jueves, 6 de octubre de 2011

El Puertu (Cangas del Narcea) - El Cuetu d'Arbas

25 de Setiembre de 2011

Track: El Puertu (Cangas del Narcea) - El Cuetu d'Arbas



Entamamos nueva temporada nel GM Xuan de la Borrina y facémoslu con una ruta que quedónos de la temporada anterior y que yera afayaiza pa cellebrar un aniciu sele y una fartura posterior más dura, jeje.

Siempre, presta dir de monte muncha xente, xuntáse de nuevu ya que non tol mundiu, tien esi afán montañeru casi enfermizu y descansa na dómina braniega hasta la segunda quincena de setiembre, fecha oficial d'entamu.


Grupu de salida nel Puertu L.leitariegos (1528 ms)

Pa esta ruta, xuníase a nós una nueva collacia pal grupu, como ye Paulina, que ya participara conmingu en delles rutes seliquines y otres non tanto, como'l Requexón de Valdunes, como entrenu y agora métíase dafechu nel grupu. Tamién recuperamos a Diego Currás, que tuvu un añu en blancu y casi tenemos que facer memoria p'alcordanos de la última ruta na que tuvo con nós: Val.le (Somiedu) - L.lagu'l Val.le - Albos - L.lagos de Saliencia.

Por últimu, dicir que les moces de Carlos y Pangua, Carla y Rebe respeutivamente, tamién xuniéronse a nós, pa participar nuna ruta que partía del Puertu cangués de L.leitariegos y más en concretu del pueblu d'El Puertu, al cual aportamos dempués d'un bon viaxe dende Xixón hasta Vil.lablino, garrando l'autovía del Güerna y travesando conceyos llioneses como Babia y L.laciana.



Xubiendo altor per bona pista siempre

Como'l desayunu en Vil.lablino y la breve estancia que pasamos nesti pueblu, nun tien muncho que comentar, más qu'echános unes bones rises, pasamos a dicir qu'unos minutos enantes de les 11 tábemos ya preparaos pa echar a andar. Nun ye davezu dar el primer pasu a una hora tan tardía pero nun había motivos pa madrugar de más, polo curtiu de la ruta.

Asína pues, salimos andando d'El Puertu (1528 ms), y bien ceo, dámonos cuenta que l'intentu de recuperar una antigua sienda qu'aportaba a la l.laguna d'El Puertu de forma direuta va ser ermu, y magar d'unos minutos de llucha escontra escobones, vamos acabar cayendo igualmente na pista formigonada que n'envueltes dirá xubiéndonos hasta esti guapu llagu glaciar.



Na redolada de la L.laguna d'El Puertu

Tres cuartos d'hora y perder a Carlos pente les escobes, ye lo que tardamos en ponénos nos 1690 ms d'altor qu'acolumbren esta masa d'agua, que nesta dómina del añu, ta enllena d'una especie d'alga qu'afea dafechu la so visión, pero que nel iviernu tien que ser bien guapu.

Como vamos con tiempu, y pa facer la ruta dalgo más prestosa, decidimos da-y la vuelta'l l.lagu, algamando delles vistes guapes y siguimos caleyando pa garrar una especie de canal pindiuca que nos tenía que dexar nel colláu de la Fanetina a casi 1900 ms.


Reaniciando l'ascensión dende la l.laguna (1700 ms)

El caleyar seguirá siendo sele, y darános pa renembrar delles hestories montañeres de temporaes pasaes, de rutes nos que nos faltó la compaña del "papi" Simón y tamién de les más cercanes Travesera y viaxe a Pireneus. Tamién valió pa probase físicamente, ya que'l propiu Simón quiso pegar un arranque y tiró canal arriba con fuercia dándose cuenta de que los parones nun vienen demasiáu bien.



Vamos dexando la l.laguna embaxu p'aportar al colláu Fanetina

Nesti colláu vamos xuntános toos, y dempués de dixebrar cotes de Somiedu como'l Cornón y el Cogol.lu Cebol.léu que tantes alcordances nos traen, vamos garrar ya l'arista final que nos fadrá pasar fácilmente pol Altu la Ferradura (1993 ms), enantes d'encarar la parte final hacia'l Cuetu d'Arbas


Crestiando pol Altu Ferradura hacia'l Cuetu d'Arbas

Dos hores xustes, tardamos n'arribar a esti cumal de 2006 ms, que ye la primer cota de Cangas del Narcea y primer cumal de más de dosmil metros dende l'occidente del cordal Cantábricu, y vamos facelo con un día preciosu soleyeru que nun sirve pa más que dános más ganes de salir al monte, tanto a los nuevos integrantes de Xuan de la Borrina, como a los más vieyos.


Nel cumal d'El Cuetu d'Arbas (2006 ms)

Diez minutos tan solu tuvimos nesta cume, porque a pesar del chocolate, los estómagos taben ruxendo, porque ya sabíen lo que-yos asperaba, una bona fartura. Poro, tiramos p'abaxo pola mesma cresta, y una vegada nel colláu, decidimos variar un pocu la baxada, garrando un camín que va pegáu a un cumal de 1907 ms que pudiera ser la Fanetina polo cercanu col colláu.


Baxando de nuevu al colláu Fanetina (1878 ms)

Nun ta mui nidiu'l nome, pero lo que sí aseguramos foi una baxada rápida y cómoda hasta una curva onde nos topamos colos remontes de les pistes d'esquí de L.leitariegos, garrando entós una de les pistes que diba dexános dempués de pasar per una guapa área recreativa, na mesma pista formigonada que nos diba dexar n'El Puertu unos minutos dempués de les 2 de la tarde.



Baxando sele poles pistes d'esquí hasta'l Puertu

En resumen, fueron unes 3 hores y cuartu de ruta, nos que dimos preste a esti guapu cumal, faciendo pa ello 8,9 kms y superando un desnivel acumuláu de 521 ms, que nun ye muncho, pero pa facer fame ya val.

Poro, mudámonos de ropa y baxamos el puertu esta vegada hacia la fastera asturiana travesando los pueblos de Brañas, La Chabola, L.lindouta, L'Outeiru, San Pedru d'Arbas, Vil.lacibrán, Vil.laicanes, Bimeda y Las Mestas, onde ficimos parada pa xintar nel restaurante Maria Luisa.


Xinta d'entamu de temporada nel restaurante Maria Luisa

Ellí tomamos unes cerveces pa quitar el secañu y llueu metímonos la mayoría una fartura de fabada y corderu como ta mandáu. Hai que dicir, que la ruta nun quemó lo suficiente pa xinta tala, pero bono estes coses son así. Otros díes tamién toca pasar fame con barrines enerxétiques, chocolate y sandwiches pa metése sobas de más de 8 hores, jeje.

Asína da gustu entamar l'añu montañeru, con lo que pa mi que garramos puxu pa les siguientes rutes de sobra... ver veremos.


Camudando'l Camín dende'l Cuetu d'Arbas

Nesti día ficimos les dos cotes más altes de Cangas del Narcea: Altu la Ferradura (1993 ms) y Cuitu Arbás (2006 ms), que ye vértice xeodésicu, dos mil y monte prestosu astur.Ver progresos en: Retos montañeros

11 comentarios:

  1. Mira que tengoi ganes a esa zona, pero ye que me da pereza pegarme esa kilometrá en coche. Muy guapa la laguna, ta pa pegarse un baño en ella.
    Saludos

    ResponderEliminar
  2. Jonatan, tira por Vil.lablino, qu'en menos d'hora y media tas n'El Puertu. Por Asturies, ye llargu, llargu.

    Un saludu

    ResponderEliminar
  3. Para comenzar bien, con buen tiempo y de relax, a ver si sigue así, lo del tiempo digo.
    Vaya madrugón, a las 6:30 en Arenas!!!!!!
    Nos vemos collaciu!

    ResponderEliminar
  4. Que me vas contar de madrugón a mi. A les 5 la mañana enriba. Me da que voi dir escuchando campanes tol camín, jeje

    Vémonos

    ResponderEliminar
  5. Hola Berto, guapa ruta. La tengo hecho varias veces, incluso con bastante nieve como la entrada que tengo en el el blog. Siempre me gustó mucho esta zona, no se por lo lo lejos que la tenemos o que, el caso es que ya tengo canas de acercarme por allí. Eso sí, a ser posible, a ver si la rematamos con una comida en el rest. Maria Luisa
    Un saludo

    ResponderEliminar
  6. Recomendáu al 100%, ta riquísimu too.

    ResponderEliminar
  7. Berto, a esi cumal tengo-y yo munches ganes pero faciendolu en redondu pa dir hasta les fuentes del Narcea. El collaciu Xicu díxome que yera zuna restrinxida pero a mi parezme que si lu faigo como tengo pensao nun me meto en ella. Y si non, pues si lo tien que ser, que lo seya, porque dir, voy dir per alli, ja, ja.
    Un saludu

    ResponderEliminar
  8. Ya sabes, llueu comentes nel blog que solo fue un sueñu y p'alantre, jajaja

    Un saludu

    ResponderEliminar
  9. Hola Berto Xuan, vaya día mas guapo que tuvísteis así lo demuestra este fantástico reportaje. Ese pico también lo tenemos pendiente pero habrá que ponerle remedio más pronto que tarde je,je,je.
    Saludos.

    ResponderEliminar
  10. Ya me estraña que nun lo tuvieses nel haber montañeru, col bagaxe que gastáis pelos montes astures.

    Gracies pol comentariu

    Un abrazu a los dos

    ResponderEliminar
  11. Coime pues ye verdá, una suañu como´l tuyu pol l.lau Bonu, ja, ja.
    Un saludu

    ResponderEliminar