miércoles, 26 de abril de 2017

Pombayón (Ponga) - Picu Canellín

11 de Marzu de 2017

Track: Ponte Pombayón (Ponga) - Picu Canellín


Alcuérdome siempre del picu Canellín por varies razones. Una d'elles fué entrugame Carlos, qu'onde taba, ya que salía nel famosu llibru de los cien montes d'Asturies y nun tenía daquella mui claro onde andaba.

Llueu, tamién costaba alcontrar información amañosa p'ascendelo, hasta que los collacios de los de las Claras, sacaron una circular bien prestosa, na que sacante del propiu picu en cuestión, lo más importante como casi siempre yera'l percorríu.

Poro, cola ruta marcada na llibretina de pendientes, tocaba tener la oportunidá de facela y dempués de que na Xuntanza de la temporada pasada, na que'l tiempu nun mos dexó facer lo planiáu, tuvimos que reservala pa otra vegada y al fin tocó poder conocer el Canellín y la so redolada.

Semeya de grupu penriba nel Monte Cuevu (625 m)

miércoles, 12 de abril de 2017

Puerta de Muniel.los (Cangas del Narcea)

26 de Marzu de 2017

Track: Puerta de Muniel.los (Cangas del Narcea)


Web del Trail: Puerta de Muniel.los (Cangas del Narcea)

Clasificaciones: Clasificaciones 2017  


Segunda carrera llarguina dempués de la Cangues Mountain y parón d'un par de selmanes ensin entrenar n'absoluto y sigo tocáu. Nun debería correla, pero equí toi y dempués un sábadu peragradable per Cangas y Mual tomando dalgo, llega'l domingu y llevántome en Mual preparándome con un fríu curiosín y siendo de nueche entá.

Paso pela carpa de la organización, onde almuerzo un cafetín con pastes, riquísimes, ya que tovía tengo la carne a la piedra de la nueche anterior nel gargüelu, falo con xente conocío un ratín y empobínome de nuevu hasta la furgo camentando si debo correr o non.

GM Xuan de la Borrina y Asgaya Team

Finalmente, ye carrera non conocía y vamos ver como de mal tenemos la patuca. Poro, aportamos a la salida, ensin nervios siquiera, saliendo de tranqui con Illán, Alberto y compañía viendo que pueu llevar ritmos lentonos ensin munchos dolores.

Pasen unos pocos kilómetros, cruciando de nuevu Mual, hasta entamar la xubida más llarga nel pueblu d'Oubachu, onde caleyando veóme bien y llevando los dos palos descargo abondo la cadera, poro decido tirar pola mió cuenta y apretar nel ascensu al menos pa sentime que toi forciando un pocu.

Pasando per Mual y Oubachu

L'ascensión ye cenciella y mui tendía, con cuatru repechos duros pel pueblu y ceo alcontrámonos nel tramu más guapu de la carrera, xubiendo pelos montes d'Oubachu hacia la pena Ventana, onde alcontrámonos con venti centímetros de ñeve.

Equí, con un fríu y tramos onde la ventisca azota con fuercia voi ganando posiciones y pasándolo realmente bien. Abluca, la implicación de los voluntarios, animando tol tiempu, con kilos de ropa pa soportar el vientu y el fríu pero siempre con una sorrisa y muchos aplausos amatagos poles manoples.

Divirtiéndonos pel tramu de los montes d'Oubachu con ñeve y ventiscu

Pero tolo bono, acábase y toca'l descensu, el cual demientres hai ñeve y trialera voi esfrutando, pero cuando toca metese en pista, vuelvo a los problemes de siempre nun pudiendo aguantar un ritmu curiosu nin una zancada decente ya que la carga de la pierna derecha pa a más.

Aún así, aguanto'l tramu hasta aportar a la vera'l ríu Muniel.los onde tenemos un llargu tramu de llanu picando un pelín, nel que debería correr fuertísimo pero lo únicu que soi capaz de facer ye cargar enforma y llego al avituallamientu mui doloríu y con un calor increyible.

Baxando per pista hacia'l ríu Muniel.los

Paro un ratín a quitar el cortavientos y salgo mediu andando, decidiendo acabar la carrera como sea, yendo despacín hasta qu'entama la xubida hacia la Pena'l Moncóu, onde pueu tirar p'arriba caleyando y vuelvo a sentime bien y garrar ritmu.

Apretaré tolo posible nesti tramu, adelantando munches posiciones baxando de la Pena'l Moncóu pa meteme n'otru tramu de pista onde toca penar y vuelvo a cargame enforma. Aún así, aguanto'l tirón hasta ver cerquina'l pueblu de Mual.

Crestiando pela Pena'l Moncóu

Namás queden tres kilómetros y la sorpresa que ya m'anunciaren dellos corredores aporta, teniendo que xubir de nuevu un montón de metros de desnivel nos qu'otra vegada apreto porque ye onde meyor voi, pero cuando facemos la envuelta pa garrar la pista final de baxada, entamo a tener calambres nos cuadriceps.

D'esti xeitu, faigo l'últimu kilómetru y mediu, eternu, ensin saber mui bien nin como pisar, pa que nun se me xuba'l cuadriceps, nin me duela'l piramidal. Fecho una llaceria soi a alcanzar nel tramu más téunicu a Rubén que va faciendo un carrerón y entro na meta con él con un tiempu de 4 hores y 15 minutinos más menos... qu'espero poder baxar en media horina pa la próxima vegada que corra en Mual.

Porque ye imposible nun volver, col nivel d'organización d'esta carrera, lo implicáu del conceyu enteru de Cangas del Narcea en xeneral y en particular, les asociaciones de Mual, que lleven una carrera, casi demasiáu correndera pa mí, a un nivel de folixa pal pueblu y pal corredor.

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Lastra, Carmen Martinez Valdés, MVFoto, Joselu A F...) 

martes, 11 de abril de 2017

Cangues Mountain (Cangues d'Onís)

4 de Marzu de 2017

Track: Cangues Montain (Cangues d'Onís)


Web del Trail: Cangues Montain (Cangues d'Onís)

Clasificaciones: Clasificaciones 2017  


Primer carrera llarga de la temporada dempués de varies curties pa dir garrando puxu y pa diversión y allegría llego lesionáu. Paezme que ya diba cargando de más nes últimes carreres y nun pude recuperar de nenguna manera.

Primeros kilómetros xubiendo al picu L'Arbolín y veo claramente que nun pueu correr, nin caltener un ritmu curiosu en kilómetros llanos, nin xubiendo voi cómodu y muncho pior nes baxaes onde nun pueu llevar nin una zancada llarga.

Dende Cangues d'Onís per Andrín hacia Tornín

De la que paso per Cangues de nuevu, apetezme muncho abandonar y ye que dame muncha rabia, que con un día con unes condiciones brutales con bon tiempu y una temperatura agradable nun pueda dalo too.

Aún así, sigo porque Alberto ta ehí animándome ya intento camudar los malos camientos, intentando esfrutar a unos ritmos llamentables. Pa cuando aporto a Aballe magar d'un tramu llargu de carretera voi sufriendo munchísimu y con dolores perimportantes.

Perguapa la xubida dende la Olla San Vicenti

Menos mal, que ceo entama la xubida hacia'l colláu Andrín y caleyando pueu llevar hasta unos ritmos decentes y pueu esfrutar un pocu más, con un tramu más quebrapates de xubies y baxaes, poro con sensaciones dafechu diferentes aporto a Santianes onde tiramos hacia la Olla San Vicenti y ye Alberto quien entama a tener calambres.

Nun soi a creelu, vamos mui despaciu y tien problemes físicos, cuando ya-y dixe que tirara p'alantre mil vegaes. Nel intre, paramos dacuando y aportamos a la Olla onde entama la xubida final hacia Següencu, na que voi esfrutando polo guapu del percorríu pero Alberto nun recupera y vamos a pior entá.

De Següencu hacia Cangues d'Onís apretando un pocu más

Aportamos al caberu avituallamientu, con parada llarguísima y toca metese l'últimu repechu hasta'l Mirador de Següencu pa baxar cola calma hacia Cangues d'Onís, onde alcanzamos a Ruben y alcánzanos Fátima a la que xúnome a mou llebre pa facer los kilómetros finales hasta la meta.

A la fin... carrera llamentable que podría dárseme perbien pol tipu de percorríu, con tramos quebrapates, pero mui correndera, llegando a meta mui desilusionáu pola lesión y nun diben acabase equí los sufrimientos en carreres.

Camudando'l Camín per Cangues

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Lastra, Carmen Martinez Valdés, Trece Fotografías, Gilber,...) 

jueves, 6 de abril de 2017

Pigüeña (Somiedu) - Xerra de Pigüeña

26 de Febreru de 2017

Track: Pigüeña (Somiedu) - Xerra de Pigüeña


Cola ñeve nos altos y dempués d'esfrutala como ta mandáu na xornada anterior tornamos al monte col grupu montaña decidiendo facer dalguna ruta pel suroccidente, poro tiramos hasta Somiedu. La idega yera tornar al valle del Pigüeña que nun recibía una visita nuesa dende'l finde del Cornón y Cogol.lu Cebol.léu.

Esta vegada, quería conocer la fastera norte de Somiedu asina que tirámonos a conocer la Xerra Pigüeña, que tan bien nos amuesa col so arte descriptivu, el collaciu Cienfuegos. P'aportar a Pigüeña garramos autovía "Y" en direición Uviéu, pa siguir dempués en direición Grau pola As-63, hasta la salida de Cangas del Narcea.

Salimos de Pigüeña (625 m)