L'Espital de Benás (Ribagorza) - Tuca Salbaguardia

 8 de Setiembre de 2021

Track: L'Espital de Benás (Ribagorza) - Tuca Salbaguardia

Nos planes aniciales, yera'l nuesu día de descansu, el día d'ascender sele hasta'l refuxu de la Renclusa, pal día siguiente intentar la Tuca d'Aneto, pero la llegando d'una borrasca, fainos camudar los planes y siguiendo los bonos conseyos de Fernan, salimos tol grupu a facer un monte más "amable" como ye la Tuca Salbaguardia.

Con esta actividá, colaremos del Ball de Benás, col envís d'aprovechar un par de díes más de monte hacia los Valles Occidentales del Pirinéu, ya que la previsión meteorolóxica, va seguir inestable dellos díes más en Ribagorza.

Partimos de L'Espital de Benás (1735 m)

D'esti xeitu, llueu d'un bon almuerzu nel camping Aneto, averámonos hasta L'Espital de Benás, onde tendremos l'aparcaderu onde sal l'autobús hacia la Besurta. Nel nuesu casu, nun mos fai falta bus, asina que saldremos caleyando al sol pela Plan de L'Espital con unos niveles de relaxación, pocu normales en nós.

Esfrutamos d'un paisaxe enllenu de vida a la vera del rigu Ésera

Pesie a ser un miércoles de Setiembre, hai ambiente pel monte y bien de montañeros, caleyen a la vera'l rigu Ésera hacia la Besurta y otru montón hacia'l Portillón de Benás, sobremanera un garrapiellu de franceses y tamién hacia'l nuesu oxetivu na Tuca Salbaguardia.

 

Según algamamos desnivel les vistes hacia las Maladetas son ablucantes

Pasaremos al llau del antiguu Espital de Benás y abandonaremos el rigu Ésera pa metenos na canal de la Peña Blanca, camín percómodu y entreteníu que va ganando desnivel, pali pali, agasayándonos coles meyores vistes del macizu Aneto-Maladeta.

Dexamos atrás los restos de la casa Cabellut empobinándonos hacia la Tuca Salbaguardia

Aportaremos al crucie de caminos na casa Cabellut, parando un segundu pa ver hacia onde empobinábense tol grupu francés y llueu de ver que xubíen hasta'l Portillon namás, continuamos camín hacia la Tuca Salbaguardia, ensin poder parar de mirar atrás hacia los glaciares d'Aneto y Maladeta, que según Fernan, vivieron munchos meyores tiempos, cuando conociólos per primer vegada.

Aportamos a l'arista y les vistes del Boums du Port y la Tuca de la Mina son una pasada

Aportaremos a l'arista del Salbaguardia y descubrimos el por qué, de los gritos de los franceses cuando aportaron al Portillón, ya que la vista sol Boums du Port y los Lacs de la Montagnette impresionan, al igual que la impontente Tuca de la Mina, con su afilada y esbelta presencia.

La Tuca Salbaguardia, un auténticu mirador del parque de Maladetas-Posets

Ensin más, siguimos avanzando y a les 3 hores de camín tranquilu, facemos cumal nos 2737 m de la Tuca Salbaguardia, cláramente'l meyor mirador del parque de Maladetas-Posets. Sorpréndenos, aparte de la vista hacia l'Aneto y Maladetas, les vistes hacia'l Perdiguèro qu'ascendiéramos el día anterior y hacia tol macizu del Llardana.

Cume na Tuca Salbaguardia (2737 m)

 

Definitivamente, fue un aciertu total xubir hasta esti monte y esfrutámoslu con calma, acolumabrando tol paisaxe qu'arródianos y picando dalgo d'embutíu, hasta que decidimos descender hasta'l Portillón de Benás de nuevu, pa siguir pelos Ibones de Billamuerta hacia la fastera de la Besurta.

Dexamos atrás la Salbaguardia descendiendo hacia la Besurta

El descensu ye rápidu y sólo entretenémonos mirando pa los glaciares, camentando si paga la pena, facer otru intentu a la Tuca d'Aneto nesta dómina del añu. Paez ser que'l glaciar ta nun estáu llamentable y los accidentes nel monte tan repitiéndose día tres día, poro, tornaremos de xuru pero fadrémoslu a finales de la primavera p'ascender con ñeve del Portillón hasta'l cumal.

Pasiamos hacia L'Espital de Benás pasando pel Plan d'Estañ

Desviarémonos enantes d'aportar a la Besurta y baxaremos pel Plan d'Abaixo, pente la presencia de milenta marmotes, pa caleyar al llau de los restos del Ibonet del Plan d'Estañ, hasta qu'enllazamos al altor del antiguu Espital de Benás col camín d'ascensu, zarrando una nueva circular de nuevu.

 

En resume, ruta qu'apurando un pocu pue convertise nuna mañanera, faciendo casi 15 km y +/- 1045 m de desnivel acumuláu en 6 hores y 15 min de caleyar tranquilu, esfrutando del paisaxe y de les vistes, sobretou d'Aneto-Maladetas qu'esperemos conocer el prósimu añu.

Camudando'l Camín nel día de la Nación Astur