miércoles, 19 de octubre de 2011

Pandébano (Cabrales) - La Morra

9 d'Ochobre de 2011

Track: Pandébano (Cabrales) - La Morra



5 de la mañana, Domingu y suena l'espertador. De primeres nun se nin onde toi, llueu doime cuenta, que tengo l'habitación enllena trastos y que toca ducháse y salir en llama col coche, ya que quedé con Fernan n'Arenas de Cabrales.

P'alantre, a les 5 y media taba saliendo'l coche del garaxe y a les 6 y media entraba pola recta cabraliega d'Arenas, viendo a Fernan salir pente la escuridá, namái que dexe'l coche nel aparcaderu.


Partimos de nueche del aparcaderu en Pandébano

Dempués de restolar un ratín onde desayunar, desistimos y tiramos pa Sotres y d'equí pola trillada pista que nos dexaría nel aparcaderu del colláu de Pandébano, onde preparámonos a escures y a les 8 menos 20 de la mañana ya tamos dimpuestos pa caleyar hasta la Vega Urriellu.


Alborez con collores ablucantes

La manera d'aportar hasta esti puntu ye dalgo que ya despliqué en dalguna ocasión, asína que nun perderemos tiempu nello: Sotres - Vega Urriellu. Namái tengo que dicir, que foi l'ascensu más guapu que fice nunca, aniciando na escuridá y viendo l'alborecer del sol, faciendo rellumar los cumales del Neverón d'Urriellu, del Picu Urriellu y del grupu Areneras-Albos que tantes ganes-yos tengo.


A desayunar na Vega Urriellu

Dempués de los dos horuques de vezu, nes que les semeyes yeren obligatories, aportamos a la Vega Urriellu y como un perrín qu'arrímase con mieu a xintar de la man d'un desconocíu, entrugamos-y a Tomás si pue apurrinos un cafetín con dalguna madalena.

A pesar de tar, llimpiando y barriendo ya, nun lo dulda nin mediu segundu y prepáranos los desayunos y un bocata de quesu inmensu pa Fernan, ya qu'escaeció en dalgún requexu del maleteru del coche la xinta que traía pa güei.


Partimos del refuxu d'Urriellu col Picu enriba nuesa

Coles fuercies renovaes, pocu más de les 10 hores venmos partir del refuxu, hacia la canal del Llebaniegu. Teníemos varies coses na tiesta, pero nel camín hasta la Vega Urriellu, ya decidiéramos que l'oxetivu yera La Morra coles sos dos cumes y de pasu echá-y una güeyada a los Campanarios.


Ganamos altor y les vistes ampliense

Pa nun baxar demasiáu altor, y sobretou pa nun garrar la canal del Llebaniegu demasiáu abaxo, fuimos averaos a les parés de los Tiros de la Torca, al traviés varios collaos y con tan solo una trepadina per un canalizu, empatamos cola canal a más de 2300 metros d'altor, dixebráu dafechu de garrala al traviés de la Gargantada del H.ugu Sin Tierra, a dos mil metros raspaos.


Los Campanarios y sus N cimes

Bien ceo, tendremos a vista toles cimes de los Campanarios, y según adentrámonos nel pedreru de la canal y separtámonos del conxuntu de parés de los Tiros de la Torca y de la Morra, vamos agüeyar al fin, el cumal Occidental d'ésta.


Metíos na canal del Llebaniegu cola Morra penriba nuesa

En 1 hora y 20 minutinos taremos na H.orcada'l Llebaniegu (2460 ms), onde ábrense ante nós, otru mundiu, otra fastera d'esti increyible llugar que ye'l macizu de Los Urrieles. Agora nun solo vemos la panorámica dende'l Neverón hasta la H.orcada d'Areniza Bah.as, col Torre Cerredu enmediu, sinon que tenemos enfrente, parte del macizu Oriental, y cumales desconocíos pa nós, como Tiros de Santiago, Tiros Navarro... y un sinfín de h.oos como'l del Infanzón o Villasobrada.


Vistes dende la H.orcada'l Llebaniegu

Por embargu, nun tenemos ganes de parar demasiáu, tenemos nos güeyos los dos cumales de la Morra, nun vien al casu, más qu'echar un tragu y un pocu chocolate y a ello ponémonos, siendo'l primer movimientu averáse a la h.orcada qu'hai enmediu les dos.


Averamientu a la h.orcada de las Morras

Polos "informes" que tenía la más pequeña u occidental, yera la más complicada y aérea, asína que díbemos dir a por ella primeru. La verdá ye que de la que xubíamos a la brecha entre les dos, ya teníemos na tiesta tamién como podría ser la de la grande.


Quien asoma'l focicu na H.orcada??? El Picu Urriellu

Tiraremos hasta los 2505 ms de la propia h.orcada, cola mochila y ellí dexamos les mochiles, dempués de que los Tiros de la Torca y el propiu Picu, asomen el focicu. Vamos preparaos con cuerda, arnés y cascu, pero ya veo a les clares la primer trepada y nun me paez difícil.


Primer trepada pela llambria

Ye una llambria que nel día de güei tien mui bona adherencia y el patiu nun ye tan fieru como lo podíen pintar, asína que póngome a ello, y sin mayor dificultá superamos esti primer pasín. Si tuviera más húmedu lo mesmu tocaba pensalo meyor, anque igualmente hai manes y pies bien visibles.


Segunda trepada col Picu vixilando

D'esta llambria salimos a un hombru, onde'l Picu Urriellu, tien una presencia ablucante, y hasta podemos ver xente nel so cumal. Desdexamos tala visión, y pasamos a la xera que teníemos delantre, otra llambria que fai caída amplia a dambos llaos.

Tamos nel mesmu casu qu'enantes, ya que col día soleyeru nun supón nengún problema, y dempués d'una poca d'adherencia tenemos dalgún agarre inversu nun bloque baxu, que facilita les coses más, hasta ganar la cresta final que fácilmente dexarános nel cumal de 2550 ms.


Fernan nel cumal occidental de la Morra (2550 ms)

4 hores y 20 minutos (los 20 son del desayunu nel refu) d'actividá fai que temos nesti guapu cumal, que presenta unes vistes enrededor pa quedar plasmáu. Esa mesma sensación tuve nel Picu, y nun ye otra que la de nun saber pa onde mirar, ya que la caliza gris de Picos inúndalo too, y unes cimes axúntanse con otres faciendo difícil dixebrar cual ye cual, dende esti llugar tan central.


Magar de les vistes toca baxar del cumal

Otru sentimientu tamién, camiento que tenemos y nun ye otru que'l de facer dalgo potente y dar conocencia a dalgo nuevu. Casi podríase dicir que quedábanos mui lloñe'l finde en que ficiéramos la Torre Carnizosu y el Picu, y necesitábemos dalgo curiosu pa sentinos agusto.


Dos semeyes de la baxada de la Morra Occidental

20 minutos dempués d'entamar l'ascensu, ya tábemos abaxo echando un triagu d'aquarius nes mochiles. La baxada tampoco supuso nengún problema, sacante de baxar de culu en dalgún puntu, pero nin siquiera hubo que destrepar d'espaldes, puntu clave nel qu'un destrepe te da que facer, al menos pa min claro ta.

Por dalgún motivu, darréu tábemos más tranquilos de cara al segundu cumal o al menos teníemos info de que yera'l más fácil, anque pa nós fuera tolo contrariu finalmente. Fernan, va adelantase per un senderu qu'arrodia una piedra y ponémonos a "pie de vía" onde vemos les opciones a tomar:


Croquis de les posibles víes a la Morra Oriental

La que paez más segura ye una chimenea que tien una entrada perruca al tener que superar un bloque con pocos agarres o non mui buenos. La otra ye una trepada más fácil por la parte aérea hasta una repisa, pero sin saber mui bien colo que nos podemos alcontrar. Una intermedia sería entamar pola repisa y pasarse trepando a la chimenea namás pasar el bloque.

Falamos un ratín y faigo una intentona sin muncho xeitu pola chimenea, y nun alcuentru bonos agarres, asína que me baxo, col envís de meteme en seriu, ya que tamos nun sitiu seguru pa meter un pegue en condiciones. Cuando diba a poneme a ello, veo que Fernan ya ta avanzando pela vía de la repisa y dempués d'un entamu mui fácil, pasa al pasu clave, onde me diz que la roca ta mui mala pero que llueu tien una continuidá mui bona.


Tres semeyes del pasu aéreu y cola roca podre

Asína que métome a ello, y paso tol tema fácil con roca rota pero nada espuesto, hasta'l pasu nel que tengo diez cms pa poner los pies y los agarres son nuna roca podre y descompuesta. Aún así, unos golpinos cola mano pa ver lo que ta más firme y n'equilibriu pa nun apoyáse demasiáu sáquase'l pasu ensín problemes.

La patata vuelve al so ritmu normal y los tolanos tamién baxen a la bolsa que los envuelve cuando aporto a onde ta Fernan. Cuatru pallabres sol pasín de los coyones, la cachu d'hostia qu'hai p'abaxo y siguimos alantre per tarrén fácil hasta aportar a la cresta de la Morra onde tenemos unes vistes que reláxanmos dafechu al fín.


Caleyando hacia la cresta de la morra onde vese'l Picu y sus collacios

Más apaciguaos, acolumbramos la cresta que vien de cerca la Torre las Colladetas (xubida más frecuentada a la Morra), y como non, otra miradina pa la sur del Picu y a les sos cordaes, pa siguir alantre pola cresta, hasta alcontrános con dalgún pasu de trepe más.


Últimes trepaes col H.ugu Treselpicu a lo baxero

Anque les semeyes paezan que tamos escolingaos enriba'l H.ugu Treselpicu, nada más lloñe de la rialidá, ya que tolos trepes son seguros y cenciellos, con bonos agarres y bonos pies, poro llantámonos en 5 minutos nel cumal con más altor de la Morra (2558 ms).


Nel cumal oriental de la Morra (2558 ms) col Picu

La panorámica como nel cumal anterior paez nun tener fin, y ye que tenemos un día perfeutu, nel que nel intre, nin el calor apreta, nin la brisina que nos acompanga tol día, fáise demasiáu molesta.


Los Urrieles al completu (Llambrión, Palanca, Cerredu, Párdida...)

Unos minutos contando picos y nomándolos, y como nun tenemos nin bébora nin xinta, tirámonos abaxo de nuevu, sacando los trepes hasta la cresta ensín mayor problema, sacante de la prestosa visión al fondu del h.ugu Treselpicu.


Baxamos de la Morra col picu y su h.ou siempre presentes

La verdá ye que la mente xuega un papel perimportante a la hora de destrepar y trepar ya que con ver un mínimu de resalte o balcón intermediu nel patiu, tenemos una seguridá estra y la tiesta furrala siempre más en positivu que negativu, anque la hostia pudiera ser la mesma.

Estes coses tiénense en cuenta siempre, o casi siempre, jeje. De nuevu tamos na escoyeta de que vía utilizar, si lo conocido o lo que paecía más seguro. Asína que-y echamos un vistazu al accesu a la chimenea dende riba, y vemos una cinta pa rapelar, alcordándonos de la cuerda que dexamos na mochila y de la madre que nos parió, jeje.


"El Pasu" de baxada de la Morra Oriental

En fin, por dalgún motivu axenu a la mente racional, preferimos tirar polo conocío, y metémonos nel fregáu d'enantes, faciendo la baxada aérea y de mala roca, pelín más xuguetona con dalgún enganche de ropa na roca, y sacámosla adelantre cola patata más tamboritera si cabe qu'al xubir.

Al aportar a les mochiles, aparte de beber augua y un trocín de chocolate, quedóme nidiu, que si tengo qu'ascender a la Morra Oriental, será usando la chimenea, ya que'l mio cuerpu esguilando contrólolo yo, pero la rotura d'una piedra y la hostia consiguiente nun la controla naide, más que la suerte y el bon facer nos suaves apoyos.


Acolumbrando los Campanarios y escaeciendo la guapa Morra

Ye siempre un placer dir de monte con Fernan, porque tenemos un xeitu montañeru mui asemeyáu. Ensín decinos nada en munchos momentos de la ruta, ensín falar de más demientres caleyamos y munches vegaes cola mente en nueses coses, en dos pallabres tenemos nidiu lo que vamos facer.

Esta vegada yera asína tamién, mentalmente dábemos por cerrada la ruta, la Morra supuso un bon retu y una ruta que nun escaeceremos fácilmente, pero queríemos conocer un pocu más d'esti marabayu de cumales de los Urrieles.


Xubiendo al Güeyu del primer Campanariu y crestéu fácil col segundu a vista

Poro, la intención yera travesar la H.orcada'l Llebaniegu de nuevu y visitar el primer Campanariu, el cual viéramos apocayá dende la primer Morra que nun tenía nenguna complicación.

Asína qu'arrodiámoslo un pelín pola manzorga, al ver un h.itu, qu'empobínanos per una canal que con dalgún apoyu coles manes qu'otru, déxanos nun güeyu no cimeru de la cresta. Pasámoslo pela so mandrecha y ganamos la cresta que pasa penriba d'él, y que con facilidá va dexanos nel cumal de 2547 ms del primer Campanariu.


Nel primer Campanariu (2547 ms)

El cumal ye guapu y ye afayaizu pa xintar ya que llevamos casi 6 hores pateando y ye la 1 y media de la tarde. Nun tenemos más que dicir, anque nun lo dixésemos casi en tol ascensu, diba ser la cabera cima del día.

El trabayu taba fechu y yera un bon trabayu, asína que podíemos retiranos con bon tastu na boca, y con dellos retos y xeres pal futuru, ya que pudimos ver de cerca tolos cumales de los Navarros, Santiagos y Santana, así como la continuidá hacia tolos demás Campanarios.


Xeres pal futuru (Navarros y Santanas) y siguiente minicampanariu??

La baxada la ficimos un pocu distinta col envís d'averanos al colláu ente'l primer y segundu campanariu, ya que queríemos ver una aguh.a o minicampanariu intermediu, que pola so composición de roca esmolocía solo con mirala, al paecer descompuesta enforma.


Baxando al H.ugón de Villasobrada

Finalmente, miramos la hora y decidimos facer travesía, dempués de baxar unos metros, y xuntános a la canal de xubida, p'aportar a la H.orcada'l Llebaniegu una vegada más, y entamar una baxada alternativa hacia'l H.ugón de Villasobrada.


Cuchiellos y Cuchallón de Villasobrada

Alcontrámonos con una baxada pestosa, na que los continuos resbaríos pel pedreru, facíen dar col culu nes piedres, pero diónos igual ya que fuimos a conocer un h.ou fascinante, con una cantidá d'aguh.es precioses, que por dalgún motivu raru, nun tienen nome y que paecen "formar parte" de la propia Morra.


Alloriáu pola cantidá de cumales na redolada de la Morra

Ya nun lo ví tan claru, y paecióme inxustu, qu'unes aguh.es tan increyibles, foran olvidaes tando otres con nome y ascensiones como la de los Martínez. Nun se si seré dalgún día capaz de meté-yos man, pero al menos facer una intentona y conocer meyor los accesos y les sos posibilidaes, prestaríame pola vida.

Supongo que muncho d'esto debe pasá-yos a les collacies de la Peñe Castil, que sirven de torreones a la torre mayor, y que tienen prominencies de más de 10 ms, que sepártanles dafechu y merecen ser consideraes, al igual que la Canalona o Bustamente, por dicir dalgunes.


Averándonos a collada Bonita colas Colladetas, Aguh.a Martínez y Cuchallón de Villasobrada

Desdexamos tales camientos, y siguimos camín pel pedreru, ensín perder muncho altor, pa xuntános delantre del Cuchallón de Villasobrada, col camín que vien de la fastera de las Coteras Roh.as y del colláu de la Canalona, pa entamar de nuevu una xubida más nel día a la Collada Bonita.


Mítica semeya del Picu na Collada Bonita (2377 ms)

El cansanciu golpea fuerte ya, y les pates nótense dures pol esfuerzu y la tensión de les baxaes nos pedreros, y cuéstanos abondo aportar a los 2377 ms de la Collada Bonita. Menos mal que'l Picu siempre ta presente p'animanos y ufrecénos la so amable cara sur.


Baxando de la Collada Bonita

Dexamos la Collada Bonita con más de 7 hores de camín y con bones alcordances de tiempos pasaos, y entainamos la baxada hacia les parés del H.ugu Treselpicu y hacia'l Picu, dándonos la vuelta de xemes en cuando pa ver requexos d'ascensu na Torre las Colladetas, Aguh.a Martínez y la Torre L'Osu.


Faldiando'l H.ugu Treselpicu

En media hora taremos baxo la mole del Picu, nel colláu de la Celada, onde alcontrámonos pocu dempués d'entamar la baxada con una cueva desconocía pa nós, a pesar de les vegaes que tuviemos nesti colláu. De xuru, que ta enllena ñeve y xelu durante casi tol añu, y esti desxeló al completu casi, dexando les sos entrañes al descubiertu.


Ablucante cueva nel Colláu de la Celada y Fernan col Urriellu

Magar de les semeyes col Picu, decidimos nun tomar la mítica baxada pola Canal de la Celada y garrar una alternativa al traviés del H.ugu del Carnizosu del que lleéramos ascensiones a la Torre del mesmu nome al traviés d'elli.


Escucando la baxada hacia'l H.ugu del Carnizosu

Ensín más tirámonos abaxo, y facemos el descensu en senderu bien pisáu que nos dexaría dempués nun cómodu pedreru que travesaría'l h.ou de llau a llau, hasta'l final d'ésti onde paez que los caminos dixébranse nun claru ascensu hasta un hombru a la nuesa mandrecha o nuna baxada más caótica per un pedreru de grandes dimensiones.


Pasando polos H.ugus del Carnizosu hacia'l Valle L'Agua

Decidimos siguir la xubida al hombru y dempués d'un ratín dámonos cuenta que nos lleva a les cabañes de Cambureru y poro a les cercaníes del colláu Cambureru y al valle L'Augua que xube hasta él.

Esti llugar conocíamoslo de la xubida pela otra fastera a la Peñe Castil, pero nun pudiéramos esfrutar de tola so belleza por mor de la ñebla y del mal día que tuviéramos. Agora sí, vimos lo guapu del llugar qu'asítiase ente'l Cabezu Los Tortorios y tola pala de xubida hacia Castil.


Valle L'Agua y colláu Cambureru

Dempués de pisar gayoléramente per estos praos y escaecer un ratín al menos la caliza, decidimos baxar pol Valle L'Agua hasta'l camín hacia Pandébano, ya que tornar atrás pa baxar pol final del h.ugu Carnizosu, nun mos apetez res.

Baxaremos un pelín p'alcontrar la fonte'l Meadoriu, y siguimos per un lleve senderín, hasta que nos pide xubinos a un hombru a la nuesa mandrecha, el cual nos fae abandonar esti Valle L'Agua.


Baxando tol Valle L'Agua y el Cantu Valleh.u

Tamos nel hombru del Cantu Valleh.u y a la esquierda tenemos el Valle L'Agua, del que vemos una estrechez esmoleciente y na mandrecha la canal del Valleh.u, la cual tien un aspeutu mui asemeyáu a la canal anterior y casi paralela.

Decidimos baxar por tol Cantu, metiéndonos nun tarrén feu, de yerba llarga y calices afilaes qu'escuende peligrosos pozos, nos qu'hai qu'andar sollerte pa nun meter la pata y frayala. Eso facemos y pesar del curiáu que tenemos y de siguir lo más pisáu na yerba qu'albidramos, tenemos abondos resbaríones, culaes y dalguna "metedura de pata", asína que munchu güeyu con esta baxada.


Caberu tramu del colláu Valleh.u a Pandébano

Al final, toparémonos col camín que baxa de Vega Urriellu xusto enantes del colláu Valleh.u, dexando embaxo'l restu de canal Valleh.u, que baxa perpindia hasta'l H.ue Baxu, entamu de la canal del Valcosín, fecha por nós nun va muncho tiempu.

Dempués de despedínos del Picu, nel colláu, baxaremos como siempre, hasta la Trenosa, onde facemos los últimos penosos pasos hasta l'aparcaderu de Pandébano, allugamientu del nuesu coche, dempués de 10 hores y 40 minutos de ruta.

Nestes casi 11 hores, aparte de caleyar 18,5 kms y superar unos 1970 ms de desnivel acumuláu, lo que más nos prestó, foi conocer esa parte de los Urrieles que ta detrás del Picu Urriellu, y supongo que sobretóu facer una actividá potente Fernan y yo, cosa que nun pasara dende'l finde santu, onde dimos preste a Peñasanta d'Asturies y a Peñasanta Castiella.


Camudando'l Camín dende La Morra

Nesti rutón ficimos 3 dosmiles de Cabrales que pertenecen al club 111 de Picos: La Morra (cumal Occidental (2550 ms) y cumal Oriental (2558 ms)) y el primer Campanariu (2547 ms)
Ver progresos en: Retos montañeros

4 comentarios:

  1. Dice Bittor que aparte de que estamos locos, que el 30 al medio día vais a ganar el primer partido de la liga ja,ja,ja.
    Abrazus de toos.

    ResponderEliminar
  2. Berto, Fernan; felicidades! una ruta estupenda, por collados muy guapos.
    Ya te quedan menos cumbres por la zona.
    Cual será la próxima?
    Un saludo

    ResponderEliminar
  3. Fernan di-y a Bittor, que l'Sporting va ganar esta selmana, y al Athletic tamién dos selmanes dempués... que quies, d'ilusiones vive'l tonto los ...

    Monchu, ya sabes como va esto de Picos, ye dir un día de ruta y ya tener en mente cual podría ser el siguiente, jeje

    Un abrazu

    ResponderEliminar
  4. Buen pateo, y valla con el paso. En esas situaciones prefiero no mirar.

    Saludos,

    Ricardo
    www.piratasfree.com

    ResponderEliminar