viernes, 25 de mayo de 2018

El L.lamosu (Miranda) - Picu Porcabeza

10 de Febreru de 2018

Track: El L.lamosu (Miranda) - Picu Porcabeza


Otru día más de ruta y otru día que malpenes somos tres persones del GM Xuan de la Borrina pa dir de monte, pa enriba, como non, lióme un pelín tomando dalgo con collacios y duérmome. Resultáu, otra presona que causa baxa al non poder contautar conmigo y Benjamín esperando en Balmonte.

Llamadina a Benjamín, dos minutinos de que facemos, esperes a que llegue y a toa hostia cola furgo pa Balmonte, echando de menos mi Subaru pa nun dir xugándomela a cada curva jeje. Finalmente, facemos el trayeutu dende Xixón per Uviéu, hasta'l desvíu a la A-63 onde salimos hacia Cangas del Narcea.

Vista del L.lamosu (475 m) nuna de les ñevadones d'esi añu

viernes, 18 de mayo de 2018

Pel.luno (Ayer)

7 d'Avientu de 2017

De güei nun añu... eso paez que faigo con dalgunes escueles. Paez imposible, pero si póngome a repasar los llugares nos que tuve esguilando, actualizo entraes del blog, miro les feches y alcuéntrome con que casi xustu un añu que nun paso per esta escuela.

La escalada?... como siempre, dura como un cuernu, pero les vistes increyibles y esti añu, que la ñeve venía dende bien ceo, los montes ayeranos taben preciosos. Nun ye una escuela que me preste muncho, por mor de lo bloqueru del entamu de les víes, pero'l paisaxe namora.

Pocu más que dicir... la escuela con meyores vistes nel centru d'Asturies

No deportivo, como siempre, dedicámonos a facer unes cuantes víes ensín mayores oxetivos que facer unos metrinos dempués d'unos cuantos díes de mal tiempu. Entamamos por Sex Laura (6a+) y la so variante (6b) pa dir metiéndonos en materia.

Día de munchu fríu pero al sol aguantábase bien

Llueu, siguimos con Olor natural (6b), siempre echando un vistazu a la manzorga, onde alcuéntrase'l Desplumadero, un 7a+ que tengo pendiente de probar y con bona pinta y a lo cabero encadenamos tamién Soplanucas, un 6c bastante perrete.

Al final, fue un bon día, sacando toles víes a vista y quedando con bon tastu na boca, poro, abriguéme y dediquéme a facer semeyes y ver trepar a los compañeros. Dacuando, una retirada a tiempu, ye una victoria.

Pel.luno
Croquis modificaos por mi de la escuela d'escalada de Pel.luno, por mor de Piratas Free. Gracies y col so permisu.


-----------------------------------------------------------------------------------------------------------------


jueves, 17 de mayo de 2018

Aviaos (Valdepiélagu)

9 de Setiembre de 2017 

Seguimos de puente per Llión y nel segundu día de trepada folixera, averámonos hasta'l cercanu pueblu d'Aviaos, onde na parte cimera, alcontrámonos con una foz que caltién una escuelina d'escalada nel paré de la manzorga.

Perbon apalanque en Boñar

Ya tuviéramos l'añu pasáu y anque nun ye especialmente guapa, tando tan cerquino, nun queda otra que dir por allí y dir probando vía tres vía. Aparte, teníemos a una compañera mancada d'un todiellu y nesta escuela podíemos xubí-y una siella pa que tuviera como una reina.

Menos mal que l'accesu ye inesistente

La verdá ye que tampoco ye qu'apretásemos muncho, faciendo dalgunos quintinos y sestos baxos, pero ye que dempués de les 13 víes del día anterior nun ye que tuviese pa munches más hestories y menos pa siguir apretando en placa.

Día soleyeru pa trepar o pa siestear

Ensín más, cuando consideramos que ya tuviéramos abondo, colamos d'ellí, personalmente con ganes de pa la próxima visita, trepar nes víes más verticales, ya que tienen bona pinta y puede que pague la pena metese nella.

Víes entreteníes anque seya cola roca pelín nidia

Dende Aviaos a Boñar, bien pocu de percorríu en coche, poro tiramos a tomar dalgo pel pueblu cola calma y nesti día, hasta diónos por cenar en plan guarreres una hamburguesa pa finar por pasar per tolos chigres con pinta de durar hasta bien entrada la nueche.



Aviaos (Seutores visitaos)

Croquis modificaos por mi de la escuela d'escalada de Aviaos sacaos de Escalada en León. Gracies y col so permisu.

 --------------------------------------------------------------

jueves, 3 de mayo de 2018

La Cueva Deboyu (Casu)

4 de Payares de 2017

Averándonos al iviernu, n'Asturies tórnase complicáu, poder trepar en cualesquier escuela, poro toca metese en desplomes y parés nos qu'abellugase del orbayu. Ún d'ellos, como non, ye nel parque natural de Reres en Casu... y más en concretu na Cueva Deboyu.

El día pintaba feu y fríu a partes iguales, pero aún así, con tal de facer dalgo un sábadu cualesquiera, apuntéme a dir a la Cueva Deboyu con poques pretensiones. La idega yera probar dalguna vía y si me veía bien, meteme a negociar la variante Cueva Deboyu (7b).

Guapos collores na paré de los Bombos

Siendo la segunda vegada en Cueva Deboyu y aprovechando qu'entá nun entamara a llover, tuve trepando un ratín nun 6b (El Rey León) siguiendo per un segundu llarguín de 6c+ que paecióme duru enforma, pringando nel pasu, qu'hasta aisláu costó de sacar.

El día amenazando pero na cueva aguántase

Dempués metíme nel Quijote, un 6c+ con entamu raru, metiendo pies en chimenea pa salir a una placa desplomada con bonos agarres y preciosa d'escalar. Salió al primer pegue, llegando un pelín petáu al final pero sin mayores problemes.

Pegues y más pegues nos desplomes de la Cueva Deboyu

El restu del día, dediqueme a asegurar a un collaciu, que taba probando un 8a, teniendo mui bon color pero finalmente nun pudo ser. Tampoco yo, satisfecho con la Quijote, tuve les ganes necesaries pa bregar pel desplome de la variante Cueva Deboyu... otru día habrá que ponese a trabayala.

Cueva Deboyu
Croquis disponibles nun panel al llau de la carretera, anque tan mui desactualizaos 


---------------------------------------------------------------------