viernes, 29 de octubre de 2021

Linza (Chacetania) - Meseta d'Os Treis Reis/Hiru Erregeen Mahaia - Paquiza Linzola

10 de Setiembre de 2021

Track: Linza (Chacetania) - Meseta d'Os Treis Reis - Paquiza

Abandonábemos el Ball de Benás, magar de l'ascensión a la Tuca Salbaguardia y de cuatru díes siguíos d'actividá, a la gueta de bon tiempu, faciendo viaxe tranquilu hacia los Valles Occientales del Pirinéu. El nuesu destín diba ser el valle d'Ansó, averándonos hasta'l refuxu de Linza onde ficiéramos un picotéu en forma de cena, enantes de dir a durmir pal día siguiente almorzar y ponenos n'aición col envís d'ascender a la Meseta d'Os Tres Reis.

La verdá ye que Fernan, escoyó perbien les posibles opciones, cuando truncósenos l'ascensión a la Tuca d'Aneto y tanto'l Salbaguardia p'aprovechar l'últimu día en Benás, como'l viaxe pa conocer más valles del Pirinéu, taben encantándonos, asina qu'alborecimos con ganes de conocer un pocu más d'estos Valles Occidentales que ya nos facíen sentir más cerquina de casa con una vexetación más atlántica.

Partimos de Linza (1385 m)

Nuna mañana pelín fresca, preparámos y salimos del aparcaderu de Linza, onde hai movimientu montañeru, tanto p'ascender a la Meseta d'Os Tres Reis, como pa continuar hacia les distintes estayes de la nomada Senda de Camille.

martes, 26 de octubre de 2021

L'Espital de Benás (Ribagorza) - Tuca Salbaguardia

 8 de Setiembre de 2021

Track: L'Espital de Benás (Ribagorza) - Tuca Salbaguardia

Nos planes aniciales, yera'l nuesu día de descansu, el día d'ascender sele hasta'l refuxu de la Renclusa, pal día siguiente intentar la Tuca d'Aneto, pero la llegando d'una borrasca, fainos camudar los planes y siguiendo los bonos conseyos de Fernan, salimos tol grupu a facer un monte más "amable" como ye la Tuca Salbaguardia.

Con esta actividá, colaremos del Ball de Benás, col envís d'aprovechar un par de díes más de monte hacia los Valles Occidentales del Pirinéu, ya que la previsión meteorolóxica, va seguir inestable dellos díes más en Ribagorza.

Partimos de L'Espital de Benás (1735 m)

D'esti xeitu, llueu d'un bon almuerzu nel camping Aneto, averámonos hasta L'Espital de Benás, onde tendremos l'aparcaderu onde sal l'autobús hacia la Besurta. Nel nuesu casu, nun mos fai falta bus, asina que saldremos caleyando al sol pela Plan de L'Espital con unos niveles de relaxación, pocu normales en nós.

martes, 19 de octubre de 2021

Puente Lliterola (Ribagorza) - Tuca d'El Perdiguèro - Punta Lliterola - Ibón Blanco

7 de Setiembre de 2021

Track: Puente Lliterola (Ribagorza) - Tuca d'el Perdiguèro - Punta Lliterola - Ibón Blanco

Tercer día consecutivu de pateos pel Pirinéu 2020 - 2021, camundo del Vall de Boi n'Alta Ribagorça al Ball de Benás na Ribagorza, onde debíen d'entamu facese tol restu d'actividaes del viaxe, anque ya dende esta mesma mañana, mirando la meteo ya teniemos claro, que debíemos replantiar tola estratexa de rutes.

De primeres, Fernan considera que ya tuviera abondo coles palices d'ascensiones al Pic de Comaloformo y a la Punta Alta de Comalesbienes, poro decidimos apretar les tuerques Dani, Mario y yo y facer la llarga ascensión a la Tuca d'El Perdiguero dende la Puente Lliterola.

Partimos de la Puente Lliterola (1615 m)

A les 9 en puntu, col pior de los almuerzos dende que va de viaxe nel cuerpu, salimos con xeitu acompañándonos un ratín Fernan, hasta la cabaña Lliterola onde decide baxar a pasar el día per Benás. Pel camín, alcontrarémonos con un tarrén más ermu que nel Vall de Boi, pesie a dir pegaos al barrancu de Lliterola, la vexetación amariella dixébrase enforma del verdor d'Aigüestortes que viéramos nos díes anteriores.

martes, 5 de octubre de 2021

Cavallers (Alta Ribagorça) - Punta Alta de Comalesbienes - Refugi Ventosa I Calvell

6 de Setiembre de 2021

Track: Cavallers (Alta Ribagorça) - Punta Alta de Comalesbienes - Refugi Ventosa I Calvell

Segundu día del viaxe pirenáicu, nel que continuamos de patéu nel Parc Nacional d'Aigüestortes, yéndonos esta vegada a la fastera contraria del Pic de Comaloformo, que ficiéramos el día anterior. Poro camudaremos de "Coma" que ye una depresión o valle y d'esti xeitu, preparamos otra prestosa circular, p'ascender a la Punta Alta de Comalesbienes.

Otru almuerzu relaxáu en Barruera, fainos tar nel Estany de Cavallers preparaos pa caleyar a les 9 y media la mañana. Esta vegada dexaremos el banzáu a la nuesa manzorga y entamaremos a facer envueltes hasta embocar la canal pedregosa que ye'l barranc de Comalesbienes. 

Preparaos pa l'acción dende'l banzáu de Cavallers (1743 m)

Con otru de bon tiempu, soleyeru y fresquín pa caleyar, vamos ascendiendo pali pali, faciendo calecer los músculos cansaos del día anterior nel Comaloformo. El barrancu anque pindiu déxase facer bien y vamos entreteníos xintando frambueses y aréndenos como si nun hubiera mañana.