viernes, 31 de marzo de 2017

Val.le (Somiedu)

19 Marzu de 2017  

Pues un día más, andamos tiraos per ehí, esfrutando de la vida furgonetera y dempués d'una ruta increyiblemente guapa per Somiedu, que ya contaré porque esa ye otra hestoria, despertámonos nel Val.le del qu'hai que dicir ye'l valle más guapu de too Somiedu, anque seya una pena dicir que'l de Saliencia o del Pigüeña lo seya menos.

El casu ye dempués d'almorzar como paisanos, averámonos a la Pena Blanca onde ta'l principal seutor de la escuelina d'escalada del Val.le. Y digo seutor cimeru, pero pocu aprovecháu porque nesta escuela pudiera abrise víes a lo ancho y a lo alto, sobretou a lo alto... que llargazos saldríen y cuantos metros de trepe.

Ablucante'l día... nun hai sitiu más guapu

Teniemos un par d'oxetivos durante'l día, reequipar ciertes chapes robaes, lo cual solucionamos esguilando un pocu pa calecer y facer dalguna de les 4 víes que tengo ensin probar siquiera, decidiendo meteme nel 6b+ que tien un pasu difícil de lleer.

D'esti xeitu, mandóme a la llona nel primer pegue a vista y tuve que da-y otru pa encadenalo y quedamos mui a gustu, porque la vía ye perbona y repetirela siempre que vaya pel Val.le a trepar pa calecer pa hestories más dures.

Semeyes del val.le dende'l paré con Zori trepando y Richar asegurando

El restu del día, enantes y dempués de facer la vía, dediqueme a reequipar les víes en mal estáu y a asegurar a Haritz que disfrutó munchísimu metíendose metros pal cuerpu nos quintinos tan guapos que tien esta escuelina.

Richar también se enchufó delles víes que tenía ensin probar con un primer quintín que-y costó pa tomar sensaciones y dempués enchufó un 6a brutal con un tramu de fisura y un par de travesíes pa chiflar... viote pal grau que tien.

Así va esto... faltába-y la batina

Y pa nun ser menos Zori, que tovía tien qu'ameyorar la cabecina a la hora de dar los pasos duros apretando y dándolo too, aportó a cadena nun V+ en top, saliendo per un techín, que nunca lo ficiera enantes... así que colamos d'ellí toos encantaos y con ganes de volver.

Dende equí, dar les gracies al chigre d'embaxo la escuela, Casa Cobrana, que dexónos xintar el bocata nes meses de fuera moyando'l gargüelu con una sidre de restallu que tenía. Que rises tar al llau d'unos pih.eres de la capi toos engalanaos y nós enllenos de magnesiu per tolos llaos y dándo-y al sidreu con un bocata de bonito con mayonesa jeje.

Val.le
Croquis modificaos por mi de la escuela d'escalada del Val.le, por mor de Piratas Free y Camping L.lagos de Somiedu. Gracies y col so permisu.


------------------------------------------------------------------------------

jueves, 30 de marzo de 2017

Ruayer (Ayer) - L'Orria - La Fitona - Carbayalín

25 de Febreru de 2017

Track: Ruayer (Ayer) - L'Orria - La Fitona - Carbayalín


Ya ta escapándose l'iviernu n'Asturies, siendo ésti ún de los más secos de los últimos años, con mui poca precipitación y ñevaes en cotes altes pero ensin ser denguna maraviya defechu, poro teníemos ganes de metenos nuna ivernal y poner los crampones un puquiñín.

Pa ello, tornaremos al valle del rigu Ayer, saliendo del so caberu pueblu, Ruayer. P'aportar a esti pueblín facemos la ruta davezu dende Xixón, pela autovía minera hasta Mieres del Camín, onde garramos la A-66, hasta'l desvíu al corredor del Ayer.

Salimos de Ruayer (801 m)

lunes, 27 de marzo de 2017

Trail Cabeza L'Arcu (Casu)

19 de Febreru de 2017

Track: Trail Cabeza L'Arcu (Casu)


Web del Trail: Trail Cabeza L'Arcu (Casu)

Clasificaciones: Clasificaciones 2017  


Primer añu del trail Cabeza L'Arcu nel pueblu casín de Caliao y digo primer añu que se fai, pero toi seguru que nun va ser l'últimu porque ye una carrera increyible pa esta dómina del añu. Hai que dicir que'l día ayudó munchísimu, fresquín pero soleyeru y con unes vistes de diez, lo que fizo que'l percorríu conocíu per montañeros avezaos fuera más guapu si cabe.

Semeyes increyibles durante la carrera

La carrera va totalmente pel PR de la Cabeza L'Arcu y por tanto tien la guapura asegurada xubiendo pelos Arruos, ascendiendo hasta la collada l'Arcu y baxando pel valle Xulió. Nesti día, con un pocu ñeve na collada y muncha agua peles riegues fizo qu'esta carrerina de 14 km quedara pa l'alcordanza.

La xente del GM Xuan de la Borrina

Personalmente, disfrutela munchísimu, ya que dempués d'un par de carreres nes que salí demasiáu rápidu y llueu llegué pelín petáu de pates pa l'ascensión, esta vegada tomelu con calma y fuí ganando posiciones poquín a pocu na xubida pa baxar a saco como nunca lo ficiera hasta la posición 26 de la xeneral.

Los "petates" del roco dándolo too per Casu

Aparte de resultaos, fué un gran día con munchísima xente conocío corriendo pel parque de Reres como fueron los allegaos al GM Xuan de la Borrina, el Asgaya Team o los collacios d'escalada qu'animáronse a correr esta vegada y pasáronlo en grande.

Col Asgaya Team dempués de finar la carrera

Como siempre, dar gracies a organizadores, voluntarios y a los fotógrafos porque personalmente danme una allegría cola calidá de les semeyes amosando la realidá y l'esfuerzu que llevamos enriba en dellos momentos (Gilber, Agus Camino, Francisco Poli, Lastra, Trece Fotografías, Club Correr Asturias, Malgor,...)

viernes, 24 de marzo de 2017

Sobrevil.la (Teberga)

18 de Febreru de 2017

Sábadu con un día murniu enforma, onde l'orbayu y el fríu son el calter principal nel ambiente, aún así, los atrevíos trepamuros deciden dir hasta Murotecho en Teberga. Como nun lo conozo, garro a Kíla ensin madrugar res y tiro tranquilamente hasta valle del Trubia.

Esti seutor ta penriba del pueblu de Sobrevil.la onde va unos añinos ficiera l'ascensión a la Pena Sobia y a la Siel.la. Esta vegada nun voi de monte y si a trepar un ratín, pero como nun conozo'l camín correutu p'aportar al seutor tiro hacia la canal de la Faya ya qu'a la so manzorga veo la muria de Murotecho.

Como voi con Kíla y tien ganes de corretiar pel monte, tómolo con calma y tiro d'intuición aportando a la parte alta del pueblu, xusto na baxera de la propia canal de la Faya. Dende equí, intento buscar dalguna sienda que lléveme hasta'l seutor nuna cómoda baxada... pero va ser que non.

Ante mí, tengo una vallina y perderéme casi durante hora y media, a la gueta de senderos factibles cruciando una guapa viesca que cuando crees alcontrar senderu con salida tórnase nun bardial infumable.

Otru intentu pela parte alta, llevóme a xubir casi penriba'l seutor y tener que dar la vuelta al non alcontrar baxada posible. Finalmente, vuelta p'abaxo y casi con ganes de colar, pillo una pista casi pegáu a la última casa del pueblu y como non, con tola tranquilidá llego hasta'l seutor.

Con un sudada increyible y casi sin ganes de poneme l'arnés, faigo un esfuerzu ya intento meneame per un 6a castronazo que tengo que facer al segundu pegue pa encadenalo. Cuéstame enforma, trepar en escueles nueves pa mi y necesito varies víes pa pilla-y el puntu a la roca.

Demientres la escalada, falar un ratín y picar dalgo pola hora que yera, Kíla anda a lo suyu por ahí como siempre pero nel intre avérase de más a los dominios d'una gran danés y con comida de pol mediu, píllala pocu sollerte y méte-y un mordiatu como na so vida.

Cola perrina sangrando y lloramicando, quitenseme toles ganes de trepar y el restu la tarde ocupámosla en curiar que nun enguarre la ferida y en curásela gracies a Ramón, que tuvo los ánimos pa dir hasta'l coche a pol botiquín cola caminata de turnu.

Mil gracies Ramón... yes un grande.

Ensin ganes de facer na y con mal cuerpu... colamos de Murotecho, esperando que la próxima visita seya un pelín más agradable y pueda centrame n'esguilar qu'al final ye de lo que trátase y non de meteme nuna enguedeyada pel monte y que me muerdan a la perra jeje.

La próxima más y meyor... porque pior ya nun puede ser...


Sobrevil.la (Seutores visitaos)
 
Croquis modificaos por mi de la escuela d'escalada de Sobrevil.la, por mor de La noche del Lloro. Gracies y col so permisu.

miércoles, 22 de marzo de 2017

Manzanea (Uviéu)

5, 19, 27 d'Ochobre, 11, 18, 25 de Payares, 2 d'Avientu de 2016 y 20 de Xineru y 10, 17 de Febreru

Como podéis ver, munchos fueron los díes que pasamos pela Manzanea dende'l branu hasta bien metíu l'iviernu y ye que cuando los díes acúrtiense, nun queda otra que tirar a la roca lo más cerquino posible y col mesmu averamientu al pié de vía posible.

Aparte, de dalgún día sueltu per Arnea, con encadene de dalguna variante la Bella y de LM, cruciando ambes víes ya inclusu cola parte superior de Manzaneda Rock y otros díes nel Espolón, encadenando varies víes, anque fai falta un bon repasu y actualización de los croquis que ya fadré, el restu fue nos seutores central y la Ruda.

Pasos de ñapa y desplome... que más se puede pedir

Nel central, pocu más qu'entrenar y repetir víes ya feches, mayormente 6b's y 6c's y na Ruda fué onde más trabayu fice yendo a pol 7a+ nomáu Lloréu. Fueron principalmente 3 díes de pruebas con mui pocos pegues pola lluz nos meses de Payares y Avientu.

Demientres Marie, diba probando y enchufando les víes que-y apetecía facer yo calecía con dalguna d'elles y metíame a sacar los pasos pocu a pocu. Hasta que l'últimu día de Payares ya tábemos los dos man a man dándo-y pegues, costándome sobretou salir hacia cadena nun paséu llarguísimu ensin asegurar.

Concentración total de pasos duros en pocos metros con agarres diversos

El 2 d'Avientu, dempués de matizar bien la salida pa pasar mieu de más y dir seguru nesti tramu, facía un pegue pasando pol tramu de ñapes y faciendo los movimientos peles pinces con muncha tranquilidá, pa llueu apretar na salida hacia cadena ensin pasalo mal y disfrutando muncho esta vía cortina pero mui intensa.

Camiento qu'esti tipu de víes, de placa, lixéramente desplomada y non mui llargues, ye l'estilu que meyor soi a facer, sobretou con pasos de ñapa. Nun sólo son les ñapes, sinon que tenemos dos dinámicos a pinces de fuercia y un llance un cantu dalgo irregular.

Marie probando la vía con xeitu

Llueu, toca'l típicu paséu con alloñes brutales de la Manza que te pon la piel de pita y sólo nel gran pegue d'encadene, dexes de pensar nun posible vuelu y apretes les preses y muéveste fino, fino hasta'l siguiente seguru.

La pena fué pa Marie, que tuvo pegues bonísimos pero nel tramu más bloqueru del pasu de les ñapes a les pinces nun lo tenía suficientemente matizáu y nun pudo llevásela tamién. Dicimos de volver a la selmana siguiente pero la lluvia y les fiestes navidiegues fizo que quedásemos ensin oportunidaes pal so encadene.

Dándo-y duru al tramu clave de la vía Lloréu

Supongo que pa la primavera, la Manza tornará a ser tarrén de xuegu, sobretou col cambeu d'hora col que dame tiempu a dir facer dalgunos pegues en díes de selmana. Los oxetivos son facer un croquis claro de les víes del Espolón y meteme a saco en Tornillos Profundos (7b) la única vía que falta na llibretina del seutor Central.

Ya vos contaré....

Manzanea (Seutores visitaos)
 
Croquis modificaos por mi de la escuela d'escalada de La Manzanea, por mor de Piratas Free y El Maquis. Gracies y col so permisu.



------------------------------------------------------------------------------------  

jueves, 16 de marzo de 2017

Alles (Valle Altu de Peñamellera) - Cabeza Liño

12 de Febreru de 2017

Track: Alles (Valle Altu de Peñamellera) - Cabeza Liño


Una nueva ruta más del GM Xuan de la Borrina na qu'escapamos pa tierres orientales nel Valle Altu de Peñamellera. Esta vegada y dende cuantayá tornamos a Cuera pa facer la Cabeza Liño, que ya conociera nuna travesía increyíblemente llarga dende Purón hasta Villanueva.

Esta vegada nun vamos ser tan animalinos y saldremos dende Alles nuna circular clásica dende les falderes sur de Cuera, ya que tolos pueblos tienen más menos una pista formigonada hasta brañes altes que tienen accesu de secute a la parte alta de Cuera.


En Alles (342 m) tenemos el nuesu puntu de partida

martes, 14 de marzo de 2017

L.lano (Quirós)

11 de Febreru de 2017

Otru día sueltu per ehí con munchísimes ganes de salir a roca y como non, tiramos pa Quirós, sicasí les condiciones nun yeren les meyores pero pasar el día al aire llibre siempre ye un bon reclamu, anque temos col plumes enriba tol día.

Asína qu'ensin madrugar muncho, tiramos pa L.lano la xente davezu, decidiendo dir al Ventolín ya que ye un llugar soleyeru, anque cuando'l sol nun apaez pocu nos va importar finalmente. Enantes d'aportar al seutor decidimos parar a probar les víes de Pingadura.

Pasando un día fresquino pel L.lano

Metémonos na vía que da nome al seutor, cotáu de V+ y como non, un V+ que da nome a un seutor ye un V+ duru y perru, el cual pringo y tengo que da-y un segundu pegue y los collacios casi nun son a sacar en top... vamos, V+ clásicu y cabrón.

D'esti xeitu, quítanse-y les ganes a ún de too, poro pasamos de facer más el tuntu en Pingadura y tiramos pa Ventolín a ver si hai dalgo que pescar. Entamo faciendo la Ventolín y como non otru V+ que da nomatu... vía clásica de diedru y fisura... muncho más guapa pero que tamién díxome a les clares que nun yera'l mió día.

Kíla a lo suyo per Quirós

Pa terminar faigo la variante de 6a esta vegada cola calma y decido nun esguilar más ya que nun paga la pena marchar quemáu si me meto en dalgo más duro. Hai qu'apretar cola cabeza nel so sitiu y güei nun yera'l día.

Ensin más... nun día pocu favoratible pa grandes fazañes esguiladores... retirámonos a echar unes cerveces al refuxu y por n-enésima vegada dígome qu'hai qu'entamar a entrenar en serio, que ya llega la parte l'añu fuerte na escalada.

L.lano (Seutores visitaos)

Croquis modificaos por mi de la escuela d'escalada en: L.lano (Quirós) por mor de Mariño que m'empobinó a visitar la páxina de Piratas Free. Gracies y col so permisu.

----------------------------------------------------

lunes, 13 de marzo de 2017

Cayón Trail (Piloña)

4 de Febreru de 2017

Track: Cayón Trail (Piloña)


Web del Trail: Cayón Trail (Piloña)

Clasificaciones: Clasificaciones 2017  


Dempués de perdeme'l Trail Afuega'l Pitu por baxa por diversión, díbemos a probar como andábemos na Cayón Trail en L'Infiestu. Ye otra carrerina curtia pa estos entamos del añu, de 12 km aproximáu, pero na que les condiciones y el tarrén pel que nos movíemos condicionaba muncho la dificultá real de la prueba.

Primeros instantes de la carrera adelantando posiciones

Nun hai muncho que cuntar nel trazáu, yera un percorríu qu'ascendía al monte Cayón dende la capital piloñesa, pero nun lo facía peles pistes clásiques d'esti monte, sinon que xubía per trialeres na so parte alta que tando tan embarraes facíen bien dura la carrera.

Aportando a meta Alberto y yo con una pingadura superior

Finalmente, tanto Alberto como yo, llegamos casi nel mesmu tiempu y ye qu'otra vegada los altos ritmos del entamu, nun me van bien y llegué a la parte cimera del monte hasta con problemes de xemelos y esta vegada por dalgún motivu nin recuperé na baxada, poro toco sufrir hasta la meta.

La próxima... más y meyor.... espero 

miércoles, 8 de marzo de 2017

Felechosa (Ayer) - Cueves - Pena Melera - Foces del Pino


21 de Xineru de 2017

Track: Felechosa (Ayer) - Cuevas - Pena Melera - Foces del Pino



Ruta del GM Xuan de la Borrina na que xuntámonos ún de los númberos más baxos de los últimos tiempos: Haritz, Benjamín, Kíla y yo. Menos mal, qu'animóse un collacia, Montse, a acompañanos nesti día d'iviernu astur: murniu, húmedu y con un finu orbayu.

El puntu de salida, Felechosa y el conceyu d'Ayer, el cual ta siendo un clásicu d'esta temporada. Como siempre, p'aportar a Felechosa dende Xixón garramos l'autovía minera hasta Mieres del Camín onde garramos la autovía A66 saliéndonos na salida de Morea, pa percorrer la As 112, pasando polos siguientes pueblos: Morea, L'Escuyu, Los Estrul.lones y Cabanaquinta onde garraremos la AS-253 pasando per L.levinco, Entepenes, Col.lanzo, Yanos, La Pola Vieya, el Pino y a la fín Felechosa. 

Partimos de Felechosa (669 m)

lunes, 6 de marzo de 2017

Villanueva (Santu Adrianu)

24 d'Avientu de 2016 y 27 de Xineru de 2017


Tamos en procesu de volver a garrar motivación y ganes d'apretar de verdá y Villanueva fué mi escuela preferida esti branu, poro prestóme volver pa ver si veíemos collor a dalguna de les víes que me queden por encadenar nel seutor cimeru.
El primer día, averéme hasta ellí con Silvia, que ta volviendo a esto de trepar y ta faciéndolo perbien, llevándose a vista casi tolos sestinos baxos de la mandrecha'l seutor, lo cual ye una pasada dempués de tanto tiempu sin facer nin cuerda nin roca.


Probando'l 7b+ Bailando con Gaites

Yo daría-y caña a Bailando con gaites,un 7b+ que nos primeros croquis taba casi de 7c, pero decotóse. Yo nun fú nin fá, ye duru enforma y sería mi máximu grau, asína que tomámoslo como lo que ye un retu brutal.

El casu ye que nel primer día, pali pali, fuimos ganando-y tarrén a la vía, aportando a la cadena, lo cual da munchísima moral, ya qu'al menos sé que los pasos salen individualmente y que soi capaz de dir poniendo les cintes, con unos vuelos coyonudos... too seya dicho jeje.

Camudando'l Camín en Villanueva


La siguiente visita un mes más tarde sería un vienres tarde, nel que xubí corriendo con Kíla hasta'l seutor onde ya taben per ellí dellos collacios y tuve la suerte que dalguien taba probando la vía y dexó les cintes puestes... así qu'otru pegue curiosín pude da-y enantes de que la nueche aportara y mandáronos p'abaxo.


Como siempre, la visita a los chigrinos tienda de Villanueva y tastiar una Cotoya ye un vezu que nunca perderemos ya qu'esti pueblu tienmos ganaos pa les post-escalades.




viernes, 3 de marzo de 2017

Bermiego (Quirós) - L.lampaza - Pelitrón

21 de Xineru de 2017

Track: Bermiego (Quirós) - L.lampaza - Pelitrón


Estrenamos l'añu 2017 col GM Xuan de la Borrina con una ruta cenciella, pa qu'esos cuerpos vayan espulsando tola morralla de fartures de les fiestes navidiegues. Pa ello, ya andaba yo con ganes d'entamar daqué dende'l pueblu quirosanu de Bermiego.

Nomáu, pol so texu milenariu, aportamos a esti pueblu pel camín davezu dende Xixón, garrando l'autovía Y griega hasta Uviéu, onde siguimos pela A-64 hasta'l desvíu de los valles del Trubia, que tantes vegaes garré na mió vida pa dir esguilar y de monte.

Partimos de Bermiego (764 m)