miércoles, 23 de diciembre de 2009

Grupu Montaña Xuan de la Borrina

Ún de les coses que préstame más dar anuncia, ye la formación del nuesu propiu grupu de montaña. Llevamos una añinos nesto de peleanos pel monte, facer rutes y como nun somos de siguir el camín marcáu polos demás y menos yo, decidimos facer un grupu propiu, envede entrar nunu ya formáu.

Así, podremos continuar colos nuesos cafetinos d'enantes y dempués de la ruta, les cagaes na creación de les rutes sobre papel, les discusiones en plena ruta, los bonos momentos cuando too sal bien, y demás hestories que nos faen deprender pasín a pasu a caleyar el camín, el monte y tamién a camudar esi camín de la nuesa vida.

Dempués de munchos papeleos, notarios, conseyeríes, esti mes sedremos un grupu más na federación de montaña d'Asturies, col cual podremos federanos y formar parte de la familia montañera asturiana, dando amás un toque asturianu y un tanto desconocío al poner al grupu'l nome d'un ser mitolóxicu como Xuan de la Borrina.

Esti paisanu, que nos protexe d'un de los más temíos contratiempos na montaña, como ye la borrina, ñebla, neblina, ñublina.., ye'l personaxe sobrenatural más invocáu polos pastores pa que'l peligru de perdese pel monte, pase y s'espeye'l camín a tomar.

Xuan de la Borrina, tamién nomáu Xuan Blancu, Xuan de Madruga, Xuan de Riba o Xuan Barbudu preséntase polo xeneral acompangáu d'una perra llanuda y de la so muyer, que dicen que tamién tien barba. (Nun quiero pensar nel enguedeyu de barbes en momentos cariñosos, jeje).

Por tanto, a partir d'agora tendremos un cantar que recitar, cuando les coses tórnensen peligroses pola neblina:

Escampa, nublina,
de valle en vallina,
regueiros abaxo,
canales enriba,
qu’ehí vien Xuan Blancu
xurando y votando
que te ha de comer,
cola sua muyer barbuda,
y la sua perra llanuda.

Escampa neblina,
valle, vallina,
comieron los llobos
la cabra cornina;
comieron los güesos,
dexaron la cecina.
Ehí va Xuan Blancu
col perru blancu,
la muyer desnuda,
la perra cozcorruda.
Ehí va Riaño
xurando y votando
que te va a cortar un calcañu.

La info foi sacada de la siguiente páxina: Sobre Leyendas: Xuan de la Borrina


Ehí vamos entos, con esta nueva aventura qu'espero y deseo seya pa munchos años, dalgo que nos mantenga xuníos a tolos collacios que formamos parte d'esto, los cuales anque puquiñinos de momentu, merecemos ser toos mencionaos, a continuación:

Xunta Direutiva:


Berto Xuan (Presidente)


Simón (Vicepresidente)


Charly (Secretariu)


Pol (Ayalgueru)


Rolo (Vocal)


Mino (Vocal)

Miembros del GM Xuan de la Borrina:


Pilar


Paula


Canta


Rico


Diego


Bea y Toni


Diego Pangua

Un saludu a toes y toos, y dende esti blog daros les gracies pola xera montañera que llevamos y pola que quedanos por disfrutar.


La nuesa páxina web:
Grupu Montaña "Xuan de la Borrina"

Mail de contactu: gmxuandelaborrina@gmail.com

lunes, 14 de diciembre de 2009

Cueva Güerta (Teberga) - Braña Las Navariegas

13 d'Avientu de 2009

Track: Cueva Güerta (Teberga) - Braña Las Navariegas



A la fin dempués d'un mes de Payares práuticamente nulu pal montañismu, alborecimos en Xixón, con un día zarráu de lluvia, y cola impresión de que la meteoroloxía tan gafienta qu'apuntaben pal llunes diba llegar inda enantes de lo asperáu.

Que suel pasar nestos casos?, y más a les 7 y cuartu la mañana, pues mesaxes de móvil, llamaes, y demás alderiques hasta ponenos d'alcuerdo en si tírase p'alantre o tornamos a pegar la oreya n'almogada. El resultáu foi: delles baxes nel grupu y 3 alloriaos que monten en coche en direición al puertu Ventana nel conceyu central de Teberga, cola intención de xubir al picu La Ferreirúa.


Semeya indicaora del estáu del puertu Ventana

Dempués d'hora y picu de viaxe y cafetín en Samartín de Teberga xunto al grupu de montaña Torrecerréu de Xixón que diben al picu Gorrión de Proaza, foi la propia carretera lo que nos dixo qu'onde dibemos cola que taba cayendo, jeje. Asína que dempués de llograr da-y la vuelta al coche, llibrar dalguna curva con xelu nel asfaltu, aidar a un paisanu que salióse cola furgoneta pal cunetón y dalguna aventura más, que son les que-y dan tastu a esto de madrugar pa dir de monte, alcordeme d'una ruta que salía del desfiladeru del riu Parmu.


Aparcamientu de la Cueva Güerta y cartelu de la ruta

Esta ruta parte de Cueva Güerta (Fresnéu), onde hai una cueva kárstica mui nomada polos espeleólogos y polo que ponía nos cartelos con bona población d'esperteyos, y fina na braña Las Navariegas, 850 ms d'altor por enriba del entamu.

Pa llegar a ella, salimos dende Xixón a Uviéu pola "Y griega", garrando'l desvíu na ronda d'esti hacia Grau, pa salinos en Trubia, y metenos na carretera que va paralela a la nomada Senda l'Osu. Poro, travesaremos los conceyos de Santu Adrianu y Proaza, hasta llegar al conceyu de Teberga, onde pasaremos pelos pueblos de Entragu, Samartín, Riel.lu, San Salvador y pocu dempués del desvíu de Fresnéu, a nuesa mandrecha tendremos cueva Güerta.


Caleyando pel Pandu con fueya y ñeve

Entamaremos caleyando per una cueva pa salir per un camín hacia las Morteras d'Arriba y pasar per una zona de praos con cabañes nomada Presories, onde empindiarase de forma más pronunciada'l camín al metenos nuna preciosa viesca autóutona col nome del Pandu, onde quiciás viésemos los paisaxes más prestosos de tola ruta, tanto pa dir como pa volver, ya que l'amiestu de fueya caída y ñeve, según ganábemos altor, yera increible.

Sin danos cuenta salimos de la viesca y finamos por dar nun col.lau (col.lau del Pandu) onde acolumbramos al fin el pueblín de la Foceicha, onde hai una bona fonte y llavaderu con teyáu nel que refuxámonos un ratín de la ñeve que cayía y xintamos daqué pa ganar fuercies.


La Foceicha al fondu y na entrada'l pueblu ñeváu

Una vegada que sintimos qu'enfriábemos pusímonos a dar zapatu darréu, ya que caleyando podíase tar, pero paraos l'ausencia de grados positivos yera más qu'acusada. Dempués de travesar el pueblu, y pescanciar cual yera la nuesa ruta d'ente toles que pasen per él nuna y notra direición, dimos bona cuenta, de la fastera de praos de pación de la veiga la Foceicha, pasando a lo postreru pola ponte del riu Cuevas y xubiendo a la braña Foceicha más alantre.


La ñeve nun mos quitaba la sonrisa inda

A partir d'equí tornamos a ganar altor de forma más continúa que danos dalgo d'animu ya que sabíemos que'l final yera a bon altor y tabemos muncho tiempu caleyando ensín quitanos desnivel. Nesta parte pasamos pelos praos de la Ferviencia y xubimos faciendo ziszas al traviés del monte Braniecha, averándonos poquín a pocu al ríu del Barrancu la Verde y a les sos cascades del Navalín y los Xiblos que facía tiempu qu'oyíamos a lo lloñe.


Regatu xeláu cerca de las Navariegas


Pocu más, quedaba por caleyar, lo cual agradecíamos porque'l fríu yera ya intensu y l'esfuerzu taba pasándonos factura, colo que l'únicu que queríemos yera xintar dalgo, camudar la camiseta sudada, y garrar dalgo de calorín pa baxar cuanto antes, ya que non andábemos mui sobraos de tiempu, o lo que ye lo mesmu, lluz del día.



Aportando a la braña Las Navariegas


Semeya del esfuerzu del collaciu Rolo ya dientru la cabaña

Sin tiempu pa xintar dalgo decente, fartucámonos a bas de barrites enerxétiques y lo que toa persona más querría nesti momentu, turrón de chocolate con pan, jeje. Que puta delicia, pa que darreu de quitar la ropa moyáo, y demientres pones dalgo seco, va Rolo saca un termómetru y dizte que tábemos a -3º C na cabaña. Estes rises conxuntes son impagables.

D'equí namás quedaba tornar al coche cansaos y con fríu pero esfrutando, d'una ruta inesperada, perguapa y enllena de coses bones pa l'alcordanza, como foi la perrina qu'acompangonos a nós durante tola baxada, dempués de tar con otros montañeros na xubida.


La perrina dándonos una baxada bien prestosa


Ensín más, da-y les gracies a los mios collacios Simón y Rolo, qu'a les 7 la mañana llevantáronse con xeitu pa dir pa Teberga a ver que se podía facer, a pesar del mal tiempu. Esto foi lo que ficimos durante casi 6 hores de ruta, 850 m de desnivel y 18 kms en total, dempués de rabilar un bon ratu nel asfaltu del puertu Ventana col coche y les plaques de xelu, desistir na oción cimera y tirar por una secundaria completamente improvisada.


Semeya de la viesca del Pandu
que bien merez una postal iverniega

miércoles, 4 de noviembre de 2009

Retos montañeros, xeres pal futuru

Actualizáu (3 de Mayu de 2013)

Como siempre qu'ando preparando rutes, acabo barruntando nuevos retos, quiciás tamién porque asína ye'l mio xeitu de ver la vida: Un continuu retu o desafíu a llevar alantre. De ehí, que la mio afición al monte y la escalada, vaya empobinándome a dar preste a dellos oxetivos y d'ehí foron saliéndome les siguientes llocures:

La primer xera que tuvi en mente, foi facer toles mayores cotes de cada conceyu asturianu, pero quedábase un pelín corta polo qu'al final pasó a ser les 4 mayores cotes, guiándome por un documentu de la Federación de Montaña d'Asturies.

Mirando según que conceyu, nun tien na que ver col montañismu al ser munches cotes mui baxes, pero paecióme que podía ser prestosu faceles, unes de monte y otres de btt, poro pue ser una actividá increible preparar rutes pa la bici por conceyos costeros faciendo a poder ser eses 4 cotes baxes na mesma ruta.

Retos nel País Astur

4 Cotes, 78 Conceyos
Algamaos (Conceyos):
AyerBimenesCaraviaCasuColungaCuideiruLlaneraLlaviana
NavaOnísParresPongaRibeseyaSieroSomieduXixón

Completando dalguna manera, estes cotes a tachar, tamién puen facese los vértices xeodésicos d'Asturies, que faen perinteresante dalgunes rutes pela costa, atopando vértices en cabos onde les vistes de l'Asturies mariñana ye too un espeutáculu.

Vértices Xeodésicos d'Asturies
Algamaos (Conceyos):
Cangues d'Onís (3)Caravia (1)Cuaña(3)Llanera(3)Navia (2)
Sobrescobiu (3)Ponga(3)Proaza (1)Xixón (4)Yernes y Tameza (2)

Los siguientes retos son de montaña dafechu e inclusu d'escalada na mayor parte, ya que foi na cabera ruta de montaña, per Peña Ubiña o Pena Ubina, cuando tando nel refuxu de Meicín vimos un papel coles 58 cumes de 2000 ms d'altor del Macizu d'Ubina. Lo cual como non, fizo que picáseme'l niki p'algamar dalgún día toes eses cotes.

Club 58, Macizu d'Ubina
Algamaos (Cumes): 19 de 58

Llueu, restolando pela rede, alcontré otru club más en Picos d'Europa nomáu, el club de los 111 picos, pero paecióme una pena desperdiciar dalgunos dosmiles, ya qu'entamaban les cotes sigún el macizu (Cornión, Urrieles, Ándara) en 2300, 2400 y 2200 ms respeutivamente.

Club 111, Picos d'Europa
Algamaos (Cumes): 40 de 111

Debíu a esto, ocurrióseme facer a mi, Los 2000 d'Asturies, que nun ye nin menos nin más, que facer tolos picos de 2000 ms qu'hai n'Asturies, como non, separtaos por conceyos. La teoría ya ta fecha, agora solo queda da-y preste na práutica.

Los 2000 d'Asturies
Algamaos (Conceyos):
Cangas del Narcea(1)
Casu (2)
Onís (3)
Ponga (3)

Restolando pela rede alcuéntrense coses como esta, que nun se quien lo fadría, pero qu'apórtame dalgún monte más que nun entraba nos planes de los otros retos, asína que afayamos esta llista nel mio haber y bautizámosla de la siguiente manera:

100 montes más prestosos d'Asturies
Algamaos (Cumes): 71 de 100

Retos nel estranxeru

Como non, la mio primer visita a Pireneus, tendría que dar col resultáu bien conocíu, d'intentar facer tolos 3 miles. Anque nun ye'l desafíu que más tenga na tiesta, siempre presta dir tachando montes algamaos y fuera d'Asturies más de lo mesmu.

Pireneus 3000
Algamaos (Cumes): 30 de 243

Otros retos que tamién púseme últimamente foi facer los dosmiles de les provincies averaes al pueblu del mio pa en Recuerda (Soria), anque nun me quiten el sueñu la verdá, pero siempre presta al tar de vacas per Castiella, quitar un pocu'l monu montañeru:

Soria 2000
Algamaos (Cumes): 8 de 25

Sinceramente, si soi a facelo o non, si llegaré a tal nivel pa dalgunos d'ellos o non, si tendré tiempu durante mio vida a facelo o non, me da igual completamente. Simplemente poder intentalu y tachar los que vayan cayendo d'estes xeres particulares mies ya ye dalgo qu'ilusióname fonderamente.

Con ello, como siempre, namás que pretendo da-y un puntu de diversión y desafíu más, a esta gran afición que ye'l montañismu. Poquín a pocu, podréis dir güeyando cual ye l'estáu de cada retu, ya que diré actualizando los archivos que dexo pa descargar.

Espero tener collacios que me sigan acompangando nestes aventures.


Nun 2000 algamáu (Pena Ubina de 2420 ms)

martes, 27 de octubre de 2009

Tuiza Riba (L.lena) - Pena Ubina

25 d'Ochobre de 2009

Track: Tuiza Riba (L.lena) - Pena Ubina



Pa esta ruta tornamos otra vegada más al pueblu l.lenizu de Tuiza Riba, pa lo cual, salíemos dende Xixón bien ceo y col día murnio pero ensín lluvia. Garramos l'autovía minera y ya por Mieres del Camín entamó a llover hasta llegar al pueblu de Campumanes. Equí echamos un cafetín nel bar Ubiña, lo cual paecía afayaizu ya que dibemos xubir al mesmu picu.

Darréu del café, nun se qu'impulsónos a garrar la carretera númberu 8 de L.lena, pasando pelos pueblos de Sotiel.lo, Espineo, Los Pontones, Teyeo, Rospaso, Tuíza Baxo y a la fin Tuíza Riba ya que nun abocanaba en nengún momentu.


El cordal del Picu la Mesa pente la lluvia y preparaos pa la llucha col tiempu

Dempués d'aldericar un ratín, si debíemos xubir o non, si diba abrir o non, o si los anxeles teníen sexu o non, camentamos que ya que ficimos el viaxe en coche y el madrugón, había que xubir, asína que chubasqueros, polaines y paragües foron nueves ferramientes amestándose a los ya avezaos bastones.


Con paragües hacia Pena Ubina

Empobinámonos, como na ruta a los Picos del Fontán, en direición al refuxu de Meicín siempre baxo una lluvia intensa y ganando-y altor al terrén, por un camín empedráu y resbaladizu que sal de lo más alto de Tuiza Riba (1202 ms). Al fin nel refuxu xintamos y bebemos dalgo, ya que con tolo complicáu que ta'l día, nun hai munches ocasiones pa hidratase y garrar fuercies.


Caleyando hacia l'Altu Terreos cola penona d'Ubina presente


Pingando completamente y cola moral pelín tocada, salimos de Meicín (1538 ms) pa facer la segunda parte de la ruta, que ye la menos prestosa, y que dempués de xubir polos praos de la Guariza, ascendiendo entre Les penes Rubies y La Forquetona a la nuesa manzorga y Les Fanes y el Cuetu les Cabres a la nuesa mandrecha, déxanos nel Altu Terreos (1912 ms), de mesmu nome qu'una fonte pola que pasamos pelín más abaxo.


Pena Cerreos (2113 ms) y Pena Ubina Pequena (2193 ms)


Esti altu tamién nomáu Puertu de Tuiza, ye pasu ente Llión y Asturies, y nel nuesu casu, ye'l caberu descansu enantes, d'entamar l'ascensión final pola canal este de Pena Ubina. Nesti momentu, a pesar, de que'l contratu col degorriu que tenemos pal bon tiempu, nun taba dando los sos frutos nel día de güei, paró de llover, abrióse'l día, y un pelín de sol foi caleciéndonos y xubiéndonos l'ánimu, pal retu qu'inda nos quedaba.

Nun se, si'l nuesu Xuan de la Borrina, faló col Nuberu, pa que nos dexase un pelín de tregua o que, pero foi un de les coses más prestoses, que pasóme nunca na montaña. Quitar el chubasqueru, la gorra moyada, ... y poder acolumbrar la cume col cielu azul enriba nuesa, foi orgásmicu totalmente.


Xubiendo hacia la canal este con esfuerzo abondo


La canal ye dalgo..... Equí tengo serios problemes pa describila. Sinceramente pa mi, nun foi nengún problema, ye más disfruté como un guah.e dexando'l palu na mochila, y trepando a dos manes. Pero como préstame dar a les coses una importancia imparcial, pues nel grupu, se qu'hai xente que-y paeció difícil, pero qu'eso fízolos valorar aún más l'ascensión a pena Ubina.


Ehí tan trabayando Rolo y Carlos y Pilar y yo descansando d'un tramín duru


Poro, diré que la canal ye abegosa y que polo que pudimos ver pa xubir, la parte más fácil ye la vía sur, pero esta canal ye muncho más divertía y direuta. Eso sí, hai que tener curiáu de nun tirar piedres a la xente que vien detrás, polo que mirar bien onde se ponen los pies ye perimportante.

Una vegada que tamos arriba a 2417 ms (2420 pol GPS), les vistes del macizu de Pena Ubina ye impresionante, confundiéndose ente elles les munches cumes que superen los 2000 ms. D'esti día sacamos un retu más, o al menos yo, como ye intentar facer los 58 dosmiles de les Ubiñes. Poquín a pocu sedremos a ello.


Vistes de los Picos del Fontán y Pena Ruea y el cordal del Picu La Mesa


Semeya de grupu na cume de Pena Ubina


La baxada dempués pue facese pol sur como ficieron un par de los collacios del grupu o baxar pola mesma canal que xubimos y si yes un pelín atrevíu lo meyor ye baxar resbariando penriba les pedrices qu'hai. Asína aparte de pasalu de puta madre, baxes muncho más rápidu ensín dir reteniendo de pates y llegues al colláu de Terreos praúticamente descansáu. Eso sí, davos espaciu ente unos y otros pa non metevos una pedrada de la que baxáis, ya que cuando echen a rodar garren muncha velocidá y puen facer muncho daño.


La seronda dende'l Refuxu Meicín


Como resumen final, dicir que yera una ruta puesta por mi, pa tol grupu, y que d'entamu yera un pelín en plan desafíu. Enriba si-y sumamos el mal tiempu que tuvimos al aniciu del día, tenemos que tar percontentos porque amás de facer cota toos, dimos un pasu pergrande hacia montañes más complexes, nel nuesu camín montañeru.


Colos picos del Fontán al fondu y barruntando nueves cumes a facer

Escaecióseme, como bien dixo'l collaciu Pin, da-y les gracies a la xente del FEMPA qu'aparte de la so compaña y alderique demientres nos mudábemos de ropa apurriéronmos unos bollos preñaos que prestaron pola vida. Dicir que taben en llabores de llimpieza poles vegues qu'arrodien el refuxu de Meicín, lo qu'amuésanos que la familia montañera asturiana ye de diez y que tamos naguando formar parte d'ella dientru bien pocu.

Un saludu a ellos y gracies a tolos que respeten la ñatura y la caltienen llimpia