Puente Lliterola (Ribagorza) - Tuca d'El Perdiguèro - Punta Lliterola - Ibón Blanco

7 de Setiembre de 2021

Track: Puente Lliterola (Ribagorza) - Tuca d'el Perdiguèro - Punta Lliterola - Ibón Blanco

Tercer día consecutivu de pateos pel Pirinéu 2020 - 2021, camundo del Vall de Boi n'Alta Ribagorça al Ball de Benás na Ribagorza, onde debíen d'entamu facese tol restu d'actividaes del viaxe, anque ya dende esta mesma mañana, mirando la meteo ya teniemos claro, que debíemos replantiar tola estratexa de rutes.

De primeres, Fernan considera que ya tuviera abondo coles palices d'ascensiones al Pic de Comaloformo y a la Punta Alta de Comalesbienes, poro decidimos apretar les tuerques Dani, Mario y yo y facer la llarga ascensión a la Tuca d'El Perdiguero dende la Puente Lliterola.

Partimos de la Puente Lliterola (1615 m)

A les 9 en puntu, col pior de los almuerzos dende que va de viaxe nel cuerpu, salimos con xeitu acompañándonos un ratín Fernan, hasta la cabaña Lliterola onde decide baxar a pasar el día per Benás. Pel camín, alcontrarémonos con un tarrén más ermu que nel Vall de Boi, pesie a dir pegaos al barrancu de Lliterola, la vexetación amariella dixébrase enforma del verdor d'Aigüestortes que viéramos nos díes anteriores.

Avanzamos apriesa pel barrancu Lliterola hacia'l Ibonet de Lliterola

El día murniu, nun ye qu'acompañe muncho, asina que con bon camín, vamos charrando a bon pasu, demientres voi cuntándo-yos lo que conozo, col pasu dende la cabaña Lliterola hacia'l Ball d'Estós, onde tuviéramos va bien d'años ascendiendo a la Tuca Llardana.

Según avanzamos, dámonos cuenta del por qué de la decisión de Fernan y ye qu'a pesar del bon camín, a les pates ta costándo-yos trabayar, poro cuando aportamos al Ibonet de Lliterola, camentamos que tenemos que facer una paradina y xintar daqué enantes d'afrontar la muria que tenemos enfrente pa enllazar cola bas del Perdiguero.

C

El Perdiguero asómase ante nós con ciertu aire de gran monte dende'l Ibonet de Lliterola

Con dos hores de camín y venti minutinos de descansu, salimos del Ibonet col envís d'algamar el colláu Ubago, onde dexaremos a la nuesa manzorga'l Perdigueret y veremos l'accesu dende'l Ball d'Estós alcontránodose dambes opciones pa entamar l'ascensu a la Tuca d'El Perdiguero pela so fastera más natural, l'arista SE.

Pasamos unos terraceos ya intentamos abelluganos del vientu fríu, pero al salir a l'arista faise imposible y toca ponese a furrular. Llevo tola ruta ensín sentíme bien, l'arista nun tien pérdida, los collacios van al so ritmu y llevo lo xusto de ropa, poro decido xubir corriendo los últimos 250 m de desnivel que correspóndense cola llargúisima arista d'un kilómetru hasta'l cumal del Perdiguero.

Vamos dexando l'Ibonet de Lliterola abaxo demientres entramos en tarrén pedregosu

Sorprendéntemente, el cuerpu, avézase a les condiciones y a los que-y pides nel momentu y soi capaz d'ascender corriendo a más de 3000 metros, aportando al cumal xustu a les 4 hores dende qu'entamáremos a caleyar en Lliterola, teniendo qu'esperar polos collacios pa la semeya de cume achucáu dientru d'un vivac.

 

Cume na Tuca d'El Perdiguero (3219 m)

Toos xuntos, acolumbramos en tola redolada una belleza brutal, el Llac del Portillón col so glaciar ye ablucante, asina como los Ibones Blancos de Lliterola pelos que vamos baxar. Coincidimos na pena, de nun poder tar más tranquilinos y xintar nel cumal, pero ye que nun se para de fríu y más en pantalón curtiu como ye'l mi casu.

 Continuamos el crestéu hacia la Punta Lliterola

 

Decidimos descender hacia'l crestéu de Lliterola, siempre con vistes al Portillón, baxando per tarrén d'enormes bloques de granitu, qu'al igual que tola arista d'ascensu, ye enforma divertíu anque si prolóngase durante munchu tiempu acaba por cansar.

Entreteníu crestéu, tanto por vistes, como xeolóxicamente col cambéu de collores

 

Nesti casu, facémoslu a bon ritmu, con dalgún destrepe entreteníu y cola mesma inercia vamos encumar "de pasu" la Tuca Lliterola de 3109 m, demientres continuamos camín hacia una cota de mayor valir montañeru como ye la Tuca Ròya de Lliterola de 3135 m.

Terminamos cola Punta Lliterola de 3144 m siempre col Llac de Portillón presente

Coles mesmes, tan sólo con siguir la cuerda, camudaremos la roca "Roya" collorada, al gris del granitu del nuesu siguiente y caberu destín, como ye la Punta Lliterola de 3144 m. Equí, sí que terminamos el crestéu ante la mirada cansada de Mario y ponémonos en marcha p'alcontrar un descensu hacia los ibones Blancos lo más "cenciellu posible".

Descendemos hacia los Ibones Blancos de Lliterola

Fadrémoslu a la fin, pero un pequeñu canalizu, enantes d'aportar a la Aguya Lliterola, ya que'l vientu, nun mos facía cómoda la crestiada y dellos pasos aéreos, desdexaron la posibilidá de dir hasta'l Coll Inferior de Lliterola.

 

Poro, baxamos pelo más "pisáu" qu'alcontramos siempre con munchu tientu, ya que tamos nuna pedrera infame y toca andar sollerte de nun resbariar y tirar piedres a los compañeros. A la fín, aportamos al Ibón Blanco, onde restolamos un abellugu y xintamos con calma y con un tastu a gran monte y a gran actividá lo que ficimos, enantes de continuar el descensu hacia Lliterola.

Descendemos del Ibón Blanco al Ibonet pa siguir hacia Lliterola

Col banduyu enllenu, bordiaremos pela mandrecha l'Ibón Blanco, siguiendo una filera de finxos hasta aportar a la boquera de desagüe del ibón, descendiendo siempre a la mandrecha del barrancu hasta l'Ibonet, onde ya tornamos al camín d'ascensu y zarramos esta circular colos casi 5 km de descensu al llau del barrancu Lliterola., que facemos casi corriendo.

Aportamos a la Puente Lliterola, llueu de 9 hores y media de ruta, con casi 17 km de percorríu y +/-1840 m de desnivel acumuláu, que saben munchu meyor si Fernan ta a la espera con una cervecina fría y unos frutos secos, enantes de dir pegar una ducha caliente al camping Aneto.

Camudando'l Camín na Tuca d'El Perdiguèro