Cavallers (Alta Ribagorça) - Punta Alta de Comalesbienes - Refugi Ventosa I Calvell

6 de Setiembre de 2021

Track: Cavallers (Alta Ribagorça) - Punta Alta de Comalesbienes - Refugi Ventosa I Calvell

Segundu día del viaxe pirenáicu, nel que continuamos de patéu nel Parc Nacional d'Aigüestortes, yéndonos esta vegada a la fastera contraria del Pic de Comaloformo, que ficiéramos el día anterior. Poro camudaremos de "Coma" que ye una depresión o valle y d'esti xeitu, preparamos otra prestosa circular, p'ascender a la Punta Alta de Comalesbienes.

Otru almuerzu relaxáu en Barruera, fainos tar nel Estany de Cavallers preparaos pa caleyar a les 9 y media la mañana. Esta vegada dexaremos el banzáu a la nuesa manzorga y entamaremos a facer envueltes hasta embocar la canal pedregosa que ye'l barranc de Comalesbienes. 

Preparaos pa l'acción dende'l banzáu de Cavallers (1743 m)

Con otru de bon tiempu, soleyeru y fresquín pa caleyar, vamos ascendiendo pali pali, faciendo calecer los músculos cansaos del día anterior nel Comaloformo. El barrancu anque pindiu déxase facer bien y vamos entreteníos xintando frambueses y aréndenos como si nun hubiera mañana.

Vamos negociando camín pel barranc de Comalesbienes

Al altor de 2300 m el camín dixébrase, pudiendo escoyer pente siguir dellos h.itos más averaos al Pic de Comalesbienes o dir pegaos al rigu, escoyendo esta segunda opción, más guapa hasta arribar al desagüe de los estanys onde restolamos un abellugu onde descansar y xintar daqué pa recuperar fuercies pa l'ascensión final.

Aportamos a los estanys de Comalesbienes

Con casi tres hores de camín fechu, atopámonos nuna "coma" ablucante con varios estanys y unes vistes hacia la creste de Barrades enfrente nuesu, cenciellamente brutal. Apalancamos casi más tiempu del necesariu na xinta y cuesta arrancar de nuevu pasando pela manzorga los caberos estanys de Comalesbienes.

Ascensión bien prestosa al Pic de Comalesbienes

Lloñe de l'ascensión al Comaloforno, el senderu hacia'l Pic de Comalesbienes caltien tramos de bon senderu herbosu con dalgo de pedreru, pero na que ver col día anterior. Sólo hai que ver les cares, más sonrientes, esfrutando del paisaxe y viendo como avánzase más seguru y muncho más apriesa que pol infiernu de morrillos que yera la Comaloforno.

Facemos cumal nel Pic de Comalesbienes pa siguir el crestéu hasta la Punta Alta

 

Esfrutando muncho de l'ascensión, facemos una divertida arista hasta'l Pic de Comalesbienes (2986 m), pa continuar pela cumera crestiando hasta la Punta Alta de Comalesbienes (3014 m), onde taba esperándonos Fernan, que prefirió acortar l'ascensu hasta'l cumal de más altor de la fastera de Comalesbienes.

Semeya de grupu nel cumal de la Punta Alta de Comalesbienes (3014 m)

Una vegada más, les 5 hores hasta'l cumal, faime pensar qu'hai dalgo que nun somos a pescanciar y vemos la previsión de kilómetros y desnivel a superar, albidrando muncho menos tiempu del que finalmente llévanos y ye que l'altor al que tamos, munchu tiempu penriba de la nuesa Torre Cerredu, quiciás nun mos dexa llevar los ritmos a los que tamos avezaos.

Pindiu descensu hacia l'Estany de la Roca pasando pel coll de Arenós

 

Col merecíu descansu nesti guapu cumal, que ya faise'l nuesu favoritu del viaxe, vamos entamar descensu, primeru per tarrén más complexu hasta dir aselando y desendolcar nun bon camín hacia'l coll d'Arenós, onde ya faise menos pindiu y fadrános empobinar apriesa los nuesos pasos hacia l'Estany de la Roca, otra ablucante llaguna glaciar con guapes vistes hacia'l Pic de Travessani.

Pasamos per llugares increyibles pente l'Estany de la Roca y los Estanys de Colieto

El descensu nun para, demientres charramos so la circular de los Carros de Foc y el paisaxe meyora a cada pasu, anque les prietes nubes tamién amenacen según va pasando la tarde. A bon pasu, aportaremos a otru llugar que namorónos, l'Estany Gran de Colieto, onde entroncamos col camín de los Carros de Foc, que tien de llevanos hasta'l Refugi de Ventosa I Calvell.

 

Nel nuesu caleyar hasta'l refugi de Ventosa, alcontraremos una visión ganadera pocu vista, con delles vaques cruciando un pequeñu estany, teniendo dalgunos xatos que nalar, cosa qu'enxamás tocárame ver na mio vida.

Llugares máxicos: Colieto, Estany Negre, Refugi de Ventosa

Del refugi de Ventosa, de les sos vistes col Estany Negre embaxo, de tola redolada de Picos, como la Punta d'Harlé, el Pa de Sucre y del Pic de Tumeneia que veíemos dende Colieto, casi nun hai pallabres, asina como del pinchín y la cervecina na mesa merenderu nel refuxu... pocu que dicir más, que paga la pena tornar a esti llugar.

Descendemos hacia Cavallers de nuevu faciéndose pelín llargu coles ñubes tormentoses enriba

El descensu hacia Cavallers, fadrémoslu cola amenacia d'unes ñubes tormentoses penriba del Comaloforno que por suerte, van respetanos tanto nel descensu, como en tola vueltona pela manzorga que tendremos que da-y al Estany de Cavallers. 

 

Una vegada más, aportábemos a la furgoneta con una xatada nel cuerpu mui potente, con casi 10 hores de camín, pa facer los 15 km de percorríu, con un desnivel acumuláu de 1550 m que tornando a los mios camientos, nun ye igual facelo siempre penriba los dosmil metros qu'al altor de la mar, al que tamos avezaos per Asturies.

Camudando'l Camín dende l'Estany Gran de Colieto