jueves, 30 de mayo de 2013

Puertu Cienfuegos (Ibias) - Picu Miravalles

26 de Mayu de 2013

Track: Puertu Cienfuegos (Ibias) - Picu Miravalles


Tamos nel fín del mundiu.... astur... entiéndase, jeje. Venimos de monte hasta Ibias, a conocer un pelín meyor tola xeografía asturiana. Pa ello, tenemos intención de xubir ún de los cumales más míticos del cordal cantábricu y nesti casu de la fastera d'Os Ancares... el Miravalles.

P'aportar equí, tócanos facer una tirada en coche llarga, llarga, saliendo de Xixón a les 6 y media la mañana, pa garrar l'autovía de Grau, dempués de bordiar Uviéu, hasta'l so final. Ellí, como siempre, garramos la As-15 hasta Cangas del Narcea, pa pocu dempués parar en Pinl.lés a almorzar como lo ficiéramos na ruta na que visitamos Seroiro.

Siguiremos camín pela As-15, siguiendo'l ríu Narcea, pol conceyu de Cangas, hasta topanos col túnel d'El Rañadoiru, pa salir por L.larón y baxar al conceyu de Degaña, conociendo'l guapu pueblu de Fonduveigas al llau del ríu Ibias agora.

martes, 21 de mayo de 2013

Meyor blogue de montaña Landher Montaña y Millet

Esta ye una entrada d'eses que perderáse pa siempre nel furacu'l tiempu, jeje. Pero namás ye pa contaros que l'enllaz que veis a la mandrecha'l blogue ye porque toi participando nun concursu de blogues de montaña.



Si vos presta'l mio blogue podéis votame, poniendo'l vuesu nome y apellíos, la direición d'email y Camudando'l Camín o http://camudandolcamin.blogspot.com.es/ nel votu pa ello, tenéis que facelu... EQUI

Tenéis ehí, les normes y participáis nun sorteu pa una chaqueta téunica MILLET de 210 pavetes, jeje.

Animáivos y votar tolos blogues que vos presten

Un abrazu


viernes, 17 de mayo de 2013

Puertu Vegará (Ayer) - Picu Noales

12 de Mayu de 2013

Track: Puertu Vegará (Ayer) - Picu Noales


Entamo a escribir esta entrada nel blogue, dende'l respetu d'un humilde pisapraos hacia un alpinista de los grandes recién fallecíu, Alexei Bolotov. Estes coses pasen, muerren por facer en mayor medida lo mesmu que tamién préstanos a nós facer... conocer y ascender montañes.

Según les sos propies pallabres, les montañes son roca y xelu, y somos nós, los que-yos dámos entidá al intentar superar, les prebes que ponen nel camín pa la so ascensión. Al igual que la montaña, la nuesa entidá, grandísima entidá d'esti rusu, fuímos a conocela nel documental "Pura Vida", onde pudimos agüeyar como los más grandes montañeros tórnense empequeñecíos ante la fuercia d'una gran muyer.

miércoles, 15 de mayo de 2013

Rutes del añu y d’un futuru llonxanu

 Ensín más.... una anuncia perimportante del nuesu GM Xuan de la Borrina....
 

"Como anuncia, avisar que dende la páxina nun se va promociar, per adelantráu, nenguna de les nueses actividaes, cosa que sí que díbemos faciendo nos años anteriores.

La razón nun ye otra, que amosar que nun somos un grupu montaña al usu, y nun ufreciémos la posibilidá de guiyar a naide que quiera apuntase al traviés de la páxina. Dellos grupos de montaña, anuncien les sos actividaes en periódicos, col envís de xuntar a más xente y enllenar autobuses.

Nun ye la manera de pensar que tenemos, ya que llevar a xente conlleva una responsabilidá, que nun podemos permitinos pagar en forma de seguros y que nun queremos tener, aparte de la nuesa responsabilidá con caún de los miembros del grupu, como collacios que somos.

Esto nun quier dicir, que nun aceptemos a más persones nel grupu, ya que nos últimos años, xente que nun conocíemos, averáronse a nós, por mail, y foron participes del garrapiellu xente, que somos en Xuan de la Borrina, xuntándose a nós a posteriori, magar d’agüeyar cuál ye’l nuesu sentir pa col monte y pa cola vida en xeneral.

La responsabilidá na montaña, ye dalgo que tien que dir dientro de caún, pa consigo mesmu y pa colos demás que formen parte del to grupu, por eso, nun somos quien a poné-y preciu en mou de seguru a l’amistá.

Un abrazu xente"

viernes, 3 de mayo de 2013

El Cable (Llébana) - Picu Tesoreru

21 d'Abril de 2013

Track: El Cable (Llébana) - Picu Tesoreru



Nun m'alcuerdo casi, qu'añu foi'l que plantegué l'ascensión al Tesoreru, pero que nun diba ser n'ivernal taba claro. El casu ye qu'al final, en branu nun se dieron les premises, ya que pretendía pasar un finde per Cantabria de casa rural y demás, pero la crisis ta fadiándonos hasta pa facer planes pol estilu.

Finalmente, dióse la oportunidá d'intentar colos collacios vascos, Iker ya Ibán, una intentona con bien de ñeve y p'allá que fuímonos nesti mes d'Abril, Pangua, Haritz y yo, siendo minoría asturiana nel grupu, pa facer montaña en Cantabria,... coses que pasen.

Col madrugón de les grandes ocasiones, dexo a Paulina na cama, con un gripazu d'órdagu. Menos mal que Kíla rápidamente, acompáñala xubiéndose a la cama y consuélala un puquiñín, ya qu'ella tamién diba ser de la partida anicial na ruta.

Cableando en H.uentedé... son trampes montañeres... nun me presta muncho

Facemos tol tramu d'autovia'l Cantábricu con bon humor, aportando a Unquera y d'ellí, tiramos hasta Panes, onde almorzamos toos xuntos, magar d'unos abrazos ya que dende la Xuntanza d'esti añu, nun mos veíamos.

De Panes garraremos la N-621, que nos llevará pol desfiladeru del ríu Deva, y que fadrános pasar por pueblos cántabros como La Hermida, Potes, Espinama y finalmente H.uentedé, con un trayeutu ablucante de vistes, hacia'l macizu Oriental de Picos.

Aportamos so les 9 y media la mañana al aparcaderu de H.uentedé, onde preparámonos con calma, garrando tolo necesariu ya intentando nun escaecer nada que pudiera ser precisu. Tenemos la intención de garrar el primer teléfericu hasta'l Cable.


Semeya de grupu nel Cable (1845 ms) nun día ablucante de sol

Na mio tiesta, namái aportar al aparcaderu y ver la senda l'Hacheru dafechu prauticable, repítese una vegada y otra, que coño faigo xubiendo nel trastu esti. Aparte los 14 pavos pa federaos, siento que toi faciendo trampes... quitándome desnivel y perdiendo una sienda bien guapa de repetir.

Demientres esperamos pol trastu, vemos na cola a Tino, Jose y la so muyer, Andrea, que van xubir hacia la Padiorna, o al menos tienen esa idega. A glayíos saludámonos, pente'l xentíu d'esquiadores y turistes que tan a la espera del so turnu. Paez mentira, que dos años enantes, alcontráramonos xubiendo hacia'l Cable y dende entós, xurdiera una amistá.

Al fin, tócanos el turnu, toi nerviosu, ya que nunca nun me xubiera a esti trastu y la verdá que sacante, les mio oxeciones montañeres, nun me presta andar colgáu nesti cubil d'un cable, con 500 ms de vuelu, embaxo los pies.

Vistes brutales dende Remoña a peña Olvidada

Menos mal, que nun tarda res en llegar al Cable (1845 ms) y garro aliendu, al pisar de nuevu la peña al salir de les instalaciones. Pisar peña y ñeve, llevantando la vista y... segundos de nun falar,... Picos ye brutal... que vistes.

Pente Peña Remoña y la Padiorna, algamo a dixebrar, les torres de Salinas y del Hoyo Lliordes, siguiendo a Altaiz y San Carlos a la mandrecha, pasando pol nuesu destín, el Tesoreru.... respigu... y sigo acolumbrando H.orcaos Roh.os y tol macizu de Peña Olvidada y Peña Vieh.a. Esto si que ye una circular, jeje.

El camín qu'espéranos per delantre, ye bien conocíu, caleyaremos penriba los munchos metros de ñeve, que tapecen la pista que va hacia Cabaña Verónica. Como ye normal, nun vamos solos, decenes d'esquiadores, de turistes en pantalón curtiu, tan semaos per tola sábana blanca que ye esta fastera de los Urrieles.

Baxo les parés de Peña Olvidada, el que nun s'entretien ye porque nun quier

Hai de too y pa toos, demientres colocámonos los crampones pa nun perder tiempu, oyemos el ruiu d'un aparatín que nun sabemos que ye, hasta que vemos a un paisanu xugando con un coche teledirixíu 4x4. Como dixe hai xente pa too.

Nós a lo nuestru, a esfrutar d'una ñeve nun estáu perfeutu pa cramponear. Aún así, mirando pa les cares, paez ser, que nun vamos tolo finos que deberíemos. Les primeres rampes tan costando más de lo debíu, y nun somos a garrar ritmu, parando ca pocu, a mirar el paisaxe, anque la verdá ye que paga la pena.

Ante nós y baxo los paredones y argayos de la Peña Olvidada, van apaeciendo más picos que zarren esti Hoyu Sin Tierra que tamos bordiando pela mandrecha. Altaiz y San Carlos, van quedando a la manzorga, de la torre L'Hoyu Oscuru, del Madeh.unu, Tiru Llagu y Torre Blanca.

Metémonos nel tramu más pindiu hacia'l desvíu pa la Canalona

A la hora de camín andáu, entamaremos a facer envueltes, pa llibrar el desnivel hasta'l crucie de caminos del colláu la Canalona y Verónica. Fadrémoslo demientres vemos a dellos montañeros, ascender per un canalizu hacia les milenta aguh.es de Peña Vieh.a.

Nel desvíu, dexamos poquín a pocu, les aguh.es de la Canalona y Bustamante, así como pasamos de los paredones de los Picos Santana, a les encarnaes parés de la torre de H.orcaos Roh.os, la cual va facenos compaña nel nuesu ascender hasta los H.orcaos Roh.os.

Tramu llanu y con dalgo baxada embaxo la Torre de H.orcaos Roh.os

Pa ello tendremos inclusu que baxar un pelín, llibrando dellos argayos cayíos la selmana pasada, hasta que plantámonos, nel colláu (2278 ms) pente la cabaña Verónica y H.orcaos Roh.os. Nesti puntu, mientres decidimos si xubimos pegaos a la fastera norte o guetamos la ruta pela sur, oyemos dellos glayíos dende Cabaña... son Tino y Jose, que paez ser camudaron los planes.

Nel intre, ye cuando echo en falta a Fernan, la so esperiencia en tolos terrenos, dame tranquilidá y siempre tien una visión positiva de la montaña. Si nun ye d'esta sedrá pa otra, poro nunca nun tien problemes n'intentalo per un llau y si nun pue ser por otru, pero siempre con seguridá.

Aportamos al ablucante mirador de los H.orcaos Roh.os (2344 ms)

L'estáu de la ñeve, convídame al menos, a xubir hasta H.orcaos Roh.os, asina qu'una vocinglada a los cántabros y alcontrámonos toos nos 2344 ms del h.orcáu, cola presencia del Picu Urriellu, como testigu de les presentaciones formales d'ambos grupos.

A la fín, sedremos 8 los que vamos intentar xubir al Tesoreru y vamos facelo pela arista NE, pasando pembaxo les peñes Urrieles. Póngome a abrir la buelga y nun se si sedrán los nervios pero entamo a tirar con xeitu, buscando los meyores pasos protexíos del patiu hacia'l H.ou los Boches.

La ñeve ta dura y los crampones trabayen bien, anque cada envuelta, tien que facese con seguridá col piolé siempre en posición para lo pior. La verdá ye que, namái son unos 300 ms d'envueltes hasta la seguridá de les Urrieles, pero ver el tobogán ensín final hacia'l h.ou, faime desear pasar esti tramu los más aína posible.

Avanzamos pembaxo les peñes Urrieles cola vista puesta na cornisa que tenemos enriba

Llibramos esti primer pasu, que pese a nun tener dificultá, sí que púsonos sollertes y reunímonos nun colláin, baxo la seguridá de les Peñes Urrieles, les cuales tienen a media faldera una cornisa, que sigue arista alantre hasta'l Tesoreru. Estes cotes van quedar pa otru día, l'oxetivu cimeru ye'l Tesoreru y nun toi pa cotes secundaries.

Siguimos avanzando pela pala inclinada baxo les Urrieles y sigo estudiando los pasos a dar. Nun me presta nada, nin la posible superación de la cornisa, nin el canalizu p'algamar l'arista norte, nin el posible bordéu a esa fastera. Poro, restolamos una buelga qu'atraviesa un argayu vieyu, hasta la colladina SE, y esti camín paez seguru y una bona vía pa facer el picu o al menos pa intentalo.

Nun se, si'l ritmu de les primeres tiraes hasta'l collaín o que ya nun diba bien nes anteriores ascensiones, pero Haritz dizme que nun va seguir y Pangua, tampoco paez mui convencíu d'algamar l'ascensu. Magar de deci-yos que pol norte nun vamos a intentalo, deciden igualmente nun seguir y baxen a Verónica a esperanos.

Rápida travesía hacia'l colláu SE del Tesoreru

Ye increyible, casi siéntome mal por nun convencelos y más cuando veo que tardo 3 minutos de reló en facer tola travesía pela faldera del Tesoreru hasta'l colláu SE (2478 ms). Los demás, poquín a pocu van llegando tamién y toos vieron que foi una opción perfácil y rápida.

Tamos namái, qu'a unos 100 ms d'altor de la cumera y podemos dexar les mochiles, pa facer el tramu final ensín pesu. L'únicu que voi xubir con carga voi ser yo, que xubo'l cordino y dalgún trastín por si la cosa tuércese en dalgún momentu.

Les vistes al Llambrión y la Palanca, nun me fai quitar la vista de la pala final

La pala ye pindia, anque paez que ta nun estáu bien guapu pa da-y preste al picu. Amás tenemos una buelga del día anterior, poro tiro p'alantre y na primer parte na que la inclinación ye más sele, aprovecho pa facer semeyes al Llambrión y la Palanca, quedando ablucáu de la cantidá de ñeve que cayó esti añu.

La segunda parte, la pala va afilándose pela mandrecha y poniéndose tiesa, poro les semeyes pasaron a meyor vida, y tocó afitase bien col piolé y preparar una buena buelga escalonada, hasta l'arista nun vaya ser que dalguien resbaríe y baxe hasta la collada Blanca, jeje.

Finalmente, llego a l'arista, viendo que ye cortina hasta la cume y que nun vamos tener problemes pa xubir tol mundiu. Eso sí, con pindies pales pa los dos llaos, nun vamos tener munchu sitiu pa movese, jeje. Unos cuantos pasinos más asítiome nel llugar más altu del conu ñeve y... 2572 ms del Tesoreru.... felicidá.

Cumeeeeee del Tesoreru (2572 ms).... brutal

Unes 3 hores y media dempués, tamos toos nel cumal, nun se l'orde pero pasín ente pasu, fuimos colocándonos toos na afilada aleta de ñeve qu'encuma'l picu. Ye más, somos a albidrar el buzón de cume, unos metros embaxo nuesa, jeje.

Equí caún, tendrá les sos sensaciones y guardaráseles pa él, anque vi a tol grupu feliz. Yo personalmente, taba más contentu, col resultáu global de xubir a tol mundiu de forma segura, que pola propia ascensión en sí, que foi cenciella pero guapísima.


Vistes de Picos (Párdida y Neverón, Torrecerredu, Llambrión, H.orcaos Roh.os...)

Aún así, ... faltábame Paulina, que quedó na cama mala y que podía tar esfrutando del paisaxe y de Picos en tola so fondura, porque toi seguru que diba tar nel cumal conmigo, ensín dengún problema, ya que taba motivada al cien por cien. L'añu que vien... apúntala na llibreta Pau.

Magar de los camientos y de perder un guante y una rodiellera... demientres intentaba sacar una semeya de grupu, tocaba baxar. Eso sí, primer destrepe hasta'l guante pela vertiente norte, recuperándolo y sumando un esfuercín más.

La baxada entamóla Jose, de cara y al segundu pasu, baxó esnalando pela ñeve, frenándose unos metrinos dempués. Quedó claro al instante, que lo meyor yera baxar d'espaldes pa nun baxar del tirón y sin frenu, jeje.

Baxamos hacia'l colláu y d'ehi a cabaña Verónica a descansar

Asína fuimos faciéndolo, ún tres d'otru, hasta la metá de la falda, onde desviéme a pola rodiellera que taba per ellí y a por un palu, que dalgunu de nós, tirara pa que nun-y molestase. Cuando aporto al palu, y tengo a tiru l'otru trapu, póngome de llau, y baxo unes decenes de metros hacia los Hoyos Sengros, muncho más rápidu de lo que ficiera Jose, hasta que soi a deteneme.

Hala, otra esfuerzu más... p'arriba a por too. Recuéyolo, y faigo la travesía hasta la buelga de baxada, onde ya al fin tengo un descensu tranquilu, demientres Iker y Tino, preben les autodetenciones na parte menos inclinada, hasta'l colláu.

Dende equí, reagrupámonos y baxamos bordiando pol norte l'hombru del colláu SE con tranquilidá, hasta ponenos penriba de Cabaña Verónica. Ellí, topámonos con Pangua y Haritz, que llevaben descansando un bon ratín.

Descansu activu en Cabaña Verónica (2334 ms)

Yeren casi les 3, así que tocaba xintar, descansar y tomar una birra nel refuxu, anque al final nun too diba ser descansar. Pangua contónos qu'a unes moces escapáronse-yos los esquis pela pendinte hacia'l hoyu Sin Tierra, pero nesi momentu, echámonos unes rises y poco más.

Al ratu vien, una moza toa nerviosa diciendo que ve ún de los esquis, pero que nun s'atreve a baxar a por él. Dempués d'entruga-y al refuxeru, retrucándo-y ésti que nun tenía nin cuerda nin na, p'asegurase. Colo que quedamos un pocu alloriaos, de que nun tenga material y decidimos intervenir.

El casu ye que dempués d'un primer vistazu, Iker anímase a intentar recuperalu tamién. La verdá ye que tampoco yera pa tanto onde taba, yera menos inclináu que l'ascensu al Tesoreru, pero la rapaza nun mos dexaba baxar ensín asegurar.

Pa que quería más Iker, colo que-y presta cacharrear, montó una reunión nuna peña, asegurose y asegurome a mí, que baxé a dos piolés, hasta l'esquí, viendo que l'otru taría más menos, nel hoyu Sin Tierra, jeje. Asína que, rescate d'esquí y p'arriba, cola mente tranquila de nun dexar a xente tirada pudiendo aidar y pa enriba too, prauticamos un pocu, pa posible aseguramientos a xente.

Baxamos a pol teleféricu ensín dexar d'echar un vistazu al nuesu Tesoreru

Pa cuando finamos de recoyer too, yeren les 4 y cuartu, y tocaba baxar al Cable en mou fueu, tando nel edificiu del teleféricu, en pocu más d'una hora, y eso que la ñeve ya facíanos meter la pata hasta la rodiella.

Al final, con tantos rescates de palos, trapos y esquís, llegué fundíu al Cable, dempués de 6 hores y 45 minutos d'actividá, anque deberíemos quitá-y hora y media de trastéu estúpidu estra, jeje. Los 10,5 kms de percorríu y los 825 ms d'ascensión acumulada (nun cuento los estra) si que nun vos los quita naide, si queréis repetir esta guapísima ruta al Tesoreru.

Camudando'l Camín nos Urrieles


Nesta ivernal en Picos ficimos con ésitu: Picu Tesoreru (2572 ms) del club 111 y dosmil astur de Picos

Ver progresos en: Retos montañeros