando al colláu de Faya y protexíos del vientu

Enriba'l vientu yera tan fuerte, que casi nun dexaba avanzar y los últimos pasos ficiéronse perduros hasta que la mayor parte del grupu pudo protexese detrás d'una muria. Digo la mayor parte, porque namái qu'aportamos al colláu, dexé que Paula fuera al refuxu y yo tiréme a la manzorga a pol primer finxu del día, el cumal de la Pena Sobia.


Pena Caranga y nel cumal de la Pena Sobia (1433 ms)

Dempués de lluchar contra'l vientu per un terrén de caliza afiláo, xuntámonos nel cumal de la Sobia (1433 ms) Pangua, Simón, Carlos y yo, ya qu'éstos dempués de varios glayíos escontra'l xiblíu del nuberu, amestáronse a mi a facer esta cume tamién.


Tornando al colláu colas Veigas d'Adientru

La verdá ye qu'hai dalgo d'enguedeyu cola toponimia d'esti macizu calizu, ya qu'al cumal de 1485 ms qu'apunta pal conceyu de Proaza, hai xente que nómelu Pena Sobia, pero ye'l Barzanalgas y la Pena Sobia ye'l puntu más altu del paredón que sal del pueblu teberganu d'Entragu, al nuesu entender esti cumal de 1433 ms.


Unes rises col trasgu de la Sobia, jeje

Con pocu más que pasar fríu pa sacar una semeya, tornamos más menos polos nuesos pasos y demientres echámos un vistazu a las Veigas d'Adientru y a la Pena Caranga, caleyamos lo más rápidu posible p'acurrucanos tamién al refuxu'l vientu colos nuesos collacios.


Entamando l'ascensión a la Siel.la

Dempués d'unes rises con Simón y el so gorru de papá pitufu, vamos dir desperezándonos del descansu y tendremos en mente l'oxetivu cimeru del día: La Siel.la. Pa ello, saldremos arrodiando pola manzorga varios peñones que formen la Pena L.lana y qu'amuesen posibles salides de canales con accesu nel puente roca de la canal de la Faya.

El caleyar agora ye más cenciellu y anque'l vientu sigue dificultando'l nuesu andar, tenemos tramos de bona yerba que sortiando la caliza, va facénos avanzar xubiendo'l pocu más d'un centenar de metros d'altor que separaben el final de la canal de la Faya y el cumal de la Siel.la de 1510 ms.


La Siel.la dende la L.lana (1485 ms) y últimos pasos al cumal

Asína qu'en pocu menos de media horina, con cuentagotes diremos aportando unu a unu hasta esti prestosu cumal que n'otru día sería un sitiu guapísimu pa xintar el bocata, pero güei taba faciéndonos pasar un fríu perimportante.


Cumal de la Siel.la (1510 ms)

Unos pocos minutinos pa facer la semeya davezu y tiramos p'abaxo a fueu, a la gueta d'un llugarín onde cobixanos pa xintar. La baxada sedrá per una amplia canal, fecha pol hombru que sal de la Siel.la en direición Este y la llinea del propiu cumal y el sitiu a refuxase sedrán unes peñes verticales enmediu de la Veiga d'Afuera.


Baxando a las Veigas d'Afuera

3 hores xustes al picu La Siel.la y 20 minutinos más hasta'l nuesu llar calizu, daben les 2 menos cuartu, hora más qu'aceptable pa ponése cómodu y garrar tolo que s'alcuentre pola mochila pa llevalu a la boca. Y nun solo nós, sinon que tamién xunióse al festexu un guapu mastín de moza edá, que llevóse una bona parte de los nuesos bocates.


Un vistazu a L'Aramo demientres un mastín róndanos la xinta

Pa cuando finamos de xintar, les pates, el cuerpu y la tiesta, ya teníen claru que nun pagaba la pena siguir faciendo cumales pela Sobia. El día nun taba nada prestosu pa ello y nin siquiera na veiga tábase cómodu ya que'l vientu siguía azotando con ganes.


Paseando polas veigas pente cabañes circulares

Esto pesónos muncho y nin siquiera yo animéme a salir corriendo a la gueta del cumal del Barzanalgas que tenía enfrente a mi. Nun m'apetecía res pasar friu, asína que como'l monte sigue ehí esperando, fadremos otra incursión más a la Sobia pola vertiente de Proaza-Quirós col envís de da-y preste al Barzanalgas y al Xerragallos.


Curiosa piedra con forma de caballu

Sele, empobinámonos al travies de la Veiga d'Afuera hacia la L.laguna de Sobia. Nesta parte, vamos esfrutar d'esta preciosa veiga la cual travesaremos con cierta galvana, demientres entretenémonos coles sos cabanes circulares y con dalguna forma curiosa de la roca, que solo a dos guah.es pue entrener tanto, jaja.


Caberu paséu na veiga d'Afuera enantes d'entamar la baxada

En menos de media hora, dende que saliéramos del requexu onde xintamos, tamos na L.laguna de Sobia, a la cual llégase dempués d'un pequeñu ascensu dende la parte más baxa de la Veiga d'Afuera y una posterior baxada dende un pequeñu altu, onde l'aire torna a azotar con más fuercia si cabe.


L.laguna de Sobia

Pasaremos sin pena nin gloria al llau de la l.laguna ya que'l so aspeutu artificial al tar remocicada pa usu ganaderu, fai que pierda tol encantu d'una l.laguna natural y bien ceo garraremos la nomada pista de Les Envueltes, que tanto quisimos evitar a mou d'ascensión.


Baxando poles Envueltes

La primer parte d'esta pista, sedrá un amiestu de tierra y formigón nes partes más pindies, pero en rialidá va llevándose bien, sobretou porque al fin, col altor perdíu, vamos escaeciendo esi vientu tan molestu que lleva aturullando tola ruta.


Posando nuna de les envueltes

Esta pista baxa dafechu hasta'l pueblu de Carrea, pero nós como entamamos la ruta en Sobrevil.la vamos a desvianos a la mandrecha del camín normal, nel Fitu, más menos al altor de 980 ms.


Primeru pela pista abierta y llueu pente una viesca prestosa

Con ello nun solo, vamos averanos al nuesu entamu de ruta pa facela circular, sinon qu'alcontrarémonos con una prestosa pista, que primeru faldiará pembaxu de la Siel.la pasando por Las L.lastras y el Redondu baxando sele'l desnivel, y llueu fadrános conocer unes viesques autóutones como facía tiempu que nun veíemos en L'Allén y Pandu.

L'últimu pequeñu esfuerzu fadrémoslo xubiendo al col.lau de la Rebol.lá (llugar onde hai Rebol.los, ye dicir carbayos) , pa dempués d'echar un vistazu a la nuesa vía pela canal de la Faya, baxar pel Castañéu, que como su nome indica, tien unos exemplares de castañal ablucantes. Hai que dicir, que la pista qu'empobínase a Sobrevil.la, foi un placer facela nesta dómina del añu, cola fueya cayía pel suelu, faciendo que'l caleyar seya prestosu a cada pasu que dimos.


Nel castañéu enantes d'aportar a Sobrevil.la

Unos pocos minutinos enantes de les 4 de la tarde, aportaríemos toos (unos enantes y otros dempués) al pueblu de Sobrevil.la, que como últimu detalle, déxate unos exemplares d'arquitectura asturiana con horros y paneres nun estáu de conservación guapu (sacante de les pintaes de los neños... Ayúdote yo???)

Finalmente, foron 5 hores y 35 minutos de ruta percorriendo 10,8 kms y superando un desnivel acumuláu de 1015 ms, faciendo a pesar del vientu, lo que más ganes teníemos, conocer parte d'esta guapa peñona caliza.


Camudando'l Camín en Teberga

Nesti rutina ficimos un vértice xeodésicu de Teberga y monte prestosu astur: La Siel.la (1510 ms)

Ver progresos en: Retos montañeros

8 comentarios:

  1. LÁSTIMA DE VIENTO, HABRÁ QUE IR A TERMINAR EL RESTO DE LAS CIMAS.
    Un abrazu collaciu

    ResponderEliminar
  2. Eso dalo por fecho Fernan... Gero arte collaciu

    ResponderEliminar
  3. muy bueno el reportaje, pero si volveis cuidao col trasgu de la sobia jejejejej.

    ResponderEliminar
  4. Berto, ye o nun ye guapa esa xubida alternativa a la Siel.la. Por lo que agüeyo nun xubisteis por onde yo. Yo topé la cuerda muncho más abaxo, dende el entamu el murallón. Perguapa tambien esa biesca pa baxar fasta Sobrevil.la. Lo del enguedellu nomes nos cumales, ya ye algo habitual.
    Un saludu

    ResponderEliminar
  5. Esa subida alternativa es mucho mas apetecible que la puñetera pista que por cierto subimos hace cinco años para ir a la Siel.la, a propósito, ¡¡vaya suerte que tuvísteis!! a nosotros nunca nos tocó ver un trasgu y no será por falta de ganas ja,ja,ja.
    Un saludo.

    ResponderEliminar
  6. La verdá ye que la canal de la Faya, ye una grandísima opción pa xubir a Sobia, pero hai que dicir que ye esixente en xeneral.

    La pista?? Pues pa baxar la cuenta, pero pa xubir tien que ser pesáo, pesáo.

    La verdá ye que me queden dalgunes visites más a a la pena Sobia, así qu'a ver si tamién llevámos al trasgu con nós de nuevu, jeje

    ResponderEliminar
  7. Berto, si tornais por la xerra Sobia, nun escaezas Peña Saleras. Nun se si lu conoces ya, pero ye un cumal perguapu. La primera vegada xubilu dende Carreá, cresteando el llau teberganu, pero faese pesao abondo (menudu terrenu más malísimu). La segunda vegada xubimos en iviernu, con bien de ñeve, dende Vil.lamarcel y baxamos a Coañana. Ye mucho más prestoso y guapo. O a mi pereciómelo.

    ResponderEliminar
  8. Pues tenía una visita asegurada pal Saleras, pero agora tamién tengo otra pal Barzanalgas, jeje. El Saleras tenémoslu pa esti añu tamién, asína qu'apúntome la to opción.

    Mil gracies

    ResponderEliminar